Kua akataka te Encyclopædia Britannica i te Easter ei “tuatau no te akonoanga Kerititiano i te akamaara i te Tuakaouanga o Iesu Mesia.” Tera ra, e akaepaepaanga ainei teia no te au Kerititiano?

Kia akanoo i te tikaanga o tetai apinga taito, ka tau kia akara matatio i te reira. Mei te reira katoa, e rauka ai ia tatou i te kite e me ka anoanoia te au Kerititiano kia akono i te Easter, e mea tau kia akara meitaki no runga i te Easter.

Te mea mua, kua pati a Iesu i tana au pipi kia akamaara i tona matenga, kare i tona tuakaouanga. Kua kapiki te apotetoro ko Paulo i teia e ko ‘te kaikai a te Atu.’​—1 Korinetia 11:20; Luka 22:19, 20

Tetai katoa, kua karanga te Britannica e “kare e rotai ana” te peu a te Easter ki to Iesu tuakaouanga, “tera ra e peu teia na te tangata.” Ei akaraanga, no runga i te uamoa e te rapiti, kua karanga te Encyclopedia of Religion e: “Te akatutu maira te uamoa i te oraanga ou e ngaangaa ra mei roto mai i te anga.” Karanga katoa e: “E manu tuke akerai te rapiti, e te akatutu maira te reira i te tuatau tupuanga rau e vaitata mai nei.”

Kua akamārama mai tetai tangata kite ko Philippe Walter e akapeea te akaepaepaanga Easter i riro mai ei peu matau. Kua tata aia no runga i “te riro mai anga te au akonoanga pikikaa ei au Kerititiano.” Kua karanga aia e ko te akaepaepaanga pikikaa no te akono i “te roa anga mei te tuatau anu tikai ki te tuatau tupuanga rau,” e māmā ua i te akapiri atu i teia peu ki to Iesu tuakaouanga. Kua tata a Walter e kua tauturu teia i te au akonoanga pikikaa kia āriki i te “au akamaaraanga Kerititiano.” Kua riro katoa teia ei mea māmā ua no te maataanga o te tangata kia taui i ta ratou akonoanga.

Kare teia tu i tupu i te tuatau e ora ra te au apotetoro, no te mea kua riro ratou ei arai no te au peu pikikaa. (2 Tesalonia 2:7) Kua akamatakite te apotetoro ko Paulo e i tona aere “ke atu” anga, “ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.” (Anga. 20:29, 30) E i te openga o te anere mataiti mua, kua tata te apotetoro ko Ioane e te tauta ra tetai aronga i te akavare i te au Kerititiano. (1 Ioane 2:18, 26) Ko te tumu teia e maata te au akonoanga tei aru i te au peu pikikaa.

Inara, penei ka manako tetai aronga e kare i te mea tarevake me akono i te peu Easter​—te karanga anga e kua riro te reira ei akatakaanga meitaki no te au akonoanga “pikikaa” no runga i to Iesu tuakaouanga. Tera ra, kare roa a Paulo i āriki mai ana i taua manako. Noatu e maata te au peu pikikaa tana i kite i tona tere i Roma, kare aia i apii mai i taua au peu kia mārama meitaki te tangata no runga ia Iesu. E mea tuke tana i rave, kua akamatakite aia i te au Kerititiano e: “Auraka kotou e kapitiia ma te tau kore i te aronga akarongo kore ra: eaa to te tuatua-tika tau anga i te tuatua-tika kore? e eaa to te mārama tau anga i te poiri? E teianei, te na ko mairā Iehova, ‘E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii.’”​—2 Korinetia 6:14, 17

Eaa te manako puapinga tei rauka mai mei teia kimikimianga poto ua no runga i te peu Easter? Taka ua ra e kare te akaepaepaanga Easter i te mea tau no te au Kerititiano.