Pene 5

Ko Taai Akamori Anga ta te Atua ka Ariki?

1. Eaa ta tetai vaine Samaria i anoano kia kite no runga i te akamori anga?

KUA kimi ainei toou manako e, ‘Ko taai akamori anga ta te Atua ka ariki?’ Penei kua tupu te reira uianga ki te manako o tetai vaine i tona tuatua anga ma Iesu Karaiti i vaitata i te Maunga Gerizima i Samaria. I te takianga i te manako ki te tuke anga i rotopu i te akamori a to Samaria e te ngati Iuda ra, kua tuatua aia: “I akamori ana to matou ui metua ki runga i teianei maunga; e te karanga nei kotou e, tei Ierusalema te ngai e tikaʼi kia akamori.” (Ioane 4:20) I karanga ainei a Iesu ki taua vaine Samaria ra e te ariki ra te Atua i te au akamori anga ravarai? Me kare kua karanga ainei aia e te vaira etai apinga akatakaia te umuumuia ra ei akamareka i te Atua?

2. I te pauanga i taua vaine Samaria ra, eaa ta Iesu i tuatua?

² Ko ta Iesu pauanga poitirere e: “Kua vaitata te ora e, kare kotou e akamori i te Metua i teianei maunga, e kare rai oki i Ierusalema.” (Ioane 4:21) Kua roa to Samaria i te mataku anga ia Iehova e kua akamori i etai atu atua ke i runga i te Maunga Gerizima. (2 Ariki 17:33) I teianei kua tuatua atu a Iesu Karaiti e kare i te reira ngai e kare katoa i Ierusalema te ngai puapinga no te akamori mou.

AKAMORI MA TE VAERUA E TE TUATUA MOU

3. (a) Eaa to Samaria i kore ei i kite tikai i te Atua ra? (e) Akapeea e raukaʼi i te au ngati Iuda tiratiratu e etai ke atu te kite i te Atua ra?

³ Kua tuatua ua atura a Iesu ki te vaine Samaria e: “Kare  kotou i kite i ta kotou e akamori nei: kua kite matou i ta matou e akamori nei: no te ngati Iuda mai oki te ora.” (Ioane 4:22) E au manako akonoanga pikikaa oki ta to Samaria e kua ariki i nga puka mua e rima anake o te Puka Tapu ei mea akauruia—e ko teia anake ua i to ratou uaorai manako anga tei matauia e ko te Penetatuku Samaria. No reira, kare ratou i kite tikai i te Atua ra. Inara, kua orongaia mai te kite Tuatua Tapu ki te ngati Iuda. (Roma 3:1, 2) Kua oronga te au Tuatua Tapu ki te au ngati Iuda tiratiratu e etai ke atu oki tei akarongo atura i tei anoanoia no ratou kia rauka te kite i te Atua ra.

4. Kia tau ki ta Iesu, eaa ta te au ngati Iuda e to Samaria ka anoano i te rave e arikiia mai ei e te Atua ta ratou akamori anga?

⁴ Ko te tika, kua akakite a Iesu e ko te au ngati Iuda e to Samaria katoa ka tau kia akatikatika i ta ratou akamori anga e raukaʼi te akamareka i te Atua. Kua karanga aia e: “Kua vaitata, e teianei oki taua ora ra, e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra. E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.” (Ioane 4:23, 24) Ka tau tatou kia akamori i te Atua “ma te vaerua,” na te ngakau ki i te akarongo e te aroa e akakeu. Ka rauka ra kia akamori i te Atua ‘ma te tuatua-mou’ na te apiianga i tana Tuatua, koia te Puka Tapu, e na te akamorianga iaia kia tau ki tana tuatua mou tei akakiteia maira. Te anoano ra ainei koe i te rave i te reira?

5. (a) Eaa te aite anga o te “akamori”? (e) Eaa ta tatou ka tau kia rave me te anoano ra tatou kia ariki mai te Atua i ta tatou akamori?

⁵ Kua akaketaketa maira Iesu e te anoano ra te Atua i te akamori mou. Te akaari maira teia e te vaira te au tu akamori kare a Iehova e ariki. Te aite anga o te akamori i te Atua ra kia oronga kiaia i te akangateitei tapu e kia rave i te tavini anga tapu kiaia. Me te anoano ra koe i te akaari i te tu akangateitei ki tetai tutara mana ririnui, penei ka anoano katoa koe kia tavini atu iaia e kia rave i te apinga te  ka akamareka iaia. E tika rava, i reira, ka anoano tatou kia akamareka i te Atua. Kare e kia tuatua ua, ‘Te tau ra taku akonoanga kiaku,’ no reira ka tau tatou kia akapapu e te tau ra ta tatou akamori ki ta te Atua i umuumu.

RAVEANGA I TE ANOANO O TE METUA

6, 7. Eaa a Iesu i kore ei e akatika i tetai papaki o te aronga te karanga ra e e pipi ratou nana?

⁶ E tatau tatou ia Mataio 7:21-23 e kia kite e me ka rauka ia tatou te akataka i tetai tumu puapinga te ka akapapu mai me te ariki ra te Atua i te au akamori katoatoa. Kua karanga a Iesu: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra. E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni [au mea ora vaerua kikino] i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.”

⁷ Ko te akatikaanga e ko Iesu Karaiti te Atu e apinga maata ia i te akamori mou. Inara e apinga tetai te ngaro ra i te akamori anga a te aronga e manganui te karanga ra e e au pipi ratou na Iesu. Kua tuatua aia e ka rave tetai papaki i te “au akairo e manganui,” mei tei manakoia ra e e au rapakauanga temeio. Inara, kare e rauka ia ratou te rave i ta Iesu i tuatua e e mea puapinga maata. Kare ratou e “akono ra i te anoano o [tona] Metua.” Me te inangaro ra tatou i te akamareka i te Atua, ka tau tatou kia apii eaa te anoano o te Metua ra e ka rave ei i te reira.

TE KITE TIKA—E PARURU IA

8. Me ka rave tatou i to te Atua anoano, eaa te umuumuia ra, e eaa te au manako tarevake ka tau tatou kia kopae ke?

⁸ Te umuumuia ra te kite tika i te Atua ko Iehova e ia Iesu Karaiti no te raveanga i to te Atua anoano. Ka taki atu taua kite ra ki te ora mutu kore. E mea tika, i reira, ka inangaro  tatou ravarai kia manako tikaʼi kia rauka te kite tika mei roto mai i te Tuatua a te Atua ra, koia te Puka Tapu. Te tuatua ra tetai papaki e kare e tau kia taitaia me te akono ra tatou ma te ngakau tae e te maroiroi ra i ta tatou akamori. Te karanga ra etai e, ‘Ko te meangiti mai i toou kite, te meangiti mai ia i tei manakonakoia mai ia noou.’ Inara, te akamaroiroi maira te Puka Tapu ia tatou kia akono kia maata te kite i te Atua e tana au akakoro anga.—Ephesia 4:13; Philipi 1:9; Kolosa 1:9.

9. Akapeea te kite tika i te paruru anga ia tatou, e eaa tatou ka anoano ei i taua paruru anga ra?

⁹ E paruru anga taua kite ra i te akaviivii anga i ta tatou akamori. Kua tuatua te apotetoro ko Paulo no tetai mea ora vaerua tei “akatutu angela katoa iaia uaorai no te mārama.” (2 Korinetia 11:14) Na taua akameamea anga ra, te tauta ra teia mea ora vaerua—koia a Satani—i te akavare ia tatou kia rave i te au apinga patoi i to te Atua anoano. Ko etai atu mea ora vaerua tei kapitiia atu ma Satani te taviivii katoa ra i te akamori anga a te au tangata, no te mea kua tuatua a Paulo: “Ta te etene i akaatinga ra, i akaatinga ïa na te au demoni, kare na te Atua.” (1 Korinetia 10:20) Penei, e manganui tei manako e te akamori ra ratou na te mataara tika, noatu rai e kare ratou e rave ana i ta te Atua i anoano. Kua akavareia ratou ki roto i te akamori anga viivii e te pikikaa. E maata atu ta tatou ka apii no Satani e te au temoni i muri akenei, inara ko teia au enemi o te Atua e mea papu e no te taviivii ana i te akamori anga a te au tangata.

10. Eaa taau ka rave me ka poitini akakoroia e tetai taau vai akonoia, e eaa ta te kite tika i te Tuatua a te Atua ka akapapa ia tatou kia rave?

¹⁰ Me kua kite tikai koe e kua poitini akakoroia e tetai taau vai akonoia mai ka rave ua atu ainei koe i te inuanga mei te reira? E mea tika, ka rave viviki koe i te kimi i tetai tumu vai meitaki, e te ma. E tika rai, ka akapapa te kite tika i te Tuatua a te Atua ia tatou kia akataka i te akonoanga mou e kia kopae i te au mea viivii te ka akariro kia kore te akamori anga e arikiia e te Atua.

 AU AKAUENGA A TE TANGATA EI AU APIIANGA

11. Eaa te tarevake i te akamori anga a te au ngati Iuda e manganui?

¹¹ I te tuatau ia Iesu i te enua nei, e manganui te au ngati Iuda kare i akono kia tau ma te kite tika i te Atua. No reira kua ngere ratou i te tika kia rauka tetai turanga ma ki mua ia Iehova. Kua tata a Paulo no ratou e: “Ko au te kite ia ratou, e maroiroi to ratou i ta te Atua, kare ra i te maroiroi kite.” (Roma 10:2) Kua iki ratou no ratou uaorai akapeea i te akamori anga i te Atua kare ra i akarongo atu i tana i tuatua ra.

12. Na teaa i taviivii i te akamori a to Iseraela ra, e eaa te tupu anga?

¹² Kua akono to Iseraela i te akamata anga i ta te Atua akonoanga ma i oronga mai, inara kua taviiviiia te reira e te au apiianga e te au peu a te tangata nei. (Ieremia 8:8, 9; Malaki 2:8, 9; Luka 11:52) Noatu rai e kua manako te au arataki akonoanga ngati Iuda tei matauia ra e ko te au Pharisea e te arikiia ra ta ratou akamori anga e te Atua, kua tuatua atu a Iesu kia ratou: “E te au pikikaa, te tau tikai nei kotou i ta Isaia i tuatua ia kotou, i tei tataia ra e, ‘Ko te vaa o teianei aronga te akameitaki mai iaku; tei te atea ke ra to ratou ngakau iaku. E akamori anga puapinga kore ra ta ratou iaku, ka apii ei i tei tukuia mai e te tangata anake ra.’”—Mareko 7:6, 7.

13. Penei eaa ta tatou ka rave mei te au Pharisea?

¹³ Te tika ra ainei e penei te rave ra tatou mei ta te au Pharisea i rave? Ka tupu teia me ka aru tatou i te au ikuiku anga akonoanga tei tukuia mai kia tatou e kare e akara matatio i ta te Atua i tuatua mai no te akamori. I te akamatakiteanga i teia tu kino tikai, kua tata a Paulo: “Te tuatua pu ua maira te Vaerua, e kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra.” (1 Timoteo 4:1) No reira kare i rava kia manako ua e te akamareka ra ta tatou akamori anga i te Atua. Mei te vaine Samaria tei aravei atura ia Iesu, penei kua akatuangaia tatou i ta tatou tu akamori mei to tatou ai metua maira.  Inara ka tau tatou kia akapapu e te rave ra tatou i te au apinga te tau ra ma to te Atua mareka anga.

E PARURU ATU I TE AKARIRI I TE ATUA

14, 15. Noatu rai e e manga kite to tatou i to te Atua anoano, eaa i tau ei kia matakite tatou?

¹⁴ Me kare tatou e matakite, penei ka rave tatou i tetai apinga kare te Atua e ariki. Ei akatauanga, kua tipapa iora te apotetoro ko Ioane ki raro i te pae vaevae o tetai angera “e akamori iaia.” Inara kua akamatakite atu taua angera ra: “Auraka koe e akapera; e taeake tavini au noou, e no to au taeake e akakite i te tuatua a Iesu ra; e akamori i te Atua.” (Apokalupo 19:10) Te kite ra ainei koe i reira i te anoano kia akapapu e kare taau akamori anga i taviiviiia e tetai ua atu tu akamori itoro ra?—1 Korinetia 10:14.

¹⁵ I te akamata anga tetai papaki Kerititiano i te rave i te au peu akonoanga kare ra e akamareka i te Atua, kua ui atura Paulo: “Eaa kotou i oki akaou atu ei ki taua apiianga mua rikiriki tika kore, i ta kotou e anoano ra e kia tuikaa akaou rai kotou i reira? Te akono na kotou i te rā, e te marama, e [t]e tuatau, e te mataiti. Te mataku nei au ia kotou, ko te riro aea taku i angaanga ki o kotou na ei mea puapinga kore.” (Galatia 4:8-11) Kua rauka ke ana i taua aronga ra te kite i te Atua inara i muri akera kua apa i te akono anga i te au peu akonoanga e te au ra tapu kare ra e arikiia e Iehova. Mei ta Paulo i tuatua ra, ka tau tatou kia akono “kia kitea ia [tatou] te mea mareka na te Atu.”—Ephesia 5:10.

16. Akapeea ta Ioane 17:16 e ta 1 Petero 4:3 tauturu mai anga ia tatou i te iki me te akamareka ra te au orote e te au peu i te Atua?

¹⁶ Ka tau tatou kia akapapu e kia kopae ke tatou i te au orote akonoanga e etai atu au peu te ka patoi i ta te Atua ra au kaveinga. (1 Tesalonia 5:21) Ei akatauanga, kua tuatua a Iesu no tana au pipi e: “Kare ratou i to teianei ao, mei iaku nei rai oki, kare i to teianei ao.” (Ioane 17:16) Te o atura ainei taau akonoanga ki roto i te au peu e te au orote te ka patoi i te kaveinga no te tu takake ki te au ravenga o teianei ao? Me kare te piri atura ainei te aronga o taau akonoanga i etai taime ki roto i te au peu e te au oroa penei te o atura te  tu akono te aiteite ra ki tei akatakaia mai e te apotetoro ko Petero ra? Kua tata aia: “To tatou oki manga tuatau i topa ake i to tatou ora anga nei, oti ra ua ïa i te rave anga i to te etene inangaro, ka rave ei oki i te peu kanga ra, te inangaro tika kore, te inu nui i te wina ra, te kapiti anga kanga ra, te akakonā kava ra, e te au ravenga viivii a te idolo ra.”—1 Petero 4:3.

17. Eaa tatou i tau ei kia kopae ke i tetai ua atu apinga te akaata maira i te vaerua o teianei ao?

¹⁷ Kua akaketaketa mai te apotetoro ko Ioane i te anoano kia kopae ke i etai ua atu au ravenga te akaata maira i te vaerua o teianei ao akono kore i te Atua takapini ia tatou. Kua tata a Ioane: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra. Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa. Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:15-17) I kite ana ainei koe e ko te aronga “tei akono ra i to te Atua ra anoano,” ka ora ia e tuatau ua atu? Ae, me rave tatou i to te Atua anoano e ka kopae ke i te au angaanga te akaata maira i te vaerua o teianei ao, ka rauka ia tatou te manakonako anga no te ora mutu kore!

E MOU I TA TE ATUA RA AU TURANGA TEITEI

18. Akapeea tetai papaki o to Korinetia i te tarevake anga no te tu akono, e eaa ta tatou ka tau kia kite mei teia?

¹⁸ Te inangaro ra te Atua i te au tangata akamori iaia ei aronga te ka akono i tana au turanga tau e te teitei. Ko tetai papaki i Korinetia i taito ra kua manako tarevake e ka akakoromaki ua te Atua i te tu akono tau kore. Ka kite tatou i to ratou tu tarevake takiri na te tatauanga ia 1 Korinetia 6:9, 10. Me ka akamori tatou i te Atua ma te arikiia, ka tau tatou kia akamareka iaia i te tuatua e te angaanga oki. Te rauka ra ainei ia koe te rave i te reira i taau tu akamori anga?—Mataio 15:8; 23:1-3.

19. Akapeea te akamori mou i te akatuke anga i ta tatou akono anga i etai ke?

 ¹⁹ Ta tatou au rave anga angaanga ma etai atu tangata ke ra ka tau katoa kia akaata i to te Atua au turanga. Kua akamaroiroi mai a Iesu Karaiti ia tatou kia akono ia etai ke ra kia tau ki ta tatou ka anoano ia ratou kia rave mai ia tatou, ko tetai tuanga oki teia o te akamori mou. (Mataio 7:12) E akamanako katoa i tana i tuatua no te akakiteanga i te aroa taeake: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Ka tau te au pipi a Iesu kia aroa i tetai e tetai e kia rave i te mea meitaki ki te au taeake akamori e kia etai ke katoa oki.—Galatia 6:10.

AKAMORI MA TE META KATOA

20, 21. (a) Eaa te tu o te akamori anga ta te Atua e umuumu maira? (e) Eaa a Iehova i kopae ke ei i ta Iseraela akamori anga i te tuatau ia Malaki ra?

²⁰ I roto i toou ngakau, penei te inangaro ra koe i te akamori i te Atua ma te arikiia. Me koia ia, ka tau koe kia akono i to Iehova manako no te akamori anga. Kua akaketaketa mai te pipi ko Iakobo e ko ta te Atua i manako ra ko te mea puapinga maata ia, kare e ko ta tatou. Kua karanga a Iakobo: “Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga e te tiaki iaia uaorai auraka ei viivii i teianei ao.” (Iakobo 1:27) Ma te anoano kia akamareka i te Atua ra, ka tau tatou tataki tai kia akara matatio i ta tatou akamori anga kia akapapu e kare te reira i taviiviiia i te au ravenga tau kore i te Atua me kare kia kore tatou e akakore i etai apinga tana e manako ana e puapinga maata ra.—Iakobo 1:26.

²¹ Ko te akamori ma anake, ma te meta katoa te akamareka ra ia Iehova. (Mataio 22:37; Kolosa 3:23) I te oronga anga te iti tangata o Iseraela ki te Atua kia meangiti mai i te reira, kua tuatua aia: “E akangateitei te tamaiti i te metua tane, e te tavini i tona atu: e teianei, e Metua au nei, teiea taua akangateitei noku ra? e e Atu oki au ra, teiea au i te  mataku angaia?” Kua akariri ratou i te Atua na te orongaanga kiaia i te manu matapo, te pirikoki, e te maki ei atinga, e kua kopae ke aia i taua au mea akamori anga. (Malaki 1:6-8) Te tau ra te tu ma katoa o te akamori anga no Iehova e kare aia e ariki kia meangiti mai i te akamori anga kiaia anake ua.—Exodo 20:5; Maseli 3:9; Apokalupo 4:11.

22. Me te inangaro ra tatou kia ariki mai te Atua i ta tatou akamori, eaa ta tatou ka kopae ke, e eaa oki ta tatou ka rave?

²² Te vaine Samaria tei tuatua ra ma Iesu, i te akaraanga e inangaro tona i te akamorianga i te Atua na roto i te mataara tu-Atua marekaia. Me ko te reira ta tatou i anoano, ka kopae ke tatou i te au apiianga e te au ravenga katoa te ka akaviivii mai. (2 Korinetia 6:14-18) Kareka ra, ka akauapou tatou ia tatou uaorai kia rauka te kite tika i te Atua e kia rave i tona anoano. Ka akono tatou kia piri vaitata ki tana au umuumuanga no te akamori tei arikiia ra. (1 Timoteo 2:3, 4) Te tauta ra te Au Kite o Iehova i te rave i te reira tikai, e te raurau maanaana atura ratou ia koe kia kapiti atu ia ratou katoa i te akamorianga i te Atua “ma te vaerua e te tuatua-mou ra e tikaʼi.” (Ioane 4:24) Kua karanga a Iesu e: “Ko te tu ïa o te tangata akamori ta te Metua e anoano ra.” (Ioane 4:23) Te manakonakoia ra e ko koe tetai o taua tu tangata ra. Mei taua vaine Samaria ra, kare e ekoko anga e ka inangaro koe kia rauka te ora mutu kore. (Ioane 4:13-15) Inara te kite ra koe i te au tangata e ruaine ra e ka mate atu. Na te pene ka aru mai e akakite mai te tumu.

E TIMATA I TOOU KITE

Mei tei akaariia maira ia Ioane 4:23, 24, eaa te akamori ta te Atua ra ka ariki?

Akapeea e raukaʼi ia tatou te akapapu e me te mareka maira te Atua i etai au peu e te au oroa?

Eaa etai umuumu anga no te akamori tei arikiia ra?

[Au Uianga Apii]

 [Tutu i te kapi katoa i te kapi 44]