Pene Iva

Te Mana o te Manakonako no te Tuakaouanga

1. Naringa kare te manakonako no te tuakaouanga, eaa te manakonako anga te ka rauka i tei mate ra?

KUA taka ke ainei etai taau i akaperepere ra i te mate? Naringa kare e tuakaouanga, kare e manakonako anga no te aravei akaouanga ia ratou. Ka vairai ratou i roto i te turanga ta te Pipiria i akataka maira i tana tuatua anga: “Kare ra a te aronga i mate ra e tuatua i kitea, . . . kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.”​—Koheleta 9:5, 10.

2. Eaa te manakonako anga umere te rauka maira na roto i te tuakaouanga?

² No te aroa, na roto i te tuakaouanga, kua akatuera mai a Iehova i te tuatau okomaata no te aronga tini o te au tangata tei mate ra kia oki akaou mai mei te mate e kia rekareka i te ora mutu kore. Te aiteanga o teia e ka rauka ia koe te manakonako anga akapumaana ngakau e a tetai tuatau, i roto i ta te Atua ao ou, ka taokotai akaouia koe ma te aronga akaperepere tei topa ra ki te moe i te mate.​—Mareko 5:​35, 41, 42; Angaanga 9:​36-41.

3. (a) I roto i teea au tu te akapapu anga mai i te puapinga o te tuakaouanga no te raveanga i ta Iehova ra akakoro anga? (e) I teea tuatau tikai e riro ei te manakonako no te tuakaouanga ei tumu no te akamaroiroi kia tatou?

³ No te tuakaouanga, kare tatou e tau kia mataku kino i te mate. Ka rauka ua ia Iehova, ma te kore e kino tamou ki tona au tavini tiratiratu kia tuku ia Satani kia aere ki te kotinga mamao i te tautaanga kia akapapu i tana akaapa  anga kino e “e riro oki ta te tangata katoa ra ei oko i tona ora.” (Iobu 2:4) Kua tiratiratu a Iesu ki te Atua tae roa kia mate, e no reira kua akatuakaouia mai aia e te Atua ki te oraanga i te rangi. No reira, kua rauka ia Iesu i te oronga i te puapinga o tona atinga tangata apa kore ki mua i te terono o tona Metua i te rangi ra, ma te puapinga akaoraanga ia tatou. Na roto i te tuakaouanga, ka rauka i te aronga o te “anana iti,” ei aronga akatuangaia ma Karaiti, te manakonako no te taokotai anga ma ia katoa i te Patireia i te rangi ra. (Luka 12:32) No etai ke ra, te vaira te manakonako no te tuakaouanga ki te oraanga mutu kore ki runga i te enua parataito. (Salamo 37:​11, 29) Ka kitea e te au Kerititiano katoatoa te manakonako no te tuakaouanga ei tumu no te maroiroi kia “mana maata meitaki” me rokoia ratou e te au timata anga te ka apai ia ratou kia aro atu i te mate.​—2 Korinetia 4:7.

Eaa i Riro ei ei Tumuanga i te Akarongo Kerititiano

4. (a) I teea tu e riro ei te tuakaouanga ei apiianga “tuatua mua”? (e) Eaa te aiteanga o te tuakaouanga ki to teianei ao?

⁴ Te tuatuaia ra te tuakaouanga, ia Ebera 6:1, 2, e e “tuatua mua.” E tuanga te reira no te tango o te akarongo me kare te reira kare tatou e riro ei au Kerititiano pakari. (1 Korinetia 15:​16-19) Inara, ko te apiianga Pipiria no te tuakaouanga e mea tuke ki te manakoanga matauia o teianei ao. No te ngereanga i te pae vaerua, e maata atu te au tangata te akara ra i teianei oraanga anake ei mea tika tikai. No reira, te noo nei ratou i te aruaru anga i te mea e navenave ei. Te vai katoa ra te aronga te akarongo ra i te au ikuiku anga akonoanga​—i roto e i vao katoa oki ia Kerititome​—tei manako ra e e meta mate kore to ratou. Inara kare e rauka kia kapitiia atu taua irinaki anga ra ma te apiianga a te Pipiria no te tuakaouanga, i te mea kare e  umuumuia te tuakaouanga naringa e meta mate kore to te au tangata. I te tautaanga kia kairo i teianei nga manako e rua e maata atu te oripu anga i to te akauruanga manako. Akapeea e raukai ia tatou kia tauturu i te aronga ngakau tiratiratu te anoano ra kia kite i te tuatua mou?

5. (a) I mua ake ka ariki ei te tangata i te tuakaouanga, eaa tana ka tau kia kite? (e) Eaa te au tuatua tapu taau ka taiku kia akataka i te meta? te turanga o tei mate? (nga) Penei eaa te ka tau kia raveia me ka taangaanga tetai i te urianga Pipiria te akara anga tapoki ra i te tuatua mou?

⁵ I mua ake ka ariki ei taua aronga ra i te akanoonooanga meitaki o te tuakaouanga, ka tau kia rauka ia ratou te marama tika no te meta e te turanga o tei mate ra. E putuputu, e tokoiti ua te au irava tuatua tapu ka rava kia akataka meitaki i teianei au tumu ki tetai tangata te kaki ra i te tuatua mou Pipiria. (Genese 2:7; Salamo 146:3, 4; Ezekiela 18:4) Inara, ko etai au urianga ou e te au tataanga takiota tuatua o te Pipiria te tapoki ra i te tuatua mou no te meta. No reira penei ka umuumuia kia akamanako i te au tuatua tei taikuia ra i te au reo mua o te Pipiria ra.

6. Akapeea koe me tauturu i te tangata kia kite eaa te meta?

⁶ E puapinga maata te New World Translation i te raveanga i teia no te mea te uri tamou maira te reira i te tuatua Epera neʹphesh e te tuatua Ereni aiteite psy·kheʹ ei “meta.” I roto i te tata anga openga o teianei urianga te akapapaia maira te au irava te kitea ra teianei au tuatua. E manganui te au Pipiria ke ke ra kare i tamou marie mari ra penei ka uri i te au tuatua mua ra kare ei “meta” anake mari ra ei “mea ora,” “apinga ora,” “peretana,” e te “oraanga”; “toku neʹphesh” penei ka uriia e ko “au,” e ko “toou neʹphesh,” ko “koe.” Na te akaaiteite anga i etai atu au urianga Pipiria ma te New World Translation ka tauturu i tei apiiia ma te ngakau tae ra kia ariki e ko te au tuatua o te reo akamata  anga tei uriia ra e “meta” te taiku ra i te au tangata e te au animara. Inara kare teianei au tuatua e akakite mai ana e ko tetai meta e akara koreia, kare e amiriia te ka rauka kia taka ke atu i te kopapa i te matenga e kua ora kite ua atu i tetai ngai.

7. Akapeea koe me akataka mai mei te Pipiria i te turanga o te aronga i roto ia Teoro? i roto ia Ate? i roto ia Keena?

⁷ Te rave tamou katoa ra te New World Translation i te taiku anga i te tuatua “Teoro” kia akakite mai i te tuatua Epera sheʼohlʹ e i tana taiku anga ia “Ate” no te tuatua Ereni haiʹdes e ko “Keena” no te tuatua Ereni geʹen·na. Te aiteite ra te “Teoro” ki te tuatua “Ate.” (Salamo 16:10; Angaanga 2:27) Te akataka meitaki maira te Pipiria e ko Teoro e Ate te taiku ra i te vaarua tanumanga o te au tangata e te taokotaiia atura ki te matenga, kare ki te oraanga. (Salamo 89:48; Apokalupo 20:13) Te tou katoa ra te au Tuatua Tapu ki te manakonako anga no te oki akaou mai anga mei te vaarua tanumanga ra na roto i te tuakaouanga. (Iobu 14:13; Angaanga 2:31) Ei tuke anga, kare e manakonako anga no te tuatau ki mua te mouia maira no te aronga te ka aere ki Keena, e kare te meta e tuatuaia ana i te vai kite anga ki reira.​—Mataio 10:28.

8. Akapeea te kiteanga tika i te tuakaouanga i te mana anga ki runga i te tu manako o tetai tangata e tana au angaanga?

⁸ Ma te akataka anga meitaki i taua au tumu ra, ka rauka i te tangata i reira kia tauturuia kia marama eaa te aite anga o te tuakaouanga ra kiaia. Ka rauka iaia kia akamata i te akameitaki no to Iehova aroa i te orongaanga mai i taua akono anga umere ra. Te tu mii tei manako ngakauia ra e te aronga tei taka ke ra ta ratou i akaperepere ra i te mate ka rauka kia akapumaanaia na te manako anga rekareka i te kapiti akaou anga i ta te Atua ra ao ou. Na te maramaanga i teianei au tumu ka riro katoa  ei taviri i te kiteanga i te aiteanga o te matenga o Karaiti ra. Kua kite te au Kerititiano o te anere mataiti mua ra e ko te tuakaouanga o Iesu Karaiti e tumuanga ia ki te akarongo Kerititiano ra, i te akatueraanga i te aerenga no te tuakaouanga o etai ke ra. Kua ako totomapu ratou i te tuakaouanga o Iesu e te manakonako anga ta te reira e oronga maira. No reira, katoa, te aronga te ariki ra i te tuakaouanga i teia tuatau te inangaro ra kia tua i teianei tuatua mou okomaata ma etai ke ra.​—Angaanga 5:​30-32; 10:​42, 43.

Taangaanga Anga i ‘te Taviri o Ade’

9. Akapeea ta Iesu ra taangaanga anga mua i “te taviri o te mate e to ade”?

⁹ Pouroa te aronga te ka taokotaiia ma Karaiti i tona Patireia i te rangi ra ka tika kia mate. Inara te kite meitaki ra ratou i te akapapu anga tana i oronga i te tuatua anga: “I mate ana rai oki: e i na, e ora atu rai au e tuatau ua atu, Amene; e tei iaku te taviri o te mate e to ade.” (Apokalupo 1:18) Eaa te aiteanga o tana tuatua? Te akakite atura aia i tei tupu kiaia uaorai. I mate katoa aia. Inara kare te Atua i akaruke iaia ki Ate. I te ra toru, kua akatu mai a Iehova iaia ki te oraanga vaerua e kua oronga atu i te mate kore ki runga iaia. (Angaanga 2:​32, 33; 10:40) Kapiti katoa, kua oronga atura te Atua kiaia i “te taviri o te mate e to ade” kia taangaangaia i te tataraanga i etai atu mei te vaarua tanumanga o te au tangata nei e mei te au tupuanga no te ara a Adamu ra. No te mea tei iaia taua nga taviri ra, kua rauka ia Iesu i te akatu mai i tana au pipi tiratiratu mei te mate mai. Ka akatuakaou aia i te au mema akatainuia i te vaerua o tana putuputuanga na mua, e te orongaanga kia ratou i te apinga okomaata no te mate kore i te rangi, mei ta tona Metua i oronga ra kiaia.​—Roma 6:5; Philipi 3:​20, 21.

10. Aea te tuakaouanga o te au Kerititiano tiratiratu tei akatainuia ra e tupu ei?

 ¹⁰ Aea e tupu ei taua tuakaouanga ki te rangi ra ki te au Kerititiano tiratiratu tei akatainuia ra? Te akakite maira te Pipiria e kua tupu ke ana te reira. Kua akataka maira te apotetoro ko Paulo e ka akatuia mai ratou ‘i to Karaiti tuatau parutia,’ kua akamata maira taua parutia ra i te mataiti 1914. (1 Korinetia 15:23, NW) Me oti te angaanga a te aronga tiratiratu tei akatainuia ra i te enua nei i teianei i te tuatau o tona parutia, kare ratou e vai ua i roto i te mate kia oki akaou mai to ratou Atu. Me mate ua akera ratou, kua akatuia mai ratou i roto i te vaerua, ka “akatu keia, kare e mamia, mei te kamo anga mata nei.” Mei teaa ra to ratou mataora anga, i te mea ko ta ratou au angaanga meitaki i rave ‘e aru oki ia ratou’!​—1 Korinetia 15:​51, 52; Apokalupo 14:13.

11. Eaa te tuakaouanga matauia no te au tangata ra, e aea te reira e akamatai?

 ¹¹ Inara te tuakaouanga no te aronga akatuangaia no te Patireia i te oraanga ki te rangi kare ia i te tuakaouanga anake ua. Ko te tika e te tapaia ra te reira ko “te tuakaouanga mua” ia Apokalupo 20:6 te akakite maira e ka aru mai tetai atu. Te aronga te ka puapingaia i te tuakaouanga i muri akera ka rauka ia ratou te manakonako mataora no te oraanga mutu kore ki runga i te enua parataito. Aea te reira e tupu ei? Te akakite maira te puka o Apokalupo e a muri ake “te enua e te rangi”​—koia te akatereanga kino o te au mea i teianei, ma tona au mana tutara​—i te takore atu angaia. Te vaitata maira te reira openga o te akatere anga taito. A muri ake i te reira, i ta te Atua ra tuatau tau, ka akamata te tuakaouanga no te aronga o te enua.​—Apokalupo 20:​11, 12.

12. Koai ma te ka kapitiia ki roto i te aronga tiratiratu ka akatuia mai ki te oraanga i te enua nei, e eaa te reira i riro ei ei manakonako anga marekaia?

 ¹² Koai ma ka kapitiia ki roto i taua tuakaouanga no te aronga o te enua? I roto ia ratou ko te au tavini tiratiratu o Iehova mei muatangana mai rai, te au tane e te au vaine no to ratou akarongo maroiroi i te tuakaouanga “kare ratou i ariki i te tatara anga a etai oko.” Koia oki, kare ratou i tuku ua i to ratou tiratiratu ki te Atua kia kopae ke i te ta ua, e te mate vave. Mei teaa ra tetai mareka anga kia kite tikai ia ratou e kia akarongo tika atu oki i te au tupu anga tei ripoti poto uaia maira i roto i te Pipiria! Te ka akatuakaou katoaia mai ki te oraanga i te enua nei ko Abela, te kite tiratiratu mua o Iehova; ko Enoka raua ko Noa, nga tangata akakitekite mataku kore i te tuatua akamatakiteanga a te Atua i mua ake i te Tiruvi ra; ko Aberahama raua ko Sara, tei akamanuiri ra i te au angera; ko Mose, na roto maira iaia te oronga anga mai i te Ture i te Maunga Sinai; te au peroveta mataku kore mei ia Ieremia ra, tei akara ra i te akapou anga o Ierusalema i te 607 M.T.N.; e Ioane Papetito, tei akarongo atura i ta te Atua uaorai akataka anga ia Iesu ei Tamaiti Nana. Kapiti mai, te vaira te au tane e te au vaine tiratiratu e manganui ra tei mate atu i teia tuatau openga o teianei akatereanga kino o te au mea nei.​—Ebera 11:​4-38, NW; Mataio 11:11.

13, 14. (a) Eaa te ka tupu kia Ate e te aronga mate i reira? (e) Koai ma te ka kapitiia ki roto i te tuakaouanga, e no teaa ra?

¹³ A muri akera, ko etai i te pae atu i te au tavini tiratiratu o te Atua ra ka akatu katoaia mai mei te mate, e ka akarukeia atu kare okotai i roto i te vaarua tanumanga o te au tangata nei. Te maata o te akaatea anga mai o tei mate mei te vaarua ra te kiteia ra i ta Iesu rave anga i ‘te taviri o Ade ra’ no te au tangata nei. Te akakiteia maira teia i roto i te orama tei orongaia ra ki te apotetoro ko Ioane, i  akara atura aia ia Ate e kua ‘uriia atura ki roto i te roto ai.’ (Apokalupo 20:14) Eaa te aiteanga o te reira? Tona aiteanga e ko Ate, koia te vaarua tanumanga o te tangata nei, ka akapou takiriia. Kare te reira e vai mai, ka akaatea takiriia mai tei mate mei reira, no te mea kapiti katoa ki te akatuakaouanga i te aronga akamori tiratiratu katoatoa o Iehova ra, ka akaoki aroa katoa mai a Iesu i te aronga tuatua tika kore. Te akapapu maira te Tuatua a te Atua kia tatou: “E tuakaouanga to tei mate, te aronga tuatua-tika e te aronga tuatua-tika kore.”​—Angaanga 24:15.

¹⁴ Kare e akatu uaia mai tetai o teianei aronga tuatua tika kore kia akavaia kia tau no te mate akaou. I roto i te reva tuatua tika te ka vai mai ki te enua katoa i raro ake i te Patireia o te Atua, ka tauturuia ratou kia apai mai i to ratou au oraanga kia rotai ma to Iehova ra aerenga. Kua akakite mai te orama e ka eeuia “te buka ora ra.” No reira, ka rauka ia ratou te tuatau kia tataia to ratou au ingoa ki roto i te reira. “E akavaia iora ratou ravarai i ta ratou au angaanga” te ka raveia a muri ake i to ratou tuakaouanga. (Apokalupo 20:​12, 13) No reira, me akamanakoia mai i te turanga no te akaoti anga openga, ka rauka to ratou kia riro “ei te tuakaouanga ora” e kare e riro ua “ei te tuakaouanga [akautunga] akaapa ïa ratou.”​—Ioane 5:​28, 29.

15. (a) Koai ma te kare e akatuakaouia? (e) Akapeea te kite i te tuatua no te tuakaouanga i te akakeu anga ia tatou?

¹⁵ Inara, kare ko te katoatoa tei ora ana e kua mate atu te ka akatuakaouia mai. Kua rave tetai papaki i te au ara kare ra e rauka kia akakoreia. Ko etai o taua aronga ra, kare i roto ia Ate, mari ra i Keena, te ngai e tupu ei kia ratou te akapou anga mutu kore. Kapiti katoa kia ratou ko te aronga tamateia i te “mate maata,” te vaitata maira i teianei. (Mataio 12:​31, 32; 23:33; 24:​21, 22; 25:​41, 46; 2 Tesalonia 1:​6-9) No reira, noatu rai e aroa maata te akakiteia  maira e Iehova i te tataraanga mai i tei mate ra mei Ate, kare te manakonako no te tuakaouanga e oronga mai ana i tetai tumuanga no tatou kia manako kore ua e ka akapeea to tatou oraanga i teianei. Kare e tuakaouanga e rauka no te aronga tei akameameaau akakoroia i te ngateitei o Iehova ra. Ka tau teia kite kia akakeu ia tatou kia akaari e te ariki oonu ra tatou i te takinga meitaki aroa ua o te Atua ra na te akonoanga i to tatou au oraanga kia tau ki tona anoano.

Akamaroiroiia e te Manakonako no te Tuakaouanga

16. Akapeea e raukai te manakonako no te tuakaouanga ei tumu no te maroiroi maata?

¹⁶ Te aronga o tatou kua akariro i te manakonako o te tuakaouanga no tatou uaorai te rauka ra kia maroiroi maata mai mei te reira. I teianei, ia tatou e vaitata nei i te openga o to tatou oraanga, kua kite tatou e kare e rauka ia tatou te akaroa ua atu i te matenga​—noatu eaa te au ravenga rapakau ka raveia. (Koheleta 8:8) Me kua tavini tiratiratu tatou ia Iehova ma tana akaaerenga, ka rauka ia tatou kia akara atu ki te tuatau ki mua ma te irinaki anga ki katoa. Kua kite tatou e na roto i te tuakaouanga, ka rekareka akaou tatou i te oraanga, i ta te Atua tuatau tau. E mei teaa ra te reira oraanga! “Te oraanga tikai,” mei ta te apotetoro ko Paulo i tapa ra i te reira.​—1 Timoteo 6:19, NW; Ebera 6:​10-12.

17. Eaa te ka tauturu ia tatou kia tamou i te tiratiratu kia Iehova?

¹⁷ No te kiteanga e e tuakaouanga tetai e te kiteanga e Koai te tumu o te reira ka akamaroiroi mai i to tatou akarongo. Na teia e akamaroiroi mai ia tatou kia tiratiratu ki te Atua me ka akakokoia mai tatou i te mate i nga rima o te aronga takinga kino. Kua roa a Satani i te taangaanga anga i te mataku i te mate vaveanga ei tumu no te mouanga  i te au tangata ki roto i te tu tuikaa. Inara kare ia Iesu taua tu mataku ra. Kua akapapu aia i te tiratiratu kia Iehova tae roa ki tona matenga. Na roto i tona atinga oko, kua oronga a Iesu i te tumu no te tatara keanga ia etai atu mei taua mataku anga ra.​—Ebera 2:​14, 15.

18. Na teaa i tauturu i te au tavini o Iehova kia patu i taua rekoti maata ra no te tiratiratu?

¹⁸ Ei tupu anga no to ratou akarongo i te apinga orongaia mai no to Karaiti atinga e i te tuakaouanga oki, kua patu te au tavini o Iehova i tetai akakiteanga meitaki ei aronga mou i te tiratiratu. Me tukuia ki raro ake i te taomi anga, kua akapapu ratou e “kare oki ratou i inangaro i to ratou uaorai ora” kia maata atu i to ratou inangaro ia Iehova ra. (Apokalupo 12:11) No te pakari, kare ratou e akaruke i te au kaveinga Kerititiano i te tautaanga kia akaora i to ratou oraanga i teianei. (Luka 9:​24, 25) Kua kite ratou e noatu me ka ngere ratou i to ratou oraanga i teianei no te mouanga tiratiratu i to Iehova ngateitei, ka tutaki aia ia ratou na roto i te tuakaouanga. Tei ia koe ainei taua tu akarongo ra? Ka rauka ia koe me e inangaro tikai toou ia Iehova e me kua akaperepere tikai koe i te aite anga tikai o te manakonako anga no te tuakaouanga.

Uriuri Akaou Anga

• Eaa ra te tangata i tau ei kia marama no runga i te meta e te turanga o tei mate ra i mua ake ka ariki ei aia i te tuakaouanga ra?

• Koai ma te ka oki akaou mai mei te mate, e eaa te tupu anga tau o teianei kite kia tatou?

• Akapeea te akamaroiroi anga a te manakonako no te tuakaouanga kia tatou?

[Au Uianga Apii]

[Tutu i te kapi 85]

Te taputou maira Iehova e e tuakaouanga to te aronga tuatua tika e te aronga tuatua tika kore