Tetai Patireia “Te ka Kore Rava e Akakoreia”
Pene Tai Ngauru
Tetai Patireia “Te ka Kore Rava e Akakoreia”
1. Eaa te tika tei akaketaketaia maira e te au tupu anga i te ao nei o te tuatua enua katoa o te au tangata?
TE AKAKETAKETA maira te au tupuanga i te ao katoa i te au ra tataki tai i te tika e kare i kitea e te au tangata te mataora na te kopaeanga i te ngateitei o Iehova e te tautaanga kia tutara ia ratou uaorai. Kare e akatereanga kavamani tangata tei apai mai i te au puapinga tau ki te au tangata. Noatu rai e kua akatupu te au tangata i to ratou kite taineti kia maata, kare i rauka ake ia ratou kia upokotu i te maki me kare kia akaope i te mate, kare noatu no te tangata okotai. Kare i rauka i te tutara a te tangata kia takore atu i te tamaki, te ta ua, te rave kino, te tu viivii, me kare te putaua. Te tutara ra te au kavamani takinga kino i te au tangata i te au enua e manganui. (Koheleta 8:9) Te akono anga taineti, te noinoi, e te tu kamakura kua kapiti kia taviivii i te enua, te vai, e te reva. Te akatereanga tau kore i te puapinga a te au opita te akariro ra kia ngata no te aronga e manganui kia rauka te au mea umuumuia no te oraanga. Kua kitea mai teia tika anga i te au tauatini ua atu mataiti o te tutara anga a te tangata: “E kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.”—Ieremia 10:23.
2. Eaa te rapakau anake i te au manamanata o te au tangata nei?
2 Eaa te rapakau? Ko te Patireia o te Atua, ta Iesu i apii ra i tana au pipi kia pure: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Kua akatakaia mai to te Atua ra Patireia i te rangi ra ia 2 Petero 3:13 ei “rangi ou,” te ka tutara i rungao i te “enua ou,” koia oki, te taiate tangata tuatua tika. No te puapinga maata o to te Atua ra Patireia i te rangi e kua akariro a Iesu i te reira ei tumu maata no tana tutuanga. (Mataio 4:17) Kua akakite mai aia i te ngai tau no te reira i to tatou au oraanga, i te raurauanga: “E na mua ra kotou i te kimi i te basileia o te Atua, e te tuatua-tika nana ra.”—Mataio 6:33.
3. Eaa ra i rapurapu maatai te apiianga no te Patireia o te Atua i teianei?
3 Te apiianga no te Patireia o te Atua ko tetai mea rapurapu maata i teianei, no te mea kare e roaia ka rave taua Patireia ra i te taui anga mutu kore ua atu i te tutara anga no te enua nei. Kua totou mai a Daniela 2:44: “E i te au rā o taua au ariki ra [te au kavamani e tutara nei i teianei], e akatupu ei te Atua no te rangi i tetai basileia [i te rangi], te ka kore rava e akakoreia e tuatau ua atu: kare oki taua basileia ra e riro i etai ke, [kare rava te au tangata e tutara akaou i te enua nei] e riro na te reira e akapueurikiriki e e akapou i taua au basileia katoa [nei] ra, e ka vai ra te reira e tuatau ua atu.” No reira na te Patireia e apai mai i teia tuatau openga nei ki te otianga na te akapouanga i teianei akatereanga kino katoa o te au mea nei. Ka riro te tutara anga i te enua nei na te Patireia i te rangi ra e tutara akaapa koreia. Mei teaa ra te tau kia akameitaki tatou e te vaitata nei te puapinga ta teianei ka apai mai!
4. I te pirianga ki te Patireia, eaa tei tupu i te rangi i te 1914, e eaa te reira i puapingai kia tatou?
4 I te 1914, kua akateronoia a Iesu Karaiti ei Ariki e kua akamanaia, “e ariki oki koe i rotopu i to au enemi ra.” (Salamo 110:1, 2) Pera katoa i taua mataiti ra, i akamatai “te tuatau openga” o teianei akatereanga kino o te au mea nei. (2 Timoteo 3:1-5, 13) I taua tuatau rai, i tupu ei, te au mea ta Daniela i kite ra i te orama totou anga, i te rangi ra. Kua oronga atu “to te au rā taito ra,” koia te Atua ko Iehova, ki runga i te Tamaiti a te tangata ra, ia Iesu Karaiti, i “te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” I te ripotianga i te orama ra, kua tata a Daniela: “Tona mana, e mana mutu kore ïa, kare ïa e kore, e tona basileia, kare ïa e pou.” (Daniela 7:13, 14) Na teianei Patireia i te rangi i roto i nga rima o Iesu Karaiti e orongai te Atua ra ki te aronga inangaro i te tuatua tika kia rekareka i te au apinga meitaki e maata tana i akakoro i tana tuku anga i to tatou nga metua mua ra ki roto i te Parataito.
5. Eaa te au tumu no runga i te Patireia e manako anga maata kia tatou, e no teaa ra?
5 Te anoano ra ainei koe kia riro ei tangata tiratiratu i raro ake i te Patireia? Me koia ia, ka inangaro maata koe kia kite i te akapapaanga e te angaanga a teia kavamani i te rangi ra. Ka anoano koe kia kite eaa ta te reira e rave nei i teianei, eaa ta te reira ka rave i te tuatau ki mua, e eaa ta te reira e umuumu maira ia koe. Ia koe e akara matatio piri vaitata ra i te Patireia, ka tau kia tupu maata atu toou ariki anga no te reira. Me ka kauraro akaperepere atu koe i te tutara anga a te reira, ka papa meitaki atu koe i te tuatua kia etai ke ra no te au mea memeitaki ta te Patireia o te Atua ra ka rave no te au tangata akarongo ra.—Salamo 48:12, 13.
Te Au Tutara o te Patireia o te Atua
6. (a) Akapeea ta te au Tuatua Tapu akaari anga e noai te tu ngateitei te akakiteia maira e te Patireia Mesia? (e) Akapeea te tupu anga tau kia tatou na ta tatou e apii ra no te Patireia?
6 Tetai mea mua te ka akakiteia mai e taua akara anga matatio ra e ko teianei Patireia Mesia e akakite anga i to Iehova uaorai ngateitei. Ko Iehova oki tei oronga atu i “te mana, e te kakā, e te basileia” ki tana Tamaiti. I muri ake i te akamana anga i ta te Atua ra Tamaiti kia akamata i te tutaraanga ei Ariki, kua akakite tau mai te au reo i te rangi ra: “Ko te au basileia o teianei ao, kua riro ïa ei au basileia no to tatou Atu [ te Atua ko Iehova] e no tana Mesia; e e vai rai te au iaia [ ko Iehova] e tuatau e tuatau ua atu.” (Apokalupo 11:15) No reira te au mea ravarai ta tatou ka kite no teianei Patireia e ta te reira ka rave ka akavaitata atu ia tatou kia Iehova uaorai. Ka tau ta tatou ka kite kia tauru ki roto ia tatou i te anoano kia kauraro ki tona ngateitei e tuatau ua atu.
7. Eaa ra i manako maatai kia tatou e ko Iesu Karaiti te Tutara Tauturu ia Iehova ra?
7 E akamanako, katoa, i te tika e kua tuku a Iehova ia Iesu Karaiti ki runga i te terono ei Tutara Tauturu nona. Ei Pu Rave Angaanga ta te Atua i taangaanga kia maani i te enua e te au tangata, kua kite a Iesu i te au mea umuumuia no tatou e meitaki atu i ta tatou i kite. Pera katoa, mei te akamataanga mai o te tuatua enua o te au tangata nei, kua akakite aia ‘i tona mataora i te tamariki a te tangata ra.’ (Maseli 8:30, 31; Kolosa 1:15-17) No te maata o tona aroa no te au tangata kua aere mai aia uaorai ki te enua nei e kua oronga i tona oraanga ei oko no tatou. ( Ioane 3:16) No reira kua oronga mai aia i te tika no tatou kia tataraia mai mei te ara e te mate e te tika oki no te oraanga mutu kore.—Mataio 20:28.
8. (a) Ei tuke anga ma te au tutara anga a te tangata, eaa ra te kavamani a te Atua ka tinamou ei? (e) Eaa te pirianga o “te tavini akono meitaki e te pakari” ma te kavamani i te rangi ra?
8 Te Patireia o te Atua e kavamani ngaueue kore e te tinamou. Taua tu tinamou ra te akapapuia maira na te tika e kare a Iehova uaorai e mate. (Habakuka 1:12) Ei tuke anga ma te au ariki tangata nei, ko Iesu Karaiti ta te Atua i oronga atura i te ariki anga, e mate kore katoa oki aia. (Roma 6:9; 1 Timoteo 6:15, 16) Taokotaiia atu ma Karaiti ki runga i te au terono i te rangi ra ko etai 144,000, tavini tiratiratu no te Atua no te “au kopu ravarai, e te au reo katoa, e te au iti-tangata katoa, e te pa enua katoa.” Kua oronga katoaia kia ratou te oraanga mate kore. (Apokalupo 5:9, 10; 14:1-4; 1 Korinetia 15:42-44, 53) Te maata anga o ratou kua tae ke ana ki te au rangi ra, e ko te toenga o ratou i te enua nei i teia tuatau ko te “tavini akono meitaki e te pakari,” te akatere tiratiratu atura i te au tumu no te Patireia i konei.—Mataio 24:45-47.
9, 10. (a) Eaa te au mana tataka ke e te taviivii ta te Patireia ka takore atu? (e) Me kare tatou e inangaro kia riro mai ei au enemi no te Patireia o te Atua, eaa te au apinga ta tatou ka tau kia kopae ke atu?
9 Kare e roaia i teianei, i tona ra tuatau tau, ka tono mai a Iehova i tana au nuku akapou kia tama i te enua. Ka akapou mutu kore atu ratou i te aronga tei iki ra ratou uaorai kia kore e akatika i tona ngateitei e tei akono aviri ra i te au akanoonoo anga tana e rave ra na roto ia Iesu Karaiti. (2 Tesalonia 1:6-9) Ko te reira te ra a Iehova, te tuatau roa i tatariia maira no tona akatika anga e ko te Ngateitei o te Ao Katoa e Pini Ua ake. “I na, te vaitata maira te rā o Iehova! e rā tangi kore e te riri otooto, . . . e te au tangata ara i roto iaia ra, ka akapou ravaia ïa e ia.” (Isaia 13:9) “E rā riri otooto taua rā ra, e rā manamanata e te kino, e rā akatanea e te pou, e rā poiri e te po āve, e rā tumurangi e te poiri tangotango.”—Zephania 1:15.
10 Te au akonoanga pikikaa katoatoa e te au kavamani tangata katoatoa e to ratou au nuku vaeau, tei taangaangaia maira e te tutara rave kino akara koreia ra o teianei ao, ka akapouia e tuatau ua atu. Te katoa te ka akataka ia ratou uaorai ma teianei ao na te aruaruanga i te oraanga noinoi, tiratiratu kore, e te aerenga tau kore o te oraanga ka tipu keia i te mate. Ka takoreia atu a Satani e tana au temoni mei te pirianga mai ki te au tangata o te enua nei, e ka akataka tinamouia atu no te tauatini mataiti. Ka riro i te Patireia o te Atua i reira te akatere anga takiri i te au mea katoatoa o te enua nei. Mei teaa ra te matara anga o te reira no te aronga katoatoa te inangaro ra i te tuatua tika!—Apokalupo 18:21, 24; 19:11-16, 19-21; 20:1, 2.
Te Au Akakoro Anga Patireia—Akapeea e Raukai
11. (a) Akapeea te Patireia Mesia i te akatupu anga i ta Iehova ra akakoroanga no te enua nei? (e) Eaa te aiteanga o te tutara Patireia no te au tangata te ka noo ki runga i te enua nei i reira?
11 Na te Patireia Mesia e akaoti takiri i ta te Atua ra akakoro anga mua no te enua. (Genese 1:28; 2:8, 9, 15) Tae rava mai ki teianei ra, kare te au tangata i turu i taua akakoro anga ra. Inara, “taua ao a muri nei” ka kauraro ki te Tamaiti a te tangata, ia Iesu Karaiti. Pouroa te au tangata te ka ora atu i te akapou anga o te akava anga a Iehova ki runga i teianei akatereanga taito ka angaanga taokotai i raro ake ia Karaiti te Ariki, i te raveanga mataora i tana ka arataki atu, kia riro te enua ei ao parataito. (Ebera 2:5-9) Ka rekareka te au tangata pouroa i te angaanga a to ratou au rima e ka puapinga ki katoaia mei te au tupu anga maata o te enua nei.—Salamo 72:1, 7, 8, 16-19; Isaia 65:21, 22.
12. Akapeea te apai maianga i te tu apa kore ua no te manako e te kopapa no te au tangata i raro ake i te Patireia ra?
12 I te oti anga te anga mai ia Adamu raua ko Eva, e apa kore ua raua, e ko te akakoro anga a te Atua no te enua kia akakiia ma ta raua anaunga, kia rekareka katoatoa i te manako e te kopapa apa kore ua. Ka riro taua akakoro anga ra ei mea kaka anga tika tikai i raro ake i te tutara a te Patireia. Ka umuumuia e teia te takore anga i te au tupuanga katoa no te ara, e ki taua openga ra, ka tavini a Karaiti kare ei Ariki anake ua mari ra ei Taunga Maata oki. Ma te akakoromaki maata, ka tauturu aia i te aronga kauraro akarongo iaia kia puapingaia mei te atinga tapokianga ara o tona uaorai oraanga tangata.
13. Eaa te au puapinga kopapa te ka kiteaia i raro ake i te tutara anga Patireia?
13 I raro ake i te tutara Patireia, ka kiteia e te au tangata o te enua nei te au puapinga pae kopapa umere tikai. “Ei reira e akapueraiaʼi te mata o te matapo ra, e e akaputataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:5, 6) Te kopapa tuke ra no te ruaine me kare te maki mate ka riro kia maata atu te poria i to te tamariki, e ko te tu paruparu kino ka monoia ki te ora anga ruperupe ra. “E maata oki te poria o tona ra kopapa i to te tamariki ra: e oki aia ki te au rā o tona ou anga ra.” ( Iobu 33:25) Ka tae mai te ra e kore ei e tumu no tetai kia tuatua, “Kua maki au.” No teaa ra? No te mea ka akamataraia mai te au tangata mataku i te Atua ra i te teiaa no te ara e tona au tupuanga kino katoa ra. (Isaia 33:24; Luka 13:11-13) Ae, na te Atua “e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4.
14. Eaa te kapitiia atura ki te raukaanga te tu tangata apa kore ua?
14 Inara, te raukaanga te tu apa kore ua, e maata atu te o maira i te kopapa meitaki e te manako meitaki. Te kapiti katoa ra te reira i te akaataanga i te au tu o Iehova, i te mea kua angaia mai tatou ‘i to te Atua uaorai tu, kia aite ki tona tu.’ (Genese 1:26) E raukai te reira, e maata te apiianga ka umuumuia. I roto i te ao ou, “te vai tika anga o te tuatua-tika ra.” No reira, mei ta Isaia i totou maira, “te apii ra to te ao nei i te tuatua-tika i reira.” (2 Petero 3:13; Isaia 26:9) Ka taki atu teianei tu ki te au—i rotopu i te au tangata o te pa enua ravarai, i roto i te au taokotai anga piri vaitata, i roto i te pamiri o tetai ra, i runga ravao, ma te Atua uaorai ra. (Salamo 85:10-13; Isaia 32:17) Te aronga te ka apii i te tuatua tika ka apii tamou marie ia i to te Atua ra anoano no ratou. I te aka oonu anga te inangaro no Iehova ki roto i to ratou ngakau, ka aru ratou i tona au mataara i roto i te au tu ravarai o to ratou oraanga. Ka rauka ia ratou kia tuatua mei ia Iesu ra, ‘kare oki au i tukumoe i te rave i te mea e mareka mai ei toku Metua.’ (Ioane 8:29) Mei teaa ra te rekareka o te oraanga me ko te tika te reira no te au tangata katoatoa!
Te Kiteia Nei te Au Tupu Anga
15. Te taangaangaanga i te au uianga i roto i teia parakaoa, e akataka mai i te au tupu anga a te Patireia e akaari maira eaa ta tatou ka tau kia rave i teianei.
15 Te kiteia nei te au tupu anga marekaia no to te Atua ra Patireia e tona au tangata kia etai ke. Ka akamaaraara atu te au uianga te aru mai nei e te au tuatua tapu i etai o teianei kia koe o etai o teia au tupu anga, pera katoa oki te au mea tau ta te aronga katoa i raro i te Patireia ka rave e te rave nei i teianei.
Koai ma ta te Patireia ra i tamaki mua atu, e eaa te tupu anga? (Apokalupo 12:7-10, 12)
Ko te akaputuanga i te toenga o te au mema o teea pupu te raveia nei mei te akaterono anga maira o Karaiti? (Apokalupo 14:1-3)
Eaa te angaanga ta Iesu i totou mai e ka rave aia i muri ake i te akamata anga o te mate maata, tei tataia ra ia Mataio 25:31-33?
Eaa te angaanga mua te raveia nei i teia tuatau? Koai ma te rave ra i te reira? (Salamo 110:3; Mataio 24:14; Apokalupo 14:6, 7)
Eaa ra i kore ei e rauka i te aronga poritiki e te aronga patoi akonoanga kia tapu i te angaanga tutu aereanga? (Zekaria 4:6; Angaanga 5:38, 39)
Eaa te au taui anga kua tupu ki te au oraanga o te aronga tei kauraro ra ki te tutara anga Patireia? (Isaia 2:4; 1 Korinetia 6:9-11)
Te Patireia no Tetai Tauatini Mataiti
16. (a) Eaa te roa o to Karaiti tutara anga? (e) Eaa te au mea umere ka raveia i reira e i muri akera?
16 A muri ake i te uri angaia a Satani e tana au temoni ki raro i te vaarua takere kore, ka tutara a Iesu Karaiti e tona aronga akatuangaia e 144,000 ei ui ariki e ei kau taunga no te tauatini mataiti. (Apokalupo 20:6) I taua tuatau ra, ka apaiia mai te au tangata ki te tu apa kore ua, e ka takore takiriia te ara e te mate mei ia Adamu maira e tuatau ua atu. I te openga o te Tutara Tauatini Mataiti ra, i te oti anga meitaki tana angaanga ei Ariki Taunga Mesia, “ka tuku atu ei [a Iesu] i te basileia” ki tona Metua, “kia riro ko te Atua i rungao i te au mea katoa i te au ngai ravarai.” (1 Korinetia 15:24-28) Ei reira, ka tataraia mai a Satani no te tuatau poto kia timata i te au tangata okoia ra i ta ratou turu anga i te tu ngateitei o Iehova i te ao katoa e pini ua ake. I muri ake i te oti anga taua timata anga openga ra, ka akapou atu a Iehova ia Satani e te aronga meameaau tei kapitiia atura kiaia. (Apokalupo 20:7-10) Ko te aronga tei mou ki to Iehova ra ngateitei—e tona tika kia tutara—kua akakite ki katoa i to ratou tiratiratu ngaueue kore. Ka apaiia mai ratou i reira ki roto i to ratou pirianga tika ma Iehova, i tana ariki anga ia ratou ei au tamaroa e ei au tamaine nana, tei marekaia i te tu-Atua no te oraanga mutu kore.—Roma 8:21.
17. (a) Eaa te ka tupu ki te Patireia i te openga o te tauatini mataiti? (e) I roto i teea tu e tikai e ko te Patireia “kare ïa e pou”?
17 No reira, ko ta Iesu uaorai tuanga e ta te 144,000 ra ka tauiia i te pirianga ki te enua nei. Eaa ra ta ratou angaanga a te tuatau ki mua? Kare te Pipiria i tuatua mai ana. Inara me ka mou tiratiratu tatou i te ngateitei o Iehova, ka ora atu tatou i te openga o te Tutara Tauatini Mataiti ra kia kite eaa ta Iehova akakoro anga no ratou pera katoa oki no tana ao umere katoa e pini ua ake. Inara, ka riro to Karaiti tutara anga no te tauatini mataiti ei “mana mutu kore” e tona Patireia “kare ïa e pou.” (Daniela 7:14) I roto i teea tu? No tetai tumu, kare te mana tutaraanga e riro ki roto i te au rima o etai atu e tuke ra ta ratou akakoro anga, i te mea ko Iehova te Tutara. Pera katoa, ko te Patireia “kare ïa e pou” no te mea ko tana au mea i rave ka vai rai e tuatau ua atu. (Daniela 2:44) E ko te Ariki Taunga Mesia e tona au oa ariki kau taunga ka akangateitei mutu koreia no to ratou tavini anga tiratiratu kia Iehova.
Uriuri Akaou Anga
• Eaa ra te Patireia o te Atua i riro ei e ko te rapakau anake i te au manamanata o te au tangata? I naea te Ariki o te Patireia o te Atua i akamatai i te tutara?
• Eaa te mea taka ke maata kia koe no te Patireia o te Atua ra e ta te reira ka rave?
• Eaa te au mea ta tatou i kite tei akonoia ra e te Patireia, e eaa ta tatou tuanga i roto i te reira?
[Au Uianga Apii]
[Tutu i te kapi 93]
I raro ake i te Patireia o te Atua, ka apii te au tangata ravarai i te tuatua tika
