Pene Rua Ngauru

E Akamanako Vaitata i te Ra o Iehova

1. I toou kite mua anga e te vaitata maira te akaora anga mei te au mamae ngakau o teianei akatereanga taito, i akapeea toou manako ngakau no te reira?

KO TETAI mea mua taau i apii mai i te Pipiria e ko te akakoroanga a Iehova kia akariro i te enua katoa ei parataito. I taua ao ou ra, ka kore atu te tamaki, te rave kino, te putaua, te maki, te mamaeanga, e te mate oki. Noatu ko tei mate ka ora akaou mai. Mei teaa ra te au manakonakoanga umere! Te akaketaketaia ra te vaitata anga mai o te reira katoa na te akapapu anga e kua akamata to Karaiti parutia akara koreia ei Ariki tutara anga i te 1914 e mei reira mairai tei roto tatou i te tuatau openga o teianei ao kino. A te openga o teianei tuatau openga, ka akapou atu a Iehova i teianei akatere anga o te au mea nei e ka apai mai i te ao ou taputouia maira!

2. Eaa ‘te rā o Iehova’ ra?

² Te tapaia ra i te Pipiria teianei tuatau akapouanga te aere mai nei ko “te rā o [“Iehova,” NW].” (2 Petero 3:10) Ko te reira “te rā e riri ei a Iehova ra” i te ao katoa o Satani. (Zephania 2:3) Ka tae te reira ki tona take i “te tamaki i taua rā maata o te Atua mana, katoatoa ra . . . , ko Aramagido te ingoa i te tuatua Ebera,” i reira “te ui ariki o te ao katoa nei” e akapouiai. (Apokalupo 16:​14, 16) Te akakite maira ainei te tu o toou oraanga e te irinaki ra koe e te vaitata mai nei teianei ‘rā o Iehova’?​—Zephania 1:​14-18; Ieremia 25:33.

3. (a) Aea e tae mai ei te ra o Iehova ra? (e) Eaa ra i riro ei ei puapinga e kare a Iehova i akakite mai i “te reira rā e te reira ora”?

 ³ Kare te Pipiria e akakite tika mai ana kia tatou i te ra tikai e aere mai ei a Iesu Karaiti ei Rave i ta Iehova ra Akapouanga i ta Satani akatereanga o te au mea nei. “Kareka te reira rā e te reira ora, kare rava tetai e kite, kare oki te au angela o te rangi, kare katoa oki te Tamaiti, ko te Metua anake ra,” ta Iesu ia i tuatua. (Mareko 13:32) Me kare etai e aroa tikai ia Iehova, ka manako ratou kia akaroa atu i tona ra i roto i to ratou au manako e ka ariu ke atu ki te au aruaru anga o teianei ao. Mari ra ko te aronga tei aroa tika ra ia Iehova ka tavini atu iaia ma te ngakau katoa, noatu rai aea e tae mai ei te openga o teianei akatereanga kino.​—Salamo 37:4; 1 Ioane 5:3.

4. Eaa ta Iesu i tuatua mai ei akamatakite anga?

⁴ Na roto i tetai tuatua akamatakiteanga ki te aronga inangaro ia Iehova, te tuatua ra a Iesu: “E matakite oki ia kotou, e akamaroiroi, e e pure; kare oki taua tuatau ra i kitea e kotou.” (Mareko 13:​33-37) Te raurau maira aia ia tatou e auraka e tuku i te kaikaianga e te inuanga me kare “te pekapeka o teianei ao” kia akapou i to tatou manako anga e kia ngaro to tatou manako no te kino o te au tuatau ra.​—Luka 21:​34-36; Mataio 24:​37-42.

5. Mei ta Petero i akataka maira, eaa ta te ra o Iehova ka apai mai?

⁵ Kua ako aiteite katoa maira Petero ia tatou kia akamanako vaitata i te “tae [anga] maira te rā o [“Iehova,” NW] mei te keia i te po ra, ka peke ke atu oki teianei rangi ma te paku maata, e taravai te au tumu o te enua i te veravera maata.” Te au kavamani katoa a te tangata​—“te rangi”​—ka akapouia, pera katoa te taiate rave kino a te tangata nei​—“te enua”​—e tona “au tumu,” koia te au ravenga e te au angaanga o teianei ao kino, mei tona au tu manako takake mai i te Atua ra e tona au aerenga akono  tau kore e te au apinga oki o te ora anga nei. Ka monoia te reira au mea ma te “rangi ou [te Patireia o te Atua i te rangi ra] e tetai enua ou [tetai taiate enua ou]” i te “vai tika anga o te tuatua-tika ra.” (2 Petero 3:​10-13) Ko teianei au tupuanga akangaangaa i teianei ao ka tupu viviki mai e i tetai ra e te ora kare i manakoia atu.​—Mataio 24:44.

Kia Matakite i te Akairo

6. (a) Eaa te maata o ta Iesu ra pauanga ki te uianga a tana au pipi te piri anga atu ki te openga o te akatereanga ngati Iuda? (e) Ko teea tuanga o ta Iesu ra pauanga te tou atura ki te au tupuanga e te au tu akono mei te 1914 mairai?

⁶ I te manako anga i te tuatau e noo nei tatou, ka tau tatou kia kite meitaki i te au tupuanga o te akairo taokotaiia te akataka maira i te tuatau openga​—“te openga o te akatereanga o te au mea nei.” E akamanako e i ta Iesu pau anga i te uianga a tana au pipi tei tataia ia Mataio 24:3 (NW), tetai papaki o tana i akataka maira i te irava 4 ki te 22 kua akatupu meangiti ia ki runga i te akatereanga ngati Iuda mei te 33 e te 70 T.N. Inara ko te tupuanga maata o taua totou ra kua tupu i te tuatau mei te 1914, te tuatau o to Karaiti “parutia e te openga o te akatereanga o te au mea nei.” Ia Mataio 24:​23-28 te akakite maira eaa te ka tupu mei te 70 T.N. ki te tuatau o to Karaiti ra parutia. Ko te au tupuanga i akatakaia maira ia Mataio 24:​29–​25:46 ka tupu i te tuatau openga ra.

7. (a) Eaa tatou uaorai i tau ei kia matakite i akapeea te au turanga e tupu nei i te akatupuanga i te akairo ra? (e) E pau mai i te au uianga i te openga o teianei parakaoa, te akakiteanga e i akapeea te akairo anga i te akatupu angaia mei te 1914 mairai.

⁷ Ka tau tatou uaorai kia akara i te au tupuanga e te au tu akono te ka akatupu i te akairo ra. Na te kapitianga i teianei au mea ki te totou Pipiria ra ka tauturu ia  tatou kia akamanako vaitata i te ra o Iehova ra. Ka tauturu katoa te reira ia tatou kia karape i te akamatakiteanga ia etai ke ra i te vaitata anga o taua ra ra. (Isaia 61:1, 2) Ma taua au akakoroanga ra i roto i te manako, e akara akaou tatou i te au uianga te aru mai nei i te akakite maataanga i te au tuanga o te akairo ra, mei tei tataia ia Mataio 24:7 e ia Luka 21:​10, 11.

Na roto i teea tu maata te tu anga mai ‘o tetai enua e tamaki mai ki tetai enua, e tetai basileia e tamaki mai ki tetai basileia’ i te akatupu angaia te akamataanga i te 1914 maira? No runga i te au tamaki, eaa tei tupu mei reira mairai?

I te 1918, eaa te maki mate tei apai ke atu i te au oraanga e maata atu i ta te Tamaki I o te Ao ra? Noatu ra te kite rapakau o te au tangata, eaa te au maki te tamate atura i te aronga e mirioni ua atu?

Eaa te maata o te tupuanga o te onge kai ki te enua nei noatu rai te au tereanga ki mua o te taineti o te anere mataiti kua topa akenei?

Eaa te akairinaki ra ia koe e kare a 2 Timoteo 3:​1-5, 13 e akataka mai ana i te turanga o te oraanga mei mua maira, mari ra i te tu pakari o te au turanga kikino e tupu nei ia tatou e aere atu nei ki te openga o te tuatau openga ra?

Akatakake Anga i te Au Tangata

8. (a) Eaa atu, tei akatakaia maira ia Mataio 13:​24-30, 36-43, ta Iesu i kapiti atu ma te openga o te akatereanga o te au mea nei? (e) Eaa te aiteanga o te akatutuanga a Iesu ra?

⁸ Te vaira etai atu au tupuanga maata ta Iesu i kapiti atu ma te openga o te akatereanga o te au mea nei. Tetai o teia ko te akataka ke anga i “te tamariki o te basileia” mei “te tamariki a te vaerua kino ra.” Kua tuatua a Iesu i  teia i tana parapore no te kainga titona ta te enemi i ruru ra ma te titania ra. “Te sitona” i roto i tana parapore ra ko te au Kerititiano mou akatainuia ra. “Te zizania” ko te aronga tei karanga ra e Kerititiano ratou mari ra te akapapu ra ia ratou uaorai e ko “te tamariki a te vaerua kino” no te mea te mou ra ratou ki te ao ko te Tiaporo ra te tutara. Te akataka keia ra ratou mei “te tamariki o te basileia [o te Atua]” e kua akairoia no te akapouanga. (Mataio 13:​24-30, 36-43) Kua tupu ainei teia?

9. (a) I muri ake i te Tamaki I o te Ao ra, eaa te akatakake anga maata no te aronga tei karanga ra e Kerititiano ratou? (e) Akapeea ta te au Kerititiano akatainuia oronga anga i te akapapu e e au tavini mou ratou no te Patireia ra?

⁹ I muri mai i te Tamaki I o te Ao, kua raveia tetai akatakake anga o te aronga katoatoa tei karanga ra e Kerititiano ratou ki roto i nga pupu e rua: (1) Te au orometua o Kerititome e ta ratou au pipi, tei rave ra i te turuanga ketaketa i te League of Nations (ko te United Nations i teianei) ia ratou e mou ra ki to ratou tiratiratu i te au pa enua, e (2) te au Kerititiano mou o muri mai i taua tamaki anga ra, tei oronga ra i ta ratou turuanga ki katoa ki te Patireia Mesia o te Atua ra, kare ki te au pa enua o teianei ao. (Ioane 17:16) Kua akapapu teia aronga ia ratou uaorai ei au tavini mou no te Patireia o te Atua na te raveanga i te tutu aereanga i “te evangelia o te basileia nei” i te ao katoa. (Mataio 24:14) E eaa te au tupu anga?

10. Eaa te tupuanga mua o te angaanga tutuanga Patireia ra?

¹⁰ Te mea mua, ko te akaputuanga i te toenga o te aronga akatainuia ra e te vaerua o te Atua, tei ia ratou ra te manakonako anga no te kapiti anga ma Karaiti ei tuanga no te Patireia i te rangi. Noatu rai kua totoaia taua aronga ra i roto i te au enua ra, kua taokotaiia mai ratou ki roto i te akaaerenga okotai. Te akaoti anga  o te akairoanga i teianei aronga akatainuia te vaitata nei.​—Apokalupo 7:3, 4.

11. (a) Eaa te angaanga akaputu anga te rave uaia atura, e kia rotai ma teea totouanga? (e) Eaa ta te tupuanga o teianei totou e akakite maira?

¹¹ I reira, i raro ake i ta Karaiti arataki anga, kua akamataia te akaputuanga i te “aronga maata rava . . . no te pa enua ravarai, e te au kopu ravarai, e te au iti-tangata ravarai, e te au reo katoa oki.” Ko teianei aronga no te “mamoe ke atu” te ka ora atu i “te mate maata” ki roto  i te ao ou a te Atua. (Apokalupo 7:9, 14; Ioane 10:16) Ko teia angaanga no te tutuanga i te Patireia o te Atua i mua ake i te taenga mai te openga kua raveia tae roa mai ki teianei tuatau. Te rave tiratiratu ra, te aronga maata o te mamoe ke atu, i teianei te tae ra te numero ki te au mirioni ua atu, tei tauturu i te toenga o tei akatainuia ra kia akakitekite i te tuatua puapinga maata no te Patireia. Te akarongoia nei teianei tuatua i te pa enua ravarai.

Eaa te Vai Maira ki Mua?

12. Eaa te maata atu o te angaanga tutuanga ka raveia i mua ake ka tae mai ei te ra o Iehova?

¹² Pouroa te au akakite anga i mua akenei te akataka  maira e te vaitata nei tatou i te openga o te tuatau openga e te vaitata maira te ra o Iehova. Inara te vaira ainei etai totou kia akatupuia i mua ake ka akamatai taua ra mataku ra? Ae. Ko tetai apinga, ko te akatakake anga i te au tangata no te maroanga i te Patireia ra kare i oti ake. I etai ngai te maata ra te patoi anga tei tupu no etai mataiti, te tupu maata maira te au pipi ou. Noatu rai i te ngai tei kopaeia ra te tuatua meitaki, te akakiteia maira to Iehova aroa ua na ta tatou rave anga i te akakitekite anga. No reira, e rave ua atu i te angaanga! Kua akapapu maira Iesu kia tatou e me oti taua angaanga ra, ka tae mai te openga i reira.

13. Mei tei rekotiia ia 1 Tesalonia 5:2, 3, eaa te tupu anga maata te ka tupu mai, e eaa te aiteanga o te reira kia tatou?

¹³ Tetai atu totou Pipiria puapinga maata te akakite mai ra: “E tuatua oki te tangata e, e au, e kare e kino; ei reira ratou e rokoia uaia mai ei e te mate viviki, mei te vaine nui kia rokoia e te mamae ra; e kare rava ratou e ora.” (1 Tesalonia 5:2, 3) Mei teaa te tu o taua tuatua akakiteanga “e au, e kare e kino” te vaira te reira kia kiteaia. Inara kare tona aiteanga e ka kitea tikai e te aronga arataki o teianei ao te apinga ei akakore i te au manamanata o te tangata nei. Te aronga tei akamanako vaitata i te ra o Iehova kare e arataki keia e taua akakite anga ra. Kua kite ratou e a muri ua ake, ka tupu viviki te akapouanga.

14. Eaa te au tupu anga te ka tupu mai i te tuatau o te mate maata, e i roto i teea papa anga?

¹⁴ I te akamataanga o te mate maata, ka uri atu te au tutara e ka ta ia Babulonia Maata, te patireia akonoanga pikikaa o teianei ao e ka akatanea iaia. (Mataio 24:21; Apokalupo 17:​15, 16) I muri ake i te reira, ka uri atu to te pa enua ka patoi i te aronga tei mou i to Iehova ra tu ngateitei, te akakeu anga i to Iehova riri ki te au kavamani poritiki e te aronga e turu ra ia ratou, te akatupu anga i te  akapouanga takiri ia ratou ra. Ko te take te reira o Aramakito o te mate maata. Ei reira a Satani e tana au temoni e uriiai ki roto i te vaarua takere kore, kare e rauka kia mana akaou ki runga i te tangata. Na teia e akaope i to Iehova ra e akateiteiiai tona ingoa.​—Ezekiela 38:​18, 22, 23; Apokalupo 19:​11–​20:3.

15. Eaa ra i pakari kore ei kia manako e te mamao atura te ra o Iehova?

¹⁵ Ka ope teianei akatereanga i tona taime tikai, kia tau ki ta te Atua ra papaanga. Kare te reira e taroaroa. (Habakuka 2:3) Kia maara, te akapouanga o Ierusalema i te 70 T.N. kua viviki ua, i te tuatau kare te ngati Iuda ra i manako i te reira, i to ratou manakoanga e kua kore atu te kino. E akapeea oki a Babulonia i taito ra? E ririnui ia, e papu tikai, e kua akaketaketaia ma te au paruru maatamaata. Inara kua topa te reira i te po okotai ra. Pera katoa oki, ka tupu viviki te akapouanga ki runga i teianei akatereanga kino. Me tae mai te reira, kia kitea tatou te taokotaiia ra i te akamori anga mou, ma te akamanako vaitata anga i te ra o Iehova ra.

Uriuri Akaou Anga

• Eaa ra i puapinga maatai kia akamanako vaitata i te ra o Iehova? Akapeea e raukai ia tatou te rave i te reira?

• Akapeea te akatupu anga kia tatou uaorai no te akatakake anga o te au tangata te raveia nei i teianei?

• Eaa te vai maira ki mua i mua ake ka akamatai te ra o Iehova? No reira, eaa ta tatou ka tau kia rave?

[Au Uianga Apii]

[Tutu i te kapi 180]

Kare e roaia ka ope atu te tuatau openga ra ma te akapouanga i ta Satani akatereanga