E mea matauia no te au tangata kia inangaro i te akatupu i te au, te tu tika, e te tu takinga meitaki. Eaa i reira tatou i kite ua ai i te tā tangata, te tu tika kore, e te tu kino tikai? E mea matauia i te kite i te au nuti kino tikai. E apinga ainei tetai e akakeu ra i te tangata kia rave i te kino?​—E tatau ia 1 Ioane 5:19.

Kua anga ainei te Atua i te tangata kia inangaro i te rave i te kino? Kare, kua anga te Atua i te tangata i tona uaorai tu, ma te inangaro kia aru i to te Atua tu aroa. (Genese 1:27; Iobu 34:10) Inara kua oronga katoa te Atua i te tikaanga ki te tangata kia rave i ta ratou uaorai ikianga. Te iki anga to tatou nga metua mua i te rave i te kino, kare raua i aru i te akaraanga o te Atua e kua riro mai ei nga tangata apa ua. Kua iri mai i reira to raua tu ara ki runga ia tatou.​—E tatau ia Deuteronomi 32:4, 5.

Te inangaro maira te Atua ia tatou kia kopae i to tatou au tu kino. (Maseli 27:11) No reira aia i apii mai ei ia tatou akapeea me kopae i te rave i te tarevake e kia rauka mai te mataora mou. Inara i teianei, kare e rauka ia tatou i te aru vaitata i to te Atua tu aroa apa kore.​—E tatau ia Salamo 32:8.

Noatu e te kino ua atura teianei ao, te akatika ra te Atua i te kino kia tupu no tetai tuatau poto ua kia kite te katoatoa i te ka tupu mai no te reira. (2 Petero 3:7-9) Tera ra, kare e roa atu ana ka ki te enua i te aronga mataora tei akarongo ki te Atua.​—E tatau ia Salamo 37:9-11.