Mei taua reva poitini rai, kare a Satani e kiteaia e te mata tangata e e kino pakari tikai aia. Inara kare te Atua e akaruke ia tatou ma te kore e tauturu. Kare koe e anoanoia kia mataku ia Satani me akono meitaki koe i teia au apinga aroa ta te Atua i oronga mai.

Te tikaanga kia iki. Akakite mai a Iakobo 4:7 kia tatou e: “E patoi atu i te diabolo, e nana e rere ke atu.” Noatu to Satani ririnui, kare e rauka iaia kia māro ia tatou i te rave i te au angaanga kare tatou e inangaro i te rave. Naau rai te ikianga. Te na ko ra a 1 Petero 5:9 e, e “patoi atu [i te Tiaporo] ma te akarongo turori kore.” E akamaara, i muri ake i to Iesu patoi anga i te au timataanga a Satani, kua akaruke atu a Satani iaia. (Mataio 4:11) Ka rauka katoa ia koe kia iki i te patoi atu ia Satani.

Te pirianga oa ki te Atua. Te akamaroiroi maira a Iakobo 4:8 ia tatou kia “akavaitata atu ki te Atua.” Te pati maira a Iehova ia koe kia riro ei oa nona. Akapeea koe i te rave anga i teia? Te mataara meitaki roa atu koia oki kia apii no runga iaia i roto i te Pipiria. (Ioane 17:3) Ka riro taau i apii no runga ia Iehova ei tauturu ia koe kia inangaro iaia, e na taua inangaro ra e akakeu ia koe kia rave i tona anoano. (1 Ioane 5:3) Ia koe e akavaitata atura ki toou Metua i te rangi, ka akapeea aia me ariu mai? Te na ko ra a Iakobo e: “[Na te Atua] e akavaitata mai kia kotou.”

Te taputou no te paruruanga. Karanga maira a Maseli 18:10 e: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” Kare te aiteanga e ka riro te ingoa o te Atua mei tetai apinga manamana rai te ka paruru ia tatou. Mari ra, te aiteanga koia oki ka rauka i te aronga e akangateitei ra i te ingoa o te Atua kia pati iaia no te paruruanga i tetai ua atu taime.

Tetai akaraanga Pipiria. Te akakite ra a Angaanga 19:19 i tetai angaanga meitaki ta te au Kerititiano ou i Ephesia i rave: “E manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai: kua tatau  iora i te moni i te oko i taua au buka ra, e kitea iora, e rima ngauru anga te tausani i te moni ario.” * Kua takore taua au Kerititiano i tetai ua atu apinga purepure, noatu te oko maata i te reira. Ka rauka i teia akaraanga te akamaroiroi ia tatou i teia tuatau. Te rave maata atura teia ao i te angaanga manamana e te purepure. Ka rauka i te au temoni i te akakeu i te tangata na roto i te au apinga e te au ravenga purepure. E puapinga tikai kia akakore takiri i taua au apinga ra mei roto i toou oraanga, noatu e eaa te oko maata i te reira.​—Deuteronomi 18:10-12.

Ko Rogelio, tei taikuia i te akamataanga o teia au atikara, kare aia i irinaki ana e te vai ua ra te Tiaporo no te 50 mataiti. Inara kua taui aia i tona manako. Eaa te tumu? “No te taime mua i toku oraanga, kua rauka iaku tetai Pipiria,” i tuatua ai a Rogelio. “Na te kite o te au Tuatua Tapu i akapapu kiaku e te vai ua ra te Tiaporo. E na taua kite ra e paruru ana iaku i teianei mei tana akakeuanga.”

Ka inangaro ainei koe kia kite i te tuatau e takore takiriia ai a Satani? Ka tupu te reira. Te totou maira te Tuatua Tapu i tetai tuatau ki mua me tiria te Tiaporo, tei akavare i te tangata “ki roto i te roto ai e te teio.” (Apokalupo 20:10) Tika rai, kare tetai vaerua ora kitea koreia e kā i roto i tetai roto ai. No reira te akatutu maira te roto ai i te takore takiriia anga. Ae, ka takoreia a Satani e tuatau ua atu. E tuatau mataora tikai teia no te aronga e inangaro ra i te Atua!

I teianei ra, e tauta ua atu i te apii no runga ia Iehova e tona aerenga. * Akamanako ana e mei teaa te tu a te tuatau ki mua me karanga tatou e, “Kua takore takiriia a Satani!”