Pene Varu

‘Kukumianga i te Au Vaerua Kikino’

1. Eaa te angaanga a te au vaerua kikino ra i riro ei kia manako maataia e tatou?

E MANGANUI te au tangata te aviri ra i te manako e te vaira te au vaerua kikino. Inara kare te reira i te tumu no te takatakataanga. Me te irinaki ra te au tangata i te reira e me kare, te vai maira te au vaerua kikino, e te tauta ra ratou i te tuku i te taomianga ki runga i te au tangata ravarai. Kare te aronga akamori ia Iehova i atea ke mai. Ko te tika ra, ko ratou te takete maata. Te akamatakite maira te apotetoro ko Paulo i taua tika ra, i te na koanga: “Kare oki te tangata anake ta tatou e kukumi nei, ko te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei.” (Ephesia 6:12) I to tatou tuatau nei kua tae te taomianga i tukuia maira e te au vaerua kikino ki tetai take teitei rava no te mea kua uriia mai a Satani mei te rangi e te riri maata ra, i te kiteanga e kua poto tona tuatau.​—Apokalupo 12:12.

2. Akapeea e raukai ia tatou kia re i te kukumi anga i te au vaerua maroiroi atu i te tangata?

² Ka rauka ainei kia re i tetai kukumi anga i te au mana vaerua maroiroi atu i te tangata ra? Ae, inara na te irinaki takiri anake ki runga ia Iehova. Ka tika tatou kia akarongo atu kiaia e kia akono i tana Tuatua. Na te raveanga i te reira, ka kopae ke tatou i te maata anga o te kino pae kopapa, te tu akono, e te manako ngakau e kitea ra e te aronga i raro ake i ta Satani akatereanga.​—Iakobo 4:7.

 Au Tutara o Teianei Ao i te Reva Nei

3. Koai ma ta Satani e patoi kino atura, e akapeea ra?

³ Kua akataka meitaki maira Iehova kia tatou i te turanga o te ao nei i tana akara anga mai i te reira mei tona ngai teitei i te au rangi ra. Kua oronga atura aia ki te apotetoro ko Ioane i te orama i akatutuia maira Satani ei “taae maata muramura.” Kua papa aia kia apuku, i te Patireia Mesia o te Atua ra me ka rauka iaia, i tona anauia maianga i te rangi ra i te 1914. I te koreanga e rauka te reira, kua tuku maira Satani i te vaipuke patoianga riri i te aronga o taua Patireia ra i te enua nei. (Apokalupo 12:​3, 4, 13, 17) Ka akapeea ra a Satani i te rave anga i teia tamakianga? Na roto i tona uaorai au tangata nei.

4. Koai te tumu o te mana o te au kavamani tangata nei, e akapeea tatou i kite ei i te reira?

⁴ I muri akera kua akaariia atu kia Ioane tetai puaka taae e itu ona mimiti, e rau ngauru oki tara, e mana to taua taae ra i “te au kopu katoa, e te au reo, e i te pa enua.” Te akatutu maira taua taae ra i te akatereanga poritiki i te ao katoa nei. Kua akakiteia kia Ioane e “kua oronga maira te taae [ko Satani te Tiaporo ra] i tona uaorai maroiroi, e tona uaorai terono, e te mana maata nona.” (Apokalupo 13:​1, 2, 7) Ae, ko Satani te tumu no te maroiroi e te mana no te au kavamani tangata nei. No reira, mei ta te apotetoro ko Paulo i tata ra, te “au tutara o teianei ao” tikai ko “te au vaerua kikino i te reva nei,” te akatere nei i te au kavamani a te tangata. Ka tau te au tangata katoatoa te ka akamori ia Iehova kia mou i te puapinga maata o te reira.​—Luka 4:5, 6.

5. Te akaputuia atura te au tutara poritiki ki teaa i teianei?

⁵ Noatu rai e manganui te au tutara poritiki te karanga ra e akonoanga ta ratou, kare takiri tetai o te au pa enua ra e kauraro ana ki ta Iehova tutara anga me kare ki tana Ariki akataoongaia ra, ko Iesu Karaiti. Pouroa ratou te tauta ketaketa ra kia mou atu i to ratou uaorai mana. I teia tuatau, mei ta te tataanga ia Apokalupo e akakite maira te  akaputuputu ra te “au vaerua demoni” i te au tutara o teianei ao ki “te tamaki i taua rā maata o te Atua mana katoatoa ra” ia Aramakito.​—Apokalupo 16:​13, 14, 16; 19:​17-19.

6. Eaa ra i umuumuiai te matakite kia kopae ke i te akariro anga kia turu i te akatereanga a Satani?

⁶ I te au ra ravarai, te akatukiia atura te oraanga o te au tangata e te poritiki, te akaaereanga tangata, te pae o te puapinga, e te au tamaki anga akonoanga te vevete ra i te ngutuare tangata. I roto i teia au tamaki anga, e mea matauia no te au tangata kia akapiri atu kia ratou​—te tuatua anga me kare i etai atu tu​—ma te pa enua, te kopu, te pupu reo me kare te pupu tangata e tuanga ra ratou. Noatu me kare te au tangata e o tika atu ana ki roto i etai tamaki anga, e putuputu ratou i te kite anga ia ratou uaorai i te akaperepere anga i tetai pae ki rungao i tetai. Inara noatu me ko teea tangata me kare te tumu ta ratou ka turu, koai tikai ta ratou e turu ra? Te akataka meitaki maira te Pipiria: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Akapeea, i reira, e raukai i tetai tangata kia kopae atu i te arataki anga ke ma te toenga o te au tangata nei? Na te oronga anake i tana turu anga ki katoa ki te Patireia o te Atua ra e te tamou takirianga i te tu neutara i te au tamaki anga o teianei ao.​—Ioane 17:​15, 16.

Te Au Ravenga Kikite a te Vaerua Kino Ra

7. Akapeea te akaari anga i to Satani ra tu karape i te taangaanga anga i te akonoanga pikikaa ra?

⁷ I te au tuatau katoa o te tuatua enua, kua taangaanga a Satani i te takinga kinoanga na te tuatua e te pae kopapa oki kia akaariu ke i te au tangata mei te akamori anga mou. Kua rave katoa aia i etai au tu akavare anga​—te au angaanga e te au ravenga kikite. Kua akono kikite katoa aia i tetai tuanga maata o te au tangata ki roto i te poiri na roto i te akonoanga pikikaa, i te akariroanga kia manako ratou e te tavini ra ratou i te Atua. I te ngereanga i te kite tika no te Atua e te inangaro no te tuatua mou, penei kua akavareia ratou e te au tavini  anga ngaro e te au akonoanga manako ngakau ua me kare kua rekaia e te au angaanga mana ra. (2 Tesalonia 2:9, 10) Inara te akamatakiteia maira tatou e noatu mei roto mai i te aronga tei akono ra i te akamorianga mou, “e akaruke ei tetai papaki . . . , i te akono anga atu i te au vaerua pikikaa, e te tuatua o te au demoni ra.” (1 Timoteo 4:1) Akapeea e tupu ei te reira?

8. Akapeea e raukai ia Satani te akavare ia tatou ki roto i te akonoanga pikikaa noatu rai e me te akamori ra tatou ia Iehova?

⁸ Na te tu kikite, ka akono ua atu te Tiaporo ki runga i to tatou au tu paruparu. Te mou ua ra ainei te mataku i te tangata ki runga ia tatou? Me koia ia, penei ka tuku ua tatou ki te taomi anga mei ko mai i te au kopu tangata ra me kare te au tangata tupu kia piri atu ki roto i te au ravenga tei akamataia maira i te akonoanga pikikaa. E akaparau ainei tatou? Me koia ia, penei ka riri tatou me akoia mai me kore ra me kare etai ke ra e ariki mai i te au manako ta tatou e akakitekite ra. (Maseli 15:10; 29:25; 1 Timoteo 6:3, 4) Koi kore ei e akatikatika i to tatou manakoanga kia tau ki te akatauanga o Karaiti, penei ka ariu atu tatou ki te aronga ‘e navenave ei to tatou taringa’ na te tuatuaanga e ka rava ua i te tatauanga i te Pipiria e te akonoanga i te oraanga meitaki. (2 Timoteo 4:3) Me ka kapiti atu tatou ki tetai atu pupu akonoanga me kare ka mou ua ki ta tatou uaorai akonoanga kare i te mea puapinga kia Satani, tera ua kia kore tatou e akamori ia Iehova i te tu ta te Atua e arataki maira na roto i tana Tuatua e tana akaaerenga oki.

9. Akapeea a Satani i te taangaanga kikite anga i te ainga kia akatupu i tana au akakoroanga?

⁹ Te akavare kikite katoa maira Satani i te au tangata kia akamerengo atu i to ratou au inangaro matauia na roto i te au tu tarevake. Kua rave aia i teianei ma te inangaro no te au pirianga ainga. I te kopaeanga i te tu tau i te Pipiria, e manganui i te ao nei te manako ra i te pirianga ainga i rotopu i nga tangata kare ra i akaipoipoia e te tau ra ia ei akamareka anga  me kare ei akapapuanga e kua pakari ratou. E ka peea oki te aronga kua akaipoipo? E manganui kua akaturi. E noatu me kare e tarevake to ratou akaipoipo anga, e manganui te aronga te kimi ra i te kopae anga me kare akatakake anga kia rauka ia ratou te noo kapitianga ma tetai ke atura. Te akakoro ra ta Satani akapapa anga kikite kia akariro i te au tangata kia akono i te navenave anga i teianei, na te akavareanga ia ratou kia manako kore i te au tupu anga roa kare ia ratou anake e etai ke ra mari ra ki runga tikai i to ratou pirianga ma Iehova e tana Tamaiti.​—1 Korinetia 6:9, 10; Galatia 6:7, 8.

10. Akapeea ta Satani tauta anga kia akaanga ke i to tatou tu manako i te ainga tau kore e te ta ua?

¹⁰ Tetai atu inangaro natura ko te tamataora anga. Me e tau, ka riro ia ei pumaana anga i te pae kopapa, te manako, e te manako ngakau oki. Inara ka akapeea ta tatou akono anga me taangaanga kikite a Satani i te atianga no te tamataora anga kia tauta i te akaanga ke i to tatou manakoanga mei to te Atua ra? Ei akatauanga, kua kite tatou, e te makitakita ra Iehova i te ainga tau kore e te ta ua. Me akakite mai te au teata, te porokaramu tivi, me kare te au ravenga teata i taua au apinga ra, ka noo ua atu ainei tatou e akarakara i taua au apinga katoa ra? E akamanako katoa oki, e ka akono a Satani i taua au apinga ra kia maata atu te taeke anga i te vaitata anga te tuatau no tona akapouanga, i te mea “te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.” (2 Timoteo 3:13) No reira ka tau tatou kia tamou marie i te paruru anga i ta Satani au ravenga.​—Genese 6:13; Salamo 11:5; Roma 1:​24-32.

11. Na roto i teea au tu noatu te tangata kua kite ra i te tuatua mou no te purepure i te riro anga kia ereereia me kare aia e matakite?

¹¹ Kua kite katoa tatou e te aronga e rave i tetai ua atu tu purepure​—te raveanga tauraatua, te raveanga angaanga taunga, me kare te tautaanga kia komunikeiti ma tei mate ra​—e au mea rikarika ia kia Iehova. (Deuteronomi 18:​10-12) I te  tamouanga i te reira i te manako, kare tatou e tamanako i te aere atu ki te au taunga vaerua ra, e kare katoa oki tatou e turou atu ia ratou ki roto i to tatou ngutuare kia rave i ta ratou au peu temoni. Inara ka akarongo atu ainei tatou ia ratou me ka mama mai ki runga i ta tatou tivi me kare i te Internet? Noatu rai e kare tatou e ariki i te akono anga mai a tetai taunga purepure, ka tapeka ainei tatou i tetai taura ki runga i te rima o ta tatou tamaiti anau ou, ma te manako anga e penei ka paruru ia taua tamaiti ra i te kino? I te kite anga e te akaapa ra te Pipiria i te tukuanga i tetai tia ki runga i etai ke ra, ka akatika ainei tatou i tetai hypnotist kia akatere i to tatou manako?​—Galatia 5:​19-21.

12. (a) Akapeea te akatangi imene i te taangaangaia kia tamanako tatou i te au manako ta tatou kua kite e e tarevake? (e) Penei ka akapeea te kakau e te tu o te rouru o tetai tangata, me kare te tuatua anga i te akakite anga i te akaperepere anga no te aronga kare ra a Iehova e mareka i to ratou tu oraanga? (nga) Eaa te umuumuia ra i to tatou tuanga kia kopae ke tatou i te topaanga ki ta Satani au ravenga kikite ra?

¹² Te tuatua ra te Pipiria e ko te akaturi e te au tuatua viivii ravarai auraka rava (ma te au tu manako viivii) e akaikiia i roto ia tatou. (Ephesia 5:​3-5) Inara ka akapeea me ko taua au tumu ra te na roto maira i te akatangi anga imene marekaia te tangi anga, tetai tiunu ngoie ua te maaraia, me kare tetai tukituki anga tamouia? Ka akamata ainei tatou i te taokioki anga i taua akatangianga te akakaka ra i te ainga ma te kore e akaipoipo, te rave apinga akakona no te navenave anga, e etai atu au raveanga ara ra? Me kare ia tatou e kite ra e kare tatou e tau kia aru i te tu oraanga o te au tangata tei rave ra i taua au apinga ra, te akono ra ainei tatou kia akataka atu ia tatou uaorai ma ratou katoa na te aruanga i to ratou tu kakau, ta ratou akono i te rouru, me kare ta ratou tuatuaanga? Mei teaa ra te kino o te au ravenga ta Satani e taangaanga ra kia akavare i te au tangata kia aru atu i tona uaorai mataara no te manako anga viivii ra! (2 Korinetia 4:3, 4) Kia tamou kia kore e topa atu ki tana au ravenga akavare ra, ka tika tatou kia  kopae ke i te panu atuanga ma teianei ao. Ka tau tatou kia tamou ki roto i te manako koai ma “te au tutara o teianei ao poiri” e kia kukumi akatenga oki i to ratou mana.​—1 Petero 5:8.

E Akapapa kia Re

13. Akapeea e raukai i tetai ua atu o tatou, ma to tatou au tu apa ua nei, kia re i te ao ta Satani e tutara nei?

¹³ I mua ake i tona matenga, kua tuatua a Iesu ki tana au apotetoro: “Ka akamaroiroi ra, kua riro te re o teianei ao iaku.” (Ioane 16:33) Ka rauka katoa oki kia re ratou. I etai 60 mataiti i muri iora, kua tata te apotetoro ko Ioane: “Koai te tangata i vi ei teianei ao iaia, mari ra ko tei akarongo e, ko Iesu te Tamaiti a te Atua?” (1 Ioane 5:5) Te akaariia maira taua akarongo ra na to tatou akarongoanga i ta Iesu au akauenga e te irinakianga ki runga i te Tuatua a te Atua, mei ta Iesu i rave ra. Eaa atu te umuumuia ra? Kia piri vaitata tatou ki te putuputuanga koia oki te Upoko. Me ka topa tatou, ka tika tatou kia tataraara akatenga e kia kimi i ta te Atua ra akakoreanga  ara tei akatumuia ki runga i to Iesu atinga. I roto i teianei tu, noatu rai to tatou au tu apa ua e te au tarevake, ka rauka katoa kia re tatou.​—Salamo 130:3, 4.

14. E tatau ia Ephesia 6:​13-17, e taangaanga oki i te au uianga e te au tuatua tapu tei orongaia maira i roto i teia parakaoa ei tumuanga no te uriurianga i te au puapinga mei te tuanga taki tai o te rakei vaerua ra.

¹⁴ E autu ei, ka tau tatou kia rave ana “i te rakei katoa a te Atua ra,” auraka e tuanga o te reira e akakoreia. E eeu i taau Pipiria kia Ephesia 6:​13-17 ine, e ka tatau ei i te akataka anga no taua rakei ra. Ei reira, na te pauanga i te au uianga i raro ake, e akamanako e akapeea koe e puapingaiai mei te paruru anga te orongaia maira e te au tuanga tataki tai o taua rakei ra.

“Tatuaia to kotou taukupu, i te tuatua-mou”

Noatu rai me kua kite tatou i te tuatua mou, akapeea te apii putuputu, te akamanako anga i te tuatua mou o te Pipiria, e te aereanga ki te uipaanga i te paruru anga ia tatou? (1 Korinetia 10:​12, 13; 2 Korinetia 13:5; Philipi 4:8, 9)

“Te tapoki-umauma ra ko te tuatua-tika”

Noai teianei turanga tuatua tika? (Apokalupo 15:3)

E akatutu mai e akapeea te kore anga e aru i ta Iehova ra au turanga tuatua tika i te akaaro atuanga i tetai ki te kino pae vaerua. (Deuteronomi 7:3, 4; 1 Samuela 15:​22, 23)

“Akatamakaia to kotou vaevae i te teateamamao o te evangelia o te au ra”

Akapeea te paruru anga o te reira no tatou kia rave putuputu to tatou nga vaevae i te apai anga ia tatou kia tuatua atu ki te au tangata no ta te Atua au apinga no te au? (Salamo 73:2, 3; Roma 10:15; 1 Timoteo 5:13)

“Te paruru i te akarongo”

Me e akarongo to tatou tei akanoo ngaueue koreia ra, ka akapeea ta tatou akono i te aro atuanga i te au tautaanga  tei manakoia kia akaekoko ia tatou me kare kia mataku? (2 Ariki 6:​15-17; 2 Timoteo 1:12)

“Te pare ra i te ora”

Akapeea te manakonako anga i te ora i te tauturu anga i tetai kia kopae ke i te ereere anga no te manako anga maata i te au apinga pae kopapa ra? (1 Timoteo 6:​7-10, 19)

“Te koke a te Vaerua ra”

Ka tau tatou kia irinaki tamou ki runga i teaa me te patoi atura i te au raveanga kino i to tatou tu pae vaerua me kare i to etai ke ra? (Salamo 119:98; Maseli 3:5, 6; Mataio 4:3, 4)

Eaa atu te puapinga maata ra kia autu i te tamaki anga pae vaerua? Akapeea te putuputu te rave anga i te reira? E noai ma oki? (Ephesia 6:​18, 19)

15. Akapeea tatou i te paruru anga i roto i te tamaki anga pae vaerua ra?

¹⁵ Ei au vaeau na Karaiti, e tuanga tatou no tetai nuku maata te rave ra i te tamaki anga pae vaerua. Me ka matakite tatou e ka taangaanga meitaki i te rakei katoa no ko mai i te Atua ra, kare tatou e riro kia mate i teia tamaki anga. Kareka ra, ka riro tatou ei tauturu akamaroiroianga i te au oa tavini i te Atua ra. Ka papa tatou e ka inangaro kia rave maata, i te akatotoa anga i te evangeria no te Patireia Mesia o te Atua ra, te kavamani i te rangi ta Satani e patoi kino ra.

Uriuri Akaou Anga

• Eaa ra te aronga akamori ia Iehova i tamou ei i te tu taka ke takiri i te au tamaki anga o teianei ao?

• Eaa etai o te au ravenga kikite te taangaangaia ra e Satani kia apai mai i te au Kerititiano ki te kino pae vaerua?

• Akapeea te rakei pae vaerua a te Atua ra i te paruru anga ia tatou i ta tatou tamaki anga pae vaerua?

[Au Uianga Apii]

[Tutu i te kapi 76]

Te akaputuia ra to te au pa enua ki Aramakito