Rekarekaia te Tu Rangatira e te Aronga Akamori ia Iehova
Pene Rima
Rekarekaia te Tu Rangatira e te Aronga Akamori ia Iehova
1, 2. (a) Eaa te tu rangatira ta te Atua i oronga ki nga tangata mua e rua ra? (e) E taiku mai i etai o te au ture tei akatere ra i te angaanga a Adamu raua ko Eva.
I TA Iehova anga mai anga i te tangata mua e te vaine, kua rekareka raua i te tu rangatira meitaki roa atu i to te au tangata o teia tuatau nei. E Parataito to raua kainga, i te Kainga manea i Edene ra. Kare e makimaki ei akakino i to raua rekareka anga i te oraanga, i te mea e manako apa kore to raua e nga kopapa apa kore oki. Kare te mate i tapapa atu kia raua mei ta te reira i rave ra no etai ravarai mei reira mairai. Pera katoa oki, kare raua i nga tangata ropoti mari ra tei ia raua te apinga umere no te anoano tu rangatira, koia te kite kia tuku i ta raua uaorai au ikianga. Inara, e raukai kia rekareka ua atu i taua tu rangatira ra ka tau raua kia akangateitei i te au ture a te Atua ra.
2 Ei akatauanga, e akamanako i te au ture kopapa ta te Atua i akanoo maira. Inara, kare teianei au ture i akakiteia mai i te au tuatua tataia, mari ra kua angaia maira Adamu raua ko Eva i roto i taua tu ra e e mea tau anake no raua kia rave. Kua akakite to raua kaki anga i te kai i te umuumu anga kia kai; to raua kaki anga vai, i te umuumu anga kia inu; te opunga o te ra, i te umuumu anga kia moe. Kua oronga katoa a Iehova i te papaanga angaanga na raua. Ko taua papaanga ra e tika ko tetai ture ia no te mea na te reira e akatere i ta raua raveanga angaanga. Kia anau tamariki raua, kia mana ki rungao i te au tu ora e manganui i te enua nei, e kia akatotoa i te au kotinga o Parataito tae roa kia koropiniia te enua katoa nei. (Genese 1:28; 2:15) Mei teaa ra tetai ture puapinga maata o te reira! Kua oronga kia raua i tetai angaanga akamerengoanga tikai, e raukai ia raua kia taangaanga i to raua au kite ki katoa ra i roto i te au tu tau tikai. Pera katoa oki, te rava ra to raua tu rangatira kia rave i te au iki anga e akapeea raua i te rave anga i ta raua angaanga. Eaa atu ta tetai ka rauka kia pati?
3. Akapeea te tauturu anga ia Adamu raua ko Eva kia taangaanga pakari i to raua tu rangatira i te rave anga i te au iki anga?
3 Inara, i te oronga anga kia Adamu raua ko Eva i te tika no te tukuanga i te au ikianga, kare te aiteanga o teia e ko tetai ua atu ikianga ta raua ka rave ka akatupu mai i te au tupuanga meitaki. To raua tu rangatira kia rave i te au iki anga ka tau anake kia akonoia i roto i te au kotinga o te au ture a te Atua ra e te au kaveinga oki. Akapeea raua e kite ei i te reira? Na te akarongoanga ki Tei Anga maira ia raua e na te akaraanga i tana au angaanga. Kua oronga atura te Atua kia Adamu raua ko Eva i te kite karape tei umuumuia ra kia akono i ta raua i kite ra. I te mea i angaia raua e apa kore ua, ka tau to raua manako anga kia akaata mai i to te Atua ra au tu i te tukuanga i te au tika. Ka tika, kia rave matakite raua i te reira me e ariki anga tikai to raua i ta te Atua i rave ra no raua e te anoano ra kia akamareka iaia.—Genese 1:26, 27; Ioane 8:29.
4. (a) Kua akangere ainei te akauenga kia Adamu raua ko Eva ra kia kore e kai i te ua o te rakau okotai ra i to raua tu rangatira? (e) Eaa ra teia i tau ei ei umuumu anga?
4 E mea tika, i reira kua iki te Atua kia timata i to raua akarongo kiaia e ko Tei Oronga-Ora atu no raua e to raua puareinga anga oki kia vai marie ki roto i te ngai tana i akakite atura. Kua oronga a Iehova kia Adamu i teia akauenga: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:16, 17) I muri ake i te anga mai anga ia Eva, kua akakite katoaia kiaia teianei ture. (Genese 3:2, 3) Kua akangere aina teia tureanga i to raua tu rangatira? Kare rava ia. E maata ta raua kai meitaki no te au tu ravarai kia kai e auraka e kai i te ua no taua rakau okotai ra. (Genese 2:8, 9) E mea tau anake oki e kia kite raua e no te Atua te enua katoa, i te mea nana i anga mai te reira. No reira tei iaia te tika kia maani i te au ture te ka tau ki tana akakoro anga e ka akapuapinga oki i te au tangata katoa.—Salamo 24:1, 10.
5. (a) Akapeea a Adamu raua ko Eva i ngere ei i te tu rangatira meitaki tei ia raua ra? (e) Eaa tei mono atu i te tu rangatira i rekarekaia e Adamu raua ko Eva ra, e akapeea te akatupu anga a te reira kia tatou nei?
5 Inara eaa tei tupu? Kua akakeuia tetai angera e te inangaro noinoi, e kua rave tarevake i tona anoano e kua riro mai ko Satani, tona aiteanga e “Patoi.” Kua akavare aia ia Eva na te akapapuanga kiaia i tetai apinga tei tarevake ra ki to te Atua anoano. (Genese 3:4, 5) Kua kapiti atura Adamu kia Eva i te aatianga i te ture a te Atua. Na te raveanga i te apinga kare ra e na raua, kua ngere raua i to raua tu rangatira kaka ra. Kua riro te ara ei pu no raua, e mei ta te Atua i akamatakite atura, i te openga kua aru atu te mate. Kua akatuanga raua i ta raua anaunga i te ara—te akaari ia ra i roto i tetai inangaro i roto roa ra kia rave i te tarevake. Kua apai katoa mai te ara i te tu paruparu i te tupuanga o te maki, te ruaine, e te mate. Te anoano kia rave i te tarevake, tei akatupuia ra e te mana no Satani, kua akatupu mai i tetai taiate tangata ma te tuatua enua no te makitakita, te rave kino, te takinga kino, e te au tamaki tei apai ke atura e manganui te au mirioni oraanga. Mei teaa tetai tuke anga ki te tu rangatira ta te Atua i oronga ra ki te tangata i te akamataanga ra!—Deuteronomi 32:4, 5; Iobu 14:1, 2; Roma 5:12; Apokalupo 12:9.
Te Ngai e Kiteai te Tu Rangatira
6. (a) Teiea te ngai e kiteai te tu rangatira tikai? (e) Eaa te tu rangatira ta Iesu i tuatua ra?
6 I te manakoanga i te au tu kikino te vaira i te au ngai ravarai i teia tuatau nei, kare i te mea poitirere e kua roa te au tangata i te inangaro anga i te tu rangatira maata atu. Inara teiea te ngai e kiteai te tu rangatira tikai? Kua tuatua a Iesu: “I tāpu tikai kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:31, 32) Ko teia tu rangatira kare i te tu ta te au tangata e manakonako ra no ta ratou kopae anga i tetai tutara me kare i tetai tu kavamani i te akaperepere anga i tetai ke ra. Kareka ra, te aere tika atura teia tu rangatira ki rotopu o te au manamanata o te au tangata nei. Ta Iesu i uriuri manako ra ko te tu rangatira mei te tapeka ki te ara. (Ioane 8:24, 34-36) No reira, me ka riro tetai peretana ei pipi tikai na Iesu Karaiti, ka kite aia i tetai taui anga taka meitaki i tona oraanga, e matara anga!
7. (a) I roto i teea tu e raukai ia tatou kia matara mai i te ara i teianei? (e) E raukai taua tu rangatira ra, eaa ta tatou ka tika kia rave?
7 Kare te aite anga o teia e i teianei kare te au Kerititiano mou e manako ngakau i te au tupu anga no te inangaro kia akono i te tu ara anauia maira. I te mea e tuanga ara to ratou, te vaira te kukumi anga na ratou no te reira. (Roma 7:21-25) Inara, me ka akono tetai peretana kia rotai ma ta Iesu ra au apiianga, kare aia e riro ei tavini i te ara. Kare te ara e riro kia aite ki tetai tutara kino kiaia tei oronga ra i te au ikuiku anga kia rave matapo ua atu aia. Kare aia e ereereia ki roto i tetai tu oraanga tei ngere ra i te akakoro anga e tei akaruke maira iaia ma tetai akava ngakau kino. Ka rekareka aia i te akava ngakau ma ki mua i te Atua no te mea kua akakoreia te au ara kua topa ra na runga i te tumuanga o tona akarongo i te atinga o Karaiti. Penei ka tauta te au manako anga ara kia akatu mai ia ratou uaorai, inara me akakore atu aia i te raveanga ia ratou no te mea te akamaaraara ra aia i te au apiianga ma a Karaiti, ka akaari aia e kare te ara i tona pu.—Roma 6:12-17.
8. (a) Eaa te au tu rangatira ta te Kerititiano mou ka oronga mai kia tatou? (e) Eaa te tu manako tau no tatou ki te aronga tutara o teianei ao?
8 E akamanako ana i te au tu rangatira ta tatou e rekareka nei ei au Kerititiano. Kua tataraia mai tatou mei te au tupuanga no te au apiianga pikikaa ra, mei te au tapekaanga ki te mataku purepure ra, e mei te tuikaaanga ki te ara. Te au tuatua mou mekameka no te turanga o tei mate ra e te tuakaouanga oki kua tatara mai ia tatou mei te mataku anga tau kore no te mate ra. Te kite e kare e roaia ka monoia atu te au kavamani apa ua a te tangata nei e te Patireia tuatua tika a te Atua ra ka tatara mai ia tatou mei te tu manakonako kore ra. (Daniela 2:44; Mataio 6:10) Inara, kare taua tu rangatira ra e akatika i te akangateitei kore no te aronga mana taoonga kavamani e ta ratou au ture ra.—Tito 3:1, 2; 1 Petero 2:16, 17.
9. (a) Akapeea ta Iehova tauturuanga aroa ia tatou kia rekareka i te tuanga maata no te tu rangatira te ka rauka i te tangata i teianei? (e) Akapeea e raukai ia tatou te au iki anga pakari?
9 Kare a Iehova e akariro na tatou e kimi na te timataanga e te tarevake e akakite i te aerenga meitaki i te ora anga. Kua kite aia i akapeea to tatou maani anga mai, eaa te ka apai mai i te mareka anga tikai kia tatou, e eaa te ka akapuapinga mutu kore ia tatou. Kua kite aia i te au manako e te tu akono oki te ka akakino i te pirianga o tetai peretana kiaia e ma tona au oa tangata oki, penei ka arai atu i taua tangata ra mei te ao ou. E mea aroa ra, kua akakite mai a Iehova kia tatou i teianei au mea na roto i te Pipiria e tana akaaerenga akara mataia oki. (Mareko 13:10; Galatia 5:19-23; 1 Timoteo 1:12, 13) I reira tei runga ia tatou kia taangaanga i to tatou anoano tu rangatira mei ko mai i te Atua ra kia iki ka akapeea tatou i te akono anga. Kare mei ia Adamu rai, me kua tuku tatou ki to tatou ngakau i ta te Pipiria i akakite kia tatou, ka rave tatou i te au iki anga pakari. Ka akaari tatou e ko te pirianga meitaki kia Iehova to tatou manako anga maataia i te oraanga.
Anoanoanga i Tetai Atu Tu Rangatira
10. Eaa te tu rangatira ta tetai papaki o te Au Kite o Iehova e itae atura?
10 I etai tuatau tetai papaki o te au tangata ou e Au Kite o Iehova—pera katoa etai kua pakari maira—penei ka manako ngakau e te anoano ra ratou i tetai atu tu no te rangatira. Penei ka akara anga akaieie teianei ao, e ko te maata atu i to ratou manako anga i te reira, ka ketaketa atu to ratou inangaro kia rave i te au apinga tau kore i te Kerititiano te matauia ra i teianei ao. Ko taua aronga ra penei kare e parani kia kai tau kore i te apinga akakona, kia inu maata rava, me kare kia akaturi. Inara ka akamata ratou i te taokotai atu ma te aronga kare ra i te au Kerititiano mou, i te anoanoanga kia arikiia mai e ratou. Penei ka tamata ratou i te aru i ta ratou tuatua e te tu akono oki.—3 Ioane 11.
11. Noea mai te akavareanga kia rave i te tarevake te aere maira i etai taime?
11 I etai tuatau ko te akavare anga kia rave i te tu akono tau kore i te Kerititiano te aere maira mei tetai te manako ra e te tavini ra aia ia Iehova. Ko te tika te reira i etai o te au Kerititiano mua ra, e ka rauka katoa kia tupu taua tu rai i to tatou tuatau nei. E putuputu taua au tangata ra i te anoano kia rave i te au apinga ta ratou i manako ngakau ra ka apai mai i te marekaanga no ratou, inara te patoi ra taua au apinga ra i te au ture a te Atua. Ka raurau ratou ia etai kia “kanga kanga.” ‘Te tuatua akarangatira ra ratou, inara te tuikaa ra ratou uaorai na te kino.’—2 Petero 2:19.
12. Eaa te au tupuanga mii no te tu akono te tuke ra ki te au ture e te au kaveinga a te Atua?
12 Te uua anga no taua tu karangaia ra e akarangatira anga e kino ia, i te mea e akarongoanga kore ia i te au ture a te Atua ra. Ei akatauanga, te ainga tau kore ka akatupu i te manako ngakau kino, te maki mate, te mate, te nui anoano koreia, e penei katoa i te ngaangaa anga o te akaipoipo anga. (1 Korinetia 6:18; 1 Tesalonia 4:3-8) Ka rauka i te kaianga tau kore i te apinga akakona kia akatupu i te riri ua, te tuatua taka kore, te akara anga aveave, te takaanini, akakino i te akaae anga, te kiteanga e te akarongoanga i te apinga kare ra i reira, e te mate oki. Ka rauka kia akariro kia kore e akamutu te kai apinga akakona, penei ka taki atu ki te rave anga i te kino kia turu i taua ravenga ra. E aiteite te au tupuanga no te inu tau kore i te kava akakona ra. (Maseli 23:29-35) Te aronga te ka o atu ki taua tu akono ra penei ka manako e e tu rangatira to ratou, inara i reira ka kite ratou e kua tureiti rava kua riro ratou ei tuikaa ki te ara. Mei teaa ra tetai pu kino ko te ara! Na te manakoanga tau i taua tumu ra i teianei ka tauturu kia paruru ia tatou i taua tupuanga ra.—Galatia 6:7, 8.
Te Ngai Akamata Anga te Au Manamanata
13. (a) Akapeea te au anoano te ka taki atu ki te au manamanata i putuputu ei te akakeuia? (e) Kia kite eaa “te kapiti anga kino” noai te manako ta tatou ka umuumu? (nga) Ia koe e pau ra i te au uianga tei akapapaia i roto i te parakaoa 13, e akaketaketa i to Iehova manako.
13 E tamanako ana i te ngai e putuputu te akamata anga o te au manamanata. Te akataka maira te Pipiria: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” (Iakobo 1:14, 15) Akapeea te akakeuanga i te anoano ra? Na tei tauruia ra ki roto i te manako. E putuputu teia i te tupu no te kapitianga ma te au tangata kare ra e akono ana i te au kaveinga Pipiria. Inara, te kite ra tatou katoatoa e ka tau tatou kia kopae ke i “te kapiti anga kikino ra.” (1 Korinetia 15:33) Inara ko teea te kapiti anga kikino? Akapeea to Iehova ra manako anga no teianei tumu? Na te manakoanga tau ki runga i te au uianga te aru mai nei e te akaraanga i te au tuatua tapu tei taikuia maira ka tau kia tauturu ia tatou kia rauka te au taopenga tika ra.
Te riro ra ainei te tika e ko etai tangata e akara anga ngateitei to ratou te aite anga e e aronga meitaki ratou no te kapiti atu? (Genese 34:1, 2, 18, 19)
Ka rauka ainei i ta ratou tuatua anga, penei ta ratou takatakata, te akakite mai me e no roto tatou i te piri anga vaitata ma ratou ra? (Ephesia 5:3, 4)
Ka akapeea to Iehova manako ngakau me ka iki tatou kia kapiti vaitata atu ma te au tangata kare ra e inangaro iaia? (2 Paraleipomeno 19:1, 2)
Noatu rai te angaanga kapiti ra tatou me kare te aere ra ki te apii ma te au tangata kare ra e piri mai ana ki to tatou akarongo, eaa ra i umuumuiai no tatou kia matakite? (1 Petero 4:3, 4)
Te akaraanga tivi e te au teata, te taangaanga anga i te Internet, e te tatauanga i te au puka, au makatini, e te au nutipepa e au tu no te kapitianga ma etai ke ra. Eaa te tu apinga mei taua au tumu ra ka tau tatou kia paruru atu? (Maseli 3:31; Isaia 8:19; Ephesia 4:17-19)
Eaa ta tatou iki anga no te au kapiti anga ka akakite kia Iehova i to tatou tu ei au tangata? (Salamo 26:1, 4, 5; 97:10)
14. Eaa te tu rangatira mekameka te vai maira ki mua no te aronga tei akono tiratiratu ra i te akoanga a te Tuatua a te Atua i teianei?
14 I mua ua ake ia tatou nei te vai maira te ao ou a te Atua. Na te kavamani Patireia o te Atua i te rangi ra e akamatara mai i te au tangata mei te mana o Satani e tana akatereanga kino o te au mea katoa nei. Na te akakore anga tamou marie i te au tupu anga katoa no te ara ra mei te au tangata akarongo, e akatupu i te tu apa kore o te manako e te kopapa, kia raukai ia tatou te rekareka i te oraanga mutu kore i Parataito. Te tu rangatira tei rotai ki katoa ma “te Vaerua o te Atu ra” ka rekarekaia e te au mea ora i angaia ra i te openga. (2 Korinetia 3:17) Ka tau ainei kia akaekoko i te rutianga taua au mea katoatoa no te manako koreanga i te akoanga a te Tuatua a te Atua i teianei? Na te akonoanga pakari i to tatou tu rangatira Kerititiano i teia tuatau, kia akaari taka meitaki tatou katoatoa e ko ta tatou e anoano tika ra ko “te rangatira meitaki o te tamariki a te Atua ra.”—Roma 8:21.
Uriuri Akaou Anga
• Eaa te tu rangatira tei rekarekaia e nga tangata mua e rua ra? Akapeea te aiteite o te reira ki to te au tangata i teia tuatau nei?
• Eaa te tu rangatira o te au Kerititiano mou i teianei? Akapeea te tuke o teia ki ta te ao e akamanako ra e tu rangatira?
• Eaa ra i puapinga maatai kia kopae ke i te kapiti anga kikino? Kare mei ia Adamu ra, ko taai tuku anga tika e eaa te mea kino ta tatou ka ariki?
[Au Uianga Apii]
[Tutu i te kapi 46]
Te akamatakite maira te Tuatua a te Atua: “Auraka e vavare; e kino te tuatua meitaki i te kapiti anga kikino ra”
