Pene Tai Ngauru Ma Toru

E Aronga Maata i Mua i te Terono o Iehova

1. (a) I mua ake ka raukai i te au tavini taito o te Atua ra me kare te 144,000 to ratou tutaki, eaa te ka tupu kia ratou? (e) Eaa te ka rauka no te “aronga maata” e ora nei i teia tuatau?

KUA tuku te au tavini tiratiratu o te Atua ra mei ia Abela kia Ioane Papetito i te raveanga i to te Atua ra anoano ei mea mua i to ratou au oraanga. Inara, kua mate atu ratou katoatoa, te tatari nei no to ratou tuakaouanga ki te oraanga i runga i te enua i te ao ou a te Atua. Te 144,000, te ka tutara ma Karaiti i to te Atua ra Patireia i te rangi, ka tika katoa kia mate i mua ake ka raukai ia ratou te tutaki. Inara, te akaari maira a Apokalupo 7:9 e i teia tuatau openga nei e “aronga maata” tetai no te au pa enua ravarai kare e kite i te mate mari ra ka rauka ia ratou te manakonako anga no te oraanga e tuatau ua atu ki runga i te enua. Ko koe ainei tetai i roto ia ratou?

Akatakaanga i te Aronga Maata

2. Eaa tei taki atu ki te maramaanga taka meitaki i te akataka anga i te aronga maata ia Apokalupo 7:9 ra?

² I te 1923, kua kite te au tavini o Iehova e ko “te mamoe” o ta Iesu parapore tei kitea ia Mataio 25:​31-46 ra e te “mamoe ke atu” tana i taiku tei tataia ra ia Ioane 10:16 e au tangata tei ia ratou te tika kia ora e tuatau ua atu ki runga i te enua. I te 1931 ko te aronga tei akatakaia mai ia Ezekiela 9:​1-11 e ko te aronga tei akairoia to ratou rae kua kitea katoaia e manakonako anga to ratou no te enua nei. I reira i te 1935 kua kitea mai e ko te aronga maata e tuanga no te pupu mamoe ke atu ta Iesu i tuatua maira. I  teia tuatau ko teianei aronga maata akaperepereia ra kua tae te numero ki te au mirioni ua atu.

3. Eaa ra te tuatua anga i te “tu ua anga ki mua i te terono” i korei e taiku i tetai pupu no te rangi ra?

³ Ia Apokalupo 7:9, kare te aronga maata i kitea atu i te rangi. To ratou “tu ua anga ki mua i te terono” o te Atua kare te aiteanga e tei te rangi ratou. Tei mua ua ratou i te akara anga a te Atua. (Salamo 11:⁠4) Ko te tika e ko te aronga maata, “kare takiri e pou kia tatau,” kare i tetai pupu no te rangi te akakiteia maira na te akaaite atuanga i tona numero kare ra i akatakaia mai ki tei tataia ra ia Apokalupo 7:​4-8 e Apokalupo 14:​1-4. I reira te numero tei apaiia atura mei te enua ki te rangi ra kua akakiteia maira e 144,000.

4. (a) Eaa “te mate maata” te ka ora atu te aronga maata? (e) I tei tataia ia Apokalupo 7:​11, 12, koai ma tei akara atu i te aronga maata ra e kua kapiti atu ma ratou i te akamori anga?

⁴ Te tuatua ra a Apokalupo 7:14 no te aronga maata: “Ko te aronga teia i aere mai mei roto i te mate maata.” Ka ora atu ratou i te taitaia kino roa te ka kitea i te tuatua enua o te tangata nei. (Mataio 24:21) Me oronga akameitaki ratou i to ratou ora ki te Atua e kia Karaiti oki ei reira te au mea ora tiratiratu katoatoa i te rangi e taokotai ei ma ratou katoa i te tuatuaanga: “E tika ïa: ko te akapaatu, e te kakā, e te pakari, e te akameitaki, e te ngateitei, e te mana, e te maroiroi, ei to tatou Atua ïa, e tuatau e tuatau ua atu. Koia ïa.”​—Apokalupo 7:​11, 12.

Akapapuanga e te Tau Ra

5. Akapeea e raukai ia tatou te akataka eaa te umuumuia ra kia riro ei tuanga no te aronga maata?

⁵ Te akaora anga i te aronga maata na roto i te tumatetenga maata ka tupu kia rotai ma to Iehova ra au turanga tuatua tika. Te au tu akatakaanga o te aronga te ka  akaoraia te uriuri meitakiia ra i roto i te Pipiria. No reira, ka rauka i te aronga inangaro i te tuatua tika kia akono i teianei kia akapapu e te tau ra no te akaoraanga. Eaa te mea tika na teia aronga kia rave?

6. Eaa ra i raukai te aronga maata kia akaaite tikaia ei mamoe?

⁶ E maru te au mamoe e te kauraro oki. No reira i ta Iesu tuatua anga e e mamoe ke atu tana kare ra no te pupu o te rangi, te tuatua ra aia no te au tangata kare i anoano anake kia ora ua atu ki runga i te enua nei mari katoa ra kia kauraro i tana au apiianga. “Ka akarongo mai taku mamoe i toku reo, taku rai oki i karanga atu na kia kotou, kua kite oki au ia ratou, e ka aru mai oki ratou iaku,” tana ia i tuatua. (Ioane 10:​16, 27) Teia aronga e au tangata tei akarongo tikai kia Iesu e ka rave oki i tana tuatua, kua riro ei au pipi nana.

7. Eaa te au tu te tau ra te au pipi a Iesu kia akatupu?

⁷ Eaa etai atu au tu ka tika teia aronga tataki tai o te au pipi a Iesu kia akatupu? Te pau maira te Tuatua a te Atua: “Kia kopae kotou i ta kotou tuatua i muatangana ra, i te tangata taito . . . E kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:​22-24) Te akatupu maira ratou i te au tu te ka akameitaki atu i te taokotai anga o te au tavini o te Atua ra​—“te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.”​—Galatia 5:​22, 23.

8. Eaa ta te aronga maata ka aro atu ia ratou e turu ra i te toenga?

⁸ Te turu ra te aronga maata i te numero tokoiti o te aronga e manakonako anga to ratou no te rangi, te rave ra i te arataki anga i te angaanga tutu aereanga. (Mataio 24:14; 25:40) Te turu ra te au mamoe ke atu, noatu e te kite ra ratou e ka aro atu ratou i te patoianga no te mea i te akamataanga mai o te tuatau openga nei, kua uriia mai  e Iesu Karaiti e tana au angera a Satani e tana au temoni ki vao i te rangi ra. Kia riro teia ei “mate ra oki to te enua . . . tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” (Apokalupo 12:​7-12) No reira, ka akamaata atu a Satani i tana patoianga i te au tavini o te Atua ra i te vaitata anga te openga o teianei akatere anga.

9. Akapeea te autu anga o te au tavini o te Atua ra i te tutuanga i te tuatua meitaki, e no teaa ra?

⁹ Noatu rai te takinokino anga kino, te aere ua atura te angaanga tutu aereanga ki mua. Mei etai tauatini tokoiti  ua aronga tutu aere i te Patireia i te openga o te Tamaki I o te Ao ra, i teianei e au mirioni ua atu, no te mea kua taputou a Iehova: “Te taoonga ra noou i angaiaʼi ra, kare ïa e manuia.” (Isaia 54:17) Noatu rai kua kite tetai mema o te akavaanga teitei ngati Iuda e kare e rauka kia akakoreia te angaanga a te Atua. Kua tuatua aia ki te au Pharisea i te anere mataiti mua no te au pipi ra: “E akataka ke atu kotou i tenana au tangata, e vaio ua atu: na te tangata teianei angaanga e teianei tuatua, ka ngaro ua ïa: Na te Atua ra, kare rava e kore ia kotou; ko te riro aea oki kotou ei aronga tamaki atu ki te Atua.”​—Angaanga 5:​38, 39.

10. (a) Eaa te aite anga o “te akairo” i runga i te aronga o te aronga maata ra? (e) Akapeea te au tavini o te Atua i te akarongo anga i tetai “reo no te rangi mai”?

¹⁰ Te akatutuia maira te aronga o te aronga maata e kua akairoia no te ora. (Ezekiela 9:​4-6) “Te akairo” ko te akakite anga e kua akatapuia ratou kia Iehova, kua papetitoia ei au pipi na Iesu, e kua o atu ki te tatanuanga i te tu aite kia Karaiti. Kua akarongo ratou i te “reo no te rangi mai” tei tuatua maira no te patireia akonoanga pikikaa o Satani i te ao katoa nei: “Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara, kia kore kotou e mate katoa i tona ra au mate.”​—Apokalupo 18:​1-5.

11. Na roto i teea tu puapinga maata ta te aronga maata ra akakite anga e au tavini ratou no Iehova?

¹¹ Pera katoa, kua tuatua a Iesu ki tana au pipi: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Ei tuke anga, te tamate nei te au mema o te au akonoanga o teianei ao i etai atu mema i te tamaki anga, e putuputu no te mea no tetai enua ke ratou! Te akakite ra te Tuatua a te Atua: “Ko te mea teia e kiteaʼi te tamariki a te Atua, e te tamariki  a te diabolo; ko tei kore e rave i te tuatua-tika ra, kare ïa i to te Atua, kare katoa tei kore e aroa i tona taeake. . . . Kia aroa tatou ia tatou uaorai. Auraka mei ia Kaina, no taua vaerua kino ra aia, e tamate rava atura i tona teina.”​—1 Ioane 3:​10-12.

12. A te tumatetenga maata, ka akapeea ta Iehova akono anga i te “au rakau” akonoanga tei ua maira i te ua kino?

¹² Kua akakite a Iesu: “E ua mai te au rakau meitaki katoa i te ua meitaki; e te au rakau kikino ra, e ua mai ïa i te ua kino. Kare e tika i te rakau meitaki kia ua mai i te ua kino, kare katoa te rakau kino e ua mai i te ua meitaki. Te au rakau katoa kare e ua mai i te ua meitaki ra, e tipuia ïa, e ka titiriia ki roto i te ai. Ka kite kotou ia ratou i ta ratou e ua maira.” (Mataio 7:​17-20) Te au ua uuaia mai e te au akonoanga o teianei ao te akataka maira ia ratou ei “au rakau” pe, kare e roaia ka akapouia e Iehova i te tumatetenga maata.​—Apokalupo 17:⁠16.

13. Akapeea ta te aronga maata akakite anga e te taokotai ra ratou i te “tu ua anga ki mua i te terono” o Iehova?

¹³ Te akakite maira Apokalupo 7:​9-15 i te au tika te ka taki atu ki te akaora anga o te aronga maata. Te akaariia maira ratou e taokotaiia ra i te “tu ua anga ki mua i te terono” o Iehova, i te mouanga i tona tu ngateitei i te ao katou e pini ua ake. “Kua orei i to ratou kakau, e kua akateatea i te toto o te Punua-mamoe ra,” te akakite maira e kua kite ratou i te atinga tapokianga ara o Iesu. (Ioane 1:29) Kua akatapuia ratou uaorai ki te Atua e kua akatutu i teia na te taruku anga i te vai. No reira te rekareka ra ratou i te turanga ma ki mua i te Atua, tei akatutuia maira e te kakau teatea, e te ‘akamori ra iaia i te po e te ao.’ E au rave anga ainei etai te ka rauka ia koe kia apai i toou oraanga katoa kia rotai atu ma tei akatakaia mai i konei?

 Au Puapinga i Teianei

14. Eaa etai o te au puapinga taka ke te aere maira ki te au tavini o Iehova i teianei?

¹⁴ Penei kua kite atu koe i te au puapinga taka ke te aere maira i teianei ki te aronga te tavini ra ia Iehova. Ei akatauanga, i toou kite anga i ta Iehova ra au akakoro anga tuatua tika, kua marama koe e te vaira te manakonako anga kaka no te tuatau ki mua. No reira i teianei e akakoro anga tikai taau i te oraanga​—kia tavini i te Atua mou ma te manakonako anga rekareka no te ora mutu kore ki runga i te enua parataito. Ae, na te Ariki ko Iesu Karaiti “e arataki oki [i te aronga maata] ki te au pupui anga o te vai ora.”​—Apokalupo 7:⁠17.

15. Akapeea te Au Kite o Iehova i te puapinga anga ia na te mou anga i te au kaveinga Pipiria no runga i te au tumu poritiki e te akono tau oki?

¹⁵ Te puapinga umere te rekarekaia ra e te aronga maata ko te aroa, te taokotai anga e te rotai oki te kitea ra i roto i te au tavini o Iehova i te enua katoa nei. I te mea te kaikai katoa ra tatou i te kai vaerua aiteite, te akarongo katoa ra tatou i te au ture e te au kaveinga aiteite tei kitea i roto i te Tuatua a te Atua. No reira tatou i korei e tataka keia e te au manako poritiki me kare to te au enua keke. Pera katoa, te tamou ra tatou i te au turanga akono teitei ta te Atua e umuumu maira i tona au tangata. (1 Korinetia 6:​9-11) No reira, e kore ei e kite i te pekapeka, te kore anga te taokotai, e te tu ainga tau kore te tupu nei i te ao, te rekareka ra te au tangata o Iehova i tei rauka kia karangaia e parataito pae vaerua. E akara e i akapeea te akatakaanga i teianei ia Isaia 65:​13, 14.

16. Noatu rai te au manamanata matauia ra ki te oraanga, eaa te manakonako anga no te aronga maata ra?

¹⁶ Kare, kare te au tavini tangata o Iehova ra i te tu apa kore ua. E te tupu ra te au manamanata matauia i te oraanga  i teianei ao, mei te topaanga rai ki te au tuatau ngata me kare te riroanga ei aronga takinoia i te au tamaki a te au pa enua ra. Te aro katoa ra ratou i te maki, te mamaeanga, e te mate. Inara e akarongo to ratou e i te ao ou, na te Atua “e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.”​—Apokalupo 21:⁠4.

17. Noatu eaa te ka tupu mai kia tatou i teianei, eaa te tuatau umere ki mua, te vai maira no te aronga tei akamori ra i te Atua mou?

¹⁷ Noatu ra me ka ngere koe i toou oraanga i teianei no te ruaine, te maki, tetai tumatetenga, me kare takinga kinoanga, ka akatuakaou mai a Iehova ia koe ki te ora i Parataito. (Angaanga 24:15) Ei reira ka rekareka ua atu koe i te kaikai anga pae vaerua i te tuatau o te Tutara Tauatini Mataiti o Karaiti. Ka oonu ua atu toou inangaro i te Atua i to kite anga i te tupu anga kaka o tana au akakoro anga. E na te au akameitakianga pae kopapa ta Iehova ka oronga mai i reira ka akaoonu atu i toou inangaro nona ra. (Isaia 25:​6-9) Mei teaa ra tetai tuatau umere te vai maira i te tuatau ki mua no te au tangata o te Atua ra!

Uriuri Akaou Anga

• Eaa te tupu anga meitaki roa ta te Pipiria e kapiti atura ki te aronga maata?

• Me te anoano tika ra tatou kia kapitiia atu ki taua aronga maata akaperepereia e te Atua, eaa ta tatou ka tika kia rave i teianei?

• Akapeea te puapinga maata kia koe o te au akameitaki anga ta te aronga maata e rekareka nei i teianei e ka rekareka katoa oki i te ao ou o te Atua ra?

[Au Uianga Apii]

[Tutu i te kapi 123]

E au mirioni ua atu to te aronga maata te akamori taokotai ra i te Atua mou