‘Na Mua i te Kimi i te Basileia’
Pene Tai Ngauru Ma Tai
‘Na Mua i te Kimi i te Basileia’
1. (a) Eaa ra a Iesu i raurau ei i te aronga akarongo atu kiaia ra kia na mua i te kimi i te Patireia? (e) Eaa te uianga ka tau tatou kia ui kia tatou uaorai?
E TERE atu i te 1,900 mataiti kua topa i roto i tetai akoanga i Galilea, kua raurau atura Iesu i te aronga akarongo atu iaia: “E na mua ra kotou i te kimi i te basileia o te Atua, e te tuatua-tika [na te Atua] ra.” Inara no teaa taua rapurapu ra? Kare ainei te tuatau e raukai ia Karaiti te mana Patireia ra e manganui te au anere mataiti ki muri akera? Ae, mari ra ka riro na te Patireia o te Mesia e akono ta Iehova akatika anga i tona ngateitei e te akatupu oki i tana akakoro anga mekameka no te enua nei. Tetai ua atu tei ariki tikai i te puapinga o taua au mea ra ka oronga i te ngai mua no te Patireia ra ki roto i tona oraanga. Me ko te tika te reira i te anere mataiti mua ra, mei teaa ra te maata atu te tika i teia tuatau, i teianei e kua akateronoia a Karaiti ei Ariki! No reira ko te uianga, Te akaari ra ainei toku oraanga e te kimi ra au i te Patireia o te Atua na mua?—Mataio 6:33.
2. Eaa te au mea ta te au tangata e matauia ra kia aruaru?
2 I teia tuatau, e au mirioni ua atu tangata i te ao katoa nei, te kimi nei i te Patireia na mua. Te akaari ra ratou i ta ratou turu anga i te tutara Patireia na te akonoanga i to ratou au oraanga ki runga i te raveanga i te anoano o Iehova, kua akatapu ia ratou uaorai kiaia. I tetai pae, te maata anga o te au tangata te manako ra i te kimianga i te au mea puapinga kore ua. Te aruaru ra te au tangata i te moni e te au apinga e te au mea e navenave ei ta te moni ka oko mai. Me kare ka tuku ratou i to ratou maroiroi ki roto i te akatere atuanga i ta ratou au angaanga. Te akaata ra ratou i te tu oraanga te akapou taime ra ma ratou uaorai, i te au apinga, e te au mea e navenave ei. Te tuku ra ratou i te Atua ki roto i te tuanga rua, me te irinaki ua ra ratou iaia.—Mataio 6:31, 32.
3. (a) Eaa te au tu apinga ta Iesu i akamaroiroi ra i tana au pipi kia kimi, e no teaa ra? (e) Eaa ra i korei e tau kia manako maata roa no te au umuumu anga kopapa?
3 Inara, kua tuatua atura Iesu i teianei akoanga ki tana au pipi: “Auraka e akaputu i te apinga na kotou i teianei ao,” i te mea kare taua au apinga ra e vai mai e tuatau ua atu. Kua na ko atura aia, “ka akaputu ra i te apinga na kotou ki runga i te rangi” na te tavinianga ia Iehova. Kua raurau atura Iesu i tana au pipi kia “meitaki” to ratou mata na te akamanako anga e te akamaroiroi anga ki runga i te raveanga i te anoano o te Atua. “Ko kotou nei oki, kare e tika kia akono atu i te Atua e te Mamona,” tana i tuatua atu kia ratou. Inara akapeea te au apinga umuumuia—te kai, te kakau, e te are? “Auraka e apiapi,” ta Iesu i ako atu. Kua taki atu aia i to ratou manako ki te au manu—na te Atua i angai ia ratou. Kua akamaroiroi atu a Iesu i tana au pipi kia maara i te au riri—na te Atua e akakakau ia ratou. Kare aina e meitaki maata atu to te au tavini tangata kite a Iehova ra i to te reira ra? “E na mua ra kotou i te kimi i te basileia o te Atua, e te tuatua-tika nana ra;” ta Iesu i tuatua, “e kapiti katoaia mai taua au mea [umuumuia] katoa ra ia kotou.” (Mataio 6:19-34) Te akaari ra ainei taau au angaanga e te irinaki ra koe i te reira?
Auraka e Tuku kia Pokia te Tuatua Mou Patireia
4. Me ka tuku te tangata kia maata roa te akaketaketa anga ki runga i te au apinga materia ra, penei eaa te tupu anga?
4 E mea tika kia manako kia merengo te au mea umuumuia noou uaorai e to pamiri. Inara, me ka manako maata tetai tangata no te au apinga kopapa, ka rauka kia riro te tupu anga ei kino. Noatu rai e me te karanga ra aia e te irinaki ra i te Patireia, me i roto i tona ngakau te tuku ra aia i etai atu au apinga na mua, ka riro kia pokia te tuatua mou Patireia ra. (Mataio 13:18-22) Ei akatauanga, i tetai atianga kua ui maira tetai tangata ou e tutara apinganui kia Iesu: “E akapeea au nei e raukaʼi iaku te ora mutu kore?” Kua akono aia i te ora anga tau e kua meitaki oki te akono atu ia etai ke ra, inara e maata tona manako i tana au apinga kopapa ra. Kare e rauka iaia te akakore atu i te reira kia raukai kia riro ei pipi na Karaiti. No reira kua akakore atu aia i te tika tei rauka ra kia taki atu iaia kia kapitiia ma Karaiti ra i te Patireia i te rangi ra. Kua tuatua maira Iesu i taua atianga ra: “Te akao ngata e o te aronga apinga nui, ki te basileia o te Atua!”—Mareko 10:17-23.
5. (a) Eaa te au apinga ta Paulo i akamaroiroi atu ia Timoteo kia mareka, e no teaa ra? (e) Akapeea ta Satani taangaangaanga ‘i te anoano maata i te moni’ ei ereere akapou anga?
5 I etai mataiti i muri akera, kua tata atu te apotetoro ko Paulo kia Timoteo, i Ephesia i reira ra, ko tetai oire puapinga maata. Kua akamaara atura Paulo kiaia: “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.” Te rave angaanga kia rauka “te kai e te kakau” na tatou e to tatou pamiri e mea tau ia. Inara kua akamatakite maira Paulo: “Kareka te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” E kikite a Satani. I te akamataanga penei ka akavare aia i te tangata na te au tu rikiriki. Penei ka aruia mai teia na te taomianga maata atu, penei ake na tetai tika no te akateitei angaia me kare no tetai angaanga meitaki atu e maata atu te moni inara ka umuumuia te taime tei akatakaia no te au tumu pae vaerua. Naringa kare tatou e matakite, ka rauka “i te anoano maata oki i te moni” kia pokia te au mea e maata atu te meitaki koia to te Patireia ra. Kua akataka maira Paulo na teia tu: “Kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.”—1 Timoteo 6:7-10.
6. (a) Kia kopae ke i te ereere anga o te noinoi apinga, eaa ta tatou ka tika kia rave? (e) Eaa te irinaki anga ka rauka ia tatou, noatu i te manako anga i te turanga puapinga o teianei ao i teia tuatau nei?
6 Ma te aroa tikai no tona taeake Kerititiano, kua raurau atura Paulo ia Timoteo: “Ka rere ke koe i te reira” e, “Kukumi ua ïa i te kukumi meitaki ra i te akarongo.” (1 Timoteo 6:11, 12) Te umuumuia ra te tauta anga akatenga kia kopae ke tatou i te riroanga i te tu oraanga noinoi i te apinga o te ao takapini ia tatou nei. Inara me ka tauta tatou uaorai kia rotai ma to tatou akarongo, kare rava a Iehova e akaruke ia tatou. Noatu eaa te au tutaki teitei e te kore e angaanga, ka akapapu mai aia e ka rauka ia tatou te au mea e umuumuia e tatou ra. Kua tata a Paulo: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’ I tikaʼi ia tatou kia akamaroiroi, e kia karanga e, ‘Ko Iehova toku tauturu, kare au e mataku; eaa ta te tangata kia rave mai iaku?’” (Ebera 13:5, 6) E kua tata te Ariki ko Davida: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.”—Salamo 37:25.
Kua Oronga Mai te Au Pipi Mua ra i te Akaraanga
7. Eaa te au apiianga no te tutu aereanga ta Iesu i oronga ki tana au pipi, e eaa ra i tau ei te reira?
7 I muri ake i ta Iesu ra terenianga tau i tana au apotetoro ra, kua tono atura aia ia ratou ki to Iseraela kia tutu aere i te tuatua meitaki e kia akakite: “Te vaitata mai nei te basileia o te ao.” Mei teaa ra te marekaanga o te reira tuatua! A Iesu Karaiti, te Ariki Mesia, i roto ia ratou ra. I te mea te akono ra te au apotetoro ia ratou uaorai i te tavini anga i te Atua, kua raurau atura Iesu ia ratou kia irinaki e ka utuutu te Atua ia ratou. No reira kua tuatua atura aia: “Auraka ei apinga e apaiia atu i to kotou tere, auraka ei tokotoko, auraka ei pute, auraka ei manga, auraka ei moni; auraka kia taki rua pereue i te tangata okotai. E te are ta kotou e tomo ra, ei reira noo ei, e ka aere atu ei.” (Mataio 10:5-10; Luka 9:1-6) Ka akono ra a Iehova e ko ta ratou e umuumu ra ka akamerengoia e te au rima o te au oa Iseraela ra, i roto ia ratou ra ko te akamanuiri anga i te au tangata ke e peu ia.
8. (a) I mua poto ake i tona matenga, eaa ra a Iesu i orongai i te au apiianga ou no te tutu aereanga? (e) Eaa ra te vaira ei mea mua i te au oraanga o ta Iesu au pipi?
8 I muri akera, i mua ake i tona matenga, kua akamatakite atura Iesu i tana au apotetoro i te tika e i te tuatau ki mua ka angaanga ratou i raro ake i te au turanga tauiia. Ei tupuanga no te patoianga i ta ratou ra angaanga, kare te akamanuiri anga e oronga uaia kia ratou i Iseraela. Pera katoa, kare e roaia ka apai atu ratou i te tuatua Patireia ki te au enua Kenitara ra. I teianei ka apai ratou i tetai “pute” e te “manga.” Inara, ka na mua ratou i te kimianga i te Patireia o Iehova e te tuatua tika nana ra, ma te irinaki anga e ka akameitaki te Atua i ta ratou au tauta anga kia rauka te kai e te kakau i umuumuia.—Luka 22:35-37.
9. Akapeea ta Paulo ra tuku anga i te Patireia na mua i tona oraanga iaia e akono ra i te au mea anoanoia no tona kopapa, e eaa te akoanga tana i oronga no teia au tumu?
9 E akatauanga meitaki te apotetoro ko Paulo no tetai tei akono ra i ta Iesu akoanga. Kua patu a Paulo i tona oraanga koropini i te angaanga orometua ra. (Angaanga 20:24, 25) I tona aere anga ki tetai ngai kia tutu aere, kua akono aia iaia uaorai i te au mea umuumuia ra, kua rave katoa i te angaanga anga are kakau. Kare aia i manako na etai ke e akono mai iaia. (Angaanga 18:1-4; 1 Tesalonia 2:9) Inara, kua ariki akameitaki aia i te akamanuiri anga e te apinga orongaia me akakite mai etai ke ra i to ratou aroa na roto i teia tu. (Angaanga 16:15, 34; Philipi 4:15-17) Kua akamaroiroi a Paulo i te au Kerititiano, auraka e manako kore i ta ratou apainga ei pamiri kia rave ei i te tutu anga mari ra kia akatau i ta ratou au apainga tuke tuke. Kua ako atu aia ia ratou kia angaanga, kia aroa i to ratou au pamiri, e kia oronga atu kia etai ke ra. (Ephesia 4:28; 2 Tesalonia 3:7-12) Kua raurau atura aia ia ratou kia irinaki i te Atua, auraka i te au apinga kopapa nei, e kia taangaanga i to ratou au oraanga na roto i te tu te ka akaari e te kite tika ra ratou e eaa te au mea maata ua atu te meitaki. Kia rotai ma ta Iesu au apiianga ra, te aite anga o te reira kia na mua i te kimianga i te Patireia o te Atua e te tuatua tika nana ra.—Philipi 1:9-11.
E Tuku i te Patireia na Mua i Toou Oraanga
10. Eaa te aiteanga kia na mua te kimi i te basileia?
10 Eaa te maata o ta tatou uaorai rave anga i te tuatua meitaki o te Patireia ra kia etai atu? Tei runga te reira, i tetai tuanga, i to tatou au turanga e te oonu oki o to tatou ariki anga. Kia tamou ki te manako e kare a Iesu i tuatua, ‘E kimi i te basileia me kare atu aau angaanga kia rave.’ I te kiteanga i te puapinga o te Patireia ra, kua akakite aia i te anoano o tona Metua, i te na ko anga: “E kimi ra kotou i te basileia o te Atua.” (Luka 12:13) Noatu rai te maata anga o tatou ka tau kia rave i te akono i te au mea umuumuia no tatou e to tatou au pamiri, me e akarongo to tatou, ka koropini to tatou au oraanga i te angaanga Patireia ta te Atua i oronga maira kia tatou. I taua taime rai, ka akono tatou i te au apainga o to tatou pamiri.—1 Timoteo 5:8.
11. (a) Akapeea ta Iesu ra akatutu anga e kare e rauka i te katoatoa kia aiteite te maata o te akatotoaanga i te tuatua Patireia ra? (e) Eaa te au tumu te akatupu ra i te maata anga o ta tetai ka rave?
11 Te rauka ra i tetai papaki o tatou te akapou kia maata atu te taime i to etai ke ra i te tutuanga i te tuatua meitaki o te Patireia. Inara i roto i tana parapore no te au tu tuke o te one, kua akakite mai a Iesu e ko te aronga katoa te aite ra te ngakau ki te one meitaki ka uua mai. Eaa te maata? E tuke tuke te au turanga o te aronga tataki tai ra. Te mataiti, te ora kopapa, te au apainga pamiri e au tumu katoa ia. Inara me te vaira te ariki anga tika tikai, e maata te ka rauka kia raveia.—Mataio 13:23.
12. Eaa te akakoro anga tau i te pae vaerua te akamaroiroiia ra te aronga ou kia akamanako?
12 E mea meitaki te akanoo i te au akakoroanga te ka tauturu ia tatou kia akatotoa atu i ta tatou tuanga i te angaanga orometua Patireia. Ka tau te aronga ou kia manako tikai i te akatauanga meitaki a taua Kerititiano ou totomapu ra ko Timoteo. (Philipi 2:19-22) Eaa te ka meitaki atu no ratou i te tomo atu ki te angaanga orometua i te au tuatau ravarai me oti atu ta ratou apiianga? Ka puapinga katoa te aronga kua pakari mai na te akanooanga i etai akakoro anga tau i te pae vaerua ra.
13. (a) Naai e tuku te tika eaa ta tatou tataki tai ka rauka kia rave i te tavini anga Patireia? (e) Me ka kimi tikai tatou i te Patireia na mua, eaa ta tatou e akapapu ra?
13 Koi kore ei e akaapa atu i te aronga penei te manako ngakau ra tatou e ka rauka kia maata atu ta ratou kia rave, ka tau tatou kia akakeuia na te akarongo kia rave kia meitaki mai tatou uaorai kia raukai ia tatou te tavini i te Atua ra i te ki katoa te ka rauka i to tatou uaorai au turanga te akatika. (Roma 14:10-12; Galatia 6:4, 5) Mei te akaariia maira i te tu o Iobu ra, kua maro a Satani e ko to tatou manako maata ko ta tatou au apinga kopapa nei, to tatou uaorai pumaana, e to tatou uaorai meitaki e ko to tatou akakeu anga kia tavini i te Atua ra e mea noinoi ia. Inara me te kimi tika ra tatou i te Patireia na mua, te o atura tatou i te akapapuanga e e pikikaa tikai te Tiaporo. Te oronga ra tatou i te akakite anga e ko te mea mua i to tatou au oraanga ko te tavini i te Atua. I te tuatua e te angaanga, te akapapu ra tatou i to tatou inangaro oonu no Iehova, to tatou turu anga tiratiratu i tona ngateitei, e to tatou aroa no te au oa tangata nei.—Iobu 1:9-11; 2:4, 5; Maseli 27:11.
14. (a) Eaa ra i puapingai te papaanga no te angaanga tutu aereanga? (e) Eaa te maata o te raveanga a te au Kite e manganui i te angaanga tutu aereanga?
14 Ka tauturu tetai papaanga ia tatou kia rave kia maata atu i ta tatou ka rauka i te rave. E ‘tuatau akatakaia’ ta Iehova uaorai no te raveanga i tana akakoro anga. (Exodo 9:5; Mareko 1:15) Me ka rauka, e mea meitaki kia rave i te angaanga orometua tutu aere e tai me kare e tere atu te taime akatakaia i te epetoma taki tai. E au anere ua atu tauatini Au Kite o Iehova takapini i te ao katoa kua o atu ei au painia tauturu, i te rave anga e vaitata e rua ora i te ra i te tutuanga evangeria. E au anere ua atu tauatini o etai atu te tavini ra ei au painia tamou, i te angaanga anga e vaitata i te rua e te apa ora i te ra i te akakite anga i te tuatua Patireia. Te au painia taka ke e te au mitinari te akapou ra e maata roa atu te taime i te tavini anga Patireia. Ka rauka katoa ia tatou i te kimi i te au tuatau no te tutu anga i te manakonako anga Patireia ma etai ua atu te ka akarongo mai. (Ioane 4:7-15) Ka tau to tatou inangaro kia ki tetai tuanga i taua angaanga ra i te ka rauka i to tatou au turanga, no te mea kua totou a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”—Mataio 24:14; Ephesia 5:15-17.
15. I te kapiti anga i ta tatou angaanga orometua, eaa koe i manako ngakau ei e te tau ra te akoanga ia 1 Korinetia 15:58?
15 Taokotaiia, i roto i te au tuanga katoatoa o te enua nei, noatu ko teea te enua te noo ra ratou, te rave ra te Au Kite o Iehova i teia apainga no te tavini anga. Kua akono ratou kia ratou uaorai i te akoanga akauruia i te Pipiria ra: “Kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.”—1 Korinetia 15:58.
Uriuri Akaou Anga
• I ta Iesu tuatua anga e ‘na mua i te kimi i te basileia,’ eaa tana e akakite maira ka tau kia tukuia ki roto i te ngai tuarua ra?
• Eaa to tatou manako no te akonoanga i te au umuumuanga kopapa no tatou uaorai e to tatou au pamiri? Eaa te tauturu ta te Atua ka oronga mai kia tatou?
• Ki roto i teea au tuanga o te tavinianga Patireia te ka rauka ia tatou kia rave kapiti?
[Au Uianga Apii]
[Tutu i te kapi 107]
I te au enua ravarai, te tutu aere ra te Au Kite o Iehova i te tuatua meitaki i teia tuatau, i mua ake ka tae mai ei te openga
