Pene Itu

Ta Tatou i Kite mei ta te Atua Tuku Ua Anga i te Rave Kino

1, 2. (a) Naringa a Iehova i tamate vave i nga meameaau i Edene ra, akapeea te akatupu anga o te reira kia tatou? (e) Eaa te au akanoonooanga aroa ta Iehova i rave no tatou?

“I TOKU nei au rā i toku au mataiti i te tuitarere ua anga . . . e au rā poto oki toku,” ta te pateriareka ko Iakoba i tuatua. (Genese 47:9) Aiteite katoa, kua tuatua a Iobu e ko te tangata “e iti ua ona puke rā, e te ki oki i te pekapeka.” (Iobu 14:1) Mei ia raua rai, kua kite te maata anga o tatou i te au tu ngata, te au tika kore, pera katoa te au tumatetenga. Inara, kare to tatou anauia mai anga i te tika kore i to te Atua ra tuanga. E tika, kare ia tatou te apa kore o te manako e te kopapa e te kainga Parataito oki tei rauka ra ia Adamu raua ko Eva i te akamata anga. Inara ka peea me i tamate vave atu a Iehova ia raua i to raua meameaau anga? I te tuatau kare ra e maki, e mii, me kare e mate, kare katoa oki te au tangata i reira. Kare tatou i anauia mai. No te aroa ua, kua akatika te Atua i te tuatau kia anau tamariki mai a Adamu raua ko Eva, noatu rai e kua akatuangaia mai ratou ma te tu apa ua. E na roto ia Karaiti, kua akanoonoo a Iehova kia rauka akaou ia tatou tei ngaro ke ra ia Adamu​—te ora mutu kore ki runga i te enua parataito.​—Ioane 10:10; Roma 5:12.

² Mei teaa ra te akamaroiroianga o te reira no tatou kia rauka te akara atu ki mua ki te oraanga e mutu kore ua atu i te ao ou i roto i te au tu Parataito, te ngai e kore ei tatou e maki, e mii, e mamae, e te mate oki, pera katoa  i te au tangata rave kino ra! (Maseli 2:​21, 22; Apokalupo 21:4, 5) Inara mei te tataanga Pipiria maira, ka kite tatou e noatu e puapinga maata to tatou uaorai ora kia tatou e kia Iehova, te o maira tetai apinga maata rava atura.

No Tona ra Ingoa Maata

3. Eaa te o atura ki te akatupu anga i te akakoro anga a Iehova no te enua e te au tangata?

³ Te o atura te ingoa o te Atua ki roto i te tupu anga o tana akakoro anga no te enua e te au tangata oki. Te aite anga o taua ingoa ra ko Iehova “Ka Akariro Aia kia Tupu.” No reira te akakite maira tona ingoa i tona turanga e ko te Ngateitei i te Ao Katoa e Pini Ua Ake, e ko Tei Akakoro ra, e te Atua o te tuatua mou. No to Iehova ra turanga, te au e te meitaki oki o te ao katoa e pini ua ake te umuumuia ra e ko tona ingoa e tei koropiniia ra e te reira ka tau kia orongaia te tu akangateitei anga ki katoa te tika ra no te reira e kia akarongo atu te katoatoa kiaia ra.

4. Eaa tei kapitiia ki ta Iehova ra akakoroanga no te enua?

⁴ I muri ake i te anga maianga ia Adamu raua ko Eva, kua oronga atura Iehova i tetai angaanga na raua kia akatupu. Kua akataka atura aia e kare tana akakoro anga kia akavi anake i te enua katoa​—ma te akatotoaanga i te au kotinga o Parataito​—mari ra kia akaki katoa i te reira ma ta raua au anaunga. (Genese 1:28) Ka riro ainei teia akakoro anga kia puapinga koreia no to raua tu ara? Mei teaa ra te akakino anga i te ingoa o Iehova mana katoatoa ra me kare e rauka iaia te akatupu i tana akakoro anga no te enua nei e te au tangata katoa oki!

5. (a) Me kai nga tangata mua ra i to te rakau no te kite i te meitaki e te kino, aea raua e mate ei? (e) Akapeea a Iehova i te akatupu anga i tana tuatua ia Genese 2:17 e te akangateiteianga oki i tana akakoroanga no te enua nei?

⁵ Kua akamatakite atura Iehova ia Adamu raua ko Eva e  me ka akarongo kore raua e ka kai oki mei taua rakau o te kite i te meitaki e te kino, ka mate raua “i te rā” e kai ei raua i to reira. (Genese 2:17) Kua tika ki tana i tuatua, kua akataka atura Iehova i te ra tikai i arai raua, e kua akakite atu i te akautunga no te mate. Mei to Iehova ra manako anga, kua mate a Adamu raua ko Eva i taua ra ra. Inara, kia akatupu i tana akakoro anga no te enua, kua akatika a Iehova kia anau mai raua i tetai pamiri i mua ake ka mate atu ei raua i te pae o te kopapa. Tera ra, i te mea te rauka ra i te Atua kia manako i te 1,000 mataiti ei ra okotai, i te opeanga to Adamu oraanga i te 930 mataiti, i roto ia i te “rā” okotai. (2 Petero 3:8; Genese 5:​3-5) No reira kua mou ta Iehova ra tuatua tika e a ea e tupu ei te akautunga, e kare tana akakoro anga no te enua i akakoreia i to raua matenga. Inara no tetai tuatau, kua tukuia te au tangata apa ua nei, kapiti katoa te aronga rave kino kia ora.

6, 7. (a) Kia tau ki ta Exodo 9:​15, 16, eaa a Iehova i tuku uai i te aronga rave kino kia vai mai no tetai tuatau? (e) I to Pharao tu ra, i akapeea te akaari anga i to Iehova ra mana, e akapeea tona ingoa i te akakite angaia? (nga) Eaa te ka tupu me ope te akatereanga kino nei?

⁶ Ta Iehova i tuatua ki te tutara o Aiphiti i te tuatau ia Mose ra kua akaari katoa e eaa te Atua i akatikai i te aronga rave kino ra kia ora. I ta Pharao akakore anga i te aere ke atu anga o te tamariki a Iseraela mei Aiphiti, kare a Iehova i ta atu iaia i reira. Kua apaiia mai te Mate Tai Ngauru ki runga i taua enua ra, ei akakiteanga i to Iehova ra mana i roto i te au tu umere. I te akamatakite anga i te itu o te mate ra, kua tuatua atura Iehova kia Pharao e ka ngoie ua Iaia te takore atu ia Pharao e tona au tangata mei runga i te mata o te enua. “No reira tika rai oki au,” i na Iehova ei “i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.”​—Exodo 9:​15, 16.

 ⁷ I ta Iehova akaora anga i to Iseraela ra, kua riro tikai tona ingoa kia kitea maataia. (Iosua 2:​1, 9-11) I teia tuatau, e vaitata i te 3,500 mataiti i muri akera, ko tana i rave i reira ra kare i ngaropoinaia. Kare i akakite anakeia te ingoa uaorai o Iehova mari ra kua pera katoa oki te tuatua mou no Tei apai i taua ingoa ra. Na teia i akanoo te akateitei anga no to Iehova ra ingoa ei Atua tei mou ra i tana au taputou e tei akono ra i tona au Tavini. (Iosua 23:14) Kua akakite mai te reira e no tona mana katoatoa, kare e apinga e rauka kia arai i tana akakoroanga. (Isaia 14:​24, 27) No reira ka rauka ia tatou kia irinaki e kare e roaia ka rave aia i te angaanga no tona au Tavini tiratiratu na te akapouanga takiri i ta Satani akatereanga kino ra. Taua akakite anga i te mana katoatoa e te kaka ta te reira ka apai mai ki to Iehova ra ingoa kare rava ia e ngaropoinaia. Kare e openga o te au puapinga.​—Ezekiela 38:23; Apokalupo 19:1, 2.

‘Aue te Oonu o te Pakari i te Atua!’

8. Eaa te au tika ta Paulo e raurau maira ia tatou kia akamanako?

⁸ I tana reta ki to Roma ra, kua akatu mai te apotetoro ko Paulo i te uianga: “E tuatua-tika kore aina ta te Atua?” Kua pau ketaketa atura aia: “Auraka rava ia.” I reira kua akaketaketa mai aia i to te Atua ra aroa ua e kua taiku maira i ta Iehova i tuatua no te akatikaanga kia ora a Pharao no tetai tuatau. Kua akaari katoa a Paulo e te aite ra tatou tangata nei mei te karakaraea i roto i te rima o te potera ra. I reira kua tuatua aia: “Eaa oki te Atua, kia anoano i te akakite i tona riri, e kia kitea tona mana, i te akakoromaki anga roa i te au āriki no te riri i akatauia no te mate ra; E kia anoano oki aia i te akakite i te maata anga o tona meitaki, i te au āriki o te aroa i akatau takereia e ia no te ao; Koia oki tatou nei, ko tei tuatuaia mai e ia, auraka ko to te ngati Iuda anake ra, ko te etene katoa nei ra?”​—Roma 9:​14-24.

9. (a) Koai ma te “au āriki no te riri i akatauia no te mate ra”? (e) Eaa ra a Iehova i akaari ei i te akakoromakianga roa ki mua i tona aronga patoi ra, e akapeea te openga ra e riro ei ei puapinga no te aronga tei inangaro ra iaia?

 ⁹ Mei te meameaau anga i Edene mairai, tetai ua atu tei patoi ra ia Iehova e tana au ture kua riro ei “au āriki no te riri i akatauia no te mate ra.” I taua tuatau katoa mei reira mairai, kua akono a Iehova i te akakoromakianga roa. Kua aviri te aronga rave kino ra i tana au ravenga, kua takinga kino i tona au tavini, e kua tamate i tana Tamaiti. Ma te akaarianga i te akakoromaki maata, kua akatika a Iehova kia rava te tuatau no te au mea ora katoa ra kia kite ki katoa i te au tupu anga kino no te meameaau anga i te Atua e te tutara anga a te tangata tei takake ra iaia. I taua tuatau rai, kua oronga mai to Iesu matenga i te tika no te akaoraanga i te au tangata akarongo ra e ‘kia akakore aia i te angaanga a te diabolo ra.’​—1 Ioane 3:8; Ebera 2:​14, 15.

10. Eaa ra a Iehova i akakoromaki ei i te aronga rave kino no te 1,900 mataiti kua topa akenei?

¹⁰ Ko tei tere atu i te 1,900 mataiti mei te tuakaouanga mai o Iesu, kua akakoromaki atura Iehova i te “au āriki no te riri,” i te tapuanga i to ratou akapouanga. No teaa ra? Ko tetai tumu, no te mea i teateamamao ana aia i te aronga te ka taokotaiia atu ma Iesu Karaiti ki roto i tona Patireia i te rangi ra. E 144,000 to ratou numero, e ko ratou te “au āriki o te aroa” tei tuatuaia ra e te apotetoro ko Paulo. Te aronga mua, no roto mai i te au ngati Iuda tei patiia atura kia piri atu ki teia pupu no te rangi. I muri iora, kua pati atu te Atua i te au tangata no te au Kenitara ra. Kare a Iehova i opara i tetai ua atu o teia aronga kia tavini atu iaia. Mari ra no roto mai i te aronga tei akarongo ariki ua ra i tana au apinga aroa, kua oronga atura aia ki tetai papaki i te tika no te riroanga ei au oa tutara ma tana Tamaiti i te Patireia i te rangi ra.  Te vaitata ra i te oti i teianei te teateamamao anga i taua pupu no te rangi ra.​—Luka 22:29; Apokalupo 14:​1-4.

11. (a) Eaa te pupu te puapingaia ra i teianei i to Iehova akakoromaki anga roa? (e) Akapeea e puapingaiai tei mate ra?

¹¹ Inara ka akapeea te aronga no te enua nei? Kua akapapa katoa to Iehova ra akakoromakianga roa i te akaputu anga i te “aronga maata rava” no te au pa enua ravarai. Kua tae to ratou numero i teianei ki te au mirioni ua atu. Kua taputou mai a Iehova e ka ora atu teianei pupu no te enua nei i te openga o teianei akatereanga e tei ia ratou te manakonako anga no te ora mutu kore ki runga i te enua parataito. (Apokalupo 7:9, 10; Salamo 37:29; Ioane 10:16) I te tuatau tau o te Atua, e aronga tini o tei mate ra ka akatuakaouia mai e ka orongaia atu te tika kia riro ei au tangata no te enua nei i raro ake i te Patireia o te rangi ra. Te totou maira te Tuatua a te Atua ia Angaanga 24:15: “E e tuakaouanga to tei mate, te aronga tuatua-tika e te aronga tuatua-tika kore.”​—Ioane 5:​28, 29.

12. (a) Eaa ta tatou i kite no Iehova mei tona akakoromaki anga i te kino? (e) Akapeea toou manako ngakau no ta Iehova akono anga i teia au tumu?

¹² E tu tau kore ainei to roto katoa i teianei? Kare, no te mea na tana tapuanga i te akapouanga o te aronga kino, me kare te “au āriki no te riri,” te akaari maira te Atua i te aroa ki etai atu, kia rotai ma tona akakoro anga. Na teia i akaari mai i tona aroa ua e te aroaanga oki. Pera katoa, i te rauka anga te tuatau kia akara i te eeuanga o tana akakoro anga, e maata ta tatou i kite no Iehova uaorai. Kua umere tatou i te au tu ke ke o tona tu ei peretana tei aere maira ki te marama​—tona tu tau, tona aroa ua, tona akakoromakianga roa, tona pakari tataka ke ra. Ta Iehova ra akonoanga pakari i te maroanga no tei ngateitei i te ao katoa e pini ua ake​—tona tika kia tutara​—ka tu ia  e mutu kore ua atu ei akakite anga i te tika e ko tana tutara anga tei meitaki rava atu. Ma te apotetoro katoa ko Paulo, ka tuatua tatou: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!”​—Roma 11:33.

Te Tuatau Va Mai kia Akaari i to Tatou Akamori Anga

13. Me kite tatou uaorai i te mamaeanga, eaa te tuatau te orongaia maira kia tatou, e eaa te ka tauturu ia tatou kia akono pakari atu?

¹³ E manganui te au tavini o te Atua tei roto i te au turanga te o atura ki te mamaeanga. Te tupu ua atura to ratou mamaeanga no te mea kare te Atua i akapou ake i te aronga rave kino e i apai mai ake i te akaora anga totouia maira no te tangata. Ka tau ainei teia kia akamareka kore ia tatou? Me kare te kite ra aina tatou i taua au turanga ra ei au tuatau va mai kia rave i te akapapuanga e e pikikaa te Tiaporo? Ka rauka kia akamaroiroiia tatou kia rave i te reira me ka tamou tatou ki te manako i te pati anga: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” (Maseli 27:11) Ko Satani tei akakino ra ia Iehova, kua karanga e me ka mamae te au tangata no te ngereanga i te apinga me kare te mamae anga kopapa, ka akaapa ratou i te Atua ra, e ka taumaa atu iaia. (Iobu 1:​9-11; 2:4, 5) Ka apai mai tatou i te rekareka ki te ngakau o Iehova me, na to tatou tiratiratu kiaia i te aro atuanga i te au tu ngata, ka akaari tatou e kare te reira i te tika i to tatou turanga.

14. Me ka irinaki tatou kia Iehova i to tatou au timataanga, eaa te au puapinga ka rauka ia tatou?

¹⁴ Me ka irinaki tatou ki runga ia Iehova me ka timataia tatou, ka rauka ia tatou te akatupu i te au tu okomaata. Ei akatauanga, ei tupu anga no te au apinga ta Iesu i mamae ra, “i kite aia i te akamoraro” i roto i tetai tu kare ra aia i kite ana  i mua ana. Ka rauka katoa oki ia tatou kia kite mei to tatou au timataanga i te mea ka rauka ia tatou kia tatanu i te akakoromakianga roa, te tamou marie anga, e tetai ariki anga oonu no to Iehova ra au aerenga tuatua tika.​—Ebera 5:8, 9; Iakobo 1:​2-4.

15. Ia tatou e akakoromaki marie ra i te tu ngata, akapeea etai ke ra e puapingaiai?

¹⁵ Ka akara mai etai i ta tatou e rave ra. No ta tatou i rave no to tatou inangaro i te tuatua tika, penei ka ariki tetai papaki o ratou a muri akera e koai ma te au Kerititiano mou i teia tuatau. E na te taokotai anga mai kia maua ra i roto i te akamorianga, ka rauka kia akapapa mai ratou no te au  akameitaki anga o te oraanga mutu kore. (Mataio 25:​34-36, 40, 46) Te anoano ra Iehova raua ko tana Tamaiti kia rauka taua tuatau ra i te au tangata.

16. Akapeea to tatou manako anga i te tu ngata i te piri anga ki te tumu no te taokotai anga?

¹⁶ Mei teaa ra te meitaki o te reira me ka manako tatou i te au turanga ngata ei au tuatau kia akaari i to tatou akamori anga kia Iehova pera katoa oki ei kapiti anga i te akaotianga i tona anoano! Na to tatou raveanga i te reira ka akakite e te aere tika atura tatou ki te taokotai anga ma te Atua e Karaiti. Kua pure a Iesu kia Iehova no te au Kerititiano katoatoa i te na ko anga: “Kare oki au i pure ia ratou [i tana au pipi vaitata iaia i reira] anake ua, i te aronga katoa ra te ka akarongo mai iaku i ta ratou apii anga; Kia riro ratou katoa ei okotai; mei ia koe, e taku Metua, i roto iaku nei, e mei iaku oki i roto ia koe na, kia okotai katoa ratou ki roto ia taua.”​—Ioane 17:​20, 21.

17. Eaa te irinaki anga te ka rauka ia tatou me te tiratiratu ra tatou kia Iehova?

¹⁷ Me ka tiratiratu tatou kia Iehova, ka tutaki maoraora mai aia ia tatou. Te na ko ra tana Tuatua: “Kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.” (1 Korinetia 15:58) Te tuatua katoa ra e: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.” (Ebera 6:10) Te akakite maira Iakobo 5:11: “I na oki, te karanga nei tatou e, kua meitaki te aronga i tamou marie i te akakoromaki. Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra; e kua ki te Atu i te aroa e te takinga-meitaki maata.” Eaa te tupuanga no Iobu? “Akameitaki roa akerā Iehova i to Iobu openga i to tona muatangana.” (Iobu 42:​10-16)  Ae, ko Iehova “tei tutaki mai i te aronga i kimi tikai iaia.” (Ebera 11:6) E mei teaa ra te tutaki anga ta tatou ka tapapa atu ki te​—oraanga mutu kore ki runga i te enua parataito!

18. Eaa te ka tupu i te openga ra ki etai ua atu au maaraara anga mamae o tatou ra?

¹⁸ Ka akakore atu te tutara Patireia a te Atua i te au kino katoatoa tei raveia ki te pamiri tangata nei no te au tauatini mataiti kua topa. Ka maata rava atu te au rekareka anga a taua taime ra i to etai ua atu mamaeanga ta tatou i kite i teianei. Kare tatou e akapekapekaia e tetai ua atu au maaraara anga mamae o muatangana. Te au manako akamatutuanga e te au angaanga te ka akaki i te au ra ravarai o te oraanga tangata i roto i te ao ou ra ka takore marie atu i te au maaraara anga mamae. Te akakite maira Iehova: “Te anga nei au i te rangi ou [i tetai kavamani Patireia ou i te rangi i rungao i te au tangata] e te enua ou [tetai taiate tangata tuatua tika]: kare oki tei muatangana ra e maaraia, kare e akamanako akaouia atu. E rekareka ra kotou, e e rere ua i te rekareka e tuatau ua atu, i taku e anga nei.” Ae, i roto i te ao ou a Iehova ka rauka kia tuatua te aronga tuatua tika: “Kua noo ponuiaau ua te ao katoa nei, kua akaanga te roi, kua puroro ua mai to ratou reo imene.”​—Isaia 14:7; 65:​17, 18.

Uriuri Akaou Anga

• I te tuku uaanga i te rave kino, i akapeea a Iehova i te akaari anga tika i te ngateitei no tona uaorai ingoa?

• I akapeea to te Atua ra akakoromaki anga i te “au āriki no te riri” i raukai kia tae roa mai tona aroa maata kia tatou nei?

• Eaa ta tatou ka tau kia tauta kia kite i roto i te au turanga te o atura te mamaeanga tangata nei?

[Au Uianga Apii]

[Tutu i te kapi 67]

“Akameitaki roa akerā Iehova i to Iobu openga i to tona muatangana”