E Tuatua Ua Atu i te Tuatua a te Atua ma te Mataku Kore
Pene Tai Ngauru Ma Iva
E Tuatua Ua Atu i te Tuatua a te Atua ma te Mataku Kore
1. (a) Eaa te tuatua meitaki ta te au pipi a Iesu ra i akakitekite aere, inara eaa te manako o etai au ngati Iuda? (e) Penei eaa te au uianga ta tatou ka ui?
VAITATA i te 2,000 mataiti kua topa, kua akatainuia te Tamaiti a te Atua, ko Iesu Karaiti, ei Ariki no te tuatau ki mua i rungao i te enua katoa. Kua tamateia a Iesu i raro ake i te akakeu anga a te au enemi no te akonoanga ra, inara kua akatu mai a Iehova iaia mei te mate maira. Na roto ia Iesu, kua rauka mai te ora mutu kore i teianei. Inara, i te akakitekite anga te au pipi a Iesu i teia tuatua meitaki, kua akamata te tamamae anga. Kua tiria tetai papaki o ratou ki roto i te are tapekaanga, e kua papaia e kua ikuikuia kia akamutu i te tuatuaanga no runga ia Iesu. (Angaanga 4:1-3, 17; 5:17, 18, 40) Eaa ta ratou ka rave? E penei eaa taau ka rave? Ka rave ua atu ainei koe i te tutu akakite ma te mataku kore?
2. (a) Eaa te nuti umere te tau ra kia akakitekiteia i to tatou tuatau nei? (e) Tei iaai ma te apainga kia tutu aere i te tuatua meitaki?
2 I te 1914 kua akateronoia te Ariki o te Patireia o te Atua, ko Iesu Karaiti, i te rangi kia tutara ‘i rotopu i tona au enemi.’ (Salamo 110:2) I muri akera, kua uriia mai a Satani e tana au temoni katoa ki raro i te enua nei. (Apokalupo 12:1-5, 7-12) Kua akamataia te tuatau openga o teianei akatereanga kino. Me ope teianei tuatau, ka akapueurikirikiia e te Atua te akatereanga o te au mea katoatoa a Satani ra. (Daniela 2:44; Mataio 24:21) Ka vai mai ki mua i te aronga te ka ora atu i reira te manakonako anga no te oraanga mutu kore ki runga i te enua te ka riro ei parataito. Me ko koe tetai tei takave i teia tuatua meitaki, ka anoano ia koe kia tua atu i te reira ma etai ke ra. (Mataio 24:14) Inara eaa te tu akono taau ka manako atu?
3. (a) Akapeea te au tangata i te ariu mai anga ki te tuatua no te Patireia? (e) Eaa te uianga ka tika tatou kia aro atu?
3 Me akakitekite aere koe i te tuatua meitaki no te Patireia, penei ka ariki mai tetai papaki tangata i te reira, inara ko te maata anga kare e manako mai. (Mataio 24:37-39) Penei ko tetai papaki ka aviri mai ia koe me kare ka patoi mai. Kua akamatakite mai a Iesu e penei ka tupu mai te patoianga mei toou uaorai au kopu tangata. (Luka 21:16-19) Penei ka tupu katoa mai te reira i taau ngai angaanga me kare i te apii anga. I etai tuanga o te enua nei, tei raro ake te Au Kite o Iehova i te araianga a te kavamani. Me aroia mai e taua au turanga ra, ka rave ua atu ainei koe i te tuatua mataku kore i te tuatua a te Atua ra e “kia mou piri tikai te akarongo”?—1 Korinetia 16:13.
Auraka e Irinaki i to Tatou Uaorai Maroiroi
4. (a) Kia akapapu ia tatou uaorai ei au tavini tiratiratu no te Atua ra, eaa te umuumuanga akatumuia ra? (e) Eaa ra i puapinga maatai te au uipaanga Kerititiano?
4 Te tumuanga ki te riroanga ei tavini tiratiratu no Iehova ko te irinaki anga i runga i tana au akameitaki anga. Ko tetai o te reira ko te au uipaanga putuputuanga. Te raurau maira te au Tuatua Tapu ia tatou auraka e manako kore ua ia ratou. (Ebera 10:23-25) Te aronga tei tamou marie ra ei Au Kite tiratiratu no Iehova kua uapou ia ratou uaorai kia aere putuputu ki te au uipaanga ma te au oa akamori. I teia au uipaanga ka tupu maata to tatou kite i te au Tuatua Tapu ra. Pera katoa, to tatou ariki anga i te au tuatua ou matauia ra ka tupu, e ko to tatou matakite anga i te au tu e taangaangai ia ratou ka akakoiia. Ka akapiri vaitataia atu tatou ki to tatou au taeake Kerititiano i te akamori taokotai anga e ka akamaroiroiia kia rave i to te Atua ra anoano. Te oronga maira te vaerua o Iehova i te arataki anga na roto i te putuputuanga, e na roto i taua vaerua ra, tei rotopu a Iesu ia tatou.—Mataio 18:20; Apokalupo 3:6.
5. Me tei raro ake te Au Kite o Iehova i te arai anga, eaa te ka raveia ki te au uipaanga?
5 Te aere putuputu ra ainei koe i te au uipaanga katoatoa, e te akono ra ainei koe uaorai i taau e akarongo ra i te uriuri angaia? I etai taime, me tei raro ake te Au Kite o Iehova i te araianga, te anoanoia ra kia raveia te au uipaanga i roto i te au pupu rikiriki mai i roto i te au ngutuare. Penei ka tuke tuke te au ngai e te au taime e penei kare i ngoie ua ana, ko etai uipaanga kua akonoia i te turuaipo. Inara noatu te tu ngata kia ratou taki tai me kare te tu kino, ka akono te au taeake e te au tuaine tiratiratu i te tauta anga pakari kia tae ki te au uipaanga tataki tai ra.
6. Akapeea tatou i te akakite anga i to tatou irinaki anga ki runga ia Iehova, e akapeea teia i te tauturu anga ia tatou kia rave ua atu i te tuatua mataku kore?
6 Te irinaki anga ia Iehova te akatupuia ra na te ariu putuputuanga kiaia na roto i te pure mei te ngakau maira, i te kiteanga e te umuumu ra tatou i te tauturu a te Atua. Te rave ra ainei koe i te reira? Kua pure putuputu a Iesu i te tuatau o tana angaanga orometua i te enua nei. (Luka 3:21; 6:12, 13; 22:39-44) E i te po i mua ake i tona patiti angaia, kua raurau aia i tana au pipi: “E ara, e pure, kia kore kotou e rokoia e te timataanga.” (Mareko 14:38) Me aravei atu tatou i te tu manako kore i te tuatua Patireia, penei ka timataia tatou kia tuku i ta tatou angaanga orometua ki raro. Me aviriia mai tatou e te au tangata me kare ka takinga kino mai ia tatou, penei ka timataia mai tatou kia muteki ua ei kopae ke i te au manamanata. Mari ra me pure akatenga tatou no te vaerua o te Atua kia tauturu ia tatou kia tuatua mataku kore ua atu, ka paruruia tatou kia kore e unui ki muri i taua au timataanga ra.—Luka 11:13; Ephesia 6:18-20.
Tetai Tataanga no te Akakitekite Anga Mataku Kore
7. (a) Eaa te tataanga ia Angaanga ra i riro ei ei manakoanga takake kia tatou? (e) E pau i te au uianga i orongaia mai i te openga o teia parakaoa, te akaketaketa anga e akapeea te akakiteanga i te akapuapinga anga ia tatou.
7 Te tataanga i roto i te puka o Angaanga e manako anga taka ke kia tatou katoatoa. Te akakite maira e i akapeea te au apotetoro e etai atu au pipi mua ra—e au tangata e manako ngakau to ratou mei to tatou nei—i te akakore atu anga i te au arairai anga e kua akapapu i te mataku kore ei au kite tiratiratu no Iehova. E akara matatio tatou i tetai tuanga o taua tataanga ra ma te tauturu anga a te au uianga te aru maira e te au tuatua tapu tataia ra. Ia tatou e rave ra i te reira, e akamanako e akapeea koe uaorai e puapingaiai mei taau e tatau ra.
E au tangata apii teiteiia ainei te au apotetoro ra? E aronga tataki tai ainei ratou tei mataku kore ua ra, noatu eaa te tupu anga? (Ioane 18:17, 25-27; 20:19; Angaanga 4:13)
Na teaa i raukai ia Petero kia tuatua mataku kore ki mua i te akavaanga ngati Iuda tei akaapa ra i ta te Atua uaorai Tamaiti? (Mataio 10:19, 20; Angaanga 4:8)
Eaa ta te au apotetoro ra i rave i te au epetoma i mua ake i to ratou apainaanga ki mua i te Sunederi ra? (Angaanga 1:14; 2:1, 42)
I te ikuiku anga te au tutara ra i te au apotetoro kia akamutu i te tutuanga tei akatumuia ki runga i te ingoa o Iesu, i akapeea ta Petero raua ko Ioane pauanga? (Angaanga 4:19, 20)
I muri ake i to ratou matara anga mai, koai ta te au apotetoro ra i akara akaou atu no te tauturu? Kua pure ainei ratou kia akamutuia te takinga kino, me eaa? (Angaanga 4:24-31)
Na teea tu ta Iehova ra orongaanga mai i te tauturu i te tauta anga te aronga patoi ra kia arai i te angaanga tutu aere? (Angaanga 5:17-20)
I akapeea ta te au apotetoro ra akaari anga e kua kite ratou i te tumu i akaoraiai ratou? (Angaanga 5:21, 41, 42)
Noatu rai e manganui te au pipi tei akapueu keia no te takinga kinoanga, eaa ta ratou i rave ua atura? (Angaanga 8:3, 4; 11:19-21)
8. Eaa te au tupuanga mareka mei ko mai i te angaanga orometua a te au pipi mua ra, e akapeea tatou i te o anga atu ki roto?
8 Kare i puapinga kore te angaanga tutuanga i te tuatua meitaki ra. E vaitata i te 3,000 pipi i papetitoia ia Penetekote 33 T.N. “Te aronga ra i akarongo i te Atu, e manganui rava atura ïa tei kapiti mai kia ratou ra, te tane ma te vaine katoa oki.” (Angaanga 2:41; 4:4; 5:14) I muri iora, noatu ko tetai tei takinga kino tikai i te au tangata o te Atua, ko Saula o Tareso, kua riro mai ei Kerititiano e kua akamata i te akakitekite mataku kore i te tuatua mou. Kua riro aia kia matauia e ko te apotetoro ko Paulo. (Galatia 1:22-24) Te angaanga tei akamataia ra i te anere mataiti mua kare i akamutu ake. Kua tere maata atu ki mua i teia tuatau openga nei e kua taeria te au tuanga katoatoa o te enua nei. Tei ia tatou te tika no te raveanga i te reira, e ia tatou e rave ra i te reira, ka rauka ia tatou te kite mei te akatauanga tei akanooia maira e te au kite tiratiratu tei tavini ra i mua ake ia tatou.
9. (a) Eaa te au tuatau ta Paulo i taangaanga kia rave i te akakitekite anga? (e) Na roto i teea au tu taau akatotoa anga i te tuatua Patireia kia etai ke ra?
9 I to Paulo ra kite anga i te tuatua mou no Iesu Karaiti, eaa tana i rave? “Kua akakite atura aia i reira e . . . ko te Tamaiti [a Iesu] na te Atua.” (Angaanga 9:20) Kua ariki aia i to te Atua ra aroa ua kiaia, e kua kite aia e te umuumu ra te au tangata ravarai i te tuatua meitaki tei rauka maira iaia. E ngati Iuda a Paulo, e kia tau ki te peu o taua tuatau ra, kua aere aia ki te au tunako kia rave i te akakite anga. Kua tutu aere katoa aia mei tera are ki tera are e kua uriuri manako ma te au tangata i te ngai okooko anga. E kua puareinga ua aia i te aere atu ki te au ngai ou kia tutu aere i te tuatua meitaki.—Angaanga 17:17; 20:20; Roma 15:23, 24.
10. (a) I akapeea ta Paulo akaari anga e noatu te mataku kore, e manako karape katoa aia i tana tu akakitekite anga? (e) Penei akapeea tatou i te akaata anga i to Paulo au tu i te akakitekiteanga ki te au kopu tangata, te au oa angaanga, me kare te au oa apii ra?
10 E mataku kore a Paulo inara e kite oonu katoa oki, mei tei tau no tatou. Ki te au ngati Iuda kua tuatua aia no runga i te tumuanga o te au taputou tei akanooia e te Atua ki to ratou ai metua. Ki te au Ereni kua tuatua aia no te tumuanga o te au mea ta ratou e matau ra. I etai tuatau kua taiku aia i te tupuanga kiaia uaorai i te apiianga i te tuatua ou ei tumuanga no te orongaanga i te akakiteanga. Kua tuatua aia: “No te evangelia i peraʼi au, kia rauka katoa iaku i ta te evangelia ra.”—1 Korinetia 9:20-23; Angaanga 22:3-21.
11. (a) Eaa ta Paulo i rave kia kopae ke i te aro putuputu anga atu i te aronga te patoi maira? (e) Penei aea tatou e aru pakari ei i ta Paulo akatauanga, e akapeea? (nga) Noea mai te mana kia tuatua ua atu ma te mataku kore?
11 I te akariro anga te patoianga kia akaraanga meitaki atu no Paulo kia tutu aere i tetai atu ngai no tetai taime, kua rave aia i te reira kare i manono kia aro putuputu atu i te aronga te patoi maira. (Angaanga 14:5-7; Roma 12:18) Inara kare rava aia i akama i te tuatua meitaki. (Roma 1:16) Noatu rai kua kite a Paulo i te aronga akakino mai—pera katoa te ta ua—te akonoanga a te aronga patoi ei mea mareka kore, ‘i maroiroi ra aia i tona Atua’ kia tutu aere ua atu. Kua tuatua aia: “Kua tauturu maira te Atu iaku, kua akamaroiroi maira; kia kitea ravaia te tuatua i ako aereia nei e au.” (1 Tesalonia 2:2; 2 Timoteo 4:17) Te Upoko o te putuputuanga Kerititiano, ko Iesu, kua rave ua atu i te oronga mai i te mana umuumuia ra e tatou kia rave i te angaanga tana i totou maira no to tatou tuatau nei.—Mareko 13:10.
12. Eaa te oronga maira i te akapapu anga i te mataku kore Kerititiano, e eaa te tumu anga no te reira?
12 Tei ia tatou te au tumu ravarai kia rave ua atu i te tuatuaanga i te tuatua a te Atua ma te mataku kore, mei ta Iesu e etai atu au tavini tiratiratu o te Atua i rave i te anere mataiti mua ra. Kare te aiteanga o teianei e ko te manako koreanga me kare te tautaanga kia opara i te tuatua ki runga i te aronga kare ra e anoano i te reira. Inara kare tatou e akamutu ua no te mea kare te au tangata e manako mai; e kare tatou e muteki ua no te patoianga. Mei ia Iesu rai, ka tou atu tatou ki te Patireia o te Atua ra e ko te kavamani tika no te enua katoa nei. Te tuatua nei tatou ma te irinaki anga no te mea te turu ra tatou ia Iehova, i Tei Ngateitei i te Ao Katoa e Pini Ua Ake, e no te mea te tuatua ta tatou e akakitekite nei kare na tatou no ko mai ra iaia. E ko to tatou inangaro no Iehova ka tau ei akakeu maata ia tatou no te akapaapaaanga iaia.—Philipi 1:27, 28; 1 Tesalonia 2:13.
Uriuri Akaou Anga
• Eaa ra i puapinga maatai kia tua aere i te tuatua Patireia ma te aronga ravarai te ka rauka, inara eaa te au manako anga ta tatou ka tapapa atu?
• Akapeea e raukai ia tatou kia akaari e kare tatou e irinaki i to tatou uaorai maroiroi kia tavini ia Iehova?
• Eaa te au apiianga puapinga ta tatou ka apii mei te puka o Angaanga?
[Au Uianga Apii]
[Tutu i te kapi 173]
Mei te tuatau i topa ra, te tuatua nei te au tavini o Iehova i teia tuatau i te tuatua a te Atua ma te mataku kore
