I roto i te atikara mua, kua kite tatou e kua taangaanga a Iesu i tona oraanga “i te tutu aere anga i te tuatua meitaki i te basileia o te Atua.” (Luka 8:1) Kua aaere aia e anere ua atu kiro mita i roto i te enua o Iseraela kia apii i te tangata i te Patireia o te Atua. Kua tataia te angaanga orometua a Iesu ki roto i te Evangeria e a, e kua taikuia te Patireia tere atu i te 100 taime. Ko te maataanga o teia au taikuanga, no roto mai i te tuatua a Iesu, tera ra papu tikai e e maata atu tana i tuatua no runga i te Patireia o te Atua!—Ioane 21:25.

Eaa te tumu i puapinga ai te Patireia kia Iesu iaia i te enua nei? Tetai tumu, kua kite a Iesu e kua iki te Atua iaia ei Tutara. (Isaia 9:6; Luka 22:28-30) Inara kare a Iesu i akamou i tona manako ki runga i te mana e te kākā te ka rauka iaia. (Mataio 11:29; Mareko 10:17, 18) Kare aia i akakitekite no runga i te Patireia ei puapinga rai nona. Ko te tumu i puapinga maata ai te Patireia o te Atua kia Iesu i te tuatau i topa e i teianei * koia oki, ta te reira ka rave no tana aronga akaperepere—tona Metua i te rangi e tana au pipi tuatua tika.

Akaperepere maata a Iesu i tona Metua i te rangi. (Maseli 8:30; Ioane 14:31) Umere tikai aia i te au tu manea o tona Metua, mei Tona aroa, Tona tu tangi, e Tona tu tau. (Deuteronomi 32:4; Isaia 49:15; 1 Ioane 4:8) Papu i reira e te makitakita ra a Iesu i te au pikikaa no runga i tona Metua—te au pikikaa e kare te Atua e manako mai ana i te tu taitaia o te tangata e te inangaro ra aia i te tangata kia rokoia e te kino. Ko teia tetai tumu i inangaro maata ai a Iesu i te akakitekite “i te evangelia o te basileia”—kua kite aia e ka akatapu te Patireia i te ingoa o tona Metua. (Mataio 4:23; 6:9, 10) Akapeea ra?

Na roto i te Patireia, ka rave a Iehova i te au tauianga umere te ka riro ei puapinga no te tangata. “Nana e orei i te roi-mata katoatoa” o te aronga tuatua tika. Ka takore katoa aia i te au tumu i aue ei te tangata, te akapapu anga “e e kore rava te mate, e te aue, e te mii; e te mamae oki, e kore katoa ïa.” (Apokalupo 21:3, 4) Na roto i te Patireia, ka takore te Atua i te au tu mamae pouroa o te tangata. *

 Kare tatou e poitirere e kua inangaro maata a Iesu i te akakite i te Patireia ki te tangata! Kua kite aia e ka akaari te reira i te mana ririnui e te tu tangi o tona Metua. (Iakobo 5:11) Kua kite katoa a Iesu e ka puapingaia te aronga tana e akaperepere ra mei te Patireia—te aronga tuatua tika.

I mua roa ake ka aere mai ei a Iesu ki te enua nei, kua noo ana aia e tona Metua i te rangi. Kua taangaanga te Metua i te Tamaiti kia anga i te au mea ravarai, mei te au rangi teitei, te au etu e te au vananga etu, pera katoa to tatou enua manea e te au mea ora e noo ra i reira. (Kolosa 1:15, 16) Tera ra, i te au mea ravarai tana i anga, “tei te tamariki a te tangata nei” to Iesu “mataora anga.”—Maseli 8:31.

Kua akaariia to Iesu aroa no te tangata i roto i tana angaanga orometua. Mei te akamataanga, kua akaari pu tikai aia e i aere mai aia ki te enua nei “ei tutu aere i te evangelia” ki te tangata. (Luka 4:18) Inara kare a Iesu i tuatua ua no te tauturu i te tangata. Mari ra, kua rave aia i te au angaanga tei akaari i tona aroa no te tangata. Ei akaraanga, te uipa anga mai tetai urupu tangata i te akarongo kiaia kua “tangi atura aia ia ratou, akaora iora i to ratou aronga maki.” (Mataio 14:14) Te akaari anga tetai tangata maki repera i te akarongo e ka rauka ia Iesu te rapakau iaia me te inangaro tikai ra te Atu kia rave i te reira, kua akakeuia a Iesu e te aroa. Kua akaora aia i taua tangata ra, e kua akakite kiaia ma te tu tangi e: “Kua tika ïa iaku: kia mā koe.” (Luka 5:12, 13) Te kite anga a Iesu i tona oa ko Maria e aue ra i te mate anga tona tungane ko Lazaro, “ngunguru iora aia i roto iaia,” “taitaia atura,” e kua “aue iorā Iesu.” (Ioane 11:32-36) E oti kua rave aia i tetai temeio—kua akatu akaou a Iesu ia Lazaro mei te mate e a rā!—Ioane 11:38-44.

Tika rai, kua kite a Iesu e ka vai ua te au mea meitaki tana i rave i te enua nei no tetai tuatau poto ua. Kua mārama aia i muri mai e, pouroa te au tangata maki tana i akaora ka maki akaou, e te aronga pouroa tana i akatuakaou, ka mate ratou. Inara kua kite katoa a Iesu e ka takore takiri te Patireia o te Atua i teia au manamanata. Ko teia te tumu i kore ei a Iesu i rave ua i te au temeio, mari ra kua akakite maroiroi katoa aia “i te evangelia o te basileia.” (Mataio 9:35) Kua akaari mai tana au temeio i ta te Patireia o te Atua ka rave i te ao katoa. Akara ana i ta te Pipiria e taputou maira no taua tuatau ra.

•  Kare e maki akaou.

  “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” Pera katoa, “Kare oki to reira e karanga e, Kua maki au.’”—Isaia 33:24; 35:5, 6.

• Kare e mate.

  “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

  “Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”—Isaia 25:8.

• Te aronga i mate ka ora akaou.

  “E akarongo ei te aronga katoa i roto i te rua i tona reo, E kua aere mai ki vao.”—Ioane 5:28, 29.

  “E tuakaouanga to tei mate.”—Angaanga 24:15.

• Ka tu te katoatoa i te are e te ngai angaanga.

  “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. . . . e rekareka tei ikiia e au ra, i te angaanga a to ratou uaorai rima.”—Isaia 65:21, 22.

•  Kare e tamaki akaou.

  “Kua akakore aia i te tamaki e tae rava akenei ki te openga enua.”—Salamo 46:9.

  “Kare tetai enua e tamaki mai ki tetai enua i te koke, kare oki ratou e apii akaou i te tamaki.”—Isaia 2:4.

• Kare e onge.

  “Ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei!”—Salamo 67:6.

  “E manga sitona okotai rima i ki i te enua nei, i runga i te take o te au maunga ra.”—Salamo 72:16.

• Kare e putaua.

  “Kare oki te tangata rikiriki e akangaropoina roaia atu.”—Salamo 9:18.

  “Ko tei putaua ra me kapiki maira, nana ïa e akaora; e tei akaaka ra, e kare ona e tauturu. Ka akaperepere aia i tei apikepike ra e tei putaua, e akaora oki aia i te au vaerua o te aronga ao ra.”—Salamo 72:12, 13.

Me akamanako koe i teia au taputou a te Patireia o te Atua, te kite ra ainei koe i te tumu i puapinga ai te Patireia kia Iesu? Iaia i te enua nei, kua puareinga ua aia i te akakite i te Patireia o te Atua ki tetai ua atu tangata tei inangaro i te akarongo mai, no te mea kua kite aia e ka takore takiri te Patireia i te au manamanata kino ta tatou e kite nei.

Te reka ra ainei koe i te au taputou a te Pipiria no runga i te Patireia? Me koia ia, akapeea koe me apii maata atu no runga i taua Patireia ra? Eaa taau ka rave kia puapingaia mei te au akameitakianga o te reira? I roto i te atikara ka aru mai, ka kite koe i te pauanga ki teia au uianga.