E Akakoro ra Koe kia Tavini i te Atua e Tuatau Ua Atu
Pene 18
E Akakoro ra Koe kia Tavini i te Atua e Tuatau Ua Atu
1, 2. Eaa te umuumuia ra i te pae atu te rauka anga te kite i te Atua ra?
E MANAKO ua e te tu ra koe ki mua i tetai ngutupa kua rokaia no te aere atu ki roto i tetai pia e apinganui maata to reira. Ka karanga tatou e kua orongaia mai kia koe e tetai tangata akamanaia te taviri e kua tuatua mai aia kia koe kia rave ua koe i taau ka inangaro i taua au apinga oko maata ra. Kare e puapinga o te taviri kia koe me kore koe e taangaanga i te reira. Mei te reira katoa rai, ka tau koe kia taangaanga i te kite kia puapingaia koe i te reira.
2 Ko te tika ra teia no te kite i te Atua. Ae, ko te kite tika i te Atua ia Iehova e ia Iesu Karaiti ko te ora mutu kore ia. (Ioane 17:3) Inara, ko te reira manakonako anga kare e rauka na roto anake i te rauka anga te kite. Mei ia koe rai e taangaanga ra i tetai taviri puapinga, ka tau katoa koe kia akono i te kite i te Atua ra i toou oraanga. Kua karanga a Iesu e ko te aronga tei akono ra i te anoano o te Atua ka “tae ki te basileia ra.” Ko taua aronga tataki tai ra ka rauka kia tavini i te Atua e tuatau ua atu!—Mataio 7:21; 1 Ioane 2:17.
3. Eaa to te Atua ra anoano no tatou?
3 I muri ake i te kiteanga i to te Atua ra anoano, e mea puapinga maata kia rave i te reira. Eaa i toou manako to te Atua ra anoano noou? Ka rauka ua ia i te akatakaia na roto i teia nga tuatua: E aru ia Iesu. Te tuatua maira a 1 Petero 2:21 kia tatou e: “I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” Ko te rave i to te Atua ra anoano, i reira, ka tau koe kia aru vaitata i to Iesu akaraanga. Ko te reira te tu no taau taangaanga i te kite i te Atua ra.
AKAPEEA TA IESU TAANGAANGA I TE KITE I TE ATUA
4. Eaa ra i maataʼi to Iesu kite ia Iehova, e i akapeea tana taangaanga i teia kite nona?
4 E maata atu to Iesu kite tikai i te Atua ra i to etai ua atu kite. Kua ora aia e kua angaanga kapiti ma te Atua ko Iehova i te rangi no te au tuatau roa i mua ake i tona aere mai anga ki te enua nei. (Kolosa 1:15, 16) E eaa ta Iesu i rave ma taua kite katoa ra? Kare aia i marengo ua i te rauka anga iaia te reira. Kua akono ra a Iesu i te reira. No reira aia i takinga meitaki roaʼi, i akakoromaki ei, e i aroaʼi i tana akonoanga i tona au oa tangata ra. No reira kua aru a Iesu i tona Metua i te rangi ra e kua rave kia rotai ma tona kite i to Iehova au aerenga e tona tu oki.—Ioane 8:23, 28, 29, 38; 1 Ioane 4:8.
5. Eaa a Iesu i papetitoiaʼi, e i akapeea aia i te akono anga i te aiteanga o tona papetito anga?
5 Na to Iesu kite ra i akakeu katoa iaia kia rave i tetai takainga ei puapinga maata. Kua aere mai aia mei Galilea ki te Kauvai i Ioridana ra, te ngai i papetitoiaʼi aia e Ioane. (Mataio 3:13-15) Eaa tei akatutuia mai e to Iesu papetito anga? Ei tetai ngati Iuda, kua anauia mai aia ki roto i tetai iti tangata akatapuia ki te Atua ra. No reira, kua akatapuia a Iesu mei tona anau mai anga. (Exodo 19:5, 6) Na tona kauraro anga ki te papetito anga, kua oronga aia iaia uaorai kia Iehova kia rave i te anoano tu-Atua nana i te reira tuatau. (Ebera 10:5, 7) E kua akatupu ra a Iesu i te aiteanga o tona papetito anga. Kua akono aia i tona uaorai ririnui i te tavini kia Iehova, i te tuaanga i te kite i te Atua ma te au tangata i te au tuatau ravarai. Kua kite a Iesu i te mareka anga i te raveanga i to te Atua anoano, ma te tuatuaanga e kua aite te reira ki te kai nana.—Ioane 4:34.
6. Na teea mataara ta Iesu akakore anga iaia uaorai?
6 Kua kite tikai a Iesu e ko te raveanga i to Iehova anoano ka riro ei apinga oko maata—e ka riro te reira kia tutakiia ki tona oraanga. Inara, kua akakore ua a Iesu iaia uaorai, kua tuku i tona uaorai au anoano ei tuanga rua ia. Ko te raveanga i to te Atua ra anoano ko te mea mua ia i te au tuatau ravarai. I teia tu, akapeea tatou me aru i to Iesu ra akara anga apa kore?
AU TAKAINGA TE KA TAKI ATU KI TE ORA MUTU KORE
7. Eaa etai takainga te ka tau tetai kia rave e tikai aia no te papetito anga?
7 Kare mei ia Iesu rai, e apa ua tatou nei e ka itaeia anake taua takainga puapinga maata no te papetito anga ra i muri ake i te raveanga i etai atu takainga meitaki tikai. Ka akamataia teia na te apiianga kia rauka te kite tika i te Atua ia Iehova e ia Iesu Karaiti ki roto i to tatou au ngakau. Na te raveanga i teia ka akariro ia tatou kia akono i te akarongo e kia rauka te aroa maata no te Atua ra. (Mataio 22:37-40; Roma 10:17; Ebera 11:6) Na te aru anga i ta te Atua au ture, au kaveinga, e te au turanga ka tau kia akakeu ia tatou kia tataraara, ma te akakiteanga i te mii tau i te Atua ra no ta tatou au ara kua topa ra. Na teia e taki atu ki te ariu mai anga, koia oki, ki te ariu ke mai anga e te akarukeanga i tetai ua atu aerenga tarevake ta tatou i aru i te tuatau kare ra tatou i kite i te Atua. (Angaanga 3:19) E mea matauia, me te vaira tatou i te rave anga muna i etai ara kare i te raveanga i te tuatua tika, kare tikai tatou i ariu ke mai, e kare katoa oki tatou e akavare i te Atua ra. Te kite ra a Iehova i te au pikikaa ravarai.—Luka 12:2, 3.
8. Eaa taau ka rave me anoano koe kia kapiti atu ki te angaanga tutu aereanga i te Patireia?
8 I teianei i te mea e i rave ana koe i te kite i te Atua, kare ainei i te mea tau kia akamanako i te au tumu i te pae vaerua na roto i tetai mataara tau noou uaorai? Penei te inangaro ra koe kia tuatua atu ki toou au kopu tangata, au oa, e etai ke atura i taau i apii ana. Ko te tika, penei kua rave ke ana koe i teia, mei ia Iesu i tua ra i te tuatua meitaki ma etai ke ra i te au tuatau va ua ra. (Luka 10:38, 39; Ioane 4:6-15) I teianei penei kua anoano koe kia rave kia maata atu. Ka mataora te aronga pakari Kerititiano kia tuatua kapiti kia koe i te akataka me kua tau koe e ka rauka oki ia koe i te rave i tetai tuanga angaanga tutu aereanga Patireia a te Au Kite o Iehova ra. Me kua papa koe, ka rave te aronga pakari i te au akanoonoo anga noou kia aere kapiti ma tetai Kite i te angaanga orometua. Kua aru ta Iesu au pipi i tana au ikuiku anga kia raukaʼi te rave anga i ta ratou angaanga orometua na roto i te tu tau. (Mareko 6:7, 30; Luka 10:1) Ka puapingaia koe i te tauturu mei te reira te tu ia koe e rave kapiti ra i te tuaanga i te tuatua no te Patireia mei tera are ki tera are e na roto i etai atu mataara.—Angaanga 20:20, 21.
9. Akapeea te tangata i te akatapu anga ki te Atua, e akapeea te akatupu anga a te akatapu anga ki te oraanga o tetai tangata?
9 Ko te tutu aereanga i te tuatua meitaki ki te au tu tangata ravarai i roto i te kotinga a te putuputuanga ko tetai mataara ia e kiteaʼi te aronga e ngakau tuatua tika to ratou e tei roto ia i te au angaanga memeitaki te akapapu maira e e akarongo toou. (Angaanga 10:34, 35; Iakobo 2:17, 18, 26) Ko te aere anga putuputu ki te au uipaanga Kerititiano e te rave anga i tetai tuanga tau i te angaanga tutu aereanga ko etai au mataara katoa ia no te akakite anga e kua tataraara koe e kua ariu ke mai e kua manako tamou i teianei kia akono kia tau ki te kite i te Atua. Eaa te takainga tau i muri mai? Ko te akatapu anga ia ki te Atua ko Iehova ra. Ko te aite anga o teia e na roto i te pure ngakau tae, ka akakite koe ki te Atua e te anoano ra koe e te oronga ra i toou oraanga ma to ngakau katoa kiaia kia rave i tona anoano. Ko te mataara teia no te akatapu ia koe uaorai kia Iehova e kia ariki i te amo takinga meitaki o Iesu Karaiti.—Mataio 11:29, 30.
PAPETITO ANGA—EAA TE AITE ANGA NOOU
10. Eaa koe i tau ei kia papetitoia i muri ake i toou akatapu anga ia koe uaorai kia Iehova ra?
10 Kia tau ki ta Iesu, pouroa te aronga tei riro mai ei au pipi nana ka tau kia papetitoia. (Mataio 28:19, 20) Eaa ra teia i anoanoiaʼi i muri ake i taau akatapu anga ki te Atua ra? I te mea kua akatapu koe ia koe uaorai kia Iehova, kua kite aia e te aroa ra koe iaia. Inara kare e ekoko anga e ka anoano koe kia rave i tetai atu angaanga ei akakite ki etai ke ra i toou aroa no te Atua. Ae, na te papetito anga e raukaʼi ia koe tetai tuatau kia akakite ki te au tangata i toou akatapu anga ki te Atua ko Iehova ra.—Roma 10:9, 10.
11. Eaa te aiteanga o te papetito anga?
11 E maata te aite anga akatutuia e te papetito anga. Ia koe e tarukuia ra, me kare “tanumia,” ki raro i te vai, mei te mea rai ia e kua mate koe ki toou aerenga mua o te oraanga. Me tu mai koe mei raro i te vai, mei te mea rai e te aere mai ra koe ki tetai oraanga ou, ko tetai te akatereia ra e to te Atua anoano e kare noou uaorai. Inara, kare te aite anga o te reira e kare koe e rave akaou i te tarevake, no te mea ko tatou pouroa e apa ua e no reira ka ara i te au ra ravarai. Inara, ei tavini no Iehova tei akatapuia, e kua papetitoia, kua tomo atu koe ki tetai pirianga takake ma ia katoa ra. No toou tataraara anga e toou kauraro anga akaaka i te papetito anga, te mareka ra a Iehova kia akakore i taau au ara na te akatumu anga ki runga i te atinga oko o Iesu. No reira te taki atura te papetito anga ki te akava ngakau ma ki mua i te Atua ra.—1 Petero 3:21.
12. Eaa te aite anga e kia papetitoia (a) “i te ingoa o te Metua”? (e) ‘i te ingoa o te Tamaiti’? (ng) ‘i te ingoa o te vaerua tapu’?
12 Kua akaue atura Iesu i tana au pipi kia papetito i te au pipi ou “i te ingoa o te Metua, e no te Tamaiti, e no te Vaerua Tapu.” (Mataio 28:19) Eaa ta Iesu aite anga o te reira? Papetito anga “i te ingoa o te Metua” te akakite maira e ko te tangata tei papetitoia ra te ariki ra ma te ngakau katoa e ko te Atua ko Iehova Tei Anga maira e koia Tei Ngateitei tika o te ao katoa e pini ua ake. (Salamo 36:9; 83:18; Koheleta 12:1) Te papetito anga ‘i te ingoa no te Tamaiti’ ko te aite anga te akatika ra tetai ia Iesu Karaiti—e maata oki i Tona atinga oko—ei te apinga anake no te ora tei orongaia maira e te Atua. (Angaanga 4:12) Ko te papetito anga ‘i te ingoa no te Vaerua Tapu’ te akakite maira e ko te tangata tei papetitoia ra te kite ra i te vaerua tapu o Iehova, me kare tona mana rave angaanga, ei apinga ra na te Atua no te raveanga i Tana au akakoroanga e no te akamaroiroianga i Tona au tavini i te rave i Tona anoano tuatua tika i te kapiti anga ma Tana akaaerenga aratakiia e te vaerua ra.—Genese 1:2; Salamo 104:30; Ioane 14:26; 2 Petero 1:21.
KUA PAPA AINEI KOE NO TE PAPETITO ANGA?
13, 14. Eaa i tau ei kia kore tatou e mataku kia iki i te tavini atu i te Atua ko Iehova ra?
13 I te mea e maata te aite anga o te papetito anga e tupu anga puapinga maataia i te oraanga o tetai tangata, e takainga ainei ia te ka tau koe kia mataku i te rave? Kare rava ia! Noatu rai e ko te iki anga kia papetitoia kare e tau kia manako meangiti uaia, kare e ekoko anga e ko te iki anga pakari rava ia te ka rauka ia koe i te rave.
14 Te oronga maira te papetito anga i te akakite anga i taau iki anga kia tavini atu i te Atua ko Iehova. E tamanako i te au tangata taau ka aravei. I tetai mataara me kare na tetai atu, kare ainei ratou tataki tai e tavini ana na tetai pu? Te tavini ra tetai papaki no te au apinganui. (Mataio 6:24) Ko etai ke ra te aruaru pakari ra i ta ratou au angaanga me kare te tavini ra ia ratou uaorai na te akariroanga i te akatupuanga i to ratou uaorai anoano ei mea maata i to ratou oraanga. Ko etai atura te tavini ra i te au atua pikikaa. Inara kua iki koe kia tavini atu i te Atua mou, ia Iehova. Kare tetai atu e akaari mai ana mei iaia ra te maata o te takinga meitaki, te inangaro, e te aroa. Te akangateitei maira te Atua i te au tangata ma te angaanga akakoro anga te tou atura ia ratou ki te ora. Te tutaki ra aia i tona au tavini ma te ora mutu kore. E mea tika roa, te aruanga i ta Iesu akaraanga e te orongaanga i toou oraanga kia Iehova kare ia i tetai tumu no te mataku. Ko te tika ra, ko te reira anake te ka akamareka i te Atua e te akatupu ra i te manako tau tikai.—1 Ariki 18:21.
15. Eaa etai au arai anga matauia ki te papetito anga?
15 Inara, kare te papetito anga i tetai takainga kia raveia no te taomi anga a etai ke ra. E tumu ia i rotopu ia koe e Iehova. (Galatia 6:4) I toou tupu anga i te pae vaerua, penei kua manako ua koe: “Eaa au nei e kore ei e bapetizoia?” (Angaanga 8:35, 36) Penei ka ui koe kia koe uaorai, ‘Te tapu ra ainei te patoi anga a toku ngutuare tangata iaku? Te o ra ainei au ki roto i etai turanga tau ki i te Tuatua Tapu me kare ravenga ara? Te mataku ra ainei au no tei ngaro toku akaperepere i roto i te ngai tangata?’ Ko teia katoa etai au tumu kia akamanakoia, inara e akara matatio tikai ia ratou.
16. Akapeea koe ka puapingaiaʼi mei te tavinianga ia Iehova?
16 Kare i te mea tau tikai kia paunu i te au tumu reka koreia ma te kore e akamanakoanga i te au puapinga no te tavinianga ia Iehova ra. Ei akatauanga, e akamanako i te tumu no te patoi anga a te ngutuare tangata. Kua taputou mai a Iesu e noatu rai me ka ngere tana au pipi i to ratou au kopu tangata no te aruanga iaia, ka rauka mai ia ratou tetai pamiri maata atu i te pae vaerua ra. (Mareko 10:29, 30) Ka akaari atu teia au oa akarongo i te aroa taeake kia koe, ka tauturu ia koe kia akakoromaki i te takinga kino anga, e ka turu ia koe i te mataara ki te ora. (1 Petero 5:9) E rauka oki i te aronga pakari o te putuputuanga i te tauturu ia koe kia akono i te au manamanata e kia autu i etai atu akaaoanga. (Iakobo 5:14-16) E no te ngereanga i te akaperepere i teianei ao, penei ka tau koe kia ui kia koe uaorai, ‘Eaa te ka tau kia akaaiteia atu ki te mareka anga o Tei Anga maira i te ao katoa e pini ua ake, ma te akarekareka anga iaia no te aerenga oraanga taku i iki ra?’—Maseli 27:11.
AKONOANGA KIA TAU KI TOOU AKATAPU ANGA E TE PAPETITO ANGA
17. Eaa koe i tau ei kia manako i te papetito anga ei tetai akamataanga e kare ko te openga?
17 E mea puapinga maata kia maara e kare te papetito anga i te openga o toou tupu anga i te pae vaerua. Ko te akairo ia o te akamataanga o te tavini anga oraanga roa ki te Atua ra ei orometua akataoongaia e ei tetai o te Au Kite o Iehova. Noatu rai e puapinga maata tikai te papetito anga, kare ia i te akapapu anga i te ora. Kare a Iesu i tuatua e: ‘Ko te aronga ravarai e papetitoia ka ora.’ Mari ra, kua tuatua aia: “Te tāpu tikai e tae ua atu ki te openga ra, ka ora ïa.” (Mataio 24:13) No reira, ko te mea maata e kia na mua koe i te kimi i te Patireia o te Atua na te akariro anga i te reira ei te manako anga maata i toou oraanga.—Mataio 6:25-34.
18. I muri ake i te papetito anga, eaa etai akakoro anga kia aruaruia?
18 E raukaʼi kia akakoromaki i taau angaanga kia Iehova, ka tau koe kia akanoo i te akakoro anga naau uaorai i te pae vaerua. Ko tetai akakoro anga meitaki kia akamaata atu i toou kite i te Atua na roto i taau uaorai apii putuputu i tana Tuatua. E parani i te tatauanga i te Puka Tapu i te au ra ravarai. (Salamo 1:1, 2) E aere putuputu ki te au uipaanga Kerititiano, no te mea ko te kapiti anga taau ka kite i reira ka tauturu ia koe kia rauka te maroiroi i te pae vaerua. No taau tuanga, eaa koe ka kore ei e akanoo i taau akakoro anga kia paupau i te au uipaanga putuputuanga e na reira e akapaapaa ei ia Iehova e te akamaroiroi atu ia etai ke ra? (Roma 1:11, 12) Ko tetai atu akakoro anga penei kia akameitaki atu i te tu o taau au pure.—Luka 11:2-4.
19. Eaa te au tu te ka rauka i te vaerua tapu i te tauturu ia koe kia akakite mai?
19 Me te akono ra koe kia tau ki te aiteanga o toou papetito anga, ka tau koe kia manako tamou marie ki taau e rave ra, ma te tukuanga i te vaerua tapu o te Atua kia akatupu i roto ia koe i te au tu mei te aroa ra, te rekareka, te au, te akakoromaki, te takinga meitaki, te meitaki, te akarongo, te maru, e te akono meitaki. (Galatia 5:22, 23; 2 Petero 3:11) Kia maara, te oronga maira Iehova i tona vaerua tapu ki te aronga katoatoa e te pure ra no te reira e te akarongo ra kiaia ei au tavini tiratiratu nona. (Luka 11:13; Angaanga 5:32) No reira e pure ki te Atua no tona vaerua e pati kiaia i te tauturu i te akakiteanga i te au tu te ka akamareka iaia. Ko taua au tu ra ka maata atu te kiteaia i taau tuatua e te tu akono ia koe ka aru i te mana o te vaerua o te Atua ra. Inara, te aronga tataki tai ravarai i roto i te putuputuanga Kerititiano e tauta ra kia akatupu i “te akatangata ou” kia riro ei mei ia Karaiti rai. (Kolosa 3:9-14) Te aro atura tatou tataki tai i te au akaaoanga tuke tuke i te raveanga i teia no te mea tei roto tatou i te au tuanga tuke tuke o te tupu anga i te pae vaerua. I te mea e apa ua koe, ka tau koe kia rave pakari kia rauka tetai tu tangata aite atu kia Karaiti ra. Inara auraka e ngakau paruparu no teia tu, no te mea ka rauka te reira ma te tauturu a te Atua ra.
20. Na teea au mataara e raukaʼi ia koe i te aru ia Iesu i te angaanga orometua ra?
20 I roto i taau au akakoro anga i te pae vaerua ka tau e ko te aruanga i to Iesu akaraanga rekareka kia akavaitata atu. (Ebera 12:1-3) E inangaro ana aia i te angaanga orometua. Me ko koe tetai te rave ra i te angaanga tutu aereanga Patireia, auraka i reira, e tuku i te reira kia riro ei angaanga ua nei. E kimi kia kitea te merengo anga i te apiianga ia etai ke ra no runga i te Patireia o te Atua mei ta Iesu i rave ra. E taangaanga i te au apiianga ta te putuputuanga e oronga maira ei tauturu ia koe kia meitaki mai ei orometua. E kia manako papu e ka oronga mai a Iehova kia koe i te maroiroi kia rave i taau angaanga ei orometua.—1 Korinetia 9:19-23.
21. (a) Akapeea koe i kite ei e e apinganui na Iehova te aronga tiratiratu tei papetitoia? (e) Eaa te akaari maira e e puapinga maata te papetito anga ki to tatou ora atu anga i te rave anga i ta te Atua akavaanga ki rungao i teia akatereanga kino o te au mea nei?
21 Ko tetai tangata akatapuia, e kua papetitoia te tauta tiratiratu ra kia aru ia Iesu e mea takake aia na te Atua ra. Te akara matatio ra a Iehova i te au pirioni ua atu ngakau tangata e te kite ra aia i te toko iti ua o te reira aronga. Te akamanako ra aia ia ratou ei apinganui, “tei inangaroia.” (Hagai 2:7) Te akaari maira te au totou Puka Tapu e te manako ra te Atua i taua aronga ra ei aronga akairoia kia ora i te akatupu anga i tana akavaanga te aere maira kare e roa atu ki runga i teia akatereanga kino o te au mea nei. (Ezekiela 9:1-6; Malaki 3:16, 18) Ko koe ainei tetai “tei akonoia no te ora mutu kore”? (Angaanga 13:48) Ko toou inangaro tikai ainei kia akairoia ei tetai e tavini atu ra i te Atua? Ko te akatapu anga e te papetito anga ko etai tuanga o taua akairo ra, e e mea anoanoia raua no te ora anga.
22. Eaa te manakonako anga te ka tau te “aronga maata” kia akara atu?
22 I muri ake i te Vaipuke o te ao katoa ra, kua aere mai a Noa e tona ngutuare tangata ki vao i te araka ki roto i tetai enua tamaia ra. Mei te reira katoa i teia tuatau nei, “e aronga maata” tei akono i te kite i te Atua ra i to ratou oraanga e kua rauka to Iehova mareka anga tei ia ratou te manakonako no te ora atu i te openga o teia akatereanga kino o te au mea nei e te rekareka anga i te ora mutu kore ki runga i tetai enua tamaia e tuatau ua atu. (Apokalupo 7:9, 14) Eaa te tu o te reira ora anga?
E TIMATA I TOOU KITE
Akapeea to Iehova anoano ia koe kia taangaanga i toou kite iaia ra?
Eaa etai takainga te ka taki atu ki te papetito anga?
Eaa i tau ei e kare te papetito anga i te openga mari ra ko te akamataanga ia?
Akapeea tatou i te akono anga i to tatou akatapu anga e te papetito anga?
[Au Uianga Apii]
[Tutu i te kapi 172]
Kua rave ainei koe i te akatapu anga ki te Atua na roto i te pure?
[Tutu i te kapi 174]
Eaa koe ka kore ei e papetitoia?
