MAARA ainei ia koe te tumu i riro mai tetai angera na te Atua e ko Satani te Tiaporo?— No tona inangaro noinoi kia akamoriia aia, no reira, kua akarongo kore aia ki te Atua. Kua aru ainei tetai au angera ia Satani?— Ae. Kapiki te Pipiria ia ratou ko ‘ta Satani au angela,’ me kore te au temoni.—Apokalupo 12:9.

Irinaki ainei te au angera kino, me kore te au temoni i te Atua?— Karanga ra te Pipiria e ‘te irinaki ra te au temoni e e Atua tetai.’ (Iakobo 2:19) Inara kua mataku ratou. No te mea kua kite ratou e ka takore te Atua ia ratou no te au kino ta ratou i rave. Eaa ta ratou tarevake i rave​?​—

Akakite ra te Pipiria e kua akaruke teia au angera i to ratou nooanga tau i te rangi, e kua aere mai ki te enua nei ei au tangata. Kua rave ratou i teia no te mea kua inangaro ratou i te rave i te pirianga āinga ki te au vaine manea i te enua nei. (Genese 6:​1, 2; Iuda 6) Eaa taau i kite no runga i te pirianga āinga?—

Ko te pirianga āinga, me piri vaitata tetai tane e te vaine na roto i tetai mataara umere tikai. Aru mai, penei ka tupu tetai pepe i roto i te kopu o te mama. Inara e mea tarevake no te au angera kia rave i te pirianga āinga. Ko te aronga anake ta te Atua ka inangaro kia rave i te pirianga āinga, ko tetai tane e te vaine akaipoipo. Me anau tamariki raua, ka rauka i reira i te tane e te vaine i te akono i ta raua pepe.

Te rave anga te au angera i te kopapa tangata kia piri āinga atu ki te au vaine i te enua nei, kua anau tamariki teia au vaine e kua riro mai ta ratou pepe ei tuputupua. E tu kino tikai to teia au tuputupua, e kua takinokino i te tangata. No reira te Atua i apai mai ei i tetai vaipuke maata ei tamate i te au tuputupua e te aronga kino pouroa. Inara kua akakite aia kia Noa kia maani i tetai araka, me kore paī maatamaata ei akaora i tetai pupu aronga iti ua tei rave i te mea tika. Akakite mai te Puapii Maata e e puapinga kia akamaara tatou i tei tupu i te tuatau o te Vaipuke.—Genese 6:​3, 4, 13, 14; Luka 17:26, 27.

Te tae anga mai te Vaipuke, kua kite koe eaa tei tupu ki te au angera kino?— Kua akaruke ratou i to ratou kopapa tangata, e kua oki ki te rangi. Inara kare ratou i riro ei angera akaou na te Atua, no reira kua riro mai ratou ei angera na Satani, me kore ei au temoni. Eaa tei tupu ki ta ratou tamariki, ki te au tuputupua?— Kua mate pouroa ratou i roto i te Vaipuke e pera katoa te aronga kare i akarongo ki te Atua.

Muri ake i te Vaipuke, kare te Atua e akatika akaou i te au temoni kia rave i te kopapa tangata. Inara noatu kare tatou e kite mata i te au temoni, te tauta nei ratou i te maani i te tangata kia rave i te kino. Te akatupu nei ratou i te kino maata i teia tuatau tikai. Te rave nei ratou i teia no te mea kua tiria mai ratou mei te rangi ki te enua nei.

Kua kite ainei koe i te tumu kare e rauka ia tatou i te akara mata i te au temoni?— No te mea kare ratou e kiteaia e te mata tangata. Inara papu ia tatou e te ora nei ratou. Karanga ra te Pipiria e ‘ko Satani tei pikikaa i to te ao katoatoa,’ e te tauturu nei tana au temoni iaia.​—Apokalupo 12:​9, 12.

Ka rauka ainei i te Tiaporo e tana au temoni i te pikikaa, me kore akavare ia tatou?— Ae, me kare tatou e matakite. Inara kare tatou e anoanoia kia mataku. Karanga te Puapii Maata: ‘Kare o te Tiaporo mana ki rungao iaku nei.’ Me akavaitata ua tatou ki te Atua, ka paruru aia ia tatou mei te Tiaporo e tana au temoni.​—Ioane 14:30.

E mea puapinga kia kite tatou eaa te au mea kino ta te au temoni ka inangaro ia tatou kia rave. No reira e akamanako ana. Eaa te au mea kino ta te au temoni i rave ia ratou i runga i te enua nei?— I mua ake i te Vaipuke, kua rave ratou i te pirianga āinga ki te au vaine, kare teia i tau no te au angera kia rave. I teia rā, e reka ana te au temoni me kare te tangata e akarongo ki te ture a te Atua no te pirianga āinga. Teia tetai uianga, Koai ka tau kia rave i te pirianga āinga?— Ae, tano taau pauanga, ko te aronga akaipoipo ua.

Teia tuatau, e rave ana tetai au tamariki tamaroa e te tamaine i te pirianga āinga, inara e tarevake teia. Te tuatua ra te Pipiria no runga i te ‘mero ainga’ o te tane, koia oki te ure. (Levitiku 15:​1-3) Kapikiia te mero āinga o te vaine e ’ika. E akakoroanga puapinga to Iehova no te anga mai i te mero āinga e ka tau te reira no te aronga akaipoipo ua. Ka rekareka te au temoni me rave te tangata i te au mea kare a Iehova e akatika. Ei akaraanga, e reka ana te au temoni me amirimiri tetai tamaiti e te tamaine i te ure e te ‘ika o tetai e tetai. Kare tatou e inangaro i te akarekareka i te au temoni, ine rai?—

E apinga ke atu tetai e reka ana te au temoni, inara, te riri ra a Iehova i te reira. Kua kite ainei koe eaa?— Ko te tā tangata. (Salamo 11:5) Te tā tangata, koia oki kia riririri e kia takinokino i tetai ke. E akamaara, ko teia ta te au tuputupua, te tamariki a te au temoni, i rave.

Reka katoa te au temoni i te tamataku tangata. Penei ka akatutu ratou e ko ratou tetai tangata tei mate. Ka kopi ratou i te reo o te tangata tei mate. Na roto i teia mataara, ka akavare te au temoni i te tangata kia irinaki e te ora nei te aronga tei mate e ka rauka i te tuatua ki te aronga e ora nei. Ae, ka akakeu te au temoni i te tangata kia irinaki i te au tupapaku.

No reira, ka anoanoia tatou kia matakite kia kore a Satani e tana au temoni e akavare ia tatou. Akamatakite mai te Pipiria: ‘Ka akatutu a Satani iaia uaorai ei angera meitaki, e ka aite tona au tavini mei iaia.’ (2 Korinetia 11:14, 15) Inara e kino tikai te au temoni. Akara tatou akapeea ratou me akavare ia tatou kia aru i to ratou tu kino.

Noea mai te ngai ka apii te tangata no runga i te tā tangata, te āinga tau kore, te au vaerua kikino e te tupapaku?— Kare ainei e no te akarakara i te au porokaramu tivi e te teata, te apinga kangakanga vitio e te komupiuta, te taangaanga i te Initaneti e te tatau i te au puka? Ka akavaitata ainei teia au mea ia tatou ki te Atua, me ki te Tiaporo e tana au temoni? Eaa toou manako?—

I toou manako, koai tei inangaro ia tatou kia akarongo e kia akara i te au mea kino?— Ae, ko Satani e tana au temoni. No reira, eaa ta taua ka rave?— E tatau, akarongo e te akara i te au mea meitaki te ka tauturu ia tatou kia tavini ia Iehova. Ka rauka ainei ia koe te akamanako eaa tetai au mea meitaki ta tatou ka rave?—

Me rave tatou i te meitaki, kare e tumu kia mataku i te au temoni. E ririnui atu a Iesu ia ratou, e te mataku ra ratou iaia. I tetai atianga, kua kapiki te au temoni ia Iesu: “I aere mai aina koe e tamate ia matou?” (Mareko 1:​24) Kare ainei tatou e mataora tikai me tae mai te tuatau no Iesu kia takore ia Satani e tana au temoni?— I teianei, papu e ka paruru a Iesu ia tatou mei te au temoni, me noo vaitata ua tatou i te pae iaia e tona Metua i te rangi.