E mirioni ua atu tangata i te ao katoa e irinaki ra no runga i te Patireia o te Atua. Te aru ra ratou i te akaraanga o Iesu, tei apii i tana au pipi kia pure e: “Kia tae toou basileia. Kia akonoia toou anoano i te enua nei.”—Mataio 6:10.

Te mea tangi ra, e maata te tangata e inangaro ra i te kite no runga i te Patireia o te Atua, kare ra te au akonoanga e apii ana no runga i te reira. Kua akakite tetai tangata tata tuatua enua ko H. G. Wells e e mea umere tikai e kua oronga a Iesu i te “turanga puapinga maata roa atu . . . i te apii i te Patireia o te Rangi” tera ra, karanga a Wells e e “iti ua te puapinga o teia . . . i roto i te au apiianga a te au akonoanga Kerititiano.”

I tetai tua, e puapinga tikai te Patireia o te Atua ki te Au Kite o Iehova. Akamanako ana: Kua neneiia ta matou makatini, taau ïa e tatau ra i roto i te 220 reo. Vaitata i te 46 mirioni kopi o te itiu tatakitai tei neneiia, no reira ko teia te makatini e tuʼa maata ia ana takapini i teianei ao. Eaa te tumu manako maata o te karere i roto i teia makatini? Akara ana i te tumu tuatua i te kapi mua: Te Punanga Tiaki Akakiteanga i te Patireia o Iehova.  *

Eaa te tumu i tauta maata ai te Au Kite o Iehova i te akakitekite i te Patireia o te Atua? Tetai tumu, te irinaki nei matou e ko te Patireia o te Atua te tumu manako maata no te puka puapinga roa atu i te ao katoa koia oki, ko te Puka Tapu. Pera katoa, te irinaki nei matou e ko te Patireia o te Atua anake ua te ka akatikatika i te au manamanata o te tangata.

Me akakitekite te Au Kite o Iehova i te Patireia o te Atua, te aru vaitata ra ratou i te akaraanga o Iesu. Iaia i te enua nei, ko te Patireia o te Atua te mea puapinga roa atu i roto i to Iesu oraanga e ko teia te tumu manako maata o tana angaanga orometua. (Luka 4:43) Eaa ra te Patireia i puapinga ai kia Iesu? Eaa ta te reira ka rave noou? Te pati nei matou ia koe kia akara i te au pauanga a te Pipiria i roto i te nga atikara ka aru mai.