TETAI taime, ka rave a Iehova i te au mea umere no te paruru i te au mea ora kare e rauka i te paruru ia ratou uaorai. Me aere koe ki vao, penei ka kite koe i tetai ravenga e rave ana a Iehova i teia. Inara me akara koe, penei kare koe e mārama i te reira.

Kua kite koe i tetai manu rere vaitata kia koe. Te akara anga, kua pakia te reira. Ka kika te manu i tona peau na runga i te one e me aere koe ki te pae iaia ka akamamao atu iaia. Me aru ua koe i te manu rere, ka akamamao te reira e kare e rauka ia koe i te opu atu. E oti, kite ua ake koe, kua ngaro te manu i te rere. Kare ua i pakia te reira! Kite ainei koe eaa ta te manu rere e rave ra?—

Te ngai vaitata i te manu rere, e ko’anga tetai i roto i te ngangaere te ngai e pipini ra tana punupunua. Mataku te mama e ka opu koe i tana punupunua e ka takinokino i te reira. No reira kua maani te mama e kua pakia aia ei arataki ke ia koe mei te ko’anga. Kua kite ainei koe e koai ka rauka i te paruru ia tatou mei te manu rere rai tei paruru i tana punupunua?— I roto i te Pipiria, kua akaaiteia a Iehova ki tetai manu rere rai, ko te aeto, tei tauturu i tana anaunga.​—Deuteronomi 32:11, 12.

Ko ta Iehova i akaperepere maata rava atu o te au mea ravarai, ko tana Tamaiti ko Iesu. Ia Iesu i runga i te rangi, e vaerua ririnui aia mei tona Metua rai. Ka rauka iaia i te paruru iaia uaorai. Inara i te anau angaia mai a Iesu ei pepe i te enua nei, kua anoano aia i te tauturu. Ae, kia paruruia.

Ei akatupu i to te Atua anoano nona i te enua nei, kua anoanoia a Iesu kia maata mai e kia riro ei tangata apa kore. Inara, kua tauta a Satani i te tamate ia Iesu i mua ake ka maata ai aia. E tua umere tikai te tauta anga te Tiaporo i te tamate ia Iesu i tona rikiriki anga e te paruru anga a Iehova iaia. Ka inangaro ainei koe i te akarongo ki te reira?—

Muri ua ake i to Iesu anau anga, kua maani a Satani i tetai etu kia turama i te po i te tua Itinga. Kua kite te aronga akara etu i te reira, e kua aru i te etu e anere ua atu maire ki Ierusalema. Ui ratou e teiea te ngai ka anau mai te pepe te ka riro ei ariki no te ngati Iuda. Te uiia anga teia ki te aronga tei kite i pauanga a te Pipiria, karanga ratou: “I Betelehema.”​—Mataio 2:​1-6.

Te rongo anga a Heroda, te ariki kino o Iseraela e kua anau te ariki ou i roto i te oire vaitata mai ko Betelehema, karanga aia ki te aronga akara etu: ‘Aere e kimi i te tamaiti, e oti oki mai kotou e akakite mai kiaku.’ Kua kite ainei koe i te tumu i inangaro ei a Heroda i te kimi ia Iesu?— No te mea kua vareae a Heroda e kua inangaro i te tamate atu iaia!

Akapeea te Atua te paruru anga i tana Tamaiti?— I na, te aravei anga te aronga akara etu ia Iesu, kua oronga ratou i te au apinga aroa nona. Muri mai kua akamatakite te Atua i te aronga akara etu na roto i tetai moemoea e auraka ratou e oki ki Heroda. No reira kua oki ratou ki to ratou enua na tetai mataara ke, kare na Ierusalema. Te rongo anga a Heroda e kua ngaro te aronga akara etu i te oro, kua riri tikai aia. No te mea kua inangaro aia i te tamate ia Iesu, akakite a Heroda kia tamateia te au pepe tamaroa pouroa i Betelehema e rua mataiti e i raro ake! Inara, kua ora mai a Iesu.

Kua kite ainei koe akapeea a Iesu i ora ai?— Te oki anga te aronga akara etu ki to ratou enua, kua akamatakite a Iehova i te tane a Maria ko Iosepha kia tu ki runga e oro ki Aiphiti. Ka paruruia a Iesu mei te ariki kino ko Heroda i tera ngai. Tetai au mataiti i muri mai, te akaruke anga a Maria e Iosepha ma Iesu katoa ia Aiphiti, akamatakite akaou te Atua ia Iosepha. Na roto i tetai moemoea, karanga aia kia Iosepha e noo ratou ki Nazareta, e oire ka paruruia a Iesu.​—Mataio 2:​7-​23.

Te kite ra koe akapeea a Iehova te paruru anga i tana Tamaiti?— Toou manako, koai tei aite mei te punupunua ta te mama i uuna ki roto i te ngangaere me kore mei ia Iesu rai i tona rikiriki anga? Kare ainei ko koe?— E aronga tetai te ka inangaro i te tamamae ia koe? Kua kite ainei koe e koai?—

Akakite te Pipiria e mei te riona ngunguru rai a Satani te kimi ra i te tangata ei kai nana. Mei te au riona rai tei opu i te au manu rikiriki, e reka ana a Satani e te au temoni i te opu i te tamariki. (1 Petero 5:8) Inara e ririnui atu a Iehova ia Satani. Ka paruru a Iehova i te tamariki e ka akakore i tetai ua atu kino tei tupu kia ratou no ta Satani i rave.

Maara ia koe te Pene 10 o teia puka, eaa ta te Tiaporo e tana au temoni ka inangaro ia tatou kia rave?— Ae, ka tauta ratou i te timata ia tatou kia rave i te pirianga āinga tei tarevake i roto i te mata o te Atua. Koai anake te ka tau kia rave i te pirianga āinga?— Ae, ko tetai tane e te vaine tei akaipoipo.

Inara, te mea tangi, e aronga maata tetai e reka ana i te piri āinga ki te tamariki. Me pera ratou, ka akamata teia au tamariki tamaroa e te tamaine i te rave i te au mea kino ta ratou i apii mei te aronga maata. Ka taangaanga ratou i to ratou mero āinga na roto i te tu tau kore. Kua tupu teia i muatangana i roto i tetai oire ko Sodoma. Karanga te Pipiria e kua tauta te aronga i tera oire, ‘te tamariki tamaroa e tae ua atu ki te aronga ruaine,’ i te piri āinga ki te nga tangata tei aere mai i te aravei ia Lota.​—Genese 19:​4, 5.

No reira mei ia Iesu tei anoano i te paruruanga, ka anoanoia koe kia paruruia mei te aronga maata​—e pera te au tamariki​—te ka tauta i te piri āinga kia koe. Penei ka karanga mai ratou e e oa ratou noou. Ka oake mai ratou i tetai apinga kia koe me taputou koe e kare koe e akakite ki tetai tangata eaa ta ratou ka inangaro i te rave kia koe. Inara e kino teia aronga. Mei ia Satani e tana au temoni, ka inangaro ua ratou i te akanavenave ia ratou uaorai. E ka rave ratou i teia na te piri āinga atu ki te tamariki. E tarevake kino tikai teia!

Kua kite ainei koe eaa ta ratou ka rave kia akanavenave ia ratou uaorai?— Penei ka amirimiri ratou i toou mero āinga. Me kore ka maani ratou i to ratou mero āinga kia amiri atu i toou. Inara auraka e akatika i tetai ua atu tangata kia amirimiri i toou ure me kore ‘ika. Auraka katoa tetai ua atu tangata i roto i toou ngutuare, kapiti mai toou mama e te papa e amirimiri i te reira. Ko koe anake te ka akatikaia kia amiri i teia mero o toou kopapa.

Akapeea koe me paruru i toou kopapa mei te aronga tei rave i teia au angaanga kino?— Te mea mua, auraka e akatika i tetai ua atu tangata kia amirimiri i toou mero āinga. Me tauta tetai tangata i te rave i teia, e tuatua atu koe kiaia ma te reo maata: “Akamutu! Ka akakite au ia koe!” E me karanga mai tera tangata e naau i maani iaia kia pera, auraka e irinaki iaia. E pikikaa teia. E aere ua atu koe e akakite ki tetai tangata eaa tana i rave, noatu e koai aia! E rave koe i teia noatu ka karanga mai aia e ko ta korua e rave ra, e mea muna i rotopu ua ia korua. Me karanga mai tera tangata e ka oake aia i tetai apinga manea noou me kore ka tamataku aia ia koe, e oro ke atu koe mei iaia e e akakite atu ki tetai ke eaa tana i rave.

Kare koe e anoanoia kia mataku, inara ka anoanoia koe kia matakite. Me karanga mai toou nga metua auraka koe e kapiti atu ki tetai tangata me kore auraka e aere ki tetai ngai kino, e akarongo kia raua. Me pera koe, kare e rauka i te tangata kino i te tamamae ia koe.