Pene Rua Ngauru Ma Tai

Ka Autu Kaka ta Iehova Akakoro Anga

1, 2. (a) Eaa to Iehova akakoro anga no tana au mea ora kite ra? (e) Koai ma tei kapitiia ra ki roto i to te Atua pamiri no te akamorianga?

TE AU mea kite katoatoa tei taokotaiia i te akamorianga i te Atua mou anake ra e ratou katoatoa te rekareka ra i te tu rangatira kaka ei tamariki na te Atua​—ko to Iehova ia akakoroanga aroa. Ko te reira katoa ta te aronga inangaro i te tuatua tika e anoano akatenga ra.

² Kua akamata a Iehova i te akatupuanga i teianei akakoro anga mekameka i tana akamata anga i tana au angaanga anga maianga. Tana mea mua i anga mai ko tetai Tamaiti “ko te kakā oki aia [o te Atua] tapunui, e ko te tutu tikai nona uaorai” mei tona tuakaouanga mairai. (Ebera 1:​1-3) E taka ke teianei Tamaiti, na te Atua anake ra i anga mai. No reira, i riro ei na roto mai i teianei Tamaiti i angaia mai ei etai atu kia vai mai: te aronga mua ko te au angera i te rangi ra, i muri akera ko te au tangata i te enua nei. (Iobu 38:7; Luka 3:38) Pouroa teianei aronga katoatoa kua riro ei pamiri no te ao katoa e pini ua ake. Kia ratou katoatoa ra, ko Iehova to ratou Atua, Tei Ngateitei i te Ao Katoa e Pini Ua Ake, e to ratou Metua aroa oki.

3. (a) Eaa ta tatou pouroa i akatuangaia mai mei to tatou nga metua mua ra? (e) Eaa te apinga aroa ta Iehova i rave no te anaunga a Adamu ra?

³ I te akaapa angaia to tatou nga metua mua ra kia mate atu ei nga tangata rave ara akakoroia ra, kua akaateaia atu  raua mei Edene e kua akakoreia atu e te Atua. Kua kore atu raua ei tuanga no tana pamiri i te ao katoa e pini ua ake. (Genese 3:​22-24; Deuteronomi 32:4, 5) Pouroa tatou e anaunga na raua, no reira kua anauia tatou ma te au manako ki i te ara. Inara kua kite a Iehova e ko tetai papaki mei roto mai i te anaunga a Adamu raua ko Eva ka inangaro i te tuatua tika. No reira kua rave aroa Aia i tetai akapapaanga e raukai ia ratou “te rangatira meitaki o te tamariki a te Atua ra.”​—Roma 8:​20, 21.

Kua Ngere to Iseraela i te Turanga Akaperepereia

4. Eaa te tika ta Iehova i oronga atu ki to Iseraela i taito ra?

⁴ I etai 2,500 mataiti i muri ake i te anga maianga ia Adamu, kua akatotoaia mai e Iehova ki etai au tangata te tika no tetai pirianga takake ma Ia katoa ra. Kua iki aia i to Iseraela i taito ra kia riro ei iti tangata nona e kua oronga atu i tana Ture kia ratou. (Genese 12:1, 2) Kua akapapa aia ia ratou ei iti tangata e kua taangaanga ia ratou ei raveanga i tana akakoro anga. (Deuteronomi 14:1, 2; Isaia 43:1) Inara, te vaira rai ratou i roto i to ratou tapekaanga ki te ara e te mate, no reira kare ratou i rekareka i te tu rangatira kaka ta Adamu raua ko Eva ra i kite i te akamata anga maira.

5. I akapeea to Iseraela i ngere ei i to ratou turanga takake ma te Atua ra?

⁵ Inara, e turanga akaperepereia to Iseraela ma te Atua ra. Tei ia ratou katoa oki te apainga kia akangateitei ia Iehova ei Metua no ratou e kia angaanga rotai ma tana akakoro anga. Kua akaketaketa maira Iesu i te puapinga o ta ratou akatupu anga i taua apainga ra. (Mataio 5:​43-48) Inara, kare te iti tangata o Iseraela i rave i teia. Noatu e kua karanga taua au ngati Iuda e e “okotai rai o matou metua, ko te Atua,” kua akakite a Iesu e ko ta ratou au angaanga e te vaerua ta ratou i akaari ra kua patoi i ta ratou tuatua.  (Ioane 8:​41, 44, 47) I te 33 T.N., kua akaopeia te Ture e te Atua ra, e kua ope te pirianga takake o Iseraela kiaia. Inara kua riro ainei te aiteanga o teianei e kare te au tangata e rekareka i tetai pirianga akaperepereia ma te Atua ra?

Akaputuanga i “To te Rangi”

6. Eaa te akakoro anga o te “akaaerenga” ta Paulo i taiku ra ia Ephesia 1:9, 10?

⁶ Kua akakite mai te apotetoro ko Paulo e ko tetai papaki i roto i te au tangata ra ka rauka kia rekareka i tetai pirianga takake ma te Atua ra. Ei akatauanga, no runga i ta Iehova akanoonooanga e raukai i te aronga tei akarongo kia riro ei au mema no Tona ngutuare, kua tata a Paulo: “E kua akakite mai [te Atua] ia tatou i te tuatua ngaro o tona anoano, i tona uaorai inangaro takinga-meitaki i akakoroia e ia i roto iaia uaorai: E kia tae ki te akaaerenga i te openga tikai o te au tuatau ra, kia tavaitai aia i te au mea katoatoa i te Mesia ra, to te rangi, e to te ao katoa nei: ei iaia rai.” (Ephesia 1:9, 10) Tei roto teianei “akaaerenga” ia Iesu Karaiti uaorai. Na roto iaia, ka apaiia mai te au tangata ki roto i tetai turanga marekaia ki mua i te Atua. E numero kotingaia to etai ma te manakonako no te aereanga ki te rangi. E maata rava atu te numero te ka noo ki runga i te enua nei e mutu kore ua atu.

7. Koai ma “to te rangi”?

⁷ Te mea mua, i te akamataanga ia Penetekote 33 T.N., kua orongaia te manako anga ki “to te rangi” koia oki, te aronga te ka riro kia akatuangaia ma Karaiti ki roto i te Patireia i te rangi. Na runga i te tumuanga o to ratou akarongo i te puapinga o to Iesu ra atinga, kua akakiteia ratou e te Atua ei tuatua tika. (Roma 5:1, 2) I muri iora, kua kapitiia atu te au ngati Iuda e te au Kenitara, e “to te rangi” ko te katoa anga e 144,000. (Galatia 3:​26-29; Apokalupo 14:1) E toenga ua o ratou e vai nei i te enua.

 Akaputuanga i “To te Ao Katoa Nei”

8. Koai ma “to te ao katoa nei,” e eaa to ratou pirianga ma Iehova?

⁸ Ko taua akaaerenga rai te akaputu ra i “to te ao katoa nei.” E au mirioni ua atu te au tangata te akaputuia nei ma te manakonako anga no te nooanga ki runga i te enua nei e mutu kore ua atu. Taokotaiia atu ma te toenga o te aronga akatuangaia i te Patireia, te akamaata nei ratou i te ingoa o Iehova e te akateitei ra i tana akamori anga. (Isaia 2:2, 3; Zephania 3:9) Te karanga katoa ra ratou ia Iehova ei “Metua” no te mea te kite ra ratou iaia e ko te tumu no te ora. E te rekareka ra ratou i tetai turanga marekaia ki mua iaia na runga i te tumuanga i to ratou akarongo i roto i te toto akamaringiia o Iesu. (Apokalupo 7:9, 14) Inara i te mea e tu apa rai to ratou, ko te akatika anga ki katoa ei tamariki na te Atua te vaira ia i te tuatau ki mua.

9. Eaa te taputou ta Roma 8:21 e mou maira no te au tangata?

⁹ Ko teianei aronga e manakonako to ratou no te enua te tatari akatenga nei i teianei no te tuatau “kia akaora katoaia te au mea angaia nei i te tapeka o te mate.” (Roma 8:21) Ko taua akakore anga i te tapekaanga ka akamata mai i muri ake i ta Karaiti e tana au nuku i te rangi ra apaianga mai i te mate maata ki tona openga i te take o Aramakito ra. Ka riro te aiteanga o teianei e ko te akapouanga o ta Satani akatereanga kino o te au mea nei, kia aruia mai e te au akameitaki anga no te Tutara Anga Tauatini Mataiti o Karaiti i te mana Patireia ra.​—Apokalupo 19:​17-21; 20:6.

10. Eaa te imene akapaapaa ta te au tavini o Iehova ka imene?

¹⁰ Mei teaa ra te tereanga ki mua o te reira me taokotai te au tavini o Iehova i runga i te enua nei i te imene kapiti anga i te au manako ngakau o tona au tavini i te rangi ra, tei akakite rekareka ra: “E angaanga maata e te taka ke taau, e te Atu ra, e te Atua mana katoatoa; e aerenga tika e te tuatua-mou taau, e te Ariki o te aronga tapu e! Koai oki te ka kore e mataku ia koe, e te Atu, e te akakakā i toou  ingoa? Ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra au tutaki anga tika.” (Apokalupo 15:3, 4) Ae, pouroa te au tavini o Iehova ka taokotai i te akamori anga i te Atua mou anake ra. Noatu ko tei mate ra ka akatuakaouia e ka orongaia atu te tika kia kapiti atu i te akateiteianga i to ratou reo i te akapaapaa ia Iehova ra.​—Angaanga 24:15.

Te Tu Rangatira Umere ki Mua

11. Eaa te tu rangatira umere te ka rekarekaia e te aronga te ka ora atu i te mate maata ra?

¹¹ I muri ake i te mate maata, ma tona take ia Aramakito, kua tamaia te enua i te tu kino, kare ko Satani te Tiaporo “te atua o teianei ao ra.” Kare te aronga akamori ia Iehova e akakoromaki i to Satani mana rikarika. (2 Korinetia 4:4; Apokalupo 20:1, 2) Kare te akonoanga pikikaa e akatutu tarevake ia Iehova e e tavini oki ei mana akatataka ke i te taiate tangata nei. Kare te au tavini o te Atua mou ra e kite akaou i te tuatua tau kore e te akono anga tika kore i roto i nga rima o te aronga mana taoonga tangata nei. Mei teaa ra te tu rangatira te ka rekarekaia.

12. Akapeea te katoatoa e matara mai ei mei te ara e tona au tupuanga katoa oki?

¹² “I te Punua-mamoe a te Atua, ko tei apai ke atu i te ara a to te ao,” ka akono atu a Iesu i te puapinga o tona ra atinga kia takore atu i te au ara a te au tangata nei. (Ioane 1:29) Ia Iesu i te enua nei e kua akakore atu i te au ara a tetai tangata ara, kua rapakau atura aia i tei akakoreia atura tana ara ei akapapuanga i te reira. (Mataio 9:​1-7; 15:​30, 31) I roto i taua tu rai, a Iesu Karaiti, ei Ariki i te rangi no to te Atua ra Patireia, ka rapakau temeio ei i tei matapo ra, te murare, te taringa turi, te kopapa pirikoki ra, te manako akakinoia ra, e tetai atu aronga ma etai au maki.  (Apokalupo 21:3, 4) Pouroa te aronga akarongo ra ka riro kia akakoreia “te ture kino” i roto ia ratou kia riro ei to ratou au manako e te au angaanga kia akamareka ia ratou uaorai e i te Atua oki. (Roma 7:​21-23) Kia tae ki te openga o te Mareniamu ra, kua oti ratou i te apaiia mai ki te tu tangata apakore, i te ‘tu e kia aite’ ki to te Atua mou anake ra.​—Genese 1:26.

13. I te openga o te Tutara Mareniamu, eaa ta Karaiti ka rave, e eaa oki te tupu anga?

¹³ Me oti ia Karaiti i te apai mai i te au tangata ki te tu apa kore ua, i reira ka oronga akaou atu aia ki te Metua i te mana tei orongaia maira kiaia no teianei angaanga: “Ka tuku atu ei aia i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia. Ei iaia oki te au, e kia ope rava te au enemi katoa i te tukuia e ia ki raro ake i ona vaevae.” (1 Korinetia 15:​24, 25) Ka oti takiri i te Tutara Mareniamu o te Patireia tana akakoroanga; no reira kare e umuumuia teianei kavamani tauturu kia vai mai ki rotopu ia Iehova e te au tangata. E i te mea kua oti takiri te ara e te mate i te takore takiriia e kua oti te oko mai i te au tangata, kua ope te umuumuanga no Iesu ei oko. Te akataka maira te Pipiria: “Ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.”​—1 Korinetia 15:28.

14. Eaa ta te au tangata apa kore ra ka na roto atu, e no teaa ra?

¹⁴ Aru mai i teianei, ka orongaia ki te au tangata apa kore ua ra te tika kia akakite e ko ta ratou ikianga kia tavini atu i te Atua mou anake e mutu kore ua atu. No reira, i mua ake ka akatamariki katoai ia ratou ei tamariki nana, ka tuku atu a Iehova i taua au tangata apa kore katoatoa ra ki tetai timataanga openga. Ka tukua mai a Satani e tana au temoni mei te vaarua takere kore ra. Kare teianei e  riro ei kino tamou marie ki te aronga te inangaro tika ra ia Iehova. Inara ko tetai ua atu te ka tuku ia ratou uaorai kia takiia ki roto i te akarongo kore kia Iehova ka akapou mutu koreia, ma tei meameaau mua ra e tana au temoni oki.​—Apokalupo 20:​7-10.

15. Eaa te turanga te ka vai akaou mai i roto i te katoatoa o te au mea kite tei angaia maira e Iehova?

¹⁵ I reira a Iehova e akatamariki ei i te au tangata katoatoa tei apa kore ra e tei mou i to te Atua ra ngateitei i te tuatau o te timataanga openga ra. Mei te reira tuatau mai e aere ua atu, ka kapiti ratou ki te tu rangatira kaka no te au tamariki a te Atua ei tuanga no to te Atua ra pamiri i te ao katoa e pini ua ake. Te au mea ora kite katoa i te rangi e te enua nei ka taokotaiia i te akamorianga iaia i te Atua mou anake ra. Kua rauka ta Iehova ra akakoro anga autuanga kaka! Te anoano ra ainei koe kia riro mai ei tuanga no taua pamiri mataora, mutu kore ra i te ao katoa e pini ua ake? Me koia ia, te akamaroiroi nei matou ia koe kia akarongo i ta te Pipiria i tuatua ia 1 Ioane 2:17: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”

Uriuri Akaou Anga

• I mua ake i te meameaau i Edene ra, eaa te pirianga o te aronga akamori katoatoa kia Iehova ra?

• Eaa te apainga te vaira ki rungao i te aronga e tavini ra i te Atua?

• Koai ma te ka riro mai ei tamariki na te Atua, e akapeea te piri anga o teia ki te akakoro anga o Iehova no runga i te akamori anga taokotaiia?

[Au Uianga Apii]

 [Tutu i te kapi 190]

Ka rekareka te au tangata akarongo ra i roto i te ao parataito