Pene Toru

Kia Mou Ngaueue Kore i te Tuatua a te Atua

1. (a) Akapeea to Iseraela i taito ra i kite ei i te tika o te tuatua a te Atua ra? (e) Eaa te reira i tau ei kia manakoia e tatou?

“KUA kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou.” (Iosua 23:​14-16) Ko teia ta Iosua i tuatua ki te aronga pakari i Iseraela i muri ake i to ratou akamata anga i te noo ki te Enua Taputouia ra. Ae, kua tau kia irinakiia ta Iehova ra au taputou. Taua tataanga​—e te toenga katoa oki o te Pipiria​—kua akaoraia mai no tatou “penei e manakonakoanga to tatou.”​—Roma 15:4, NW.

2. (a) I teea tu i riro ei te Pipiria ei “mea akauruia mai e te Atua”? (e) I te kiteanga e e mea akauruia mai e te Atua te Pipiria ra, eaa ta tatou apainga i reira?

² Noatu ra e ko etai 40 tangata tata tei taangaangaia kia tata i te Pipiria, ko Iehova uaorai te Pu Tata. Te riro ra ainei te aite anga e nana tikai i arataki i te tataanga i te au mea ravarai i roto i te reira? Ae. Kua rave aia i teia na roto i tona vaerua tapu mana ririnui, koia tona mana rave angaanga. Kua tuatua mou maira te apotetoro ko Paulo: “Te au tuatua tapu katoa i tataia ra, e mea akauruia mai e te Atua . . . Kia apa kore te tangata o te Atua, ma te tau tikai i te au angaanga memeitaki katoa ra.” Te au tangata i te au ngai ravarai te irinaki ra i te reira te akarongo ra i te Pipiria e te patu ra i to ratou au oraanga kia tau ki te au apiianga i roto i reira.​—2 Timoteo 3:​16, 17; 1 Tesalonia 2:13.

 E Tauturu i Etai Atu kia Ariki i te Reira

3. Eaa te raveanga meitaki kia tauturu atu i te aronga e manganui kare ra e irinaki ana e te Pipiria ko te Tuatua ia a te Atua?

³ E manganui te aronga ta tatou e tuatua atura kare e piri mai ana ki to tatou irinaki anga e ko te Pipiria te Tuatua a te Atua. Akapeea e raukai ia tatou te tauturu ia ratou? E putuputu, e ko te tu meitaki e eeu atu i te Pipiria e ka akaari atu kia ratou eaa to roto i te reira. “E mea ora oki te tuatua a te Atua, e te ririnui, e kokoi maata oki to te reira i to te koke matarua ra . . . e te akara matariki oki i te manako e te vananga o te ngakau ra.” (Ebera 4:12) Kare “te tuatua a te Atua” i te tuatua enua mate; te ora ra ia! Te aere ririnui atura te au taputou o te Pipiria ki te tupu anga. Te mana o te tuatua no te Pipiria ki runga i te akakeu anga i te ngakau mou o tetai peretana ra e maata atu te ririnui i to tetai ua atu apinga ta tatou uaorai ka tuatua.

4. Eaa te au akataka anga no te au tuatua mou o te Pipiria ra tei taui i te tu manako o tetai papaki tangata ki te Pipiria ra, e no teaa ra?

⁴ Te akaraanga i te ingoa o te Atua i roto i reira kua akariro i te aronga e manganui kia akara oonu atura ki roto i te Pipiria. Ko etai atu kua iki kia apii i te Pipiria i te akaari ia atuanga eaa ta te reira tuatua no te akakoro anga no te oraanga, eaa te Atua i tuku uai i te au raveanga kikino, te puapinga maata o te au tupu anga i teianei, me kare te manakonako anga no te ora mutu kore ki runga i tetai enua parataito ra. I te au enua te aro atura te au ravenga akonoanga i te au tangata ki te au tamanata anga a te au vaerua rave kino ra, te akataka anga te Pipiria ra e na teaa i akatupu i teia e akapeea e raukai te takore atu kua akatupu i te manako inangaro. Eaa ra teianei au tumu i akamanako maatai i te aronga ngakau tae? No te mea ko te Pipiria anake te tumu no te akakite anga tau kia irinakiia no runga i taua au tumu maata katoa ra.​—Salamo 119:​130.

5. (a) Me tuatua tetai au tangata e kare ratou e irinaki ana i te Pipiria, penei eaa te au tumu? (e) Akapeea tatou me tauturu atu i taua au tangata ra?

⁵ Inara, ka peea me ka akakite mai te au tangata kia tatou e  kare ratou e irinaki ana i te Pipiria? Ka tau ainei kia akaopeia te tuatua anga? Kare me te mareka ra ratou kia uriuri manako tau. Penei te manako ra ratou i te Pipiria ei puka na Kerititome. Ko tona tu matauia no te pikikaa e te pirianga tau kore ki te au poritiki, pera katoa oki tana patianga putuputu no te moni, penei ko te tumu ia no to ratou tu reka kore i te Pipiria. Eaa i kore ei e ui atu me ko te tika tera? Te akaapa anga a te Pipiria i to Kerititome au aerenga i teianei ao, ma te au tumu no te tuke anga i rotopu ia Kerititome e te akonoanga Kerititiano mou ra, penei ka akakeu i to ratou inangaro.​—Mika 3:​11, 12; Mataio 15:​7-9; Iakobo 4:4.

6. (a) Eaa te akairinaki ra ia koe uaorai e ko te Pipiria te Tuatua a te Atua? (e) Eaa etai atu papa manakoanga ka rauka kia taangaangaia ei tauturu i te au tangata i te ariki e no ko mai i te Atua tikai te Pipiria ra?

⁶ No etai atu, penei ko tetai uriuri anga tika tikai i te au akakite anga e ko te Pipiria e mea akauruia mai e te Atua ka riro ei tauturu. Eaa te akapapu meitaki maira kia koe e no ko mai te Pipiria i te Atua ko Iehova ra? Ko ta te Pipiria uaorai i tuatua no tona akamata anga mai? Me kare no te tika ainei e tei roto i te Pipiria etai totou e manganui te akaata maira i etai au kite akatakaia no te tuatau ki mua ra, te au totou tei tika ra e no ko mai i tetai tumu teitei atu i te tangata nei? (2 Petero 1:​20, 21) Penei no te akakite anga mai o te Pipiria i te tu meitaki o te rotai i roto ra, noatu e 40 tangata i tataiai i te tuatau e tere atu i etai 1,600 mataiti? Me kare no tona tu tika tikai i te pae taineti i te tuke anga ma etai atu au tataanga no taua au tuatau ra? Me kare te au tu tau o tona aronga tata ra? Me kare to te reira akaora anga noatu te au tauta anga kia akapouia te reira? Ko taau uaorai i kite ei mea meitaki kia manakoia ka rauka katoa kia taangaangaia ei tauturu i etai atu au tangata ke ra. *

 Ta Tatou Tatauanga Pipiria

7, 8. (a) Eaa ta tatou ka tau kia rave ma te Pipiria ra? (e) Eaa ta tatou ka umuumu i te pae atu i ta tatou uaorai tatauanga i te Pipiria ra? (nga) Akapeea i raukai ia koe uaorai te kiteanga i te au akakoro anga a Iehova ra?

⁷ Kapiti atu ki te tauturuanga ia etai atu kia irinaki i te Pipiria, ka tau tatou kia akataka i te tuatau kia tatau putuputu i te reira. Te rave ra ainei koe i te reira? O te au puka katoatoa tei neneiia, ko teia nei te mea puapinga rava atu. Inara, kare te aiteanga o teia e me ka tatau tatou i te reira ko tatou uaorai kare e apinga ke e anoanoia e tatou. Te akamatakite maira te au Tuatua Tapu i te akataka keanga ia tatou uaorai. Kare tatou e tau kia manako e ka rauka ia tatou te au pauanga ki te au mea ravarai na te kimikimi anga takake ra. Te apii anga ko koe anake e te aerenga putuputu ki te au uipaanga o te au tangata o te Atua ra te anoanoia ra me kia riro tatou ei au Kerititiano tau.​—Maseli 18:1; Ebera 10:​24, 25.

⁸ No teia, te akakite maira te Pipiria no tetai opita Etiopia tei tatau ra mei te totou a Isaia. Kua arataki atura tetai angera ia Philipa tutu evangeria Kerititiano ra kia ui atu ki taua tangata ra: “Te kite na koe i taau e tatau na?” Kua taakaaka ua, ta te Etiopia ra pau anga: “Eaa au e kite ei, naringa e tangata te akakite mai kiaku?” Kua raurau atura aia ia Philipa kia akataka i taua Tuatua Tapu. I teianei, kare a Philipa i tetai tei tatau takake ra i te Pipiria tei oronga ua maira i tona manako anga no te au Tuatua Tapu ra. Kua tamou marie aia i te pirianga vaitata ma te akaaerenga akara mataia a te Atua ra. No reira kua rauka iaia te tauturu atu i taua tangata Etiopia ra kia puapingaia mei te apiianga ta Iehova i akapapa maira na roto i taua akaaerenga ra. (Angaanga 6:5, 6; 8:​5, 26-35) Mei te reira katoa i teia tuatau nei, kare e rauka i tetai te kiteanga tika no te au akakoro anga a Iehova ra koia anake ua. Te umuumu katoaia ra e tatou te tauturu ta Iehova e oronga aroa ua maira na roto i tana akaaerenga akara mataia ra.

9. Eaa te porokaramu tatauanga Pipiria ka akapuapinga ia tatou katoatoa?

 ⁹ Ei tauturu ia tatou kia kite i te Pipiria, te oronga maira te akaaerenga a Iehova i te au apinga Tuatua Tapu meitaki i roto i te au puka tuke tuke. Kapiti katoa, ko tetai papa anga no te tatauanga putuputu i te Pipiria te akanooia maira na tatou i roto i te Apii Orometua Teokaratiki te rave ia ra i te au putuputuanga katoatoa o te Au Kite o Iehova i te ao katoa. E maata te puapinga ka rauka mai i taau uaorai akara matatioanga i te au Tuatua Tapu ra. (Salamo 1:​1-3; 19:7, 8) E akono i tetai tauta anga taka ke kia tatau putuputu i te Pipiria. Noatu rai me kare koe e kite ki katoa i te au apinga ravarai, ko te raukaanga ia koe tetai akara anga i te katoa anga o te au Tuatua Tapu ra ka riro ei puapinga maata ia. Ei akatauanga, me ka tatau koe e a ua me kare e rima kapi i te ra okotai, ka rauka kia oti ia koe te Pipiria katoa i te mataiti okotai ra.

10. (a) Aea koe e rave ei i taau tatau anga Pipiria? (e) Koai atu ka tau kia kapitiia atu i te tatauanga i te Pipiria ra, e eaa ra i puapinga maatai kia putuputu te rave anga?

¹⁰ Ko teea te tuatau e raukai ia koe taau tatauanga Pipiria? Me ka akataka ke koe noatu e 10 me kare e 15 miniti i tetai ra no te reira, ka puapinga maataia koe. Me kare, e tauta kia papa i te au taime putuputu no te reira i te epetoma taki tai, ka mou ei ki taau papa anga ra. Me kua akaipoipo koe, ka rauka kia rekareka korua ko toou tokorua i te tatau anga maata i te Pipiria tetai ki tetai. Me e tamariki etai kua pakarikari mai kia tatau, penei ka rauka ia ratou te tatauanga maata ma te taui aereanga. Ka tau te tatau anga Pipiria kia riro ei ravenga no te oraanga roa mei te kaikai anga rai. Mei taau rai i kite ana, me kare e meitaki te au kaikai anga o tetai peretana ra, ka kino rai tona ora anga kopapa. Mei te reira, katoa oki, to tatou ora anga pae vaerua, e no reira to tatou oraanga mutu kore, tei runga i to tatou akamatutu anga putuputu i “te au mea katoa ra no roto mai i te vaa o te Atua ra.”​—Mataio 4:4.

 Ta Tatou Akakoroanga

11. Eaa te akakoro anga tau na tatou i te tatauanga i te Pipiria?

¹¹ Eaa te akakoroanga tau na tatou i te tatauanga i te Pipiria? Kare e tau ta tatou akakoroanga kia tatau ua i tetai numero o te au kapi. Ka tau to tatou akakeu anga kia meitaki atu te kite i te Atua kia raukai ia tatou te akatere atu i to tatou inangaro nona e te akamori ariki anga oki iaia ra. (Ioane 5:​39-42) Ka tau to tatou tu manako kia aite atu ki to te tata Pipiria tei tuatua ra: “E akakite mai koe kiaku i to au arataa, e Iehova; e apii mai koe iaku i to au aerenga.”​—Salamo 25:4.

12. (a) Eaa ra i umuumuiai kia rauka te “kite tika,” e eaa te tauta anga i te tatauanga penei ka anoanoia kia raukai taua kite ra? (e) Na te taangaanga anga i teaa nga tumu e a ra penei ka puapingaia tatou kia akataka eaa ta tatou e tatau ra i roto i te Pipiria? (Akara i te pia i te kapi 30.) (nga) E akatutu mai i teia au tumu na te pauanga i te au uianga orongaia maira i teianei parakaoa. E akara i te au tuatua tapu tei taikuia ra inara kare i tataia.

¹² I te rauka anga ia tatou te apiianga mei ia Iehova ra, e mea tau kia inangaro tatou kia rauka te “kite tika.” Me kare te reira, akapeea e raukai ia tatou kia akono tika i te Tuatua a te Atua i roto i to tatou uaorai oraanga me kare te akataka tika atu i te reira kia etai ke ra? (Kolosa 3:10; 2 Timoteo 2:15) E raukai te kite tika te umuumuia ra e kia tatau matakite tatou, e me e tuanga oonu tetai, penei ka tau kia tatau tatou i te reira kia tere atu i te okotai taime kia raukai te mou i te aite anga o te reira. Ka puapinga katoa ia tatou me ka akataka taime tatou kia tamanako i te tumu, e te manakoanga i te reira mei etai au tu ke ke ra. E a au ravenga puapinga no te manakoanga ta tatou ka uriuri manako te akaariia maira i te kapi 30. E manganui te au tuanga Tuatua Tapu ka rauka kia uriuri manako puapingaia na te taangaangaanga i tetai me kare kia tere atu o teianei au tumu manako. Ia koe ka pau ei i te au uianga i nga kapi te aru mai nei, ka kite koe e akapeea te reira i tikai.

(1) E putuputu, te tuanga o te Tuatua taau e tatau ra ka akakite atu kia koe i tetai apinga no to Iehova ra tu ei peretana. Ei akatauanga,  ia Salamo 139:​13, 14, ka kite tatou i to te Atua ra manako anga maata no te aronga kare ra i anauia ake: “Naau i tapoki iaku i roto i te kopu o toku metua vaine ra. Ka akameitaki au ia koe, e mea mataku e te taka ke oki toku anga angaia: e mea vavaria taau au angaanga, kua kite pu tikai oki toku vaerua.” Mei teaa ra te umere o ta Iehova au angaanga anga maianga ra! Te tu i angaia mai ei te au tangata nei te akakite ra i tona aroa maata no tatou.

I te manako anga i ta Ioane 14:9, 10 i tuatua maira, me tatau tatou i akapeea ta Iesu akono anga ia etai ke ra, te kite tika ra tatou e akapeea ta Iehova uaorai ka rave. Ma te reira i roto i te manako, eaa ta tatou ka taopenga no Iehova mei te au tupuanga tei tataia ia Luka 5:​12, 13 e ia Luka 7:​11-15 ra?

(2) E akamanako ana i akapeea ta te tataanga turu anga i te tumu tuatua o te Pipiria ra: i te akatika anga i to Iehova ra tu ngateitei e te akatapuanga i tona ingoa na te Patireia i raro ake ia Iesu Karaiti, te Uanga i taputouia maira.

I akapeea te akaketaketa anga a Ezekiela raua ko Daniela i te tumu tuatua o te Pipiria? (Ezekiela 38:​21-23; Daniela 2:44; 4:17; 7:​9-14)

Akapeea ta te Pipiria ra akataka anga meitaki ia Iesu ei Uanga taputouia ra? (Galatia 3:16)

Akapeea ta Apokalupo akataka anga i te take mekameka no te tumu tuatua Patireia ra? (Apokalupo 11:15; 12:​7-10; 17:​16-18; 19:​11-16; 20:​1-3; 21:​1-5)

(3) E ui kia koe uaorai akapeea koe i te akapirianga kia koe uaorai i taau e tatau ra. Ei akatauanga, kua tatau tatou ia Exodo tae roa ki te openga o Deuteronomi no to Iseraela ra ainga tau kore e te meameaau anga. Kua kite tatou e ko taua au tu akono ra e te au angaanga kua apai mai i te au tupuanga kikino. No reira, ka tau tatou kia akakeuia kia akamareka ia Iehova na te kore anga e aru ii te akatauanga kino o Iseraela.  “Rokoia iora ratou e taua au mea katoa ra, ei akaraanga: e ei ako mai oki ia tatou, i te aronga i rokoia mai i te openga o te au tuatau nei, i tataiaʼi.”​—1 Korinetia 10:11.

Eaa te apiianga no tatou i te tataanga no ta Kaina tamateanga ia Abela ra? (Genese 4:​3-12; Ebera 11:4; 1 Ioane 3:​10-15; 4:​20, 21)

Te piri katoa ra ainei ta te Pipiria akoanga i te au Kerititiano e manakonako anga to ratou no te rangi ki te aronga e manakonako anga to ratou no te ora mutu kore ki runga i te enua nei? (Numero 15:16; Ioane 10:16)

Noatu rai me e turanga meitaki to tatou i roto i te putuputuanga Kerititiano ra, eaa tatou i tau ei kia akamanako e akapeea te akono maata atu i te akoanga Pipiria ta tatou kua kite ra? (2 Korinetia 13:5; 1 Tesalonia 4:1)

(4) E akamanako ka akapeea koe i te taangaanga anga i taau e tatau ra ei tauturu ia etai ke ra. Te au tangata pouroa te manako  ra i te au manamanata no te ora anga kopapa, no reira ka rauka ia tatou kia tatau atu kia ratou i ta Iesu i rave ra kia akatutu i tana ka rave maata roa atu i tona mana Patireia ra: “E manganui te tangata i aere mai kiaia ra, apai katoa maira i te pirikoki, te matapo, te murare, te paruparu, e te au maki ke katoa e manganui, . . . e kua akaora atura aia ia ratou.”​—Mataio 15:30.

Penei koai ka tauturuia na te tataanga no te tuakaou anga o te tamaine a Iairo ra? (Luka 8:​41, 42, 49-56)

13. Eaa te au tupu anga ka rauka ia tatou kia tapapa atu mei tetai porokaramu tatau anga i te Pipiria e te apii anga ma te akaaerenga a Iehova ra?

¹³ Mei teaa ra te tutakianga apinganui no te tatauanga i te Pipiria me akamanako tatou i nga tumu e a ra tei taikuia i runga akenei! E tika ra, e akaaoanga te tatauanga i te Pipiria. Inara ka puapingaia tatou i te reira no te oraanga katoa ra, no te mea ia tatou e tatau ra i te au Tuatua Tapu, ka tupu maroiroi atu tatou i te pae vaerua. Ka akapiri vaitata atu te tatauanga putuputu i te Pipiria ia tatou ki to tatou Metua aroa ra, kia Iehova, e to tatou au taeake Kerititiano oki. Ka tauturu te reira ia tatou i te akonoanga i te akoanga kia rave “i te tāpu akakite anga i te tuatua ora.”​—Philipi 2:16.

[Tataanga i Raro Ake]

Uriuri Akaou Anga

• Eaa ra i tataiai te Pipiria e i akaoraiai kia tae mai ki to tatou tuatau nei?

• Akapeea e raukai ia tatou te tauturu ia etai ke ra kia ariki i te Pipiria ra?

• Eaa ra i puapingai taau uaorai tatauanga putuputu i te Pipiria? Na te taangaanga i teea nga tumu manako e a ra penei ka puapingaia tatou i te akataka anga i ta tatou e tatau ra?

[Au Uianga Apii]

[Tutu i te kapi 30]

ME TATAU KOE I TETAI TUANGA O TE PIPIRIA, E AKAMANAKO

Eaa ta te reira e akakite maira kia koe no Iehova ei peretana

Akapeea te reira i te piri anga ki te tumu katoa o te Pipiria

Akapeea te reira i te akakeu i toou oraanga

Akapeea taau raveanga i te reira ei tauturu i tetai