I ui ana ainei koe i teia au uianga kia koe uaorai? Me koia ïa, kare ko koe anake ua tei manako akapera. Takapini i teianei ao, te ui nei te tangata i te au uianga puapinga o te oraanga. Ka kitea ainei ia koe te au pauanga?

E mirioni ua atu tangata tei karanga e, “Ae!” Eaa te tumu? No te mea kua kite mai ratou i te au pauanga taka meitaki ki ta ratou au uianga mei roto mai i te Pipiria. Ka inangaro ainei koe i te kite i ta te Pipiria e akakite maira? Me koia ïa, ka rauka ia koe i te pati i tetai apii Pipiria ma te Au Kite o Iehova, kare e tutaki. *

E tika, penei ka karanga tetai pae no runga i te apii anga i te Pipiria e: “Kare oku taime.” “E ngata roa i te mārama i te Pipiria.” “Kare au i papa ake kia akamata i te apii i te Pipiria.” Inara e tuke te manako o tetai pae. Ka inangaro ratou i te kite i ta te Pipiria e apii maira. Akamanako ana i teia au akaraanga:

• “Kua aere ana au ki te akonoanga Katorika e te Porotetani, te iero Sikh, e tetai ngai akamorianga Buda, e kua apii au no runga i te au akonoanga i ko i te apii teitei. Noatu ra, kare taku au uianga no runga i te Atua i pauia mai. I reira, kua topapa tetai Kite no Iehova i toku ngutupa. Kua umere au i tana akamārama anga i te au pauanga mei roto i te Pipiria, e kua āriki au i tetai apii Pipiria.”​—Gill, Peritane.

• “E maata taku au uianga no runga i te oraanga, inara kare au e reka ana i te au pauanga a te orometua. Inara, kua pau tetai Kite no Iehova i taku au uianga mei roto i te Pipiria. Te pati anga aia iaku me ka inangaro au kia kite maata atu, kua āriki rai au.”​—Koffi, Benin.

• “Kua inangaro au i te kite e eaa te turanga o tei mate. I mua ana, kua irinaki au e ka rauka i tei mate i te takinokino i te aronga e ora ra, inara kua inangaro au i te kite e eaa ta te Pipiria e akakite maira. No reira, kua akamata au i te apii i te Pipiria ma toku oa, e Kite aia no Iehova.”​—José, Brazil.

• “Kua tatau au i te Pipiria inara kare au i mārama ana i taku i tatau. E oti, kua aravei au i te Au Kite o Iehova e kua akamārama mai ratou i te au totou i roto i te Pipiria. Kua inangaro au i te kite e eaa atu taku ka rauka i te apii mai.”​—Dennize, Mexico.

• “Kua inangaro au i te kite e me te manako tikai maira te Atua iaku. No reira, kua pure au ki te Atua o te Pipiria. I tera mai rā, kua topapa te Au Kite i toku ngutupa, e kua āriki au kia apii i te Pipiria.”​—Anju, Nepal.

Te akamaara maira teia au akaraanga i ta Iesu i tuatua e: “E ao to tei pongi, e tei kaki i te tuatua-tika: e akakiia ratou.” (Matthew 5:6) Ae, kua angaia tatou ma te anoano kia kite no runga i te Atua. Ko te Atua anake tei rauka i te akono i taua anoano ra na roto i tana Tuatua, te Pipiria.

No reira, eaa te raveia ana me apii koe i te Pipiria? Akapeea koe e puapingaia ai mei te reira? Ka pauia teia nga uianga i roto i te atikara ka aru mai.