Pene 13

Eaa te Oraanga Tau i te Atua i Apai Mai ei i te Mataora

1. Eaa ka raukai ia tatou kia tuatua e ko ta Iehova ra mataara te ka apai mai i te mataora?

KO IEHOVA “te Atua mataora,” e te anoano ra aia kia mataora toou oraanga. (1 Timoteo 1:11, NW) Na te aaereanga i tona arataa, ka puapingaia koe ia koe uaorai e ka kite i te ponuiaau te oonu ra e te mutu kore, mei te kauvai e tae tamou marie ra. Na te aaereanga i to te Atua ra arataa ka akakeu katoa i tetai kia rave tamou i te au angaanga tuatua tika, “mei te ngaru moana ra.” Ka apai mai teia i te mataora mou.—Isaia 48:17, 18.

2. Akapeea e mataoraʼi te au Kerititiano noatu e te takinga kinoia ra ratou i etai taime?

² Penei kare tetai papaki e akatika, ‘Te mamae ra te au tangata i etai tuatau no te raveanga i te mea tika.’ E tika rai, e ko te reira tei tupu ki te au apotetoro a Iesu ra. Inara, noatu kua takinga kinoia, kua rekareka ratou e kua aere ua atu i te “tuatua anga atu ia Iesu Mesia.” (Angaanga 5:40-42) Ka kite tatou i etai apiianga puapinga maata mei te reira mai. Ko tetai e kare to tatou oraanga akono i te Atua ra e akapapu mai e ka akono meitakiia mai tatou i te au tuatau ravarai. E tikai, kua tata te apotetoro ko Paulo, e ko “te aronga katoa e maara tikai e akono i te Atua, ei roto rai i te Mesia ra ia Iesu, e takinga kino katoaia ïa.” (2 Timoteo 3:12) Ko te tumu no teia e ko Satani e tona ao katoa te patoi ra i te aronga te akono ra i tetai mataara akono i te Atua. (Ioane 15:18, 19; 1 Petero 5:8) Inara kare te mataora tika tikai e tei runga i te au apinga o vao ua. Mari ra, te aere maira no tetai irinaki anga e te rave ra tatou i tei tika e no reira te marekaia maira e te Atua.—Mataio 5:10-12; Iakobo 1:2, 3; 1 Petero 4:13, 14.

3. Eaa te tupu anga tau o te akamori ia Iehova i te oraanga o tetai tangata ra?

 ³ Te vaira tetai au tangata te manako ra e ka rauka ia ratou ta te Atua akaperepere anga na te angaanga akono i te Atua i etai atianga inara ka akangaropoina ua iaia i etai atu taime ke ra. Kare te akamori mou i te Atua ra ko Iehova mei te reira te tu. Te akatupu ra ia i te tu akono ki tetai tangata i te au ora te ara ra aia, mei tetai ra ki tetai ra, tetai mataiti i muri ake i tetai mataiti. No reira ra i tapa katoaiaʼi ko “Te Ara.” (Angaanga 19:19, NW; Isaia 30:21) E ara tau i te Atua te reira oraanga te anoanoia ra tatou kia tuatua e kia rave kia rotai ma te Tuatua a te Atua ra.

4. Eaa ra ka puapingaʼi kia raveia te taui anga kia tau ei te oraanga ki to te Atua ra au mataara?

⁴ Me kite etai aronga ou te apiiia ra i te Puka Tapu e ka anoanoia ratou kia rave i etai taui anga kia akamarekaʼi ia Iehova, penei ka manako ua ratou, ‘E mea tau ainei e ka puapinga tikai ia te oraanga tau i te Atua ra?’ Ka rauka kia papu ia koe e ko te tika ia. No teaa ra? No te mea “ko te Atua te aroa,” e no reira ko tona au aerenga kua akakoroia ei puapinga no tatou. (1 Ioane 4:8) E pakari katoa te Atua e te kite ra eaa te mea meitaki no tatou. I te mea te Atua ko Iehova e mana katoatoa ia, ka rauka iaia i te akamaroiroi mai ia tatou kia akatupu i to tatou anoano kia akamareka iaia na te akakoreanga i tetai ravenga kino. (Philipi 4:13) E akamanako tatou i etai kaveinga te kapitiia maira ki te oraanga tau i te Atua ra kia kite e akapeea te akonoanga ia ratou i te apai mai anga i te mataora.

KA AKATUPU TE TIRATIRATU I TE MATAORA

5. Eaa ta te Puka Tapu tuatua no te pikikaa e te keia?

⁵ Ko Iehova “te Atua tuatua-mou.” (Salamo 31:5) Kare e ekoko anga, e te anoano ra koe kia aru i tona akaraanga e kia kiteaia ei tetai tangata tuatua mou. Te taki atura te tiratiratu ki te akangateitei ia koe uaorai e ki tetai manako ngakau meitaki. No te mea ko te tiratiratu kore e mea matauia i teianei ao ki i te ara, inara, ka tau teia akamaara anga no te au Kerititiano: “Ei tuatua-mou ta te tangata ravarai kia tuatua atu ki tetai . . . Te tangata i keia na, auraka aia e keia akaou: e rave ra i te angaanga, kia rauka iaia te mea meitaki i tona uaorai rima, kia puapingaia tana kia oronga atu na te tangata i ngere.” (Ephesia 4:25, 28) Ka rave te au Kerititiano te angaanga ra i te angaanga tiratiratu no te ra katoa. Me ka kore to ratou pu e akatika, kare ratou e rave  ua atu i etai apinga nana ra. Me i te angaanga, i te apii, e me i te kainga, ka tau tei akamori ia Iehova ra kia ‘tiratiratu i te au mea ravarai.’ (Ebera 13:18) Tetai ua atu tei rave ra i te ravenga pikikaa me kare keia kare e rauka iaia ta te Atua ra akaperepere.—Deuteronomi 5:19; Apokalupo 21:8.

6. Penei ka akapeea ta tetai tangata tiratiratu e akono tau i te Atua i te akatupu anga kaka kia Iehova?

⁶ Ko te tupu anga no te tiratiratu e manganui te au akameitakianga. Ko Selina tetai vaine takaua putaua ra i Aperika tei inangaro ra i te Atua ia Iehova e tana au kaveinga tuatua tika. I tetai ra, kua kiteia e ia tetai kete ma tetai puka pangika e te moni maata to roto ra. Na te kimi anga i te puka tereponi, kua kitea e ia te tangata nana—ko tetai tangata akono toa kua keiaia tona au apinga. Kare roa i rauka i taua tangata ra i te irinaki i tona nga mata i ta Selina, noatu te maki ra, kua aere atu i te aravei iaia e kua akaoki atu i te katoa o te au apinga o taua kete ra. “Ka tau teia tu tiratiratu kia tutakiia,” ko tana ia i tuatua e kua oronga atura i tetai moni. Ko te mea puapinga roa, kua akapaapaa teia tangata i te akonoanga a Selina. Ae, te akamanea ra te au angaanga tiratiratu i te apiianga Puka Tapu, te akakaka ra i te Atua ko Iehova, e te apai maira i te mataora ki tona aronga akamori tiratiratu.—Tito 2:10; 1 Petero 2:12.

TE AKATUPU RA TE ORONGA UA I TE MATAORA

7. Eaa te tarevake o te petianga moni?

⁷ E tu mataora tei te oronga ua, tera ra ko te au tangata noinoi “kare anake ïa e noo i te basileia o te Atua.” (1 Korinetia 6:10) Ko tetai tu matauia no te noinoi e petianga moni ia, ko tetai tamataangaia kia riro mai te moni na roto i te ruti anga etai ke ra. Kare a Iehova e mareka i te aronga “morimori apinga.” (1 Timoteo 3:8) Noatu rai i te ngai te akatikaia ra e te ture te petianga moni, e te peti moni ua ra tetai tangata ei kanga ua, penei ka riro aia kia kaki e kia akakeu i te reira ravenga tei akakino ra i te au oraanga e manganui. E putuputu te petianga moni i te akatupu i te tu ngata ki te ngutuare tangata o tei peti i te moni ra, tei akarukeia maira e meangiti ua te moni ei oko i te au mea tau mei te kai e te kakau ra.—1 Timoteo 6:10.

8. Akapeea ta Iesu ra akanoo anga i tetai akaraanga meitaki no te oronga ua, e akapeea tatou e raukai i te oronga ua?

⁸ No to ratou tu oronga aroa ua, te kitea ra e te au Kerititiano  te rekareka i te tauturuanga i etai ke ra, e maata oki ki te au taeake akarongo te ngere ra. (Iakobo 2:15, 16) I mua ake i to Iesu aere mai anga ki te enua nei, kua akara aia i to te Atua ra tu oronga ua ki te au tangata. (Angaanga 14:16, 17) Kua oronga ua a Iesu i tona taime, e tona kite manako, e pera katoa tona oraanga no te tauturu i te au tangata. No reira, kua tau tikai aia kia tuatua: “E mea meitaki i te oronga atu i te rave mai.” (Angaanga 20:35) Kua tuatua meitaki katoa a Iesu no te vaine takaua apinga kore ra tei oronga ua ra e rua moni meangiti i te vairanga moni i te iero ra, no te mea kua oronga aia kia “ope roa tona apinga rikiriki rava kore.” (Mareko 12:41-44) To Iseraela i taito ra e te au Kerititiano o te anere mataiti mua ra kua oronga mai i etai akatauanga no te oronga anga rekareka i te orongaanga i te apinga materia ei turu i te putuputuanga e te angaanga Patireia. (1 Paraleipomeno 29:9; 2 Korinetia 9:11-14) Kapiti katoa ki te orongaanga apinga materia tauturu no teia au akakoro anga, kua oronga mataora ua te au Kerititiano i teia tuatau i te akapaapaa i te Atua e te taangaanga i to ratou oraanga ki tana angaanga. (Roma 12:1; Ebera 13:15) Te akameitaki ra a Iehova ia ratou no te taangaangaanga i to ratou taime, te ririnui, e ta ratou apinga, kapiti katoa ta ratou moni, ei turu i te akamori mou e te akatupu anga i te angaanga tutu aereanga i te tuatua meitaki o te Patireia i te ao katoa nei.—Maseli 3:9, 10.

ETAI ATU TE AKATUPU RA I TE MATAORA

9. Eaa te tarevake o te inu maata i te au kava akakona?

⁹ E mataoraʼi, ka tau katoa te au Kerititiano ‘kia tāpu marie i tona akono kite.’ (Maseli 5:1, 2) Ka umuumuia ratou kia tatau e kia tamanako oonu i te Tuatua a te Atua e te au puka meitaki no te apii Puka Tapu. Inara te vaira te au apinga no te kopae ke. Ei akatauanga, te inu maata i te kava akakona ka rauka te akariro kia kore e rauka i tetai tangata i te akatere i tona manakoanga. I roto i te reira tu, e manganui te au tangata te o atura i te ravenga tau kore, te ta ua, e ka akatupu i te au tumatetenga kikino. Kare i te mea poitirere e te tuatua ra te Puka Tapu e kare anake te aronga kona kava e noo i te Patireia o te Atua! (1 Korinetia 6:10) No te akapapu anga kia vai “akono meitaki,” ka kopae ke te au Kerititiano mou i te kona kava, e ka tauturu teia kia akatupu ratou i te mataora i rotopu ia ratou ra.—Tito 2:2-6.

10. (a) Eaa ra te au Kerititiano i kore ei e kai avaava? (e) E eaa te puapinga no te akakoreanga i te au ravenga kaki apinga akakona?

 ¹⁰ Ka tauturu mai te kopapa ma i te tu mataora. Inara, e manganui te riro ra kia kaki i te au apinga akakino. Ei akatauanga, e akamanako na i te kai avaava. Te ripoti maira World Health Organization e te “tamate ra te kai avaava e toru mirioni tangata i te mataiti tataki tai.” Ka riro te akamutuanga i te ravenga kai avaava ei mea ngata no te mea te akakore anga ra i te apinga te kakiia ra. I tetai tua, e manganui te aronga i kai avaava ana te kite ra e te meitaki maira to ratou ora anga e te maata atu o te moni toe tei anoanoia no te ngutuare. E tika rai, ka tauturu te akakoreanga i te kai avaava me kare te kaki i etai atu au apinga akakino ra, kia ma te kopapa, kia meitaki te akava ngakau, e kia rauka te mataora mou.—2 Korinetia 7:1.

MATAORA I TE AKAIPOIPO ANGA

11. Eaa te umuumuia ra kia raukai tetai akaipoipo anga roa ngateitei tei tau i te ture ra?

¹¹ Ko te aronga noo kapiti ra ei tane e te vaine ka tau kia akapapu e kia retita tika i to raua akaipoipoanga ma te aronga mana ra. (Mareko 12:17) Ka tau katoa oki raua kia manako i te akaipoipo anga e apainga maata ia. E tika, penei ka anoanoia te akataka ke anga i te au tu akakore anga kia kore e turu, te raveanga akakino takiri, me kare te akakino takiri anga i te pae vaerua. (1 Timoteo 5:8; Galatia 5:19-21) Inara te akamaroiroi maira te au tuatua a te apotetoro ko Paulo ia 1 Korinetia 7:10-17 kia noo kapiti nga tokorua akaipoipoia. Inara, e mataora mou ei, ka tau raua kia tiratiratu tetai ki tetai. Kua tata a Paulo: “Kia akameitakiia te akaipoipo i te tangata ravarai, e te viivii kore oki te roi: e akava oki te Atua i te akaturi e te moeana ra.” (Ebera 13:4) Ko te tuatua “roi” te akataka maira i te piri anga ainga i rotopu i tetai tane e te vaine tei akaipoipoia ra raua i te ture tetai ki tetai. Kare tetai ke atu pirianga ainga, mei te akaipoipo ra kia tere atu i te vaine okotai, te ka tau kia akatakaia e “kia akameitakiia . . . i te tangata ravarai.” Pera katoa oki, te akaapa ra te Puka Tapu i te pirianga ainga i mua ake i te akaipoipo anga e pera katoa te rave totoma.—Roma 1:26, 27; 1 Korinetia 6:18.

12. Eaa etai ua kino no te kanga akaturi ra?

¹² Penei ka akatupu te kanga akaturi i etai atianga tokoiti ua i te mareka anga kopapa, inara kare e akatupu i te mataora mou. Ka akamareka kore te reira i te Atua e ka ira te akava ngakau o  te tangata. (1 Tesalonia 4:3-5) Penei ka tupu te mii i te AIDS no te ainga tau kore i te ture e etai atu maki viivii akatupuia mai i te ainga. “Kua manakoia e e tere atu i te 250 mirioni tangata i te ao katoa tei piriia ra e te opi tae i te mataiti tataki tai, e e vaitata i te 50 mirioni i te opi,” ta te ripoti rapakau anga i akakite. Te vai katoa ra oki te manamanata no te au toanga anoano koreia. Te ripoti maira te International Planned Parenthood Federation e, takapini i teianei ao, e tere atu i te 15 mirioni tamaine i rotopu i te 15 e te 19 mataiti e nui ra i te au mataiti tataki tai, e te tuanga toru o ratou ra kua titiri pepe. I tetai apii anga kua akaari mai e i tetai enua Aperika, kua tupu e 72 patene te au mate katoatoa i roto i te au tamaine mapu no te au manamanata titiri pepe. Penei kare tetai papaki o te aronga kanga akaturi e rokoia ana e te maki viivii e te nuianga inara kare e kore te kino o te manako ngakau. E manganui kua kore ta ratou akangateitei ia ratou uaorai e kua makitakita ia ratou uaorai.

13. Eaa etai atu au manamanata te akatupuia maira e te akaturi, e eaa te vai maira i te tuatau ki mua no te aronga te ka rave ua atu i te kanga akaturi e te akaturi?

¹³ Noatu e ka rauka rai kia akakoreia te akaturi, inara e tumu mana ia i te Tuatua Tapu no te kopae ke no te tuanga a te tokorua i apa kore ra. (Mataio 5:32; akaaite ia Hosea 3:1-5.) Me ka tupu te akakore anga i te akaipoipo no taua tu ainga tau kore ra, penei ka akaruke mai teia i te au ira anga manako ngakau ki runga i te tokorua apa kore ra e ki runga i te tamariki. Ei meitaki no te pamiri tangata nei, te tou maira te Tuatua a te Atua e ka tupu tana akava anga akaapa anga ki runga i te aronga kanga akaturi e te akaturi katoa me ka kore e tataraara. Pera katoa oki, te akataka meitaki maira e ko taua aronga rave i taua ravenga ainga tau kore ra “kare anake ïa e noo i te basileia o te Atua.”—Galatia 5:19, 21.

“KARE I TO TEIANEI AO”

14. (a) Eaa etai tu akamori itoro te kopae keia ra e te tangata akono tau i te Atua? (e) Eaa te arataki anga te orongaia maira ia Ioane 17:14 e ia Isaia 2:4?

¹⁴ Te aronga e anoano ra kia akamareka ia Iehova e kia rekareka i te au akameitakianga Patireia ka kopae i te akamori itoro i tetai tu ua atu nona. Te akaari maira te Puka Tapu e e tarevake te maani, e te akamori tiki, kapiti katoa to Karaiti, me kare to te metua vaine o Iesu, koia a Maria. (Exodo 20:4, 5; 1 Ioane 5:21)  No reira, kare te au Kerititiano mou e akatapu i te au tiki akatutu, te au koroti, e te au tiki tikai. Ka kopae katoa ratou i te au tu kikite i te akamori itoro, mei te akamori anga i te au reva e te imene anga i te au imene akakaka pa enua. Me taomiia kia rave i taua au angaanga ra, ka manako ratou i ta Iesu au tuatua kia Satani ra: “Ko toou Atua ra ko Iehova taau e akamori, e koia anake rai taau e akarongo.” (Mataio 4:8-10) Kua tuatua a Iesu no tana au pipi “kare i to teianei ao.” (Ioane 17:14) Ko te aite anga o teia kia neutara i te au ravenga poritiki e te nooanga au ua kia rotai ma ta Isaia 2:4, e tuatua ra: “Nana [na Atua ko Iehova] e akava i rotopu i te au etene, e e akataka i te tuatua i rotopu i te tangata e manganui; e tupaki oki ratou i ta ratou au koke ei auri arote, e ta ratou au korare ra, ei tipi tope ïa: kare tetai enua e tamaki mai ki tetai enua i te koke, kare oki ratou e apii akaou i te tamaki.”

15. Eaa a Babulonia Maata, e eaa ta te aronga ou apiiia i te Puka Tapu e manganui te rave ra kia atea ke mai ki vao iaia?

¹⁵ Te riro anga “kare i to teianei ao” tona aite anga katoa oki e  akaatea mai anga i te kapiti anga ma “Babulonia Maata,” koia te patireia akonoanga pikikaa o teianei ao. Kua totoa mai te akamori anga viivii mei Babulonia i taito ra e tae roa kia mou ia i te tutara kino i te pae vaerua ki rungao i te au tangata o teianei ao katoa. Te takave ra a “Babulonia Maata” i te au akonoanga katoatoa kare ra i rotai ta ratou au apii anga e te au ravenga ma te kite i te Atua ra. (Apokalupo 17:1, 5, 15) Kare tetai e akamori tiratiratu ra ia Iehova e rave i te au angaanga te kairoia ra te akarongo na te kapiti anga i te akamori anga ma te au akonoanga tuke tuke me kare na te pirianga i te pae vaerua ma tetai ua atu tuanga o Babulonia Maata. (Numero 25:1-9; 2 Korinetia 6:14) No reira, e manganui te aronga ou tei apiiia i te Puka Tapu kua tuku atu i tetai reta akamutu anga ki te akaaerenga akonoanga no reira ra ratou. Kua apai mai teia ia ratou kia piri vaitata ki te Atua mou, mei tei taputouia ra: “E teianei, te na ko mairā Iehova, ‘E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii ra;’ ‘e naku e āriki atu ia kotou.’” (2 Korinetia 6:17; Apokalupo 18:4, 5) Kare ainei  taua ariki anga a to tatou Metua i te rangi ra i taau e anoano maata ra?

AKARA MEITAKI ANGA I TE AU AKONO ANGA MATAITI

16. Eaa te au Kerititiano mou i kore ei e akono i te Keritimeti?

¹⁶ Te oraanga tau i te Atua ra ka akamatara mai ia tatou mei te akonoanga te akateiaa ra i te au orote o teianei ao. Ei akatauanga, kare te Puka Tapu i akakite mai i te ra tikai i anau mai ei a Iesu. Penei ka tuatua tetai papaki e, ‘I manako ana au i anauia mai a Iesu ia Titema ra 25!’ Kare e tau teia no te mea kua mate aia i te tuatau tupu anga rau o 33 T.N. i te 33 1/2 mataiti. E pera katoa, i te taime i anau mai ei aia, e aronga tiaki mamoe etai “e tika ki roto i te au koro, i te tiaki anga i ta ratou anana i te po.” (Luka 2:8) I te enua o Iseraela, te tuanga openga o Titema e anu ia, e te tuatau uaua i reira kua kaveia mai te au mamoe ki roto i te au are marumaru ei paruru ia ratou i te po no te reva anu o te tuatau paroro ra. Ko te tika, kua akatakaia a Titema ra 25 e to Roma ra ei ra anau no to ratou atua ko ra. I etai anere mataiti i muri ake i to Iesu tuatau i te enua nei, kua tauruia mai, kua akonoia e te au Kerititiano akaruke i te akonoanga mou teia ra no te akono anga i te ra anau o Karaiti. No reira ra, kare te au Kerititiano mou e akono i te Keritimeti me kare tetai ua atu orote tei akatumuia ki runga i te irinaki anga akonoanga pikikaa. No te mea te oronga ra ratou i te akamori anga akatakaia kia Iehova anake ua, kare katoa oki ratou e akono i te au orote te akariro ra kia akamoriia e te au tangata me kare te iti tangata.

17. Eaa te au tangata akono tau i te Atua ra i kore ei e rave i te au pati ra anau anga, e eaa ra te au tamariki Kerititiano i mataoraʼi?

¹⁷ E rua ua nga taiku anga akono anga i te ra anau anga i te Puka Tapu, e rua ravarai no nga tangata kare i tavini atu i te Atua ra. (Genese 40:20-22; Mataio 14:6-11) I te mea kare te au Tuatua Tapu i akakite mai i te ra anau o te tangata apa kore ra ko Iesu Karaiti, eaa tatou ka manako maataʼi i te au ra anau anga o te au tangata apa ua nei? (Koheleta 7:1) E tika, kare te au metua akono i te Atua e tiaki no tetai ra takake kia akaari i te aroa ki ta ratou tamariki. Kua tuatua tetai tamaine Kerititiano e 13 mataiti e: “E maata ta matou tamataora anga ko toku ngutuare tangata. . . . E piri anga vaitata toku ki toku nga metua, e me ui mai etai atu au tamariki eaa au i kore ei e akono i te au  orote, ka akakite atu au e te akono ra au i te au ra ravarai.” Kua tuatua tetai mapu Kerititiano e 17 mataiti e: “I to matou ngutuare, te oronga apinga aroa nei matou i te katoa o te mataiti.” E maata atu te mataora ka tupu mai me oronga uaia te au apinga aroa.

18. Eaa tetai akono anga mataiti ta Iesu i akaue mai ki tana au pipi kia rave, e eaa ta te reira e akamaaraara maira ia tatou?

¹⁸ No te aronga te aruaru ra i te oraanga tau i te Atua, e okotai ra i te mataiti tataki tai te tau ra kia akono taka keia. Ko te Oroa Aiai a te Atu ra, e putuputu te tapaia ko te Akamaara anga i te matenga o Karaiti. No te reira, kua akaue atura Iesu i tana au pipi: “E akapera kotou ei manako anga iaku.” (Luka 22:19, 20; 1 Korinetia 11:23-25) I ta Iesu akamata anga mai i teia oroa i te po o Nisana 14, 33 T.N., kua rave aia i te varaoa opue kore e te uaina muramura, ei akatutuanga i tona kopapa tangata ara kore e tona toto apa kore. (Mataio 26:26-29) Ko teia nga apinga te kaingaia ra e te au Kerititiano akatainuia i te vaerua tapu o te Atua ra. Kua apaiia atu ratou ki roto i te koreromotu ou e te koreromotu no te Patireia, e e manakonako anga to ratou no te rangi ra. (Luka 12:32; 22:20, 28-30; Roma 8:16, 17; Apokalupo 14:1-5) Inara, te kiteia ra te au puapinga e te aronga katoa te aere atura i te aiai te tau ra kia Nisana 14 i te karena taito a te ngati Iuda. Te akamaaraaraia ra ratou i te aroa akaariia maira e te Atua ko Iehova raua ko Iesu Karaiti i te atinga tapoki anga ara o te oko te akariro ra kia rauka te ora mutu kore no te aronga e akaperepere tu Atua to ratou.—Mataio 20:28; Ioane 3:16.

TE ANGAANGA E TE TAMATAORA ANGA

19. Eaa te akaaoanga ta te au Kerititiano e aro atura i te raveanga i tetai oraanga?

¹⁹ Tei raro ake te au Kerititiano i te apainga kia rave i te angaanga pakari e kia rauka mai ta ratou au mea anoanoia. Na te raveanga i teia ka apai mai ki te au upoko o te ngutuare tangata i te manakoanga akamerengo. (1 Tesalonia 4:11, 12) Inara, me te tarevake ra ta tetai Kerititiano angaanga ma te Puka Tapu, ka akakore teia i tona tu mataora. Inara, e rave anga ngata i etai taime kia kitea e tetai Kerititiano te angaanga te rotai ra ma te au turanga o te Puka Tapu. Ei akatauanga, te umuumuia ra etai aronga angaanga kia akavare i te aronga oko apinga. I tetai pae, ka akatika ua te au pu e manganui kia tau ki te akava ngakau o tetai tangata angaanga tiratiratu ra, kare e inangaro kia kore atu  tana tangata angaanga meitaki ra. Inara, noatu eaa te ka tupu mai, ka papu ia koe e ka akameitaki te Atua i taau tauta anga kia kitea tetai angaanga te ka akaruke mai ia koe ma tetai akava ngakau ma.—2 Korinetia 4:2.

20. Eaa ra tatou i tau ei kia matakite i te iki anga tamataora?

²⁰ I te mea te anoano ra te Atua kia mataora tona au tavini, ka tau tatou kia akatanotano i ta tatou angaanga pakari ma te au tuatau tamataora e te akaangaroi anga. (Mareko 6:31; Koheleta 3:12, 13) Kua akatupu te ao o Satani i te tamataora tu Atua kore. Inara e marekaʼi te Atua, ka tau tatou kia iki meitaki i ta tatou au puka ka tatau, te au porokarama ratio e te akatangi anga imene ta tatou ka akarongorongo, te au tamataora anga, au teata, au kangakanga, te au porokarama tivi, e te au vitio ta tatou e akarakara ra. Me te patoi ra te tamataora anga ta tatou i iki ana i te tuatau kua topa i te au akamatakite anga i te au tuatua tapu mei ia Deuteronomi 18:10-12, Salamo 11:5, e Ephesia 5:3-5, ka akamareka tatou ia Iehova e ka mataora me ka akatikatika tatou i te reira.

AKANGATEITEI I TE ORAANGA E TE TOTO

21. Akapeea te akatupu anga a to tatou manako no te oraanga no runga i te titiri pepe, e pera katoa oki ta tatou au ravenga e te tu akono?

²¹ No te mataora mou, ka tau tatou kia manako i te oraanga o te tangata ei mea tapu, mei ta Iehova rai. Te tureia ra tatou e tana Tuatua kia kore e ta tangata. (Mataio 19:16-18) Ko te tika, te akaari maira te Ture a te Atua ki to Iseraela e te manako ra aia i te tamaiti i roto i te kopu ei ora anga oko maata—kare i tetai apinga kia akapouia. (Exodo 21:22, 23) No te reira tumu, auraka tatou e akono i te oraanga ei apinga meangiti ua te puapinga na te kai avaava, te akono tau kore i to tatou kopapa ma te au apinga akakona me kare kava akakona, me kare te rave ua anga i te au apinga penei ka akakino. Kare katoa tatou e tau kia rave i etai ua atu aruaru anga akakoko i te oraanga e kare oki tatou e manako kore i te au akamatakite kia meitaki, penei ka akatupu i te apa i te toto.—Deuteronomi 22:8.

22. (a) Eaa te manako tau i te Atua no te toto e tona taangaanga angaia? (e) No toai anake te toto e akaora tikai ia?

²² Kua tuatua a Iehova kia Noa e tona ngutuare tangata e ko te toto te meta, me kare ora anga. No reira, kua ture te Atua ia ratou kia kore e kai i tetai ua atu toto. (Genese 9:3, 4) I te mea ko tatou to ratou au uanga, te mana ra taua ture ra ki rungao ia  tatou ravarai. Kua akaue atura a Iehova i to Iseraela e kia akataeia te toto ki runga i te one e auraka e taangaangaia no ta te tangata uaorai au akakoro anga. (Deuteronomi 12:15, 16) E kua taiku akaouia ta te Atua ra ture no te toto i te apii anga i te au Kerititiano o te anere mataiti mua ra: “Auraka kotou e kai . . . i te toto.” (Angaanga 15:28, 29) No te akangateitei i te tapu o te oraanga, kare te au tangata akono i te Atua e ariki i te pamu toto, noatu me ka maro mai etai ke ra e ko taua rave anga ra e akaora anga i te oraanga ia. E manganui te au rapakau tuke tuke te arikiia ra e te Au Kite o Iehova kua papu e meitaki tikai e kare e tuku ua atu i tetai ki roto i te au manamanata o te pamu anga toto. Kua kite te au Kerititiano e ko te toto akamaringiia o Iesu te apinga akaora tikai. Na te akarongo i te reira e apai mai i te akakore anga ara e te manakonako no te ora mutu kore.—Ephesia 1:7.

23. Eaa etai tutaki no te mataara tau i te oraanga tau i te Atua?

²³ Te taka meitaki ra, te akono anga i tetai oraanga tau i te Atua ra te umuumuia ra te tauta anga. Penei ka tupu mai te aviri anga mei etai mema mai o te pamiri me kare etai au taeake ua. (Mataio 10:32-39; 1 Petero 4:4) Inara ko te au tutaki no te akono anga i taua tu oraanga ra e maata ua atu te meitaki i tetai ua atu timataanga. Ka akatupu te reira i te akava ngakau ma e ka oronga mai i te pirianga oa tau ma te au taeake akamori ia Iehova ra. (Mataio 19:27, 29) E pera katoa, e tamanako ana i te oraanga e tuatau ua atu ki te ao ou a te Atua no te tuatua tika. (Isaia 65:17, 18) E mei teaa ra te rekareka i te raveanga kia tau ma te ako a te Puka Tapu ra e te akariroanga kia rekareka te ngakau o Iehova ra! (Maseli 27:11) No reira rai te akono anga i tetai oraanga tau i te Atua ra ka apai mai ei i te mataora!—Salamo 128:1, 2.

E TIMATA I TOOU KITE

Eaa etai au tumu no te apai mai anga tetai oraanga tau i te Atua i te mataora?

Penei eaa ta te oraanga tau i te Atua ka umuumu kia tauiia?

Eaa koe ka anoano ei kia akono i te oraanga tu Atua ra?

[Au Uianga Apii]

[Tutu i te kapi 124, 125]

Ko te au angaanga i te pae vaerua tei akatauia ma te au tuatau no te akaangaroi anga ka akatupu i te mataora o te aronga te akono ra i te oraanga tau i te Atua