Eaa te ka Tupu ki to Tatou Aronga Akaperepere tei Mate Ra?
Pene 9
Eaa te ka Tupu ki to Tatou Aronga Akaperepere tei Mate Ra?
1. Eaa te manako o te au tangata me ka rokoia tetai tei akaperepereia ra e te mate?
“KA MAMAE tetai me mate tana i akaperepere ra no te mea ko te matenga e ngere anga ia ki roto i tetai tu apinga kore ua tei mamao ke atu i te kite katoatoa ra.” Ko te reira ta tetai tamaiti i tuatua i te mate anga tona metua tane e i muri poto mai kua mate atu tona metua vaine. Kua akariro tona mamae e te tu ngere oonu iaia kia manako ngakau e te “maremo atura aia i te pae o te manako ngakau.” Penei paa e kua mamae koe i te tu mei te reira. Penei kua manako ua koe e teiea toou aronga akaperepere e me ka kite akaou ainei koe ia ratou.
2. Eaa te au uianga tamanata te tu maira no runga i te mate?
2 Kua akakiteia ki etai au metua te mamae ngakau ra e, “Te kato ra te Atua i te au tiare manea roa kia apai atu kiaia uaorai i te rangi.” E tika ainei te reira? Kua aere ainei to tatou aronga akaperepere tei mate ra ki tetai ngai vaerua? Ko ta tetai aronga ainei ia e karanga ra ko Nirvana, tei akatakaia ra ei tu mataora takiri kare e mamae e te anoano? Kua aere ainei te aronga ta tatou i akaperepere ra na roto i tetai ngutupa ki te ora mate kore i parataito? Me kare mei ta etai ke e karanga ra e, e topa anga ainei to te mate ki roto i tetai tamamae anga mutu kore no te aronga tei akariri ra i te Atua? Ka rauka ainei i tei mate i te akatupu i tetai apinga ki to tatou oraanga? E raukaʼi te au pauanga mou ki taua au uianga ra, ka tau tatou kia akara i te Tuatua a te Atua, koia te Puka Tapu.
EAA TE “VAERUA” I ROTO I TE AU TANGATA NEI?
3. Eaa te manako o Socrates raua ko Plato no runga i tei mate ra, e eaa te akatupu anga a teia ki te au tangata i teia tuatau nei?
3 Kua irinaki nga tangata taito apii Ereni ko Socrates raua ko Plato e e mea tau e apinga mate kore tetai i roto i te tangata e te vaine—e meta te ka ora atu i te mate e kare tikai e mate. I te ao katoa nei, e au mirioni ua atu tei irinaki ki teia i teia tuatau nei. E putuputu teia irinaki anga i te akatupu i te mataku i tei mate ra mei tana e akatupu ra i te manako no to ratou meitaki ra. Te apii maira te Puka Tapu ia tatou i tetai apinga tuke roa no tei mate ra.
4. (a) Eaa ta Genese i akakite mai kia tatou no te meta? (e) Eaa ta te Atua i akapuangi ki roto ia Adamu ei akariro iaia kia ora?
4 I te akamanakoanga i te tu o tei mate ra, ka tau tatou kia maara i to tatou metua mua ra, koia Adamu, e kare ona meta. E meta ra aia. I tetai angaanga akauru matakuia i te anga mai anga, kua anga iora te Atua i te tangata—koia te meta—mei te one o te enua nei e kua akapuangi iora ki roto iaia i “te aʼo ora.” Te akakite maira a Genese 2:7 kia tatou: “E kua anga iora te Atua ra ko Iehova i te tangata i te one-pueu o te enua nei, kua akapuangi iora aia i te aʼo ora ki roto i tona putaiu; riro akera te tangata ei [“meta ora,” NW].” Kua akatamouia te oraanga o Adamu na te utianga i te aʼo. Inara, e maata atu i te akapuangianga anake i te matangi ki roto i nga ate mama o te tangata ra tei raveia i ta te Atua tuku anga i te aʼo ora ki roto ia Adamu. Te tuatua ra te Puka Tapu no “te mana o te ora” te angaanga ra i roto i te au mea ora i te enua nei.—Genese 7:22, NW.
5, 6. (a) Eaa te “mana o te ora”? (e) Eaa te ka tupu me ka akamutu te “vaerua” taikuia maira ia Salamo 146:4 i te akaangaanga i te kopapa ra?
5 Eaa “te mana o te ora”? Ko te apinga puapinga ia ei akakeu i te oraanga ta te Atua i tuku ki roto i te kopapa ora kore o Adamu ra. Kua akatamouia teia mana i reira na te utianga i te aʼo. Inara eaa te “vaerua” tei taikuia ra ia Salamo 146:4? Te tuatua ra te reira irava no tetai tei mate ra: “Te riro nei oki tona vaerua, te oki nei aia ki tona ra one; kore rava atura tana i akakoro i taua rā ra.” I ta te aronga tata Puka Tapu taiku anga i te tuatua “vaerua” na teia tu, kare ratou i manako i tetai meta takake te ka ora ua atu i muri ake i te mate anga te kopapa ra.
6 Te “vaerua” te akaruke ra i te au tangata i te matenga ko te mana ora ia tei akamata mai ma Tei Anga maira ia tatou. (Salamo 36:9; Angaanga 17:28) Kare e au tu ke ke o teia mana ora mei to te mea ora tana e akaangaanga ra, mei te paoa uira ra kare ona tu tuke mei to te apinga tana e akataka ra. Me mate tetai tangata, ka akamutu rai te vaerua (mana ora) i te akaangaanga i te au teera o te kopapa, mei te mori rai ka mate me ka tamateia te paoa uira. Me akamutu te mana ora i te orongaanga ora no te kopapa, te tangata—te meta—ka mate.—Salamo 104:29; Koheleta 12:1, 7.
“KA RIRO AKAOU RAI KOE EI ONE-PUEU”
7. Eaa te ka tupu kia Adamu me akarongo kore aia ki te Atua?
7 Kua akataka meitaki maira Iehova e eaa te aite anga o te mate no Adamu rave ara ra. Kua karanga te Atua: “E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.” (Genese 3:19) Ka oki a Adamu ki ea? Ki te one, ki te one pueu kua angaia oki aia mei reira mai. I te matenga kua akamutu ua to Adamu ra ora anga!
8. Ei au meta, na roto i teea tu i kore ei te au tangata i teitei atu i te au animara?
8 I teia tu, kare i tuke to te tangata ra matenga i to te au animara. E au meta katoa oki ratou, e ko taua vaerua rai, me kare mana ora, te oronga ra i te ririnui no ratou. (Genese 1:24) Ia Koheleta 3:19, 20, te akakite maira te tangata pakari ko Solomona kia tatou: “Te mate nei tetai, e te pera katoa nei tetai i te mate; okotai oki o ratou katoa ra aʼo; e [i roto i te mate] kare atura te tangata i tu ke i te puaka . . . No te one-pueu anake nei ratou, e te oki anake nei ratou ki te one-pueu ra.” E teitei ake te tangata i te au puaka i te mea e i angaia mai aia i to te Atua ra tu, te akaataanga i to Iehova ra au tu. (Genese 1:26, 27) Inara, i te matenga aiteite te au tangata e te au animara ka oki akaou rai ki te one pueu.
9. Eaa te tu o tei mate ra, e ka aere ratou ki ea?
9 Kua akataka akaou maira Solomona i te aite anga o te mate, i te na ko anga: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea.” Ae, kare takiri a tei mate apinga i kite. No teia tu, kua raurau maira Solomona: “Ko tei kitea e koe ta to rima e rave ra, ka rave ma to ririnui ra; kare oki e angaanga, kare e kimianga, kare oki e kite, kare oki e pakari, i roto i te vaarua [“Teoro,” NW] taau e aere na.” (Koheleta 9:5, 10) Te aere nei tei mate ki ea? Ki Teoro (i te reo Epera, sheʼohlʹ), koia te vaarua matauia no te tanumanga tangata ra. Kare ta tatou aronga akaperepere tei mate ra e kite ana i tetai ua atu apinga. Kare ratou e mamae ana, e kare a ratou apinga e akatupu mai kia tatou na tetai ua atu mataara.
10. Eaa i raukaʼi ia tatou i te karanga e kare te mate i tau ei mea openga?
10 Ka tau ainei tatou katoatoa e to tatou aronga akaperepere kia ora no etai mataiti tokoiti ua e ka takake atu ei no te tuatau mutu kore? Kare e tau ki ta te Puka Tapu ra. I te tuatau o to Adamu meameaau anga, kua viviki ua te Atua ko Iehova i te oronga mai i te au akanoonooanga ei akaariu ke i te au tupu anga kino o te ara a te tangata nei. Kare te mate i te tuanga no ta te Atua akakoro anga no te au tangata. (Ezekiela 33:11; 2 Petero 3:9) No reira, kare te mate i tau ei mea openga no tatou me kare no to tatou aronga akaperepere.
“KUA MOE”
11. Akapeea ta Iesu akataka anga i te tu o tona oa i mate ra ko Lazaro?
11 Ko te akakoro anga ia a Iehova kia akaora mai ia tatou e to tatou aronga akaperepere tei mate ra i te matenga mei ko mai ia Adamu. No reira, te taiku ra te Tuatua a te Atua i tei mate e te moe ra. Ei akatauanga, i tona kiteanga e kua mate tona oa ko Lazaro, kua tuatua atura a Iesu Karaiti ki Tana au pipi: “Kua moe to tatou oa ko Lazaro; e te aere nei au e akaara iaia.” I te mea e kare te au pipi i mou viviki i te aite anga o teia tuatua anga, kua tuatua taka meitaki atura Iesu: “Kua mate takiri a Lazaro.” (Ioane 11:11, 14) Kua aere atura Iesu i reira ki te oire i Betania, te ngai te reira to Lazaro nga tuaine ko Mareta raua ko Maria i te aueanga i te mate o to raua tungane. I ta Iesu tuatua anga kia Mareta, “Ka tu akaou mai ïa to tungane,” kua akakite maira aia i tona akarongo i ta te Atua ra akakoro anga kia akaariu ke i te au akatupu anga a te mate ki runga i te pamiri tangata nei. Kua na ko maira aia: “Kua kite au e, ka tu akaou maira aia i te tuakaouanga i te rā openga ra.”—Ioane 11:23, 24.
12. Eaa te manakonako anga o Mareta ngakau mamae ra no tei mate?
12 Kare a Mareta i akakite i tetai manako no tetai meta mate kore tei ora ua atu i tetai atu ngai i muri ake i te matenga. Kare aia i irinaki e kua aere atu a Lazaro ki tetai ngai vaerua kia ora ua atu aia ki reira. E akarongo to Mareta i te manakonako anga meitaki roa no tetai tuakaouanga mei te mate mai. Kua kite aia e, kare ko tetai meta mate kore tei akaruke mai i te kopapa o Lazaro, mari ra kua takake te ora o tona tungane. Ko te vairakau ko te tuakaouanga o tona tungane.
13. Eaa te mana orongaia e te Atua ia Iesu ra, e i akapeea aia i te akakite anga i teia mana?
13 Ko Iesu Karaiti tei akamanaia e te Atua ko Iehova ra ei oko mai i te au tangata. (Hosea 13:14) No reira, i te pauanga i ta Mareta tuatua anga, kua karanga atura Iesu: “Ko au te tuakaouanga, e te ora; ko te akarongo mai iaku ra, mate ua atu rai, ka ora ra ïa.” (Ioane 11:25) Kua akakite a Iesu i tona mana tei orongaia mai e te Atua ra i teia tu i tona aerenga ki te menema o Lazaro, tei mate ra no nga ra e a, e kua akaoki akaou mai iaia kia ora. (Ioane 11:38-44) E tamanako ua ana i te rekareka o te aronga tei akara atu i teia tuakaouanga me kare i etai atu tei raveia ra e Iesu Karaiti!—Mareko 5:35-42; Luka 7:12-16.
14. Eaa ra i kore ei e aiteite te tuakaouanga e te manako no tetai meta mate kore ra?
14 E noo ua ana no tetai atianga kia akamanako marie i teia: Kare e tangata e anoanoia kia akatuakaouia, me kare kia akaoki akaouia mai kia ora, me e meta mate kore tetai tei ora atu i te matenga ra. Ko te tika, kare ia e riro ei takinga meitaki kia akatuakaou mai i tetai mei ia Lazaro rai kia oki mai ki te oraanga apa ua ki runga i te enua nei me kua aere ke atu aia ki tetai tutaki anga meitaki i te rangi. Ko te tika, kare rava te Puka Tapu i taiku ana i te tuatua “meta mate kore.” Kareka ra, te tuatua ra te au Tuatua Tapu e ko te meta tangata e rave ra i te ara ko te ka mate ia. (Ezekiela 18:4, 20) No reira te tou maira te Puka Tapu ki te oronga anga mai i tetai tuakaouanga e ko te rapakau tikai ia no te mate.
“TE ARONGA KATOA I ROTO I TE RUA”
15. (a) Eaa te aite anga o te tuatua “tuakaouanga”? (e) Eaa te tuakaouanga o te aronga tataki tai i kore ei e akatupu i te manamanata no te Atua ko Iehova ra?
15 Te tuatua ta te au pipi a Iesu i taiku no te “tuakaouanga” ko te aite anga tikai e “akatuanga ki runga” me kare e “tuanga ki runga.” E akatuanga teia ki runga mei te tu ora kore mai o te mate ra—koia oki, e tuanga ki runga mei roto mai i te vaarua matauia o te tangata nei. Ka ngoie ua i te Atua ko Iehova i te akatuakaou mai i tetai tangata. No teaa ra? No te mea ko Iehova Tei Akamata mai i te ora. I teia tuatau nei, ka rauka i te au tangata te rekoti mai i te au reo e te au tutu o te au tangata e te au vaine ki runga i te tepe vitio e ka rauka te akatangi akaou i teia au rekotianga i muri ake i te mate anga taua aronga tataki tai ra. E mea tika, i reira, ka rauka i Tei Anga mana katoatoa mai ia tatou nei i te rekoti i te au tu katoa o tetai ua atu tangata e ka akatuakaou mai i taua tangata rai, te orongaanga kiaia i tetai tu kopapa ou.
16. (a) Eaa te taputou ta Iesu i tuatua no te aronga katoatoa i roto i te rua ra? (e) Na teaa e akataka e ka akapeea te tuakaouanga o tetai tangata ra?
16 Kua tuatua a Iesu Karaiti: “Te vaitata mai nei oki te ora, e akarongo ei te aronga katoa i roto i te rua i tona [to Iesu] reo, E kua aere mai ki vao; tei rave ana i te meitaki ra, ei te tuakaouanga ora ïa ratou; e tei rave ana i te kino ra, ei te tuakaouanga akaapa ïa ratou.” (Ioane 5:28, 29) Pouroa te aronga i roto i to Iehova ra manako ka akatuakaouia e ka apiiia i tona au aerenga. Ko te aronga te ka rave kia rotai ma te kite i te Atua ra, ka riro teia ei tuakaouanga no te ora. Inara, ka riro ia ei tuakaouanga no te akaapa anga no te aronga tei kopae ke i te au apiianga e te tutara anga a te Atua ra.
17. Koai ma te ka akatuakaouia?
17 Te mea matauia, ko te aronga tei aru i tetai aerenga tuatua tika ei au tavini no Iehova ka akatuakaouia. Ko te tika, kua akamaroiroiia te manganui e te manakonako anga o te tuakaouanga kia aro atu i te mate, noatu rai te au tu takinga kino ta ua. Kua kite ratou e ka rauka i te Atua te akaora mai ia ratou ki te ora. (Mataio 10:28) Inara e au mirioni ua atu te au tangata tei mate kare i akaari mai me ka akono ratou i ta te Atua ra au turanga tuatua tika. Ka akatuakaouia rai oki ratou. No te irinaki anga i te akakoro anga a Iehova i teia tu, kua tuatua te apotetoro ko Paulo: “Te irinaki nei au ki te Atua . . . e e tuakaouanga to tei mate, te aronga tuatua-tika e te aronga tuatua-tika kore.”—Angaanga 24:15.
18. (a) Eaa te orama tei kiteaia ra e te apotetoro ko Ioane no te tuakaouanga? (e) Eaa te ka akapouia i “te roto ai” ra, e eaa teia ta “roto” e akatutu maira?
18 Kua kite te apotetoro ko Ioane i tetai orama marekaia no te aronga tei akatuakaouia i te tuanga ki mua i te terono o te Atua. Kua tata a Ioane i reira: “E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra: e akavaia iora ratou ravarai i ta ratou au angaanga. E uriia atura te mate e ko ade ki roto i te roto ai. Ko te rua teia o te mate.” (Apokalupo 20:12-14) E tamanako ana i te reira! Tei mate pouroa te vaira i roto i to te Atua ra manako tei ia ratou te manakonako anga no te tataraia mei Ade (Ereni, haiʹdes), me kare Teoro, e te vaarua matauia o te tangata nei. (Salamo 16:10; Angaanga 2:31) Ka rauka te tuatau no ratou kia akakite na ta ratou au angaanga me ka tavini atu ratou i te Atua. Ei reira te “mate e ko ade” e uriia atu ei ki roto i tei karangaia ra ko “te roto ai,” e akatutuanga i te akapouanga takiri, mei te tuatua ra ko “Keena.” (Luka 12:5, NW) Ko te vaarua matauia o te tangata nei ka akakoreia mai i te aronga mate i roto ra e ka kore ua ia me oti te tuakaouanga. Mei teaa ra te pumaana i te apii maira mei te Puka Tapu e kare te Atua e tamamae i tetai ua atu tangata!—Ieremia 7:30, 31.
TUAKAOUANGA KIEA?
19. Eaa ra tetai papaki o te au tangata ka akatuakaouiaʼi ki te rangi, e eaa te tu o te kopapa ta te Atua ka oronga no ratou?
19 E kotinga ua te numero o te au tane e te au vaine te ka akatuakaouia ki te oraanga i te rangi. Ei ui ariki e ei kau taunga ma Iesu katoa, ka o atu ratou i te tataraanga i te au tu ravarai o te mate tei akatuangaia maira ki te tangata mei te tangata mua ra, koia Adamu. (Roma 5:12; Apokalupo 5:9, 10) Eaa te maata o te aronga ka raveia atu e te Atua ki te rangi kia tutara ma Karaiti katoa? Kia tau ki ta te Puka Tapu, e 144,000 anake ua. (Apokalupo 7:4; 14:1) Ka oronga atu a Iehova i te kopapa vaerua ki teia aronga tataki tai tei akatuakaouia ra e raukai ia ratou te noo ki te rangi ra.—1 Korinetia 15:35, 38, 42-45; 1 Petero 3:18.
20. Eaa te ka kiteaia e te au tangata akarongo ra, kapiti katoa te aronga akatuakaouia?
20 E maata roa atu to te aronga kua mate te ka akatuakaouia mai ki tetai enua parataito. (Salamo 37:11, 29; Mataio 6:10) Ko tetai tuanga o te tumu no te akatuakaou anga i tetai papaki ki te rangi kia akaoti i ta te Atua akakoro anga no te enua nei. Ka rave marie a Iesu Karaiti e te 144,000 i te rangi ra i te apai mai i te au tangata akarongo ki te tu apa kore ua tei titiri keia e to tatou nga metua mua ra. Ka kapiti katoa teia i te aronga tei akatuakaouia ra, mei ta Iesu i akakite i tana tuatua anga ki te tangata tei mate atura koia tei patitiia i te pae iaia ra: “Tei iaku nei koe i te Parataito.”—Luka 23:42, 43, NW.
21. Kia tau ki ta te peroveta ko Isaia e te apotetoro ko Ioane, eaa te ka tupu ki te mate?
21 I runga i te enua Parataito ra, ka takoreia atu te mate, tei akatupu i teia tuatau nei i taua tu puapinga kore ra. (Roma 8:19-21) Kua akakite mai te peroveta ko Isaia e na te Atua na Iehova “e akakore rava i te mate e tuatau ua atu.” (Isaia 25:8) Kua orongaia ki te apotetoro ko Ioane tetai orama no te tuatau e kite ei te au tangata akarongo i te tu rangatira mei te mamae e te mate. Ae, “e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:1-4.
22. Eaa te akatupu anga kia koe no te kite i te tuakaouanga?
22 Te takore atura te apiianga taka meitaki a te Puka Tapu i te manako oripu ua no te ka tupu ki tei mate ra. Te taka meitaki maira te reira i te au Tuatua Tapu e ko te mate “taua enemi openga ra” te ka akapouia. (1 Korinetia 15:26) Mei teaa te ririnui e te pumaana te ka rauka ia tatou mei te kite anga i te manakonako no te tuakaouanga ra! E mei teaa to tatou mataora e ko to tatou aronga akaperepere te vaira i roto i te manako o te Atua ka ara mai mei te moe o te mate kia rekareka i te au mea memeitaki katoatoa tana i akaputu no te aronga tei aroa iaia ra! (Salamo 145:16) Ka tupu taua au akameitakianga ra na roto i te Patireia o te Atua. Inara aea tana tutara anga e akamataʼi? E akara tatou.
E TIMATA I TOOU KITE
Eaa te vaerua i roto i te au tangata ra?
Akapeea koe me akataka i te tu o tei mate ra?
Koai ma te ka akatuakaouia?
[Au Uianga Apii]
[Tutu i te kapi 85]
Mei ta Iesu kapiki anga ia Lazaro mei roto mai i te menema ra, e au mirioni ua atu te ka akatuakaouia
[Tutu i te kapi 86]
Ka vairai te rekareka me ‘akakore rava te Atua i te mate e tuatau ua atu’
