E Kitea te Tinamou i Roto i te Au Tangata o te Atua
Pene 17
E Kitea te Tinamou i Roto i te Au Tangata o te Atua
1, 2. Akapeea te turanga o te tangata nei i aite ei ki to te au tangata i roto i tetai ngai akakinoia ra e te uriia?
E TAMANAKO ua ana e kua akakinoia e tetai uriia ririnui taau ngai e noo ana. Kua akapouia toou kainga, e kua kore atu taau apinga pouroa. E meangiti te manga. E akara anga puapinga kore tikai te turanga. I reira, kua tae mai te au apinga anoanoia ra. Te kai e te kakau e maata tei orongaia mai. Kua akatuia tetai are ou noou. E mea tika ra ka akameitaki koe i te tangata nana i oronga mai teia au mea katoa.
2 Te tupu nei tetai apinga mei te reira rai te tu i teia tuatau. Mei taua uriia ra, kua akatupu te meameaau a Adamu raua ko Eva i tetai akakino anga maata ki te uanga tangata nei. Kua ngaro te kainga Parataito o te au tangata. Mei reira mairai, kua kore i rauka i te au kavamani tangata nei i te paruru i te au tangata mei te tamaki, te rave kino, e te au tu tau kore. Kua akaruke mai te akonoanga i te aronga maata ma te onge no te kai meitaki i te pae vaerua. Inara, i te pae vaerua, te oronga mai nei te Atua ko Iehova i teianei i te kai, te kakau, e te paruru. Akapeea aia i te raveanga i te reira?
“TE TAVINI AKONO MEITAKI E TE PAKARI”
3. Akapeea ta Iehova oronga anga apinga mai na te tangata nei, mei tei akaariia maira e teea au akatauanga?
3 Ko te mea matauia ka tuaia te au apinga ei tauturu na roto i tetai aerenga akapapaia, e mei te reira rai te tu kua rave a Iehova i te tua anga apinga i te pae vaerua na tona au tangata. Ei akatauanga, ko to Iseraela ra to “te uipaanga a Iehova” no etai 1,500 mataiti. I roto ia ratou ko te aronga tei tavini ra ei aerenga no ta te Atua apii anga i tana Ture. (1 Paraleipomeno 28:8; 2 Paraleipomeno 17:7-9) I te anere mataiti mua T.N., kua akatupu mai a Iehova i te akaaerenga Kerititiano. Kua akanooia te au putuputuanga, e kua angaanga ratou i raro ake i te arataki anga a tetai pupu akaaere no roto mai i te au apotetoro e te aronga pakari ra. (Angaanga 15:22-31) Mei te reira katoa i teia tuatau nei, te akono ra a Iehova i tona au tangata na roto i tetai pupu akapapaia. Akapeea tatou i kite ei i teia?
4. Koai “te tavini akono meitaki e te pakari” i teia tuatau nei, e akapeea ta te Atua ra au apinga i te pae vaerua i rauka mai ei?
4 Kua na ko maira a Iesu e a te tuatau o tona parutia i te mana Patireia, ka kitea “te tavini akono meitaki e te pakari” i te tuaanga “kai . . . i te ora mou ra” na Tana au pipi. (Mataio 24:45-47) I te akanoo anga ia a Iesu ei Ariki i te rangi i te 1914, koai tei akapapuia e ko teia “tavini” ia? E mea papu e kare i te au orometua o Kerititome. No te maata anga o te tuatau, kua angai ratou i ta ratou au anana ma te au pikikaa tei turu i to ratou uaorai au kavamani enua i te Tamaki I o Teianei Ao ra. Inara ko te kai tika e te tau i te pae vaerua kua tuaia mai e te pupu Kerititiano mou tei akatainuia ra i te vaerua tapu o te Atua e e tuanga ratou no ta Iesu i karanga ra ko te “anana iti.” (Luka 12:32) Kua tutu aere teia au Kerititiano akatainuia ra i te Patireia o te Atua kare ra i te au kavamani tangata nei. Ei tupu anga, i roto i te au mataiti i topa e au mirioni ua atu te aronga tuatua tika o “te au mamoe ke atu” kua kapiti mai ki te “tavini” akatainuia ra i te raveanga i te akonoanga mou. (Ioane 10:16) Na te taangaanga anga i the “tavini akono meitaki” ma tona Pupu Akaaere i teia tuatau nei, te arataki ra te Atua i tona au tangata akapapaia ra kia maani i te kai i te pae vaerua, te kakau, e te paruru anga kia rauka no te aronga katoatoa tei anoano ra i teia au apinga.
‘KAI I TE ORA MOU RA’
5. Eaa te tu i te pae vaerua te vai nei i te ao i teia tuatau, inara eaa ta Iehova e rave ra no te reira?
5 Kua karanga a Iesu: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) Inara, e mea mii kare te maata anga o te au tangata e akarongo ana ki ta te Atua ra au tuatua. Mei tei totouia maira e te peroveta a Iehova koia a Amosa, e e onge tetai “kare ra i te onge kai, e te kaki i te vai, i te akarongo ra i te tuatua na Iehova.” (Amosa 8:11) Noatu rai e ko te au tangata maroiroi ra i te akonoanga te mate pongi ra i te pae vaerua. Inara, ko to Iehova anoano e ko “te tangata katoatoa kia ora, e kia rauka te kite i te tuatua-mou.” (1 Timoteo 2:3, 4) No reira ra, te oronga maira aia i te kai vaerua kia maata. Inara teiea te ngai e rauka mai ei te reira?
6. Akapeea ta Iehova angai anga i tona au tangata i te pae vaerua i te tuatau kua topa ra?
6 I roto katoa i te tuatua enua, kua tua maira Iehova i te kai vaerua ki tona tangata ei tetai pupu. (Isaia 65:13) Ei akatauanga, kua akaputuputu mai te kau taunga Iseraela ra i te au tane, e te vaine, e te tamariki kia apiiia ei pupu i te Ture a te Atua. (Deuteronomi 31:9, 12) I raro ake i te arataki anga a te pupu akaaere ra, kua akapapaia te au putuputuanga e te au Kerititiano o te anere mataiti mua ra e kua akono i te au uipaanga no te apii anga e te akamaroiroi anga i te katoatoa ra. (Roma 16:5; Philemona 1, 2) Te aru nei te Au Kite o Iehova i teia akaraanga. Te pati pumaanaia atu nei koe kia aere mai ki ta ratou au uipaanga ravarai.
7. Eaa te pirianga o te aere putuputu ki te au uipaanga Kerititiano ki te kite e te akarongo?
7 Inara, penei kua maata ke ana taau i kite i taau uaorai apii anga i te Puka Tapu. Penei na tetai Kite i tauturu ia koe. (Angaanga 8:30-35) Inara penei te aiteite ra toou akarongo ki tetai ngangaere te ka mae e ka mate atu me ka kore e orongaia te utuutu anga tau. No reira, ka tau kia rauka ia koe te akamatutu anga tika i te pae vaerua. (1 Timoteo 4:6) Te oronga maira te au uipaanga Kerititiano i tetai porokarama apii anga putuputu tei akapapaia ei akamatutu ia koe i te pae vaerua e kia tauturu ia koe kia tamou marie te tupu anga i te akarongo ia koe e tupu ra i te kite i te Atua ra.—Kolosa 1:9, 10.
8. Eaa tatou i akamaroiroiiaʼi kia aere ki te au uipaanga a te Au Kite o Iehova ra?
8 Te akono ra te au uipaanga i tetai atu akakoro anga puapinga maata. Kua tata a Paulo: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga.” (Ebera 10:24, 25) Te tuatua Ereni tei uriia ra “ka akamaroiroi” ka rauka katoa kia riro e ko te aite anga “e akakina.” Te tuatua ra tetai materi Puka Tapu e: “Na te auri i akakina i te auri; e na te tangata e akakina i te mata o tona taunga.” (Maseli 27:17) Pouroa tatou te anoanoia ra te ‘akakinaanga’ tamouia. Ka rauka i te au taomi anga no teianei ao mai i te au ra tataki tai i te akapoiri i to tatou akarongo. Me aere tatou ki te au uipaanga Kerititiano, tei reira tetai orongaanga akamaroiroi. (Roma 1:11, 12) Ka aru te au mema o te putuputuanga i ta te apotetoro ko Paulo ra akamaroiroi anga “e akapumaana kotou tetai ki tetai, e akatupu i te meitaki tetai ki tetai,” e na te reira au apinga e akakina i to tatou akarongo. (1 Tesalonia 5:11) Te akakite katoa ra te aereanga putuputu ki te au uipaanga Kerititiano e te aroa ra tatou i te Atua e te oronga maira i te tuatau no tatou kia akapaapaa iaia.—Salamo 35:18.
“E KAKAU NA I TE AROA”
9. Akapeea ta Iehova akanooanga i te akatauanga no te akaarianga i te aroa?
9 Kua tata a Paulo: “E kakau na i te aroa, ko taua tatua apa kore ua ra ïa.” (Kolosa 3:14) Na Iehova i oronga aroa ua mai i teia kakau no tatou. Na teea mataara? Ka rauka ra i te au Kerititiano i te akakite i te aroa no te mea ko tetai ua orongaia mai ia e te Atua no te au ua o te vaerua tapu o Iehova ra. (Galatia 5:22, 23) Na Iehova uaorai i akakite mai i te aroa maata rava na te tonoanga mai i tana Tamaiti anau tai kia rauka ia tatou te ora mutu kore. (Ioane 3:16) Na teia akakite anga teitei rava i te aroa i oronga mai i tetai akaraanga no tatou i te akakiteanga i teia tu. “I pera te Atua i te aroa anga mai ia tatou nei,” ta te apotetoro ko Ioane i tata, “kia aroa katoa tatou ia tatou uaorai e tikaʼi.”—1 Ioane 4:11.
10. Akapeea tatou ka puapingaiaʼi i “te au taeake” katoa ra?
10 Na toou aereanga ki te au uipaanga i te Are Uipaanga Patireia ka oronga i tetai tuatau meitaki noou kia akaari i te aroa. I reira ka aravei koe i te au tangata tuke tuke. Kare e ekoko anga ka manako ngakau akavaitata viviki atu koe ki te aronga e manganui o ratou ra. Inara, e tuke tuke te tu tangata noatu rai i roto i te aronga tavini ia Iehova ra. Penei i te tuatau kua topa e kopae ua ana koe i te au tangata kare ra i aite atu ki toou ra te tu manako e te ravenga. Inara, ko te au Kerititiano, ka tau kia “aroa atu i te au taeake” katoa ra. (1 Petero 2:17, akaaite ia NW.) No reira, e akariro i taau akakoro anga kia kite koe i te aronga katoa i te Are Uipaanga Patireia ra—noatu ko te aronga e tuke i toou te mataiti, te tu, te iti tangata, me kare te kite i te apiianga. Penei ka kitea e koe e e meitaki atu ratou tataki tai i roto i etai tu akaperepereia.
11. Eaa i kore ei e tau kia manamanata koe i te au tu tuke tuke i roto i te au tangata o Iehova ra?
11 Kare e tau te au tu tuke tuke o te aronga i roto i te putuputuanga ra kia akamanata mai ia koe. Ei akatutu anga, e tamanako ua e e manganui te au motoka te aere ra i te pae mai ia koe i runga i tetai mataara. Kare ra i aiteite te viviki o te aere anga, kare katoa oki i aiteite to ratou tu. Ko tetai papaki e manganui te au maire ta ratou i aere, inara mei ia koe rai, koi akamata ua akera etai. Inara, noatu teia au tu tuke anga, pouroa te aere atura i taua mataara ra. Mei te reira katoa te aronga tataki tai o roto i tetai putuputuanga ra. Kare i aite te viviki o te tupu anga te tu Kerititiano o te katoatoa. Pera katoa oki, kare i aiteite te tu kopapa me kare te manako ngakau o te katoatoa. Ko tetai papaki e manganui te au mataiti te akamorianga ia Iehova; ko etai koi akamata ua akera. Inara, te aere ra te katoatoa na te mataara ki te ora mutu kore, “kia kapiti marie ra kotou ma te ngakau okotai e te manako okotai.” (1 Korinetia 1:10) No reira, e akara i te au tu maroiroi eiaa te au tu paruparu o te aronga i roto i te putuputuanga ra. Na te rave anga i te reira ka akapumaana i to ngakau, no te mea ka kite koe e tei roto tikai te Atua i teia au tangata. E mea tika oki e ko teia te ngai taau e anoano ra kia noo ki reira.—1 Korinetia 14:25.
12, 13. (a) Me ka akariri mai tetai ia koe i te putuputuanga ra, eaa taau ka rave? (e) Eaa i puapingaʼi kia kore e akamoupuku i te riri?
12 I te mea e apa ua te au tangata katoatoa, i etai taime penei ka tuatua me kare ka rave tetai i roto i te putuputuanga i tetai apinga te ka akariri ia koe. (Roma 3:23) Kua tata tikai te pipi ko Iakobo e: “Te apa anake nei tatou i te au mea katoa e manganui. E kia kore tetai tangata e apa i te tuatua ra, e tangata meitaki rava aia.” (Iakobo 3:2) Eaa taau ka rave me ka akariri mai tetai tangata ia koe? Te tuatua ra tetai materi Puka Tapu e: “Na te akono o te tangata i kore ei i riri vave; ko tona ïa kakā koia i akakore i te ara.” (Maseli 19:11) Te aiteanga o te manako oonu kia kite i raro ake i tetai turanga, kia kite i te au tumu i raro ake tei akariro ra i tetai tangata kia tuatua me kare kia rave i tetai tu mataara. Ko te maata anga o tatou ka taangaanga maata i te manako oonu i te kotoeanga i to tatou uaorai au tarevake ra. Eaa tatou ka kore ei e taangaanga katoa i te reira kia kite e kia tapoki atu i te au tu apa ua o etai ke ra?—Mataio 7:1-5; Kolosa 3:13.
13 Auraka e ngaropoina e ka tau tatou kia akakore i te ara a etai ke ra me te anoano ra tatou uaorai kia rauka ta Iehova ra akakore anga ara. (Mataio 6:9, 12, 14, 15) Me te akono ra tatou i te tuatua mou, ka akono rai tatou i tetai ke ra na te mataara aroa. (1 Ioane 1:6, 7; 3:14-16; 4:20, 21) No reira, me ka rokoia tetai manamanata kia koe ma tetai o te aronga i roto i te putuputuanga, e maro atu i te riri anga akamoupuku riri anga. Me kua akakakauia koe ma te aroa, ka tauta ra koe kia akakore atu i te manamanata ra, e kare koe e taroaroa i te tataraara me naau i akatupu te riri.—Mataio 5:23, 24; 18:15-17.
14. Eaa te au tu tau no tatou kia akakakau?
14 Ka tau to tatou kakau i te pae vaerua ra kia kapiti i etai atu tu te piri vaitata ra ki te aroa. Kua tata a Paulo e: “Ka akangakau aroa ua e te takinga-meitaki, te akaaka, te maru, te akakoromaki maata.” Ko teia au tu, tei koropiniia e te aroa, e tuanga ia no te “akatangata ou” tei tau i te Atua. (Kolosa 3:10, 12) Ka tamata ainei koe kia akakakau ia koe uaorai na teia mataara? E maata oki me ka akakakau koe ia koe uaorai ma te aroa taeake ka mou koe i tetai akairo akatakaanga i te au pipi na Iesu, no te mea kua karanga aia: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”—Ioane 13:35.
E NGAI NO TE TINAMOU
15. Akapeea te putuputuanga i aiteite ei ki tetai paruru anga?
15 Te riro katoa ra te putuputuanga ei paruru anga, e akapuanga paruru ei ngai e raukaʼi ia koe te manako tinamou. I roto i reira ka kitea e koe te aronga ngakau tiratiratu te tauta ra kia rave i te tika i nga mata o te Atua ra. E manganui o ratou ra kua akakore i te au ravenga kikino e te au tu akono mei taau e tauta ra kia akakore atu. (Tito 3:3) Ka rauka ia ratou i te tauturu ia koe, no te mea kua akaueia mai tatou e “ka rave atu tetai i ta tetai apainga.” (Galatia 6:2) E mea natura ia, ko te aruaruanga i tetai aerenga te ka taki atu ki te ora mutu kore ka riro i te openga naau uaorai ia apainga. (Galatia 6:5; Philipi 2:12) Inara, kua oronga mai a Iehova i te putuputuanga Kerititiano i tetai apinga meitaki no te tauturu e te turu anga. Noatu rai e eaa te taitaia i toou au manamanata, tei ia koe tetai apinga puapinga te vaitata ra kia koe—koia tetai putuputuanga aroa te ka tu ki te pae ia koe i te au tuatau o te maki me kare te ngere anga.—Akaaite ia Luka 10:29-37; Angaanga 20:35.
16. Eaa te tauturu anga ta te aronga pakari o te putuputuanga ka oronga?
16 I roto i te aronga te ka rave ei turu ia koe ko te aronga “meitaki i te tangata nei”—te aronga pakari akataoongaia o te putuputuanga, me kare au akaaere, tei tiaki rekareka ua i te anana ma te ngakau tae. (Ephesia 4:8, 11, 12; Angaanga 20:28; 1 Petero 5:2, 3) Kua totou a Isaia no ratou ra e: “E riro oki tetai tangata mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.”—Isaia 32:2.
17. (a) Eaa te tu tauturu ta Iesu i anoano tikai kia oronga? (e) Eaa te apinga ta te Atua i taputou kia oronga na tona au tangata?
17 Ia Iesu i runga i te enua nei, e mea mii te ngereanga o te au arataki akonoanga i te akaaere anga aroa. Kua akakeu oonu te tu o te au tangata ra iaia, e kua anoano tikai aia kia tauturu atu ia ratou i te pae vaerua. Kua aroa atura a Iesu ia ratou no te mea “kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Mei teaa ra te tau o teia akataka anga i te tu tangi no te aronga e manganui i teia tuatau nei tei akakoromaki i te au manamanata mamae ngakau e kare tetai i ariu atu no te tauturu e te akapumaana i te pae vaerua! Inara e tauturu to te au tangata o Iehova i te pae vaerua, no te mea kua taputou aia: “E tuku oki au i te tiaki ki rungao ia ratou, te ka angai ia ratou ra: kare atura ratou e mataku akaou, kare oki e tumatetenga, e kare oki tetai e ngaro.”—Ieremia 23:4.
18. Eaa tatou i tau ei kia aravei atu i tetai o te aronga pakari me te anoano ra tatou i te tauturu i te pae vaerua?
18 E akamatau atu ki te aronga pakari akataoongaia i te putuputuanga. E maata to ratou kite i te akonoanga i te kite i te Atua ra, no te mea kua rauka ia ratou te au turanga no te au akaaere tei akanooia maira i te Puka Tapu. (1 Timoteo 3:1-7; Tito 1:5-9) Auraka e taroaroa i te aravei atu i tetai o ratou ra me e anoano toou i te tauturu i te pae vaerua kia akakore i tetai ravenga me kare tetai peu te patoi ra i ta te Atua au umuumu anga. Ka kitea e koe e te aru ra te aronga pakari i ta Paulo akamaroiroi anga: “E akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.”—1 Tesalonia 2:7, 8; 5:14.
KIA REKAREKA I TE TINAMOU MA TE AU TANGATA O IEHOVA
19. Eaa te au akameitaki anga ta Iehova ka tuku ki runga i te aronga te kimi ra i te tu tinamou i roto i tana putuputuanga?
19 Noatu rai e te noo nei tatou i teianei i rotopu i te au turanga apa ua, te oronga maira a Iehova i te kai vaerua, te kakau, e te paruru anga. Inara, ka tau tatou kia tatari no ta te Atua ao ou i taputou maira e raukaʼi kia kite i te au puapinga o te parataito kopapa ra. Inara ko te aronga e tuanga no ta Iehova ra akaaerenga te rekareka nei i teianei i te tu tinamou o tetai parataito vaerua. No runga ia ratou, kua totou a Ezekiela e: “E noo ponuiaau ua ra ratou, e kare rava tetai e akamataku mai ia ratou.”—Ezekiela 34:28; Salamo 4:8.
20. Akapeea ta Iehova ra oronga anga no tetai ua atu apinga ta tatou ka tuku ei atinga no te akamori anga iaia ra?
20 Mei teaa ra to tatou akameitaki anga e te oronga maira a Iehova i te au apinga aroa i te pae vaerua na roto i tana Tuatua e te akaaerenga! E akavaitata ki te au tangata o te Atua ra. Auraka e taroaroa, i te mataku ua i ta te au oa me kare au kopu tangata e manako ra noou no te rave anga i te kite i te Atua. Penei ka akaapa tetai papaki no toou kapitianga ma te Au Kite o Iehova e te aere anga ki te au uipaanga i te Are Uipaanga Patireia. Inara e maata atu ta te Atua ka oronga mai no tetai ua atu apinga taau ka tuku atinga no te akamorianga iaia ra. (Malaki 3:10) Pera katoa, kua tuatua a Iesu: “Kare e tangata i akaruke i te are, e te au taeake, e te au tuaine, e te metua tane, e te metua vaine, . . . e te tamariki, e te kainga, noku, e no te evangelia nei, E kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.” (Mareko 10:29, 30) Ae, noatu eaa taau i akaruke ki muri me kare ka akakoromaki, ka kitea e koe te au oa marekaia e te tu tinamou i te pae vaerua i roto i te au tangata o te Atua ra.
E TIMATA I TOOU KITE
Koai “te tavini akono meitaki e te pakari”?
Eaa te apinga ta Iehova i rave ei angai ia tatou i te pae vaerua?
Akapeea e raukai i te aronga i roto i te putuputuanga Kerititiano i te tauturu ia tatou?
[Au Uianga Apii]
[Tutu i te kapi katoa i te kapi 165]
