Pene Rua

E Akamaata ia Iehova ei Atua Mou Anake

1. Koai te Atua mou anake?

TE TUATUA ra te Pipiria e noatu e manganui tei manakoia ra ei au atua, “kareka ia tatou nei, okotai rava ïa Atua, ko te Metua.” (1 Korinetia 8:5, 6) Taua ‘Atua okotai’ ra ko Iehova, Tei Anga ra i te au mea ravarai nei. (Deuteronomi 6:4; Apokalupo 4:11) Kua taiku a Iesu iaia e ko “toku Atua, e ki to kotou Atua.” (Ioane 20:17) Kua akatika aia ki ta Mose, tei tuatua i mua akera: “Ko Iehova te Atua; kare atu, koia anake ra.” (Deuteronomi 4:35) E teitei rava atura Iehova i etai ua atu apinga akamoriia ra, mei te au itoro ra, te au tangata akaatuaia ra, me kare i tona enemi ia Satani te Tiaporo ra, koia “te atua o teianei ao ra.” (2 Korinetia 4:3, 4) Ei tuke anga ki teianei katoa, ko Iehova, ta Iesu i karanga ra iaia, ko “te Atua mou [“anake,” NW].”​—Ioane 17:3.

2. Ia tatou e apii ra no te Atua, eaa te akakeu anga ki to tatou au ora anga?

² Te au tangata ariki tei apii ra i to te Atua ra au tu ngakau pumaana, pera katoa oki i tana i rave e ka rave no tatou nei, kua akavaitata atu kiaia. I te tupu anga to ratou inangaro no Iehova ra, ka manako ngakau ratou kia akamaata iaia ra. Akapeea? Ko tetai ravenga na te tuatuaanga kia etai ke nona ra. “Ko te vaa oki tei aaki te tuatua e kia rauka atu te ora,” ta Roma 10:10 i tuatua maira. Ko tetai atu ravenga na te aruanga iaia i te tuatua e te angaanga oki. “Ei aru kotou i te Atua, mei te tamariki akaperepere ra,” ta Ephesia 5:1 i tuatua maira. Kia rave ki katoa i te reira, ka tau tatou kia kite ia Iehova ra ma tona tu tikai.

3. Eaa to te Atua ra au tu meitaki roa?

 ³ I roto i te Pipiria katoa, e manganui te au tuatua anga te akataka maira i to te Atua ra au tu meitaki roa. Ko tona nga tu maata e a ra ko te pakari, te tu tau, te mana, e te aroa. “Tei iaia oki te pakari.” (Iobu 12:13) “Ko tei tau katoa tona au aerenga.” (Deuteronomi 32:4) Koia e “mana maata.” (Isaia 40:26) “Ko te Atua oki te aroa.” (1 Ioane 4:8) Inara, i aua nga tu maata e a o te Atua ra, ko teea tei meitaki roa, tei maata atura i etai ke ra i te akataka anga i tona tu ei Atua?

“Ko te Atua Oki te Aroa”

4. Ko teea o to te Atua ra au tu tei maata rava atu i tana anga maianga i te ao katoa e pini ua ake e te au mea ora katoatoa ra?

⁴ E akamanako ana na teaa i akakeu ia Iehova kia anga mai i te ao katoa e pini ua ake e te au mea ora vaerua kite ra e te au tangata oki. Na tona pakari ainei me kare na te mana? Kare, no te mea noatu kua taangaanga te Atua i nga tu ra, kare ko taua tu ra te au mana akakeuanga. E ko tona tu tau kare i umuumu e kia tua aia i te apinga aroa no te oraanga. Kareka ra, no to te Atua ra aroa maata i akakeu iaia kia oronga i te au tu rekareka no te oraanga kite anga ei peretana ma etai ke ra. Na te aroa i akakeu iaia kia akakoro e kia tau te au tangata akarongo ra kia ora mutu kore ua atu ki Parataito. (Genese 1:28; 2:15) Na te aroa i akariro iaia kia akapapa no te akakoreanga i te akaapa anga no te aati anga i te ture ta Adamu i apai maira ki runga i te au tangata katoa.

5. Kia tau ki ta te Pipiria ra, ko teea tu peretana anga ta Iehova i akatutu mai, e no teaa ra?

⁵ No reira, o te au tu katoa o te Atua ra, ko te mea maata rava ko tona aroa. Ko tona tu ia. Noatu rai te puapinga maata o tona pakari, te tu tau, e te mana oki, kare te Pipiria i tuatua e ko Iehova tetai o taua tu ra. Inara te tuatua ra e koia te aroa. Ae, ko Iehova te peretana anga o te aroa. Ko te aroa teia tei aratakiia ra e te kaveinga, kare no te manako ngakau. Te akatereia ra te aroa o te Atua e te au kaveinga o te tuatua mou e te tuatua tika. Ko te reira te tu teitei rava no te aroa,  tei akakiteia maira i roto i te Atua ko Iehova uaorai. Ko taua aroa ra e akakite anga i te tu noinoi kore takiri e te kapiti tamouia ra ma te akakite anga angaanga papu tikai.

6. Eaa te akariro ra kia rauka ia tatou te aru i te Atua, noatu rai e teitei roa atu aia ia tatou?

⁶ Na teia tu aroa meitaki roa e raukai ia tatou kia aru i taua Atua ra. Ei au tangata akaaka, e te apa ua, e ngoie ua te rave i te tarevake, penei ka manako tatou e kare rava tatou e autu i te raveanga i te reira. Inara teia tetai atu akatauanga no to Iehova ra aroa maata: Te kite ra aia i to tatou au kotinga e kare aia e umuumu mai ana i te tu apa kore ia tatou. Kua kite aia e e atea ke atu tatou mei te tu apa kore i teianei. (Salamo 51:5) No reira a Salamo 130:3, 4 i tuatuai: “Naringa koe, e Iehova, e akairo ana i te au ara nei, e te Atu, koai te ka mou? Tei ia koe ra te akakore i te ara.” Ae, ko Iehova “e Atua takinga-meitaki e te aroa ua, e te akakoromaki maata, e te meitaki maata.” (Exodo 34:6) “Te meitaki ra oki koe, e te Atu, e kua tika ia koe i te akakore mai i te ara nei.” (Salamo 86:5) Mei teaa ra te akapumaanaanga! Mei teaa ra te akaangaroianga o te reira i te tavini anga i teianei Atua umere e kia kite i tana utuutu anga aroa, e te tu akaaroa ua!

7. Akapeea e kiteiai to Iehova ra aroa i roto i tana au angaanga no te anga maianga?

⁷ Te kite katoaia ra to Iehova aroa i tana au angaanga no te anga maianga. E tamanako ana i te au apinga e manganui ta Iehova ra i oronga mai no to tatou rekareka anga, mei te au maunga manea ra, te au vaorakau, te au roto vai, e te au moana. Kua oronga mai aia i te kai umere tuke tuke kia akamareka i to tatou tongianga e te akamatutu oki ia tatou. Pera katoa, kua oronga mai a Iehova i te au tiare tuke tuke te manea e te kakara oki pera katoa te au manu akaieie tei angaia maira. Kua maani mai aia i te au apinga te ka akamareka i te au tangata, noatu rai e kare no tona ra meitaki. E tika, te oraanga i teianei ao kino i roto i to tatou tu apa ua  nei i teia tuatau, kare tatou e rekareka i tana au mea i anga maira ki tona ki katoa. (Roma 8:22) Inara e tamanako ua eaa ta Iehova ka rave no tatou i Parataito ra! Te akapapu maira te tata taramo kia tatou: “Te oora nei koe i to rima, e te akamerengo nei i te kaki [tau] o te au mea ora katoa nei.”​—Salamo 145:16.

8. Eaa te akatauanga meitaki roa i to Iehova ra aroa no tatou?

⁸ Ko teea te akatauanga maata roa no to Iehova ra aroa no te au tangata nei? Te akataka maira te Pipiria: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) No te meitaki ainei o te tangata i rave ei a Iehova i teia? Te pau maira Roma 5:8: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” Ae, kua tono mai te Atua i tana Tamaiti apa kore ki te enua kia oronga i tona oraanga ei atinga oko ei oko mai ia tatou mei te akaapa anga a te ara e te mate. (Mataio 20:28) Na teia i akatuera i te mataara no te au tangata tei inangaro ra i te Atua kia rauka te ora mutu kore. E mea akameitaki anga, te totoa atura te aroa o te Atua ki te aronga katoa te anoano ra kia rave i tona anoano, no te mea te akakite maira te Pipiria kia tatou e: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:​34, 35.

9. Eaa te tau ra kia mana ki runga ia tatou na te tika e kua oronga maira Iehova i tana Tamaiti ei oko no tatou?

⁹ Akapeea i tau ei te tika e kua oronga mai a Iehova i tana Tamaiti ei oko no tatou, i te akatueraanga i te mataara ki te ora mutu kore, i manai e akapeea ta tatou akono anga i to tatou au oraanga i teianei? Ka tau te reira kia akaoonu i to tatou inangaro no te Atua mou ra, no Iehova. I taua taime rai, ka tau te reira kia akariro ia tatou kia anoano kia akarongo  atu kia Iesu, tei akatutu maira i te Atua. “E i mate oki [a Iesu] no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.” (2 Korinetia 5:15) Mei teaa ra te mareka anga o te reira kia aru i to Iesu ra takainga tapuae, no te mea e akatauanga meitaki aia i te aruanga i to Iehova aroa e te inangaro oki! Te akaariia maira teia na ta Iesu i tuatua ra ki te aronga akaaka: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.”​—Mataio 11:​28-30.

Akaarianga i te Aroa no Etai Ke

10. Eaa etai tu e raukai ia tatou te akaari i te aroa no te au oa Kerititiano ra?

¹⁰ Akapeea e raukai ia tatou te akaari e tei ia tatou te tu aroa no te au oa Kerititiano ta Iehova raua ko Iesu e akono ra no tatou nei? E akara i te au tu e manganui ka rauka ia tatou te rave i teia: “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore, e rekareka ra i te tuatua-mou; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.”​—1 Korinetia 13:​4-8; 1 Ioane 3:​14-18; 4:​7-12.

11. Ka tau tatou kia akaari i te aroa kiaai ma, e akapeea ra?

¹¹ Koai ma atu ta tatou ka tau kia akaari i te aroa, e akapeea oki? Kua tuatua Iesu: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu;  Ma te apii atu ia ratou, kia akono i te au mea katoa taku i akaue atu kia kotou.” (Mataio 28:​19, 20) Te kapiti ra teia i te tuaanga i te tuatua meitaki o te ao ou parataito te aere maira ma te aronga kare ra i riro mai ei au oa Kerititiano no tatou. Kua akataka meitaki maira Iesu e kare e tau kia kotingaia to tatou aroa ki te aronga anake te kapiti ra i to tatou akarongo, no te mea kua tuatua aia: “Ko tei aroa mai ia kotou, ko ta kotou [anake] e aroa atu, eaa ta kotou tutaki i reira? kare aina te aronga telona e pera katoa? E to kotou aronga taeake anake ra, ta kotou ïa e tangi atu, eaa ta kotou ngai maata atu i reira? kare aina te au etene e pera katoa?”​—Mataio 5:​46, 47; 24:14; Galatia 6:10.

‘Ka Aaere ra i te Ingoa o Iehova’

12. Eaa i raukai kia akapiriia atu to te Atua ra ingoa kiaia anake ua?

¹² Tetai atu tumu puapinga maata no te akamaataanga i te Atua mou ra ko te kiteanga, te tuatuaanga, e te apiianga ia etai ke ra i tona ingoa takake, ia Iehova. Kua akakite maira te tata taramo i teianei anoano manako ngakau: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” (Salamo 83:18) Te aite anga o te ingoa ko Iehova “Ka Akariro Aia kia Tupu.” Koia Tei Akakoro Maata ra, te akariroanga i tana au akakoroanga ki tetai openga autu tikai. E ko te Atua mou anake ka rauka kia apai i taua ingoa ra, no te mea kare e papu i te au tangata e me ka autu ta ratou ra au tauta anga. (Iakobo 4:​13, 14) Ko Iehova anake ra ka rauka kia karanga no tana tuatua e “e tupu tei akakoroia” ra i tana i tono atura i te reira. (Isaia 55:11) E manganui te mareka ra me akara mua ratou i te ingoa o te Atua ra i ta ratou au Pipiria e kia apii oki i tona aite anga. (Exodo 6:3) Inara ka puapinga anakeia ratou i teia kite anga me ‘ka aaere ra ratou i te ingoa o Iehova e tuatatau ua atu.’​—Mika 4:5.

13. Eaa te o atura ki te kiteanga i to Iehova ingoa e te aaereanga i tona ingoa ra?

¹³ No runga i te ingoa o te Atua ra, te tuatua ra Salamo  9:10: “Te aronga i kite i toou ra ingoa, ka irinaki ia koe.” Te kapiti ra teianei e tere atu i te kite ua anga i te ingoa ko Iehova, kare ra i riro ua tona aite anga ei irinakianga iaia. Te aite anga no te kiteanga i te ingoa o te Atua ra e arikianga i te tu Atua o Iehova ra, te akateiteianga i tona mana, te akarongoanga i tana au akauenga, te irinakianga iaia i te au mea ravarai ra. (Maseli 3:5, 6) Aiteite katoa oki, te aaereanga i te ingoa o Iehova te akakite maira i te akatapuanga kiaia e te komonoanga iaia e ko tetai o tona aronga akamori ra, ma te taangaanga tikai i to tatou oraanga kia rotai ma to te Atua ra anoano. (Luka 10:27) Te rave ra ainei koe i te reira?

14. Me ka tavini tatou ia Iehova e tuatau ua atu, eaa te umuumuia ra i te pae atu i tetai tu angaanga?

¹⁴ Me ka tavini tatou ia Iehova ra e mutu kore ua atu, e tere atu i tetai tu angaanga ua ka tika kia akakeu ia tatou. Kua raurau atura te apotetoro ko Paulo ia Timoteo, tei tavini ra ia Iehova no etai mataiti e manganui: “E akamātau ua ra koe i te akono i te Atua.” (1 Timoteo 4:7) No roto maira te akono i tetai ngakau ki i te arikianga no te peretana te takiia atura te akono anga. Te akakite maira “te akono i te Atua” i te akangateitei anga tapu no to Iehova ra tu ei peretana. Te akakite maira te reira i te pirianga aroa kiaia no te manako anga teitei nona e tana au ravenga. Te akariro ra te reira ia tatou kia anoano i te au tangata ravarai kia mou i tona ingoa ki runga i te turanga teitei. Ka tika tatou kia tatanu i te akono i te Atua ra i to tatou oraanga me ka aaere tatou i te ingoa o Iehova ra, koia te Atua mou anake ra, e tuatau ua atu.​—Salamo 37:4; 2 Petero 3:11.

15. Akapeea e raukai ia tatou te oronga ki te Atua anake ra i ta tatou akamori anga?

¹⁵ Kia tavini i te Atua ra ma te arikiia mai, ka tika tatou kia akamori iaia anake, i te mea “e Atua aia te anoano ra kia akono anake uaia.” (Exodo 20:5, NW) Kare e rauka ia tatou kia inangaro i te Atua e i taua taime rai kia inangaro atu i te  ao kino, ko Satani ra tona atua. (Iakobo 4:4; 1 Ioane 2:​15-17) Te kite tika maira Iehova e eaa te tu peretana ta tatou tataki tai e tauta ra kia pera. (Ieremia 17:10) Me te anoano tika ra tatou i te tuatua tika, te kite maira aia i te reira e ka tauturu mai ia tatou kia akakoromaki i to tatou au timataanga i te au ra takitai ra. Ma te turuanga mai ia tatou ma tona vaerua tapu mana ra, nana e tauturu ia tatou kia autu ki rungao i te au tu kino te tupu maata nei i teianei ao. (2 Korinetia 4:7) Ka tauturu katoa mai aia ia tatou kia tamou marie i to tatou manakonako anga maroiroi no te oraanga mutu kore ki runga i tetai enua parataito ra. Mei teaa ra te manakonako anga kaka o te reira! Ka tau tatou kia ariki oonu i te reira e kia tavini puareinga i te Atua mou ra ia Iehova, tei akariro ra kia tupu te reira.

16. Eaa taau ka tau kia anoano i te rave, i te pae atu i te aronga e au mirioni ke atura?

¹⁶ E au mirioni ua atu te au tangata i te ao katoa nei kua ariki mataora ua i te patianga a te tata taramo tei tata ra: “E akamaata tatou ia Iehova; tatou katoa e akateitei i tona ingoa.” (Salamo 34:3) Te pati atura Iehova ia koe kia o atu ki roto i te aronga tini te tupu ra i roto i te au pa enua ravarai te rave ra i teia.

Uriuri Akaou Anga

• Eaa to Iehova ra tu ei peretana? Akapeea tatou e puapingaiai na te raukaanga te kiteanga taka meitaki i tona au tu ra?

• Akapeea e raukai ia tatou te tauturu atu i etai tangata ke ra kia kite i te tuatua mou o te Atua ra?

• Eaa te o atura i te kiteanga i to Iehova ra ingoa e te aaereanga i tona ingoa ra?

[Au Uianga Apii]

 [Tutu i te kapi 14]

I to Iehova ra, aroa maata, ‘ka oora i tona rima, e ka akamerengo i te kaki o te au mea ora katoa nei’