Cameron: Meitaki i te aravei akaou ia koe e Jon. E mataora ua ana au i ta taua apii Pipiria i te au epetoma. * Peea ua koe?

Jon: Meitaki ua.

Cameron: Mataora au i te kite e te meitaki ua ra koe. I to taua aravei anga openga, kua akara taua e eaa ra te Au Kite o Iehova i karanga ai e kua tutara te Patireia o te Atua i te mataiti 1914. * Mei ta taua i uriuri mai ana, ka kite taua i tetai akapapuanga puapinga i roto i te totou a Daniela pene 4. Maara ainei ia koe tera?

Jon: Ae, ko te moemoea a te Ariki ko Nebukanesa no tetai pu rakau maatamaata.

Cameron: Ae, ko te reira. I roto i tana moemoea kua kite a Nebukanesa i tetai āka pu rakau tei taeria ki te rangi. E kua akarongo aia i tetai angera a te Atua i te akaue anga e kia tipuia te pu rakau, tera ra kia vaooia te tumu e te aka ki roto i te one. “Kia itu ua atu tuatau,” ka tupu akaou te pu rakau. * Kua kite katoa taua e e rua tupuanga o teia totou. Maara ainei ia koe te tupuanga mua?

Jon: Kua tupu tetai apinga kia Nebukanesa, me kare ainei? Kua nenevaia aia no tetai itu mataiti.

Cameron: Tano tikai taau. Kua nenevaia a Nebukanesa no tetai tuatau poto ua, e kua tamanamanataia tana tutaraanga. Inara i roto i te tupuanga maata, ka tamanamanataia te tutaraanga a te Atua i te enua nei no tetai itu tuatau. Mei ta taua i kite mai, kua akamata te itu tuatau i te takoreia anga a Ierusalema i te mataiti 607 M.T.N. Mei tera tuatau mai, kare e ariki i te enua nei e komono ra i te Atua ko Iehova i te tutara i rungao i tona iti tangata. Inara, i te openga o te itu tuatau, ka akataoonga te Atua i tetai Tutara ou i rungao i tona iti tangata—tetai tutara i te rangi. Te aiteanga, i te openga o te itu tuatau, ka tutara te Patireia o te Atua i te rangi. No reira, kua kite taua e eaa te mataiti i akamata ai te itu tuatau. Me kite taua eaa te roa o te reira tuatau, ka kite i reira taua e inaea te Patireia o te Atua i tutara ai. Te mārama ra koe i teia?

Jon: Ae, kua tauturu teia iaku kia akamaara i te reira.

Cameron: Mako. Ka akamata taua na te uriuri anga i te roa o te itu tuatau. Koi oti ua ake au i te tatau i te tumu manako ei akamaara kiaku i te au manako puapinga. Ka tamata ana au i te akamārama i te reira.

Jon: Ok ra.

Cameron: I roto i te tupuanga mua o te totou no runga ia Nebukanesa, i te akara anga ko te itu tuatau e itu mataiti. Inara i roto i te tupuanga maata atu no runga i te Patireia o te Atua, e roa atu te itu tuatau i te itu mataiti.

Jon: Eaa koe i tuatua akapera ai?

Cameron: Tetai tumu, akamaara ana e kua akamata te itu tuatau i te takoreia anga a Ierusalema i te mataiti 607 M.T.N. Me tare taua mei taua mataiti ra, ka tae te itu mataiti ki te mataiti 600 M.T.N. Tera ra kare e apinga i tupu i tera mataiti ki te tutaraanga a te Atua. Pera katoa, mei ta taua i uriuri i mua ana, i te au anere mataiti i muri mai ia Iesu i te enua nei, kua akakite aia e kare te itu tuatau i ope ake.

Jon: Ae. Te maara nei iaku.

Cameron: No reira, kare te itu tuatau i te au mataiti tataki tai mari ra e tuatau roa atu ïa.

Jon: Eaa te roa?

Cameron: I roto i te puka o Apokalupo tei piri vaitata atu ki te puka o Daniela, ka tauturu teia ia taua kia kite e eaa te roa o te itu tuatau. Te akaari maira te reira e ko te roa anga o te toru e te apa tuatau, e 1,260 ïa rā. * No reira, ko te itu tuatau​—me taki ruaia te toru e te āpa tuatau—​e 2,520 rā te katoaanga. Te mārama ra koe?

Jon: Ae. Tera ra, kare au e kite ana e i akapeea teia i te akaari anga e kua tutara te Patireia o te Atua i te mataiti 1914.

Cameron: Ka akara ana taua me e tika rai teia. I tetai taime i roto i te totou Pipiria, te akatutu maira te okotai rā i te mataiti okotai. * Me aru taua i te akanooanga no te okotai rā i te mataiti okotai, aiteite te itu tuatau ki te 2,520 mataiti. Me tare taua i te 2,520 mataiti akamata mei te mataiti 607 M.T.N., ka tae taua ki te mataiti 1914. * Ko teia te ravenga i rauka ai ia matou te mataiti 1914, te openga o te itu tuatau, koia oki te akamata anga a Iesu i te tutara ei Ariki no te Patireia o te Atua. Pera katoa, mei te mataiti 1914 mai, kua tupu te au mea tuke akerai i te enua nei—e tupuanga tei totouia e te Pipiria no te tuatau openga.

Jon: Eaa te reira?

Cameron: Akara ana i ta Iesu i tuatua i roto ia Mataio 24:7. No runga i te tuatau e tutara ra aia i te rangi, kua akakite a Iesu e: “E tu mai tetai enua e tamaki mai ki tetai enua, e tetai basileia e tamaki mai ki tetai basileia: e onge oki, e te maki-mate, e ngaruerue te enua i tera ngai, i tera ngai.” Kua totou a Iesu i te onge e te ngaruerue enua i taua tuatau ra. Kua kite katoa te ao nei i taua au tupuanga kino ra i te anere mataiti i topa, me kare ainei?

Jon: Ae, no teaa.

Cameron: I roto i teia irava, kua totou katoa a Iesu i te tamaki i tona aerenga mai ei Ariki no te Patireia o te Atua. E kua totou te puka o Apokalupo e kare teia tamaki e no te au enua tataki tai, ka tupu ra i te ao katoa nei i te tuatau openga. * Kua kite ainei koe e inaea te tamaki mua o te ao nei i tupu ei?

Jon: Ae, i te mataiti 1914, te mataiti tikai i tutara ai a Iesu! Kare roa au i kite ana i tena.

 Cameron: Me kapitipitiia teia au tumu manako​—te totou no te itu tuatau e te au totou Pipiria no te tuatau openga—​ka mārama meitakiia te reira. Kua papu i te Au Kite o Iehova e ka tutara a Iesu ei Ariki no te Patireia o te Atua i te mataiti 1914 e i taua mataiti ra kua akamata te tuatau openga. *

Jon: Kare au e mārama meitaki ana i teia au mea pouroa.

Cameron: Kare e manamanata. Mei taku i akakite atu, kua roa rai i rauka ai iaku kia mārama pu tikai i teia. Tera ra te mea puapinga, te irinaki nei au e ka tauturu ta taua uriurianga ia koe kia mārama e, noatu e kare te mataiti 1914 i taikuia i roto i te Pipiria, kua akatumu te Au Kite o Iehova i to ratou irinakianga ki runga i te au Tuatua Tapu.

Jon: Ae, taku mea umere ia koe​—noatu e eaa taau ka tuatua, e turu ua ana koe i te reira ki tetai irava. Kare e noou ua rai tena manako. Inara i toku manako, eaa ra teia i riro ei ei mea ngata kia māramaia. Eaa te Atua i kore ei e akakite mai kia tatou i roto i te Pipiria e ka tutara mai a Iesu no runga mai i te rangi i te mataiti 1914?

Cameron: E uianga meitaki tikai tena e Jon. E maata te au mea kare i akakiteia mai kia tatou i roto i te au Tuatua Tapu. No reira eaa te tumu i tata ai te Atua i te Pipiria i roto i te tu ka anoanoia ai tatou kia tauta i te mārama i te reira? Penei ta taua teia ka uriuri me oki mai au.

Jon: Ka inangaro au i tena.