Pene Tai

Taokotai i te Akamori Anga i to Tatou Tuatau​—Eaa te Aite Anga o te Reira?

1, 2. (a) Eaa te akaaere anga rekareka te akonoia nei i to tatou tuatau? (e) Eaa te manakonako umere o te au tangata ngakau tiratiratu ra?

E KAKO rava ake i te ao katoa nei e akaaere anga rekareka tetai kia taokotai te akamori anga. Te akaputu maira te reira i te au tangata e mirioni ua atu no te pa enua ravarai, te au kopu, e te au reo oki. E maata atu te akaputuia maira i te au mataiti taki tai. Te akatakaia ra teia aronga i te Pipiria ei “kite” no Iehova e te karangaia ra e “e aronga maata rava.” Te “akamori [ra ratou i te Atua] i te po e te ao.” (Isaia 43:​10-12; Apokalupo 7:​9-15) Eaa ra ratou i rave ei i teia? No te mea kua kite ratou e ko Iehova anake te Atua mou. Na teianei i akakeu ia ratou kia apai mai i to ratou au oraanga kia rotai ma tana au turanga tuatua tika ra. Pera katoa, kua kite ratou e te noo nei tatou i “taua tuatau openga” o teianei ao kino, e kare e roaia ka akapouia e te Atua te reira, e ka monoia mai e ia te reira ma tana ao ou parataito ra.​—2 Timoteo 3:​1-5, 13; 2 Petero 3:​10-13.

² Te taputou maira te Tuatua a te Atua: “E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra.” (Salamo 37:​10, 11) “Ka riro te enua no te aronga tuatua-tika, ka noo tamou rai ratou i reira.” (Salamo 37:29) “[Na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:4.

3. Akapeea te apai mai anga i te taokotai anga mou no te akamori anga?

 ³ Te aronga te taokotaiia nei i teianei ki roto i te akamori anga mou ko ratou te aronga mua ka noo i taua ao ou ra. Kua kite ratou eaa te anoano o te Atua e te rave ra i te reira i te meitaki o to ratou kite anga. I te akaarianga i te puapinga maata o teia, kua tuatua Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Kua tata te apotetoro ko Ioane: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:17.

Eaa Tikai te Aiteanga o te Reira

4. (a) Eaa tikai te aite anga no te akaputuanga i te aronga e manganui ki roto i te akamori taokotai anga i to tatou tuatau nei? (e) Akapeea ta te Pipiria akataka anga i teianei akaputuanga?

⁴ Eaa tikai te aiteanga o te akaputuanga i te aronga e manganui kia taokotaiia i te akamori anga i to tatou tuatau nei? E akakite anga taka meitaki te reira e te vaitata rava nei tatou ki te openga o teianei ao kino, ma te akamata anga mai ta te Atua ra ao ou i muri ua ake i te reira. E aronga kite mata tatou no te akatupu anga o te au totou Pipiria tei akakite maira i teianei akaputuanga puapinga maata. Te tuatua ra tetai o taua totou ra: “E riro kia tae ki te au rā openga ra [i teianei tuatau openga], e akatinamouiaʼi te maunga ra o te are o Iehova [tana akamori anga mou akateiteiia] ki runga i te take o te au maunga ra [i runga ake i tetai ua atu tu akamori anga], . . . e ka uipa mai te au tangata ki reira. E manganui te enua e aere, ma te tuatua e, Aere mai, ka aere tatou ki runga i te maunga o Iehova, e ki te are o te Atua o Iakoba, e nana e apii mai ia tatou i tona au aerenga; e ka aere tatou na tona ra au arataa.”​—Mika 4:1, 2; Salamo 37:34.

5, 6. (a) Akapeea i tikai e te ariu maira to te au pa enua kia Iehova? (e) Eaa nga uianga te tau ra tatou kia ui kia tatou uaorai?

 ⁵ Noatu rai e kare to te au pa enua katoatoa ra e oronga ana ia ratou uaorai i te are vaerua o Iehova ra no te akamori anga, e au mirioni ua atu te aronga tataki tai no roto mai i te au pa enua katoa ra te rave ra i te reira. Ia ratou e apii ra i te akakoro anga aroa e te tu peretana marekaanga o te Atua ko Iehova ra, te akakeu oonuia ra to ratou au ngakau. Te kimi akaaka ra ratou kia kite eaa ta te Atua e umuumu maira ia ratou. Ta ratou pure te aite ra ki ta te tata taramo tei tuatua ra: “E apii mai koe iaku kia rave au i to inangaro; ko koe oki taku Atua.”​—Salamo 143:10.

⁶ Te kite ra ainei koe ia koe uaorai i roto i taua urupu maata o te au tangata ta Iehova e akaputu maira i teianei ki roto i te akamori anga taokotaiia? Te akaari ra ainei taau tu akono i te apii anga te rauka maira ia koe mei tana Tuatua e te ariki tika ra koe e ko Iehova te Tumu o te reira? Eaa te mamao o taau ‘aere anga na tona ra au arataa’?

Akapeea e Raukai te Reira

7. (a) Eaa te maata o te tupu anga te taokotai anga o te akamori anga i te openga? (e) Eaa ra i rapurapu ei i teianei kia riro ei tangata akamori ia Iehova, e akapeea e raukai ia tatou te tauturu ia etai ke kia rave i te reira?

⁷ Ta Iehova ra akakoroanga e ko te au mea ora kite katoatoa ra kia taokotaiia ki roto i te akamori anga mou. Mei teaa ra to tatou inangaro anga no te ra e akamori ei te aronga katoatoa e ora ra, i te Atua mou anake ra! (Salamo 103:​19-22) Inara i mua ake ka tupu ei te reira, ka tika a Iehova kia akaatea ke atu i te aronga katoatoa kare e akatika kia rave i tona anoano tuatua tika. No te aroa ra, te akakite maira aia na mua i te akakite anga eaa tana ka rave, kia raukai i te au tangata i te au ngai ravarai te tuatau kia taui  i to ratou aerenga. (Isaia 55:6, 7) No reira, i to tatou tuatau nei “ki te pa enua katoa, e te au kopu, e te au reo, e te au iti-tangata,” te akakiteia ra teia akakite anga rapurapu: “Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.” (Apokalupo 14:6, 7) Kua ariki ainei koe i taua patianga ra? Mei koia ia, tei ia koe te tika kia pati i etai ke kia kite e kia akamori i te Atua mou ra.

8. I muri ake i te kiteanga i te au apiianga tumu o te Pipiria, eaa tetai atu tereanga ki mua ka tau tatou kia tauta i te akono?

⁸ Kare i te akakoroanga na Iehova kia akamoriia e te au tangata te tuatua ra e te irinaki ra ratou iaia inara te rave ua atura i te aruaru anga i to ratou uaorai inangaro. Te anoano ra te Atua i te au tangata kia riro mai “i te kite i tona anoano” e ka akaata i teia i to ratou au oraanga. (Kolosa 1:9, 10) No reira, te au tangata ariki tei kite i te au apiianga tumu no te Pipiria ka anoano ia kia tere ua atu ki mua ki te pakari anga Kerititiano. Te anoano ra ratou kia meitaki atu ia Iehova, kia akapararauare atu e kia akaoonu atu i to ratou kiteanga i tana Tuatua, e kia akono ki atu i te reira i to ratou au oraanga. Ka kimi ratou kia akaata mai i te au tu o to tatou Metua i te rangi ra e kia kite i te au tumu mei tana i manako ra. Ka akakeu teia ia ratou kia kimi i etai ravenga kia kapiti atu ki te angaanga akaoraanga tana i akapapa kia raveia i te enua nei i to tatou tuatau. Ko tera katoa ainei toou inangaro?​—Mareko 13:10; Ebera 5:​12–​6:3.

9. I roto i teea au tu e raukai te taokotai anga mou i teianei?

⁹ Te akakite maira te Pipiria e ko te aronga te tavini ra ia Iehova ka tika ei au tangata taokotaiia. (Ephesia 4:​1-3) Ka tika taua taokotai anga kia tupu i teianei, noatu rai e te noo nei tatou i tetai ao tataka ke ra e te vai kukumi ua nei i to tatou uaorai au tu apa ua. Kua pure akatenga a Iesu e kia okotai tana au pipi katoatoa, kia rekareka i te taokotai  anga mou. Eaa te aiteanga o teianei? Te mea mua, e ei pirianga meitaki to ratou ma Iehova e tana Tamaiti oki. Te rua, e kia taokotai ratou tetai ma tetai. (Ioane 17:​20, 21) Ki taua akakoro anga ra, te tavini ra te putuputuanga Kerititiano ei akaaerenga te na roto maira ta Iehova apiianga i tona au tangata.

Eaa te Au Turanga ka Tauturu i te Taokotai Anga?

10. (a) Eaa ta tatou ka akatupu me ka taangaanga tatou uaorai i te Pipiria kia kimi i te au pauanga ki te au uianga te piri maira kia tatou? (e) E akataka i te au tumu te tauturu ra i te taokotai anga Kerititiano na te pauanga i te au uianga i papaia i roto i teia parakaoa.

¹⁰ E itu au turanga taviri te ka tauturu i te taokotai anga i te akamori anga te kitea ia ra i raro akenei. Ia koe e pau ra i te au uianga kapitiia maira, e tamanako e akapeea te tupu anga o te au tumu taki tai ra ki toou pirianga ma Iehova e ma toou au oa Kerititiano oki. Na te manakoanga ki runga i teianei au tumu e te akara anga oki i te au tuatua tapu taikuia kare ra i tataia ka tauturu i te tupu anga toou pakari tau i te Atua ra, te kite manakoanga, e te kite oonu anga​—te au tu te anoanoia ra e tatou katoatoa. (Maseli 5:1, 2; Philipi 1:​9-11) E akamanako i teianei au turanga e okotai i te taime.

(1) Te akatika nei tatou i to Iehova tika anga kia akanoo i te turanga no te meitaki e te kino. “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—Maseli 3:5, 6.

Eaa tatou ka tau ei kia kimi i ta Iehova akoanga e tana arataki anga i te akonoanga i te au ikianga? (Salamo 146:​3-5; Isaia 48:17)

(2) Tei ia tatou te Tuatua a te Atua ei arataki ia tatou. “Ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei  tuatua ra na te Atua, e koia tika rai oki, ko tei angaanga maroiroi i roto ia kotou i tei akarongo ra.”​—1 Tesalonia 2:13.

Eaa te kino te vaira i te rave ua anga i ta tatou i “manako ngakau” ra e meitaki? (Maseli 14:12; Ieremia 10:​23, 24; 17:9)

Me kare tatou i kite eaa te akoanga ta te Pipiria i oronga maira no runga i tetai tumu, eaa ta tatou ka tau kia rave? (Maseli 2:​3-5; 2 Timoteo 3:​16, 17)

(3) Te puapinga katoaia ra tatou mei te porokaramu angaianga pae vaerua. “E te au tamariki katoa naau ra e apiiia e Iehova.” (Isaia 54:13) “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra [no te akapouanga] i te vaitata anga mai.”​—Ebera 10:​24, 25.

Eaa te au puapinga ka aere mai ki te aronga tei akono ra i te meitaki katoa no ta Iehova ra akanoonoo anga no te angaianga pae vaerua? (Isaia 65:​13, 14)

(4) Ko Iesu Karaiti, e kare i te tangata, to tatou Arataki. “Kareka kotou, auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na. Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia tapaia i te arataki; okotai o kotou Arataki, ko te Mesia.”​—Mataio 23:​8-10.

Ka tau ainei etai ua atu o tatou kia irinaki e e teitei atu tatou ia etai ke ra? (Roma 3:​23, 24; 12:3)

(5) Ka akara atu tatou ki te kavamani Patireia o te Atua ra ei manakonakoanga anake no te tangata katoa. “Na ko kotou kia pure: E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua  nei, mei tei te ao katoa na. E na mua ra kotou i te kimi i te basileia o te Atua, e te tuatua-tika nana ra.”​—Mataio 6:​9, 10, 33.

Akapeea te ‘kimianga i te basileia na mua’ i te tauturu anga i te paruru i to tatou taokotai anga? (Mika 4:3; 1 Ioane 3:​10-12)

(6) Te akatupu ra te vaerua tapu ki roto i te aronga akamori ia Iehova i te au tu te puapinga maata ra ki te taokotai anga Kerititiano. “Ta te Vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.”​—Galatia 5:​22, 23.

Eaa ta tatou ka tika kia rave kia akatupu mai ei te vaerua o te Atua i tona au ua ki roto ia tatou? (Angaanga 5:32)

Akapeea te raukaanga te vaerua o te Atua ra i te mana anga ki runga i to tatou pirianga ma te au oa Kerititiano ra? (Ioane 13:35; 1 Ioane 4:​8, 20, 21)

(7) Pouroa te aronga akamori mou i te Atua ra te kapiti ra i te tutuanga i te tuatua meitaki o tona Patireia ra. “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.

Eaa te ka tau kia akakeu ia tatou kia anoano kia rave i tetai kapiti anga ki katoa i teianei angaanga tutu aereanga? (Mataio 22:​37-39; Roma 10:10)

11. Me akono tatou i te au tuatua mou Pipiria i to tatou au oraanga, eaa te tupu anga?

¹¹ Na te taokotai anga i te akamori ia Iehova e akapiri vaitata atu ia tatou kiaia e ka rauka kia rekareka tatou i te pirianga akapumaanaanga ma te au oa akarongo. Te tuatua ra Salamo 133:1: “I na oki, te meitaki e te mataora, kia noo katoa te au taeake ma te tau tikai!” Mei teaa ra te  akapumaanaanga kia atea ke atu mei teianei ao ma tona au tu noinoi, te au ainga tau kore, e te ta ua e kia akaputu atu ma te aronga tei inangaro tika ra ia Iehova e te akono ra i tana au ture!

E Kopae Ke i te Au Mana Tataka Ke Ra

12. Eaa tatou i tau ei kia kopae ke i te vaerua taka ke ra?

¹² Kia kore e akakino i to tatou taokotai anga oko maata i te ao katoa nei, ka tika tatou kia kopae ke i te au mana tataka ke. Tetai o teianei ko te vaerua no te taka ke anga mei te Atua ra e tana au ture. Te tauturu maira Iehova ia tatou kia kopae ke i te reira na te akakiteanga mai i tei akamata maira i te reira, koia ko Satani te Tiaporo ra. (2 Korinetia 4:4; Apokalupo 12:9) Ko Satani tei mana ra ki runga ia Adamu raua ko Eva kia kore e akarongo ki ta te Atua i tuatua atura e kia tuku i te au ikianga tei patoi ra i to te Atua anoano. Te tupu anga e tumatetenga no raua e no tatou katoa oki. (Genese 3:​1-6, 17-19) Kua ki takiri teianei ao i te vaerua no te taka ke anga mei te Atua e tana au ture. No reira ka tau tatou kia arai i taua vaerua ra i roto ia tatou uaorai.

13. Eaa te ka akaari mai me te teateamamao ngakau tae ra tatou no te oraanga ki roto i ta te Atua ao ou no te tuatua tika?

¹³ Ei akatauanga, e akamanako i ta Iehova ra taputou akamarekaanga kia mono i teianei ao kino ma te au rangi ou e tetai enua ou, “i te vai tika anga o te tuatua-tika ra.” (2 Petero 3:13) Kare ainei te reira e tau kia akakeu ia tatou kia akamata i te teateamamao anga kia ora i taua tuatau ra i te vai tika anga te tuatua tika ra? Te aiteanga o teia kia akono i te akoanga taka meitaki o te Pipiria ra: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra.” (1 Ioane 2:15) No reira, e kopae ke atu i te vaerua o teianei ao​—e tona vaerua akatake ke ra, tona manako anga maata nona uaorai, tana ainga tau kore e te ta  ua. E akariro tatou ei ravenga kia akarongo atu kia Iehova e kia akarongo kiaia mei to tatou ngakau maira, noatu tetai ua atu manakoanga patoi no te kopapa apa ua ra. To tatou aerenga o te oraanga katoa ra te akakite maira e ko to tatou manakoanga e to tatou au akakeu anga te akapapaia ra no te raveanga i to te Atua anoano.​—Salamo 40:8.

14. (a) Eaa ra i puapinga maatai kia mou i te tuatau i teianei kia apii i ta Iehova au aerenga e kia aru ia ratou i to tatou oraanga? (e) Eaa te aite anga kia tatou uaorai o te au tuatua tapu tei tataia maira i te parakaoa ra?

¹⁴ Me tae mai te tuatau akatakaia ra no Iehova kia akapou i teianei akatereanga kino o te au mea nei e te aronga katoa tei iki i tana au aerenga, kare rava aia e taroaroa. Kare aia e akaruke no tetai atu tuatau me kare e taui i tana au turanga kia tau no te aronga te tauta ra kia mou ki to teianei ao ia ratou e apii ra i te anoano o te Atua ma te apa ngakau ua e te rave ra i te reira. Ko teianei te tuatau no te rave angaanga! (Luka 13:​23, 24; 17:32; 21:​34-36) No reira, mei teaa ra te akapumaanaanga ngakau, kia akara i te urupu maata i te mou anga i teianei tuatau oko maata, i te kimi akatenga anga i te apiianga ta Iehova e oronga maira na roto i tana Tuatua e te akaaerenga e te aaere taokotaianga i tona au arataa e tae atu ei ki te ao ou ra! E te maata atu i ta tatou apii anga no Iehova, te maata atu ia i to tatou inangaro iaia e te anoano oki kia tavini atu iaia.

Uriuri Akaou Anga

• Eaa ta Iehova akakoro anga no te akamori anga?

• I muri ake i te apiianga i te au apiianga tumu o te Pipiria, eaa tetai atu tereanga ki mua te tau ra tatou kia kimi akatenga i te akono?

• Eaa ta tatou tataki tai ka rauka kia rave kia taokotai ei ma etai atu te akamori ra ia Iehova?

[Au Uianga Apii]

 [Tutu i te kapi 4]

‘Ka riro te enua i te aronga maru ra e ka rekareka ratou i te maata o te au ra’