Ei tangata apakore, kare a Iesu i na roto i te maata anga o te au manamanata e te apiapi o te tangata. Noatu te reira, kua akaari aia i tona inangaro maata i te tangata. Kua puareinga ua aia i te akaatinga iaia uaorai no ratou, koia oki kia rave maata atu i tei anoanoia. Ae, na te tangi aroa i akakeu iaia kia tauturu i etai ke. Akamanako i te au akaraanga i te Pene 32, 37, 57, 99.

Kua kite te tangata katoatoa​—te au mapu e te ruaine​—e e tu oaoa to Iesu no te mea kua oronga ua aia i tona tuatau no ratou e kare aia i maani ana e puapinga roa aia. Kua kite ratou e te manako ra Iesu ia ratou, no reira e māmā ua i te tuatua kiaia. E kite ei i te reira, akara i te Pene 25, 27, 95.

Kua uri putuputu a Iesu ki tona Metua na roto i te pure akatenga, i te tuatau koia anake ua e me kapiti atu ki te aronga akamori mou. Tukeke te au atianga i pure ei aia, kare i te taime kaikai ua. Kua pure aia ei akameitaki i tona Metua, ei akapaapaa iaia e te kimi i tana aratakianga i mua ake ka rave ei i te ikianga puapinga. Akamanako i te au akaraanga i roto i te Pene 24, 34, 91, 122, 123.

I tetai au taime, noatu te anoano ra a Iesu i te akangaroi, kua akapae rai aia i tona au anoano no etai ke. Kare aia i akamanako iaia uaorai. Na roto i teia tu, kua akanoo aia i te akaraanga no tatou kia aru vaitata. Apii akapeea teia akaraanga me akaariia i roto i te Pene 19, 41, 52.

Kare a Iesu i apii ua i te tangata kia akakore i te ara mari ra, kua akaari aia i te reira na te akakore anga i te ara o tana au pipi e i etai ke. E akamanako oonu i te au akaraanga i te Pene 26, 40, 64, 85, 131.

Kua totouia e kare te maata anga o te ngati Iuda e āriki i te Mesia e ka tamateia aia e tona au enemi. No reira e mea māmā ua no Iesu i te akaiti i tana i rave no te tangata. Inara, kua maroiroi aia i te turu i te akamorianga mou. Kua akanoo aia i te akaraanga maroiroi no tana au pipi me aravei i te aronga kare i inangaro i te akarongo e tei patoi mai. Akara i te Pene 16, 72, 103.

E maata te mataara i meitaki atu ei a Iesu i te aronga apa ua, ei akaraanga tona kite e te pakari. E no tona tu apakore i meitaki atu ei tona turanga pae kopapa e te manako i tetai ua atu. Noatu ra kua tavini akaaka aia i etai ke. Ka kite koe i te au apiianga no runga i teia i te Pene 10, 62, 66, 94, 116.

E akakoromakianga roa to Iesu i tana au apotetoro e i etai ke noatu kare ratou i aru i tona akaraanga e kare i akono i tana i tuatua. Kua apii marie aia i te au mea ta ratou i anoano ei akavaitata atu kia Iehova. Akamanako ana i to Iesu tu akakoromaki i te Pene 74, 98, 118, 135.