I tetai taime, te tuatua ra teia no runga i tetai tangata tei tataʼaia. I te tuatau Pipiria, me opuia me kore me akatuikaaia tetai au tane, ka akautungaia ratou na te tataʼaia anga. Tetai au tane irinakiia tei tataʼaia, kua tiaki ratou i te kainga o te au vaine i roto i te are ariki. Ei akaraanga, ko te nga eunuka ko Hegai e Sasagaza, kua tavini raua ei nga tiaki no te au vaine a te Ariki ko Ahasueru o Peresia, tei manakoia e ko Xerxes I.​—Esetera 2:3, 14

Inara, kare te au eunuka pouroa tei taikuia i roto i te Pipiria i tataʼaia. Karanga tetai aronga apii e kua taangaanga katoaia te tuatua eunuka no te aronga tei ikiia kia rave i te angaanga i roto i te are ariki. I te akara anga, ka tau teia tuatua kia Ebede-meleka, te oa o Ieremia, pera katoa te eunuka Etiopia ta te tangata tutu evangeria ko Philipa i tuatua atu. E taoonga ngateitei to Ebede-meleka no te mea kua rauka iaia i te aere ki mua i te aroaro o te Ariki ko Zedekia. (Ieremia 38:7, 8) E kua akatakaia mai te eunuka Etiopia ei tangata mana i roto i te ngutuare o te ariki vaine e kua “aere maira aia ki Ierusalema e akamori i te Atua.”​—Angaanga 8:27.

Ei akataka i te akavaanga o te tuatau ki mua, kua tuatua a Iesu e: “E kia tae maira te Tamaiti a te tangata ma tona kakā, . . . nana e akataka ia ratou, mei te tiaki mamoe e akataka i te mamoe e te puaka-nio.” (Mataio 25:31, 32) Eaa ra te au tiaki mamoe i akatakake ei i teia au manu?

Te mea matauia, e tukuia ana te mamoe e te puakanio kia kaikai kapiti. I te po, e akaputuputuia ana ratou ki roto i te aua kia paruruia mei te manu taetaevao, te aronga keikeia e te reva anu. (Genese 30:32, 33; 31:38-40) E akatakakeia ana teia nga manu na te tuku anga ia ratou i roto i te au aua tukeke. Ka paruru teia i te au mamoe, te au tinana e te au punua mamoe tikai, mei te kino ta te au puakanio maitiiti ka akatupu. E akatakake katoa ana te tiaki mamoe i te puakanio mei te mamoe i te tuatau “anauanga, pātē u anga, e te pakoti anga i te uru mamoe,” i karanga ai te puka All Things in the Bible. Te akaari maira te akatutuanga a Iesu i te au ravenga matauia e tupu ra ki te aronga tiaki manu mei te au tangata o Iseraela i taito rai.