Akapeea ta Iehova Arataki Anga i Tana Akaaerenga?
Pene Tai Ngauru Ma A
Akapeea ta Iehova Arataki Anga i Tana Akaaerenga?
1. Eaa te akakite anga no te akaaerenga a Iehova ta te Pipiria e akakite maira, e eaa ra te reira i puapingai kia tatou?
E AKAAERENGA ainei ta te Atua? Te akakite maira te au Tuatua Tapu akauruia kia tatou e akaaerenga tana. I roto i tana Tuatua, kua oronga mai aia i etai akaraanga poto ua kia tatou i te tuanga umere i te rangi no taua akaaerenga ra. (Ezekiela 1:1, 4-14; Daniela 7:9, 10, 13, 14) Noatu rai kare tatou e kite i teia tuanga akara koreia, e akatupu anga maata ta te reira i te aronga akamori mou i teia tuatau. (2 Ariki 6:15-17) E tuanga akaraia oki to te akaaerenga a Iehova, i te enua nei. Te tauturu ra te Pipiria ia tatou kia kite eaa te reira e akapeea oki ta Iehova ra arataki anga i te reira.
Akatakaanga i te Tuanga Akaraia
2. Eaa te putuputuanga ou ta te Atua i apai mai?
2 No te 1,545 mataiti ko te iti tangata o Iseraela te putuputuanga a te Atua. (Angaanga 7:38) Inara kare to Iseraela i mou i te au ture a te Atua e kua kopae ke oki i tana uaorai Tamaiti. Ei tupu anga, kua kopae atura Iehova i taua putuputuanga ra e kua akaruke atu. Kua tuatua atura Iesu ki te au ngati Iuda: “I na, kua vaio taneia to kotou nei are.” (Mataio 23:38) Kua apai mai te Atua i reira i tetai putuputuanga ou, tana i papau ra i tetai koreromotu ou. Ko teianei putuputuanga e 144,000 aronga tataki tai tei ikiia e te Atua kia taokotaiia atu ki tana Tamaiti i te rangi.—Apokalupo 14:1-4.
3. Eaa tei tupu ia Penetekote 33 T.N. ei akakite anga papu e te taangaanga nei te Atua i tetai putuputuanga ou?
3 Te aronga mua o taua putuputuanga ou ra kua akatainuia i te vaerua tapu o Iehova ia Penetekote 33 T.N. No runga i taua tupuanga maata ra, ka tatau tatou: ‘E tae rava atura ki te rā Penetekose, kua taki ruru marie akera ratou katoa i te ngai okotai ma te inangaro okotai. E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra. E kua mama maira te arero manga kia ratou, mei te ai ra te tu, e to iora ki rungao ia ratou katoa ra. E ki akera ratou ravarai i te vaerua tapu.’ (Angaanga 2:1-4) No reira kua akakite papu maira te vaerua o te Atua e ko teia i teianei te pupu tangata ta te Atua ka taangaanga kia akono i tana akakoro anga i raro ake i te aratakianga a Iesu Karaiti i te rangi maira.
4. Koai ma i teia tuatau te akaaerenga akara mataia a Iehova?
4 I teia tuatau, ko tetai toenga ua o te 144,000 ra te vai nei i te enua. Inara ei akatupu anga i te totou Pipiria, e “aronga maata” no te “mamoe ke,” e au mirioni ua atu o ratou, kua taokotaiia mai ki te toenga tei akatainuia ra. Kua taokotaiia e Iesu, te Tiaki Mamoe Meitaki ra, teia au mamoe ke ma te toenga ra kia riro ratou ei anana okotai ua i raro ake iaia ei Tiaki Mamoe okotai no ratou. (Apokalupo 7:9; Ioane 10:11, 16) Kua riro ratou katoa ei putuputuanga taokotaiia, te akaaerenga akara mataia a Iehova ra.
E Patu Anga Teokaratiki
5. Naai e arataki ana i te akaaerenga a te Atua, e akapeea?
5 Te tuatua o te Tuatua Tapu “te putuputuanga o te Atua ora” ra te akakite maira e naai e arataki ana i te reira. E teokaratiki, me kare e tutara na te Atua taua akaaerenga ra. Te oronga maira Iehova i te aratakianga no tona au tangata na roto ia Iesu, Tana i akataoonga ei Upoko kare i akara mataia no te putuputuanga, e na roto i Tana uaorai Tuatua akauruia, te Pipiria.—1 Timoteo 3:14, 15, NW; Ephesia 1:22, 23; 2 Timoteo 3:16, 17.
6. (a) Akapeea te arataki anga i te putuputuanga mei te rangi maira i te akakite anga i te anere mataiti mua ra? (e) Eaa te akaari maira e ko Iesu rai te Upoko o te putuputuanga?
6 Kua kite puia taua aratakianga ra ia Penetekote. (Angaanga 2:14-18, 32, 33) Kua akakitea mai i te arataki anga te angera a Iehova i te akatotoa anga i te tuatua meitaki ki Aperika, i te oronga anga te reo o Iesu i te au arataki anga i te taui anga te manako o Saula o Tareso ra, e i ta Petero akamata anga i te angaanga tutu aere i roto i te au Kenitara. (Angaanga 8:26, 27; 9:3-7; 10:9-16, 19-22) Inara i muri akera, kare e reo akaou i rongoia mei te rangi mai, kare e au angera i akara akaouia, kare e au apinga temeio no te vaerua tei orongaia mai. Inara, kua taputou a Iesu: “I na, tei vaitata ua ra au ia kotou, e tae ua atu ki te openga o teianei ao.” (Mataio 28:20; 1 Korinetia 13:8) I teia tuatau, te ariki ra te Au Kite o Iehova i ta Iesu aratakianga. Naringa kare te reira, kare e rauka te akakitekiteanga i te tuatua Patireia i te aro atuanga i te riri kino anga.
7. (a) Koai ma “te tavini akono meitaki e te pakari,” e no teaa ra? (e) Eaa te angaanga tei orongaia ki te “tavini” ra?
7 I mua poto ake i tona matenga, kua tuatua a Iesu ki tana au pipi no “te tavini akono meitaki e te pakari” tana ka tuku atu ei Pu ma te apainga taka ke ra. Ko taua “tavini” ra ka vai mairai i to te Atu ra akaruke anga no te rangi e ka vairai i te rave angaanga maata anga i to Karaiti oki maianga ma te akara koreia i te mana Patireia ra. Kare taua akatakaanga ra e tau ki tetai tangata okotai ua, mari ra ka tau ia ki te putuputuanga akatainuia a Karaiti. I te okoia mai te reira ma tona toto, kua taiku a Iesu ki te reira ei “tavini” nana. Kua akaue aia i to te reira au mema kia akariro i te au tangata ei pipi e kia angai marie ua ia ratou, ma te tua anga kia ratou “i te kai [vaerua] na ratou i te ora mou ra.”—Mataio 24:45-47; 28:19; Isaia 43:10; Luka 12:42; 1 Petero 4:10.
8. (a) Eaa te au apainga a te pupu tavini ra i teianei? (e) Eaa ra to tatou akarongoanga ki te apiianga na roto i ta te Atua ra aerenga i puapinga maatai?
8 I te mea te rave tiratiratu ra te pupu tavini i te angaanga a to ratou Pu i tona oki maianga akara koreia i te 1914, te vaira te akapapu anga e kua orongaia te reira ma te au apainga maata atu i te 1919. Te au mataiti i muri mai i reira te tuatau no te akakite anga i te Patireia ki te ao katoa, e kua akaputuia te urupu maata te akamori ra ia Iehova ma te manako anga kia akaora atu ia ratou na roto i te mate maata. (Mataio 24:14, 21, 22; Apokalupo 7:9, 10) Te umuumu katoaia ra te kai vaerua na ratou, e te tuaia ra kia ratou e te pupu tavini. No reira, kia akamareka ia Iehova ka tau tatou kia ariki i te au apiianga tana e oronga maira na roto i teianei aerenga e kia rave rotai oki ma te reira.
9, 10. (a) I te anere mataiti mua ra, eaa te akanoonoo anga no te akaotianga i te au uianga no runga i te au apii anga e te orongaanga i te arataki anga i te tutuanga i te tuatua meitaki? (e) Eaa te akanoonoo anga no te akaaere anga i te au angaanga a te au tangata o Iehova te vai nei i teia tuatau?
9 I etai tuatau, ka tu mai te au uianga no te apiianga e te ravenga. Ka akapeea i reira? Te akakite maira a Angaanga pene 15 kia tatou i akapeea tetai maro anga no runga i te au Kenitara tei taui ra i te akatikatika angaia. Kua orongaia taua tumu ra ki te au apotetoro e te aronga pakari i Ierusalema, tei tavini ra ei pupu akaaere. Kare taua aronga tangata ra i te apa kore ua, inara kua taangaanga te Atua ia ratou. Kua akamanako ratou i te au tuatua tapu no runga i taua tumu ra e pera katoa te akapapu anga i te akono anga a te vaerua o te Atua ra i te akatuera anga i te ngai Kenitara ra. I reira kua oronga ratou i te ikianga. Kua akameitaki te Atua i taua akanoonoo anga ra. (Angaanga 15:1-29; 16:4, 5) Mei taua pupu akaaere ra, kua tonokia te aronga tataki tai kia akatotoa atu i te tutu aereanga i te Patireia.
10 I to tatou tuatau nei kua akapapaia te Pupu Akaaere o te akaaerenga akaraia a Iehova ra e te au taeake akatainuia i te vaerua no te au enua ke ke mai e kua akaputuia ki te opati maata o te Au Kite o Iehova i teianei ao. I raro ake i te taoonga upoko o Iesu Karaiti, te akatere atura te Pupu Akaaere i te akamori ma i te au enua ravarai, i te aratakianga i te au angaanga tutu aere a te Au Kite o Iehova i roto i to ratou au putuputuanga e rau ngauru ua atu tauatini. Te aronga o te Pupu Akaaere te akono ra i te manako o te apotetoro ko Paulo, tei tata ra ki te au oa Kerititiano: “Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.”—2 Korinetia 1:24.
11. (a) Akapeea te akataoonga anga i te aronga pakari e te au tavini orometua? (e) Eaa ra tatou i tau ei kia taokotai ma te aronga akataoongaia ra?
11 Te akara atura te Au Kite o Iehova i te ao katoa ki te Pupu Akaaere kia iki i te au taeake ko tei, akamanaia kia akataoonga i te aronga pakari e te au tavini orometua ra kia akono i te au putuputuanga. Te tataia ra te au umuumu anga no te aronga akataoongaia i roto i te Pipiria e te akamanako katoaia ra oki e e au tangata apa ua ratou e ka tarevake i etai taime. Te aronga pakari tei rave ra i te au ikianga e te aronga tei rave ra i te akataoonga anga te akono ra i tetai apainga maata ki mua i te Atua. (1 Timoteo 3:1-10, 12, 13; Tito 1:5-9) No reira, ka pure ratou no te tauturu a te vaerua o te Atua e ka kimi i te arataki anga mei tana Tuatua akauruia. (Angaanga 6:2-4, 6; 14:23) E akaari tatou i to tatou ariki anga no teia aronga “meitaki i te tangata nei,” tei tauturu mai ia tatou kia riro “i te akarongo okotai.”—Ephesia 4:8, 11-16.
12. Akapeea ta Iehova taangaanga anga i te au vaine i te akanoonoo anga teokaratiki ra?
12 Te arataki maira te au Tuatua Tapu e ko te akaaere anga i roto i te putuputuanga na te au tane e akono. Kare teia e akameangiti mai ana i te au vaine, no te mea tetai papaki o ratou e au tuanga no te Patireia o te rangi, e e maata ta ratou e rave ana i te angaanga tutu aere. (Salamo 68:11) Pera katoa, na te akono tiratiratu anga i ta ratou au apainga no te pamiri, te tauturu ra te au vaine i te ingoa meitaki o te putuputuanga. (Tito 2:3-5) Inara ko te apiianga i roto i te putuputuanga na te au tane tei akataoongaia e akono i te reira.—1 Timoteo 2:12, 13.
13. (a) Eaa te manako anga ta te Pipiria e raurau ra i te aronga pakari kia akono no runga i to ratou turanga? (e) Eaa te angaanga ka tau tatou katoatoa kia rave?
13 I teianei ao, ko te tangata te mou ra i tetai turanga teitei te manakoia ra e puapinga maata, inara i roto i te akaaerenga a te Atua ko te ture: “E tei mea ngiti rava i roto ia kotou na, ko te ka maata ïa.” (Luka 9:46-48; 22:24-26) Te ako maira te au Tuatua Tapu i te aronga pakari kia matakite auraka e akaueue ki rungao i te aronga akatuangaia ra e te Atua mari ra, kia riro ei akatauanga no te anana. (1 Petero 5:2, 3) Kare i tetai aronga tokoiti ua tei ikiia, mari ra ko te katoatoa o te Au Kite o Iehova, te tane e te vaine, tei ia ratou te tika no te tuatuaanga no Tei Ngateitei i te ao katoa e pini ua ake, na te tuatua taakaaka anga i roto i tona ingoa e te tuatuaanga ki te au tangata i te au ngai ravarai no tona ra Patireia.
14. Na te taangaanga anga i te au tuatua tapu i taikuia nei, e uriuri manako i te au uianga te akapapaia nei i te openga o te parakaoa.
14 Ka tau tatou kia ui kia tatou uaorai: ‘Te ariki tika ra ainei au i ta Iehova aratakianga i tana akaaerenga akara mataia? Te akaata ra ainei toku tu akono, taku tuatua, e te au angaanga i te reira?’ Na te akamanakoanga ki runga i te au tumu te aru mai nei ka rauka kia tauturu ia tatou tataki tai kia rave i taua kimikimi anga ra.
Me te kauraro tika ra au kia Karaiti ei Upoko no te putuputuanga, i reira, mei tei akakiteia maira i te au tuatua tapu e aru mai nei, eaa taku ka rave? (Mataio 24:14; 28:19, 20; Ioane 13:34, 35)
Me ariki akameitaki ua au i te au apinga te aere maira na roto i te pupu tavini e tona Pupu Akaaere, koai taku e akaari ra i te akangateitei anga? (Luka 10:16)
Akapeea ta te katoatoa i roto i te putuputuanga, te aronga pakari tikai, te akono anga i tetai e tetai? (Roma 12:10)
15. (a) Na to tatou tu akono i te akaaerenga akaraia a Iehova, eaa ta tatou e akakite ra? (e) Eaa te au tuatau te vaira no tatou kia akapapu e pikikaa te Tiaporo ra e kia apai mai oki i te rekareka anga kite ngakau o Iehova?
15 Te arataki nei a Iehova ia tatou i teia tuatau na roto i tana akaaerenga akara mataia i raro ake ia Karaiti. Na to tatou tu akono i teianei akapapa anga i akakite mai e akapeea to tatou manako ngakau no te tumu o te ngateitei anga. (Ebera 13:17) Te maro ra Satani e ko to tatou manako maata no tatou uaorai. Inara me ka tavini tatou i tetai ua atu tu te anoanoia ra e ka kopae atu i te au apinga te akaanga maira i te manako anga kare i tau no tatou, te akapapu ra tatou e e pikikaa te Tiaporo. Me aroa tatou e ka akangateitei oki i te aronga te rave ra i te arataki anga i roto ia tatou e ka akakore i “te akarekareka anga i te tangata kia rauka te apinga,” ka apai mai tatou i te rekareka kia Iehova. (Iuda 16; Ebera 13:7) Na te tiratiratu ki ta Iehova akaaerenga, ka akaari tatou e ko Iehova to tatou Atua e te taokotaiia ra tatou i te akamori anga iaia.—1 Korinetia 15:58.
Uriuri Akaou Anga
• Eaa ta Iehova akaaerenga akara mataia i teia tuatau? Eaa te akakoro anga o te reira?
• Koai te Upoko akataoongaia o te putuputuanga, e na roto i teea akanoonoo anga akara mataia tana oronga maianga i te arataki anga aroa no tatou?
• Eaa te tu akono tau ta tatou ka tatanu ki te aronga i roto i ta Iehova ra akaaerenga?
[Au Uianga Apii]
[Tutu i te kapi 133]
Te arataki nei a Iehova ia tatou na roto i tana akaaerenga akara mataia i raro ake ia Karaiti
