Eric: Kite koe eaa? Kare au e aere akaou ana ki te pure, no reira kare au e manako ana e ka maata ta taua ka tuatua.

Brian: Meitaki no te akakite mai i toou manako. Ko Brian toku ingoa, koai toou?

Eric: Ko Eric.

Brian: Mataora au i te aravei ia koe e Eric.

Eric: E au rai.

Brian: I aere ana toou ngutuare tangata ki te pure i toou tamariki anga?

Eric: Ae. Inara te aere anga au ki te apii tua rua, kare au e oki akaou ana ki te pure.

Brian: Ā! Eaa taau i apii i ko i te apii tua rua?

Eric: Te apii no runga i te pirianga i rotopu i te au iti tangata e te tuatua enua. E reka ana au i te apii tuatua enua​—te oraanga tangata i runga nei i te enua.

Brian: Tika rai, e reka te apii tuatua enua. Penei kua kite koe e e puka tuatua enua te Pipiria. I akara ana koe ki roto i te Pipiria i te rave anga i taau apii?

Eric: Kare. Kua kite au e e puka meitaki te reira, tera ra kare au i manako ana e e puka tuatua enua te Pipiria.

Brian: Te akara anga e tangata manako maoraora koe. Me e taime toou, ka inangaro au i te akaari atu i tetai au akaraanga tuatua enua tika tikai i roto i te Pipiria.

Eric: No teaa, tera ra kare aku Puka Tapu.

Brian: Kare e manamanata, ka akara taua i taku. Te akaraanga mua tei roto ia 1 Paraleipomeno pene 29, irava 26 e te 27. Te na ko ra e: “Pera atura te tamaiti a Iese rā Davida i te ariki anga i runga ia Iseraela katoa. E te au rā i ariki ei aia ki runga i Iseraela, e rua takau ïa mataiti; e itu ona mataiti i te ariki anga i Heberona, e toru ngauru ma toru i te ariki anga i Ierusalema.”

Eric: Eaa koe i karanga ai e e tuatua enua tika tikai tena?

Brian: Kua karanga te aronga akaapa e kare roa e Ariki ko Davida i ora ana.

Eric: Eaa e koe? Eaa ratou i kore ei e irinaki iaia?

Brian: Kare e maata ana te tataanga i vao ake i te Pipiria i te akapapu e e tangata tika tikai aia. Inara, i te mataiti 1993, kua kitea mai e tetai pupu kimi apinga taito tetai toka tei tataia e “Te Are o Davida.”

Eric: Reka tikai au i te kite i tena.

Brian: Tetai atu tangata i roto i te Pipiria tei manakoia e kare aia i ora ana, ko Ponotio Pilato, e kavana i te tuatau o Iesu. Kua taikuia aia i roto ia Luka pene 3, irava 1​—pera katoa e maata te au tutara kavamani i taua tuatau ra.

Eric: Ae. Te karanga ra e “ko Ponotio Pilato te tutara i Iudea, e ko Heroda te teterareka i Galilea.”

Brian: Meitaki maata. Kua roa te tuatau te  manako ekoko anga tetai aronga kite e me e tangata tika tikai a Ponotio Pilato. Inara, mei te 50 mataiti i topa, kua kitea tetai toka i tera enua i te Middle East kua taraiia taua ingoa ra ki runga.

Eric: Mmm. Kare au i akarongo ana i tena.

Brian: Mataora au i te akaari atu i te reira kia koe.

Eric: Kite koe, e akangateitei ua ana au i te Pipiria e penei e tuatua enua tika tikai to roto i reira, inara kare roa au i manako ana e ka tau te reira no to tatou tuatau.

Brian: E maata te tangata e manako akapera ana. Inara e tuke rai toku manako. Teia te tumu: Kare roa te au anoano o te tangata i taui ana mei muatangana mai. Ei akaraanga, te anoano nei rai tatou i te kai, te kakau, e te are. E anoano ua ana tatou i te tuatua atu tetai ki tetai e kia mataora te ngutuare tangata. Kare ainei e te inangaro nei rai tatou i teia au apinga?

Eric: No teaa.

Brian: Ka rauka i te Pipiria i te tauturu ia tatou i roto i teia au tuanga o te oraanga. No reira taua i tuatua ai e e puka taito te Pipiria tei tau no teia tuatau.

Eric: Eaa te aiteanga i tera?

Brian: Mei teia te tu: Kua kī te Pipiria i te au kaveinga tau tikai no to tatou tuatau mei te taime mai rai i tataia ai te reira e anere ua atu mataiti i topa.

Eric: Penei e tika taau. Tera ra, i roto i teea au tuanga?

Brian: Me akara taua i te turanga o te moni, te ngutuare tangata mataora me kore te oa meitaki, ka rauka i te au kaveinga Pipiria i te arataki ia taua. Kua aite rai teia puka ki te arataa e taki atura ki te turanga puapinga. Ei akaraanga, ka akatika ainei koe e e ngata kia riro mai ei tane e ei upoko meitaki no te ngutuare tangata i teia tuatau?

Eric: Ae, ka akatika au i taau. Kua akaipoipo maua ko taku vaine no te mataiti okotai, e i tetai taime kare maua e akatika ana i to tetai e tetai manako.

Brian: Tano taau. Inara tei roto i te Pipiria te au kaveinga māmā ua i te aru. Ei akaraanga, ka akara taua ia Ephesia pene 5. Ka tatau taua i te irava 22, 23, e te 28. Penei naau e tatau mai no taua.

Eric: Te na ko ra e: “E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra. Ko te tane oki te upoko o te vaine, mei te Mesia katoa ra te upoko ïa i te ekalesia; ko te ora oki aia no taua kopapa nona nei.” Te karanga ra te irava 28 e: “E aroa katoa te au tane i ta ratou uaorai au vaine e tikaʼi, mei to ratou uaorai kopapa; ko tei aroa i tana uaorai vaine, kua aroa aia iaia uaorai.”

Brian: Meitaki maata. Kare ainei i te tika e me taangaanga te nga tokorua i teia akoanga, ka meitaki atu te oraanga ngutuare tangata?

Eric: Ae. Inara māmā ua te tuatua, ngata i te rave anga.

Brian: Tika rai; kare e tangata apa kore. I roto i taua pene rai o te Pipiria e irava tetai e akamaroiroi maira ia tatou kia manako meitaki. * No tetai ua atu pirianga kia puapingaia, ka anoanoia te tu akono tau e kia āriki i te manako o etai ke. Kua kite mai maua ko taku vaine e ka tauturu te Pipiria ia maua kia akaketaketa i to maua pirianga.

Eric: Manako meitaki tikai toou.

Brian: E Web site ta te Au Kite o Iehova te ka oronga mai i te manako tauturu no runga i te akaipoipo e te oraanga o te ngutuare tangata. Me e taime toou, ka akaari atu au i tetai akaraanga.

Eric: Ae. Ka inangaro au i te akara atu.

Brian: Meitaki. Te atereti no teia Web site, ko te www.pr418.com. Teia te kapi mua.

Eric: Manea tikai te au tutu.

Brian: E au tutu tena no ta matou angaanga orometua e raveia ra i roto i te ao katoa. Teia. E tuanga  teia i konei, te ingoa “Au Puka.” Raro ake i teia tumu tuatua, e tuanga tetai no te “Au Puka e te au Poroutia.” I roto i te poroutia “Nuti Meitaki no ko i te Atua!” e maata te au apii potopoto e pau ra i te au uianga tukeke. Ka inangaro ainei koe i te iki i tetai?

Eric: Ae. “Akapeea Toou Pamiri e Mataora Ai?” Ka inangaro au kia kite i teia!

Brian: E rima tumu manako i roto i teia apii te ka tauturu i toou ngutuare tangata kia mataora. Akara i teia parakarapa. Tatau mai koe ine e Eric?

Eric: Ae. Te karanga ra e: “Kia inangaro e kia akangateitei te au tane e te au vaine i tetai e tetai. No te mea e tu apa to te au tane e te au vaine, ko te taviri e mataora ai te akaipoipo, kia akakore raua i te ara a tetai e tetai.” Mmm, reka au i tena akamāramaanga.

Brian: Meitaki no te tatau. E irava teia i konei. Teia taku Pipiria, ka inangaro ainei koe i te tatau i teia irava no taua?

Eric: Ae, Ephesia 5:33. Te na ko ra e: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.”

Brian: Te akamou ra teia irava i te manako ki runga i te oronga anga i ta tetai atu e tapapa ra kia rauka mai?

Eric: Kare i papu iaku te aiteanga o tena.

Brian: Kare ainei i te tika e ka inangaro te tane kia akangateiteiia aia e tana vaine e i tetai tua, ka inangaro te vaine kia akapapuia e te inangaro maira tana tane iaia?

Eric: Ae. Toku manako rai ïa.

Brian: Me kimi te tane i te au ravenga kia akaari i tona inangaro no tana vaine, kare ainei e ka māmā ua i te vaine kia akangateitei i tana tane?

Eric: No teaa.

Brian: No reira i roto i teia irava tei tataia mei te 2,000 mataiti i topa, ka tauturu i te nga tokorua i roto i to raua oraanga akaipoipo e ka oronga mai i te ako te ka puapinga me akonoia.

Eric: Ka akatika rai au e e maata atu ta te Pipiria e oronga maira.

Brian: Meitaki e Eric. Ka inangaro au i te oki akaou mai kia kite i toou manako no runga i te uianga ka aru mai, “Ka akaruke ainei koe i tetai akaipoipo kare e mataora ana?” *

Eric: Ae. Ka akara maua ko taku vaine i te reira.