Pene 1

Ka Rauka ia koe Tetai Tuatau Mataora ki Mua!

1, 2. Eaa ta Tei Anga mai ia koe e anoano ra noou?

E TAKAVE anga maana mai ra tetai taau i akaperepere. E katakata mataora i te tuatau kaikai anga meitaki ma te au oa akaperepereia. Te mareka i te akarakara anga atu i te kangakanga mataora a taau tamariki. Te au atianga mei teia e au tuanga mataora i te oraanga. Inara, no te aronga e manganui, te akara anga te oronga maira te oraanga i tetai manamanata maata i muri ake i tetai. Me ko te reira tei tupu ana kia koe, e akamaroiroi.

² Ko te anoano ia o te Atua e kia rekareka koe i te mataora mutu kore i raro ake i te au tu meitaki tei takapini ia i roto i te au ngai manea. Kare teia i te moemoea ua, no te mea te oronga pu maira te Atua kia koe i te taviri ki taua tuatau mataora ra ki mua. Ko taua taviri ra ko te kite ia.

3. Eaa te kite ko te taviri ia ki te mataora anga, e eaa ra ka papu ei ia tatou e ka rauka i te Atua i te oronga mai i taua kite ra?

³ Te tuatua nei tatou no tetai tu kite takake rava tei maata roa atu i to te tangata nei pakari. Ko “te kite i te Atua.” (Maseli 2:5) E vaitata i te 2,000 mataiti i topa, kua tuatua tetai tata Puka Tapu: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebera 3:4) E tamanako ana i te kite o Tei Maani mai i te au mea ravarai! Te karanga nei te Puka Tapu e te tatau ra e te tapa ra te Atua i te au ingoa o te au etu katoatoa. Mei teaa ia manako akaruketekete, i te mea e au anere ua atu pirioni etu i roto i to tatou uaorai vananga etu, e te tuatua ra te aronga akara etu e e vaitata i te tai anere pirioni  au vananga etu ke atu! (Salamo 147:4) Kua kite katoa oki te Atua i to tatou tu katoatoa, no reira koai atu tetai te ka rauka iaia te oronga mai i te au pauanga meitaki atu i te au uianga puapinga o te oraanga?—Mataio 10:30.

4. Eaa i tau ei kia manakonako atu tatou e ka oronga mai te Atua i te au apiianga ei arataki ia tatou, e ko teea te puka te ka akaki i teia mea anoanoia?

⁴ E tamanako ana e rua nga tangata te tauta ra i te maani i to raua nga motoka. No te manata, kua titiri tetai tangata i tana au apinga ki raro. Ko tetai ia raua kua rave maru ua i te akatikatika i te ngai kino ra, kua uri i te taviri, e kua katakata i te taka anga te matini e kua meitaki te aere anga. Kare i te mea ngata roa naau kia iki e ko teea o eia nga tangata e puka apii tana mei ko mai i te ngai maani anga motoka ra. Kare ainei i te mea tau e kia oronga mai te Atua i te au apiianga ei arataki ia tatou i te oraanga? Penei kua kite koe, te tuatua ra te Puka Tapu e koia tikai te reira—e puka apiianga e te arataki anga mei ko mai i Tei Anga ia tatou, kua akapapaia ei oronga mai i te kite i te Atua.—2 Timoteo 3:16.

5. Eaa te puapinga o te kite tei roto i te Puka Tapu ra?

⁵ Me te tika ra te tuatua a te Puka Tapu, e tamanako ana i te apinganui o te kite te vaira i roto i taua puka ra! Ia Maseli 2:1-5, te raurau maira ia tatou kia kimi i te pakari, kia ko i te reira mei ta tatou ka rave no tetai apinga uunaia—kare i roto i te one o te manako tangata, mari ra i roto i te Tuatua a te Atua uaorai. Me ka kimi tatou i reira, ka “rauka ia [tatou] te kite i te Atua.” I te mea te kite ra te Atua i to tatou au kotinga e te au mea anoanoia, te oronga maira aia i te apiianga te ka tauturu ia tatou kia akono i te au oraanga ponuiaau, e te mataora. (Salamo 103:14; Isaia 48:17) Pera katoa oki, te oronga maira te kite i te Atua i te tuatua meitaki mataora kia tatou.

ORA MUTU KORE!

6. Eaa te akapapu anga ta Iesu Karaiti i oronga mai no runga i te kite i te Atua ra?

⁶ Kua akataka maira Iesu Karaiti koia tei kite meitakiia ra i teia tu i te kite i te Atua na roto i te tuatua taka meitaki. Kua karanga aia: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3)  E tamanako ana—te kite te ka taki atu ki te ora mutu kore!

7. Eaa te akapapu anga te vai nei e kare te Atua i akakoro kia mate tatou?

⁷ Auraka e akakore viviki ua i te ora mutu kore mei tetai moemoea ua. Mari ra, e akara i te tu i angaiaʼi te kopapa tangata. Kua akapapa meitakiia te reira kia tongi, kia akarongo, kia ongi, kia akara, e kia aa. E maata to runga i te enua nei te akarekareka nei i to tatou au mero no te kite—te kai reka, te imene mareka a te manu, te au tiare kakara, te ngai manea, te au oa marekaia! E ko to tatou roro e mea umere e maata roa atu i tetai komopiuta meitaki, no te mea na te reira e raukai ia tatou kia ariki e kia rekareka i taua au apinga katoa ra. I toou manako e ka anoano ainei Tei Anga mai ia tatou kia mate atu tatou e kia ngere i teia au apinga ravarai? Kare ainei i te mea tau kia manako taopenga e te anoano ra aia kia ora tatou ma te mataora e kia rekareka i te ora mutu kore? Ae, ko ta te kite te reira i te Atua ka oronga mai noou.

ORAANGA KI PARATAITO

8. Eaa ta te Puka Tapu tuatua no te tuatau ki mua o te au tangata nei?

⁸ Ta te Puka Tapu tuatua no te tuatau ki mua o te enua e te au tangata oki ka tau kia akatakaia i te tuatua okotai e—Parataito! Kua tuatua a Iesu Karaiti no te reira i tana tuatua anga ki tetai tangata te mate atura: “Ei Paradaiso taua katoa.” (Luka 23:43) Kare e ekoko anga i te taiku anga ia Parataito kua apai mai ki te manako o taua tangata ra i te tu mataora o to tatou nga metua mua ra, koia a Adamu raua ko Eva. I ta te Atua anga mai anga ia raua, e apa kore ua raua e kua noo ki roto i tetai paka mei te kainga rai te tu ta Tei Anga maira i akapapa e i tanu. Kua tau tikai te tapa anga i te reira ko te kainga i Edene ra, te ingoa tei akataka maira i te mareka anga.

9. Eaa te tu o te ora anga ki roto i te Parataito mua ra?

⁹ Mei teaa ra te mareka anga i taua kainga ra! E parataito tikai ia. I roto i tona au rakau manea ko etai kua uua mai i te au ua reka. Ia Adamu raua ko Eva i tutaka aere ei i to raua ngai, kua inu ei i tona vai reka, e kua koikoi i te ua o tona au rakau, kare a raua tumu no te apiapi me kare no te mataku. Noatu ko te au animara kare e akamataku mai, no te mea kua tuku  te Atua i te tangata raua ko tana vaine kia mana aroa ua ki rungao ia ratou ravarai. Kapiti katoa oki, e ora meitaki to taua nga tangata tokorua mua ra. Me tamou ua atu raua i te akarongo i te Atua, ka vai katoa tetai tuatau mutu kore, e te mataora ki mua ia raua. Kua orongaia kia raua te angaanga akamerengoanga i te akono anga i to raua kainga Parataito umere. E pera katoa, kua oronga te Atua kia Adamu raua ko Eva te akauenga e kia “akaki i te enua nei, e e akavi.” Ko raua e ta raua anaunga te ka akatotoa i te au kotinga o Parataito kia riro roa to tatou paraneta nei ei tetai ngai manea e te meitaki.—Genese 1:28.

10. I to Iesu tuatua anga no te Parataito, eaa tona manako?

¹⁰ Inara, i ta Iesu taiku anga ia Parataito, kare aia i pati ana ki tetai tangata te mate atura kia tamanako no te tuatau mamao kua topa ra. Kare, te tuatua ra a Iesu no te tuatau ki mua! Kua kite aia e ko to tatou kainga i te enua katoa nei ka riro ei parataito. Ei reira, ka akatupu te Atua ra i tana akakoro anga mua no te tangata e to tatou enua katoa. (Isaia 55:10, 11) Ae, ka akaoki akaouia mai te Parataito! E ka peea tona tu? E tuku na te Tuatua a te Atua, koia te Puka Tapu, nana e pau.

ORAANGA I ROTO I TE PARATAITO TE KA AKAOKI AKAOUIA MAIRA

11. I roto i te Parataito te ka akaoki akaouia maira, eaa te ka tupu ki te maki, te ruaine, e te mate?

¹¹ Kare te maki, te ruaine, e te mate e vai mai i reira. “Ei reira e akapueraiaʼi te mata o te matapo ra, e e akapu tataiaʼi te taringa o te turi ra. Ei reira te pirikoki e rererere aere ei mei te aili, e imene mai oki te vaa o te murare.” (Isaia 35:5, 6) “E noo te Atua ki rotopu [i te au tangata], ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:3, 4.

12. Eaa ka papu ei ia tatou e ka kore te rave kino, te ta ua, e te takinga kino i roto i te Parataito i te tuatau ki mua?

¹² Te rave kino, te ta ua, e te takinga kino ka kore katoa ia e tuatau ua atu. “Ka riro oki te aronga i rave i te kino ra i te tipu keia . . . E roa poto ake, e kare ua te tangata kino ra . . . Kare ua [aia]! Kareka te aronga maru ra, ka noo ïa i te enua.” (Salamo 37:9-11)  “Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”—Maseli 2:22.

13. Akapeea te Atua i te apai mai anga i te au?

¹³ Ka tupu tamou te au i te enua katoa. “Kua akakore aia [te Atua] i te tamaki e tae rava akenei ki te openga enua; kua aati aia i te ana, e kua tipupu i te korare.” (Salamo 46:9) “E ruperupe ei te aronga tuatua-tika; e maata roa oki te au, e ope ua atu te marama.”—Salamo 72:7.

14, 15. Eaa ta te Puka Tapu e tuatua no runga i te au are, te angaanga, e te kai i roto i te Parataito te ka akaoki akaouia maira?

¹⁴ Ka tinamou te au are e ka akamerengoia te angaanga. “E patu ratou i te au are, e na ratou uaorai e noo . . . Kare ratou e patu, e na tetai ke e noo; kare ratou e tanu, e na tetai ke e kai: mei te au rā o te rakau nei te au rā o toku ra iti-tangata; e rekareka tei ikiia e au ra, i te angaanga a to ratou uaorai rima. Kare ratou e angaanga puapinga kore ua; kare e anau tamariki kia mate vave ua.”—Isaia 65:21-23.

¹⁵ Ka maata te kai meitaki no te ora anga i reira. “E manga sitona okotai rima i ki i te enua nei, i runga i te take o te au maunga ra.” (Salamo 72:16) “Ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei!”—Salamo 67:6.

16. Eaa ka marekaʼi te oraanga ki Parataito ra?

¹⁶ Ka riro ei mea rekareka te ora mutu kore ki runga i te enua parataito. “Ka riro te enua no te aronga tuatua-tika, ka noo tamou rai ratou i reira.” (Salamo 37:29) “Te medebara, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.”—Isaia 35:1.

TE KITE E TOOU TUATAU KI MUA

17. (a) Eaa taau ka tau kia rave me te mareka ra koe i te oraanga ki Parataito? (e) Akapeea tatou i kite ei e ka akatupu te Atua i te au taui anga maata ki runga i te enua nei?

¹⁷ Me te reka ra i toou manako te oraanga ki Parataito, auraka e tuku i tetai ua atu apinga kia tapupu ia koe kia kore e rauka te kite i te Atua ra. Te aroa ra aia i te tangata katoa e ka akono aia i te au taui anga te anoanoia ra ei akariro i te enua ei parataito. No te mea, me tei ia koe te mana kia akaope i te tu tau kore e te tika kore te tupu nei i teianei ao, kare ainei koe e  rave i te reira? Ka manako ainei tatou e ka meangiti mai ta te Atua ka rave? Ko te tika, te tuatua nei te Puka Tapu na roto i te au tuatua ketaketa no tetai tuatau e takore atu ei te Atua i teia akatereanga tei ki i te pekapeka e ka mono i te reira ma tetai tutara apa kore e te tuatua tika. (Daniela 2:44) Inara e maata atu ta te Puka Tapu e rave nei i te akakite mai kia tatou i teia au mea katoa. Te akaari katoa maira te reira kia tatou e akapeea e raukai kia ora atu tatou ki roto i ta te Atua ra ao ou i taputou maira.—2 Petero 3:13; 1 Ioane 2:17.

18. Eaa ta te kite i te Atua ra ka rave noou i teianei?

¹⁸ Ka rauka katoa ia koe te puapinga i teianei mei te kite i te Atua. Ko te au uianga oonu rava o te oraanga e te au mea taitaia rava te pauia maira i roto i te Puka Tapu. Na te arikianga i tana arataki anga ka tauturu ia koe kia akatupu i tetai pirianga oa ma te Atua. Mei teaa ra tetai akameitaki anga mekameka! E na teia ka raukai ia koe te rekareka i te au ta te Atua anake ka oronga mai. (Roma 15:13, 33) Ia koe e akamata ra i te tauru i teia kite puapinga maata, te akamata ra koe i tetai tauta anga puapinga rava e te tutakianga maata i toou oraanga. Kare rava koe e mii i te kimianga i te kite i te Atua te ka taki atu ki te ora mutu kore.

19. Eaa te uianga ta tatou ka uriuri manako i te pene i muri akenei?

¹⁹ Kua tuatua tatou i te Puka Tapu e puka tei roto i reira te kite i te Atua. Inara, akapeea tatou i kite ei e koia ia, e kare i tetai puka no te pakari o te tangata nei, mari ra ko tetai apinga maata roa atu? Ka uriuri manako tatou i teia uianga i te pene i muri akenei.

E TIMATA I TOOU KITE

Eaa ka raukai te kite i te Atua te taki atu ia koe ki te mataora mutu kore?

Eaa te tu o te oraanga i te Parataito i te enua nei te aere maira?

Eaa koe ka puapingaiaʼi i te apiianga i te kite i te Atua i teianei?

[Au Uianga Apii]