Kua kiteaia te Au Kite o Iehova no ta ratou angaanga tutuanga. Inara, kua kite ainei koe e te apii katoa ra ratou i te Pipiria ki te tangata i te ao katoa?

I te mataiti 2014, tere atu i te 8,000,000 Au Kite o Iehova i roto i te 240 enua tei apii i te Pipiria, vaitata i te 9,500,000 tangata i te marama okotai. * Ae, ko te numero o te tangata tei apii i te Pipiria ma te Au Kite o Iehova, e maata atu ïa i te numero o te tangata i roto i tetai 140 enua!

Ei rave i teia angaanga apii i te ao katoa, e nenei ana te Au Kite o Iehova vaitata ki te tai e te āpa pirioni Pipiria, au puka, au makatini, e te au puka apii Pipiria i te au mataiti​—e i roto i tetai 700 reo! Na teia angaanga neneianga i tauturu i te tangata kia apii i te Pipiria i roto i to ratou uaorai reo.

Akapeea te apii Pipiria me raveia?

Ka uriuriia te au tumu manako tukeke o te Pipiria e ka tatau i te au irava i roto i te Pipiria tei turuturu i tera au tumu manako. Ei akaraanga, te pau ra te Pipiria i teia au uianga: Koai te Atua? Mei teaa rai tona tu? Koai tona ingoa? E noo ana aia kiea? Ka rauka ainei ia tatou i te akavaitata atu kiaia? Inara i tetai au taime e ngata i te kimi i te au irava i roto i te Pipiria ei pau i teia au uianga.

Ei tauturu i te tangata kia kimi i te au pauanga, e apii ana matou i tetai puka e 224 kapi, Eaa Tikai ta te Pipiria e Apii Maira? * Kua maaniia teia puka kia tauturu i te tangata kia mārama i te au apiianga puapinga o te Pipiria. I roto i teia puka, ka uriuriia te au tumu manako no runga i te Atua, Iesu Mesia, te tumu i tupu ei te kino ki te tangata, te tuakaouanga, te pure, e te vai atura.

 Eaa te ora e te ngai ka raveia taau apii?

I te ora e te ngai tei tau kia koe.

Eia ora ka pou me rave i taau apii?

Maata te tangata tei akapae e tai rai ora i te au epetoma kia apii i te Pipiria. Noatu ra, ka rauka i te taui i te ora no te apii, kia tau kia koe. E apii ana tetai pae e 10 me kore e 15 miniti i te au epetoma.

Ka anoanoia ainei i te tutaki?

Kare e tutaki me rave i te apii e kare te au puka e okoia. Te tau ra teia ki ta Iesu i akakite ki tana au pipi e: “E mea o mai ua to kotou, e oronga ua atu oki kotou.”​—Mataio 10:8.

Eaa te roa ka raveia te apii?

Te roa o te apii, tei runga ua ia koe. I roto i te puka Eaa Tikai ta te Pipiria e Apii Maira? e 19 tumu tuatua. Ka rauka ia koe i te apii i te katoaanga me kore i tetai o teia au tumu tuatua, e kare koe e rapurapu me apii.

Ka anoanoia ainei au kia riro mai ei Kite no Iehova?

Kare. Kua kite matou e e tikaanga to te katoatoa kia iki i ta ratou uaorai irinakianga, e ka akangateitei matou i ta ratou ikianga. Te aronga tei apii i te au apiianga puapinga o te Pipiria, ka tauturu ia ratou kia rave i ta ratou ikianga.

 Ka kimi au i te au akakiteanga ke mai kiea?

Te oronga maira te Web site jw.org i te au akakiteanga taka meitaki no te au irinakianga e te au angaanga a te Au Kite o Iehova.

Ka akapeea au me pati kia apii i te Pipiria?

• Akaki i te patianga i runga i te Web site www.pr418.com.

•  

• Aravei atu i te Au Kite o Iehova vaitata mai kia koe. Ka kitea ia koe te ingoa “Au Kite o Iehova” i roto i taau puka numero tereponi.