Ka Akapeea e Raukaʼi kia Akavaitata atu Koe ki te Atua
Pene 16
Ka Akapeea e Raukaʼi kia Akavaitata atu Koe ki te Atua
1. Eaa te au tu aiteite te kiteia ra i te au akonoanga e manganui?
KUA umere tetai vaine tei tutaka aere ra i tetai enua o te Orieni ra i te au peu akonoanga tana i kite i te iero o Buda ra. Noatu rai e kare te au tiki mei to Maria me kare to Karaiti, e manganui te au peu tei aiteite ki tana akonoanga i te kainga. Ei akatauanga, kua kite aia i te au rosario e te au imeneanga pure. Kua kite katoa oki etai ke ra i taua au tu aiteite ra. I te Itinga me kare te Opunga ra, te au mataara ta te aronga akamori e tauta ra kia akavaitata atu ki te Atua me kare ki te au apinga o ta ratou akamori anga e maata te tu aiteite.
2. Akapeea te akataka anga i te pure, e eaa ra te aronga e manganui i pure ei?
2 E manganui te tauta ra kia akavaitata atu ki te Atua na te pureanga kiaia. Kua akatakaia te pure ei “tetai angaanga no te komunikeiti anga na te tangata ma tei tapu—te Atua, te au atua, te ngai mamao atu i to tei kotingaia ra, me kare te au mana ririnui.” (The New Encyclopædia Britannica) Inara, i te akavaitataanga ki te Atua na roto i te pure, te manako ra tetai papaki i te au apinga anake te ka rauka mai ia ratou no te reira. Ei akatauanga, i tetai tuatau kua ui atu tetai tangata ki tetai o te Au Kite o Iehova e: “Me ka pure koe noku, ka akakoreia atu ainei toku au manamanata no toku ngutuare tangata, i te angaanga, e ma toku ora anga kopapa?” I te akara anga ko te manako ia o taua tangata ra, inara e manganui te pure ra e kua kite e te vai maira to ratou au manamanata. No reira penei ka ui tatou, ‘Eaa tikai i tau ei tatou kia akavaitata atu ki te Atua?’
EAA KA AKAVAITATAʼI KI TE ATUA
3. Ka tau ta tatou au pure kia tukuia atu kiaai, e no teaa ra?
3 Kare te pure i tetai peu puapinga kore ua, kare katoa ia i tetai mataara ua e rauka mai ei tetai apinga. Ko tetai tumu maata no te akavaitata anga ki te Atua ra kia raukaʼi tetai pirianga vaitata kiaia ra. No reira ka tau ta tatou au pure kia tukuia atu ki te Atua kia Iehova ra. “Te vaitata mairā Iehova i te aronga i kapiki atu iaia,” ta te tata taramo ko Davida i tuatua. (Salamo 145:18) Te pati ra a Iehova ia tatou kia aere mai ki roto i tetai pirianga ponuiaau ma ia katoa ra. (Isaia 1:18) Ko te aronga te akarongo ra ki teia patianga te akatika ra ki ta te tata taramo tei tuatua ra: “E mea meitaki ra iaku kia akavaitata atu ki te Atua.” No teaa ra? No te mea ko te aronga te akavaitata ra ki te Atua ko Iehova ka rekareka i te mataora mou e te au o te manako.—Salamo 73:28.
4, 5. (a) Eaa ra i puapinga maataʼi kia pure atu ki te Atua? (e) Eaa te tu pirianga ka rauka ia tatou kia akatupu ma te Atua na roto i te pure?
4 Eaa ka pure ei ki te Atua no te tauturu me ‘te kite ra aia i te au mea te tau ra na tatou i mua ake ka pati atu ei tatou kiaia’? (Mataio 6:8; Salamo 139:4) Na te pure e akaari e e akarongo to tatou i te Atua e te manako ra iaia ei te Tumu o “te au mea memeitaki i o maiia ra, e te au mea tika ravarai.” (Iakobo 1:17; Ebera 11:6) Te mareka ra a Iehova i ta tatou au pure. (Maseli 15:8) Te rekareka ra aia i te akarongo mai i ta tatou au akakiteanga tau no te ariki anga e te akapaapaa, mei te metua rai e rekareka ra i te akarongoanga i tana tamaiti ou i te tuatua anga ma te ngakau tae i te akameitaki anga. (Salamo 119:108) I te ngai te tupu ra te pirianga meitaki o te metua e te tamaiti, te vaira te komunikeiti anga pumaana. Ko te tamaiti tei akaperepereia ra ka anoano ia i te tuatua atu ki tona metua. Ko te tika te reira no to tatou pirianga ma te Atua ra. Me te ariki tika ra tatou i ta tatou e apii ra no Iehova e te aroa tana i akaari mai no tatou, ka tupu kia tatou te anoano pakari kia akakite i to tatou uaorai manako kiaia na roto i te pure.—1 Ioane 4:16-18.
5 I te akavaitataanga ki te Atua Teitei Rava ra, ka tau tatou kia akangateitei atu, inara kare e anoanoia kia maata roa te manako anga no te au tuatua tikai ta tatou ka taiku. (Ebera 4:16) Ka vai ua rai to tatou mataara atu kia Iehova. E mei teaa ra te meitaki e ka rauka ua ia tatou i te ‘riringi atu i to tatou ngakau’ ki mua i te Atua na roto i te pure! (Salamo 62:8) Na te ariki anga ia Iehova ka taki atu ki te pirianga pumaana kiaia ra, mei tei rekarekaia ra e te tangata tiratiratu ra ko Aberahama ei oa no te Atua ra. (Iakobo 2:23) Inara i te pureanga ki te Atu Ngateitei o te ao katoa e pini ua ake, ka tau tatou kia akono i tana au umuumu anga no te akavaitataanga kiaia ra.
AU UMUUMU ANGA NO TE AKAVAITATA ANGA KI TE ATUA
6, 7. Noatu ra e kare te Atua e pati mai ana i te tutaki anga moni kia akarongo aia i ta tatou au pure, eaa tana e umuumu maira ia tatou me pure atu tatou?
6 Ka anoanoia ainei te moni kia raukaʼi te akavaitata atu ki te Atua? E manganui te au tangata te tutaki ra i te au orometua kia pure no ratou. Ko tetai papaki te irinaki ra e ka akarongoia mai ta ratou pure kia tau ki te maata o ta ratou moni e oronga ra. Inara, kare te Tuatua a te Atua i karanga e te umuumuia ra tetai orongaanga moni no tatou kia akavaitata atu kia Iehova na roto i te pure. Tana au apinga i te pae vaerua e te au akameitakianga no te pirianga kiaia na roto i te pure te vai ua maira ma te oko koreia.—Isaia 55:1, 2.
7 Eaa, i reira, te umuumuia ra? Ko te tu akono tika o te ngakau ko tetai mea anoanoia ia. (2 Paraleipomeno 6:29, 30; Maseli 15:11) I roto i to tatou ngakau ka tau tatou kia akono i te akarongo i te Atua ko Iehova “tei akarongo i te pure ra” e “koia tei tutaki mai i te aronga i kimi tikai iaia.” (Salamo 65:2; Ebera 11:6) Ka tau katoa ei ngakau taakaaka to tatou. (2 Ariki 22:19; Salamo 51:17) I tetai o tana au akatutu anga, kua akaari maira a Iesu Karaiti e i te akavaitataanga tetai tangata terona taakaaka ua ma te ngakau tu akono akaaka ua kua akapapu e e maata tana tuatua tika i to tetai Pharisea akateitei ra. (Luka 18:10-14) Ia tatou e akavaitata atura ki te Atua na roto i te pure, kia maara tatou e “te rikarika rā Iehova i te aronga katoa i parau te ngakau.”—Maseli 16:5.
8. Me te anoano ra tatou kia pau mai te Atua i ta tatou au pure, eaa ta tatou ka tau kia tama ia tatou uaorai?
8 Me te anoano ra tatou kia pau mai te Atua i ta tatou au pure, ka tau tatou kia tama ia tatou uaorai i te tu akono i te ara. I ta te pipi ko Iakobo akamaroiroi anga etai ke ra kia akavaitata atu ki te Atua, kua tuatua katoa atura aia: “E orei na i to kotou rima, e te aronga rave ara ra; e tamā na i to kotou ngakau, e te aronga ngakau rua na.” (Iakobo 4:8) Noatu rai ko te aronga rave ara ka rauka ia ratou kia tomo atu ki roto i te pirianga ponuiaau ma Iehova ra me ka tataraara ratou e ka akaruke atu i to ratou aerenga mua o te oraanga ra. (Maseli 28:13) Kare e rauka ia tatou i te aere atu ki mua ia Iehova me ka akameamea ua tatou e kua tama tatou i to tatou aerenga. “Tei te aronga tuatua-tika ra to Iehova mata, e tei ta ratou kapiki tona taringa; e mata ke ra to Iehova i te aronga i rave i te kino ra,” ta te Tuatua ia a te Atua i akakite.—1 Petero 3:12.
9. Na roto atu iaai ta tatou tuatua anga kia Iehova, e no teaa ra?
9 Te tuatua ra te Puka Tapu: “Kare takiri e tangata tuatua-tika i te enua nei, ko tei rave i te tuatua meitaki, e kare rava e ara.” (Koheleta 7:20) Penei ka ui koe: ‘Ka akapeea, i reira, e raukaʼi ia tatou kia akavaitata atu ki te Atua ko Iehova?’ Te pau maira te Puka Tapu: “Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra.” (1 Ioane 2:1) Noatu rai e aronga ara tatou, ka rauka ia tatou i te akavaitata atu ki te Atua ma te mataku kore na roto ia Iesu Karaiti, tei mate ra ei oko no tatou. (Mataio 20:28) Koia anake ua te aerenga na roto iaia e raukaʼi ia tatou te akavaitata atu ki te Atua ko Iehova ra. (Ioane 14:6) Kare tatou e tau kia manako ua e ka meitaki ua tatou i te atinga oko o Iesu ra noatu me ka rave akakoro tatou i te ara. (Ebera 10:26) Inara, me te tauta ra tatou kia rave i te meitaki e kia akakore i te rave kino inara ka apa i etai taime, ka rauka ia tatou kia tataraara e ka pati ei ki te Atua kia akakore mai i te ara. Me akavaitata tatou kiaia ma te ngakau akaaka, ka akarongo mai aia ia tatou.—Luka 11:4.
AU TUATAU NO TE TUATUA KI TE ATUA
10. I te raveanga i te pure, akapeea tatou i te aru anga ia Iesu, e eaa etai au atianga no te pure muna?
10 Kua manako maata a Iesu Karaiti i tona pirianga ma Iehova ra. No reira, kua akataka a Iesu i te tuatau no te tuatua ki te Atua ra na roto i te pure muna. (Mareko 1:35; Luka 22:40-46) Ka meitaki tatou kia aru i to Iesu akara anga e ka pure ei ki te Atua no runga i tetai tumuanga putuputu. (Roma 12:12) E mea tau ra kia akamata i te ra ma te pure, e pera katoa i mua ake i te aere anga ki te moe, e mea tau tikai kia akameitaki tatou ia Iehova no te angaanga o taua ra ra. I taua ra katoa ra, e akono kia akavaitata ki te Atua “ma te pure tukumoe kore.” (Ephesia 6:18) Ka rauka katoa ia tatou kia pure muteki ua i to tatou ngakau, ma te kiteanga e te akarongo maira Iehova ia tatou. Na te tuatua muna anga ki te Atua ka tauturu ia tatou kia akangaueue kore i to tatou pirianga kiaia, e na te pureanga kia Iehova i te au ra tataki tai ka tauturu ia tatou kia akavaitata roa atu kiaia.
11. (a) Eaa i tau ei kia pure kapiti te au ngutuare tangata? (e) Eaa te aite anga me tuatua koe “Amene” i te openga o te pure ra?
11 Ka akarongo katoa a Iehova i te au pure tei orongaia no te au pupu tangata. (1 Ariki 8:22-53) Ka rauka ia tatou kia akavaitata atu ki te Atua ei tetai ngutuare tangata, ma te upoko o te ngutuare e rave i arataki anga. Na teia e akamaroiroi i te tapeka anga o te ngutuare tangata, e ka riro a Iehova ei tika tikai ki te aronga ou ra ia ratou e akarongo ra i to ratou nga metua e pure taakaaka ra ki te Atua. Ka peea me ko tetai te rave ra i te pure no te au pupu ra, penei i tetai uipaanga a te Au Kite o Iehova? Me ko tatou etai i reira, e akarongo marie tatou e kia tae ki te openga o te pure ra, ka rauka ia tatou i te tuatua anga ma te ngakau katoa e “Amene,” tona aite anga e “Koia ia.”—1 Korinetia 14:16.
TE AU PURE TA IEHOVA E AKARONGO MAIRA
12. (a) Eaa ra i kore ei te Atua e pau i etai pure? (e) Eaa i kore ei e tau kia manako ua tatou i tei anoano anakeia no tatou i te pureanga?
12 Penei ka manako tetai papaki e kare te Atua e pau mai ana i ta ratou au pure noatu rai te pure ra ratou kiaia na roto ia Karaiti. Inara, kua tuatua te apotetoro ko Ioane e: “Kia pati ua atu tatou i te au mea ravarai i tau [i te Atua] ra, te akarongo maira aia ia tatou.” (1 Ioane 5:14) No reira, ka tau tatou kia pati kia tau ki to te Atua anoano. I te mea te manako maira aia i te meitaki no tatou i te pae vaerua, tetai ua atu apinga te akakino maira i to tatou tu i te pae vaerua ko tetai tumu tau ia no te pure. Ka tau tatou kia kopae i te timataanga kia manako anake i te au mea anoanoia no te kopapa. Ei akatauanga, noatu rai te tika ra kia pure no te kite e te maroiroi te manako i te akono anga i te maki, kare e tau te manamanata no te ora kopapa kia riro ei kopae atu i te au manako no te pae vaerua. (Salamo 41:1-3) I tona kite anga e e maata roa tona manako anga no tona ora kopapa, kua pati tetai vaine Kerititiano kia Iehova no te tauturu kia rauka iaia te manako tau no tona maki. Ko tei tupu, kua riro tona au manamanata no te ora kopapa kia meangiti roa, e kua manako aia e kua orongaia kiaia “te mana maata meitaki.” (2 Korinetia 4:7) Kua tupu kia ririnui tona anoano i te tauturu ia etai ke ra i te pae vaerua, e kua riro mai aia ei akakite i te Patireia i te au tuatau ravarai.
13. Mei tei akakiteia mai ia Mataio 6:9-13 ra, eaa etai tumu tau ka rauka ia tatou kia kapiti atu i ta tatou au pure ra?
13 Eaa ta tatou ka kapiti ki roto i ta tatou au pure kia mareka mai ei a Iehova i te akarongo anga ia ratou? Kua apii a Iesu Karaiti i tana au pipi e ka akapeea me pure. I te pure akaraanga tei tataia ia Mataio 6:9-13, kua akanoo mai aia i tetai papaanga no te au tumu tei tau ra no tatou kia pure. Eaa tikai te manako maata no roto i ta tatou au pure? Ka tau ko te ingoa o te Atua ko Iehova e te Patireia te apinga maata. Te tau ra te patianga no te au mea anoanoia i te pae kopapa. E puapinga maata katoa oki kia pati no te akakore anga i ta tatou au ara e kia akaora ia tatou i te au timataanga e i taua vaerua kino ra, koia Satani te Tiaporo ra. Kare a Iesu i anoano kia imene tatou i teia pure me kare kia tuatua taokioki ua i te reira, ma te manako kore i tona aiteanga. (Mataio 6:7) Eaa te tu pirianga me ka taokioki ua tetai tamaiti i taua au tuatua rai i te au taime ravarai e tuatua atura aia ki tona metua?
14. I te pae atu i te au pati anga, eaa te au pure ka tau tatou kia oronga?
14 I te pae atu i te au patianga e te au patianga akatenga, ka tau tatou kia oronga i te au pure akapaapaa e te akameitakianga. (Salamo 34:1; 92:1; 1 Tesalonia 5:18) Ka rauka katoa ia tatou kia pure no etai ke ra. Te au pure no to tatou au tungane e te au tuaine te makiia ra me kare te takinga kinoia ra ka akaari i to tatou manako kia ratou, e ka mareka a Iehova kia akarongo mai i ta tatou taiku anga i taua manako anga ra. (Luka 22:32; Ioane 17:20; 1 Tesalonia 5:25) Ko te tika, kua tata te apotetoro ko Paulo: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”—Philipi 4:6, 7.
E TAMOU MARIE I TE PURE
15. Eaa ta tatou ka tau kia maara me ka akara anga e kare ta tatou au pure e pauia mai?
15 Noatu rai e te rauka maira ia koe te kite no runga i te Atua ra, penei ka manako koe i etai taime e kare taau au pure e pauia ana. Penei te tika ra te reira no te mea penei kare i tae ki ta te Atua ra tuatau no te pau anga i tetai apinga tikai tei pureia ra. (Koheleta 3:1-9) Penei ka akatika ua a Iehova i tetai turanga kia vai mai no tetai tuatau, inara te pau ra aia i te au pure e te kite ra i te taime meitaki no te rave i te reira.—2 Korinetia 12:7-9.
16. Eaa tatou i tau ei kia tamou marie i te pure, e akapeea e raukaʼi i te raveanga i teia i te akatupu i to tatou pirianga ma te Atua?
16 Na ta tatou tamou marie anga i te pure e akakite i to tatou anoano no te ngakau mai i ta tatou i tuatua ana ki te Atua. (Luka 18:1-8) Ei akaraanga, penei ka pati tatou kia Iehova kia tauturu mai ia tatou i te akakore i tetai tu apikepike. Na te tamou marie anga i te pure e te raveanga kia rotai ma ta tatou au patianga, ka akaari tatou i te ngakau tae tikai. Ka tau kia taka meitaki e kia tiratiratu ta tatou au patianga. E mea puapinga rava atu oki kia pure akatenga me te tupu ra kia tatou tetai timataanga. (Mataio 6:13) Ia tatou e rave ua atura i te pure ma te tautaanga kia akakore i to tatou anoano no te rave ara, ka kite tatou akapeea ta Iehova tauturu anga mai ia tatou. Ka patu teia i to tatou akarongo e ka akamaroiroi i to tatou pirianga kiaia ra.—1 Korinetia 10:13; Philipi 4:13.
17. Akapeea tatou e puapingaiaʼi mei tetai tu akono pure i te tavinianga i te Atua ra?
17 Na te tatanuanga i te tu akono i te pure i te raveanga i te angaanga tapu ki te Atua ko Iehova, ka riro tatou kia kite e kare tatou e tavini ana iaia ra ma to tatou uaorai maroiroi. Ko Iehova te oronga maira i te maroiroi ei rave i te angaanga. (1 Korinetia 4:7) Na te akatikaanga i teia ka tauturu ia tatou kia taakaaka ua e ka akameitaki i to tatou pirianga ma ia katoa ra. (1 Petero 5:5, 6) Ae, e au tumu ngaueue kore to tatou kia rave tamou marie i te pure. Ta tatou au pure akatenga e te kite meitaki e akapeea te akavaitata atu ki to tatou Metua akaperepere i te rangi ra ka akariro i to tatou oraanga kia mataora tika tikai.
KOMUNIKEITI ANGA MA IEHOVA KARE I TE PAE OKOTAI
18. Akapeea e raukaʼi ia tatou i te akarongo atu ki te Atua?
18 Me te anoano ra tatou kia akarongo mai te Atua i ta tatou au pure, ka tau katoa tatou kia akarongo atu ki tana tuatua. (Zekaria 7:13) Kare aia e tuku akaou mai i tana au tuatua na roto i te au peroveta akauruia ra e mea papu katoa oki kare aia e taangaanga i te au ravenga purepure. (Deuteronomi 18:10-12) Inara ka rauka ia tatou te akarongo atu ki te Atua na te apiianga i tana Tuatua, koia te Puka Tapu. (Roma 15:4; 2 Timoteo 3:16, 17) Mei ia tatou katoa i tau ra kia anoano i te tongi i te kai kopapa te meitaki ra no tatou, te raurauia maira tatou “kia kaki tikai . . . i te u iro koreia ra, i te tuatua.” E tatanu i te tongi anga no te kaikai vaerua na te tatauanga i te Tuatua a te Atua i te au ra ravarai.—1 Petero 2:2, 3; Angaanga 17:11.
19. Eaa te puapinga o te tamanako oonu anga i taau i tatau ana i te Puka Tapu ra?
19 E tamanako oonu i taau apinga i tatau i roto i te Puka Tapu. (Salamo 1:1-3; 77:11, 12) Tera te aite anga kia tamanako marie i teia au tumu. Penei ka akaaite koe i teia ki te tamaruanga i te kai. Ka rauka ia koe i te tamaru i te kai vaerua na te akapirianga i taau apinga e tatau ra ki te au apinga kua kite ke ana koe. E akamanako e ka akapeea te akatupu anga ki toou oraanga a te au tumu, me kare e akaata ki runga i ta te reira e akakite maira no runga i te au tu o Iehova e tana au ravenga. No reira na roto i taau apii, ka rauka ia koe te rave i te kai vaerua ta Iehova e oronga maira. Na teia e akavaitata atu ia koe ki te Atua e ka tauturu ia koe kia akono i te au manamanata o te au ra ravarai.
20. Akapeea te aereanga ki te au uipaanga Kerititiano i te tauturu anga mai ia tatou kia akavaitata atu ki te Atua ra?
20 Ka rauka katoa ia koe i te akavaitata atu ki te Atua na te akarongoanga i te uriuri manako anga i tana Tuatua i te au uipaanga Kerititiano, mei to Iseraela i akarongo marie ra i to ratou akaputu anga kia akarongo atu i te tatauanga i te Ture a te Atua ra i te ngai tangata. Kua rave te aronga apii mai i taua tuatau ra i te akakite anga i te aiteanga i ta ratou tatauanga i te Ture, na reira te tauturu anga i te aronga e akarongo atura ia ratou kia kite e kia akakeuia i te akono i ta ratou i akarongorongo ra. Kua taki atu teia ki te rekareka maata. (Nehemia 8:8, 12) No reira e akariro ei ravenga naau te aere atu ki te au uipaanga a te Au Kite o Iehova ra. (Ebera 10:24, 25) Na teia e tauturu ia koe kia marama e i reira kia akono i te kite i te Atua i toou oraanga e ka apai mai i te mataora noou. Te riroanga ei tuanga no te taeake anga Kerititiano i te ao katoa nei ka tauturu ia koe kia vaitata ua kia Iehova. E mei ta tatou ka kite, ka kitea e koe te tinamou tikai i roto i te au tangata o te Atua ra.
E TIMATA I TOOU KITE
Eaa ra koe i tau ei kia akavaitata atu kia Iehova?
Eaa etai umuumu anga no te akavaitata atu ki te Atua ra?
Eaa taau ka rauka kia kapiti atu ki roto i taau au pure?
Eaa koe ka tau ei kia tamou marie i te pure?
Akapeea e raukaʼi ia koe i te akarongo atu kia Iehova i teia tuatau?
[Au Uianga Apii]
[Tutu i te kapi katoa i te kapi 157]
