Ko Toai Mana Taau ka Tau kia Akatika?
Pene 14
Ko Toai Mana Taau ka Tau kia Akatika?
1, 2. E kino ainei te au tu mana taoonga ravarai? E akataka mai.
“MANA” ko tetai tuatua reka kore ia ki te au tangata e manganui. E mea matau uaia teia, no te mea e putuputu i te rave tau koreia te mana—i te angaanga, i roto i te ngutuare tangata, e te au kavamani oki. Kua tuatua tika maira te Puka Tapu: “Te tutara ra tetai tangata ki rungao i tetai, ei mate nona uaorai.” (Koheleta 8:9) Ae, e manganui kua tutara ia etai ke ra na te raveanga i tetai tu tangi kore e te tavinianga iaia uaorai.
2 Inara kare te au mana ravarai i te kino. Ei akatauanga, penei ka tuatuaia e te akono ra to tatou kopapa i te mana i rungao ia tatou. Te “ikuiku” ra ia tatou kia uti i te aʼo, kia kai, kia inu, e kia moe. E takinga kino ainei te reira? Kare. Ko te rave anga kia tau ki te reira au pati anga ei meitaki ia no tatou. Noatu rai ko te kauraroanga ki te au mea anoanoia no to tatou kopapa penei e mea rave uaia, te vaira etai atu au tu mana te umuumuia ra ta tatou kauraro anga puareinga. E akamanako ana i etai akatauanga.
TE MANA TEITEI RAVA
3. Eaa ra tikaʼi a kia tapaia a Iehova e ko te “Atu Ngateitei”?
3 E tere atu i te 300 taime, te tapaia ra a Iehova i te Puka Tapu ko te “Atu Ngateitei.” (NW) Ko tei ngateitei e mana teitei rava tona. Na teaa i oronga kia Iehova te tika i te reira turanga? Te pau maira Apokalupo 4:11 e: “E tau te kakā ia koe, e te Atu [Iehova], e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.”
4. Akapeea ta Iehova iki anga kia akono i tona mana taoonga?
4 Ei Tei Anga mai ia tatou nei, e tika to Iehova i te akono i tona mana tei tau ki tana iki anga. Penei ka akara anga matakuia teia, me ka akamanako tatou e e “ririnui” te Atua. Kua tapaia aia ko te “Atua Mana katoatoa”—e tuatuaia i te reo Epera te oronga maira i te manako e ririnui maata roa. (Isaia 40:26; Genese 17:1) Inara, te akaari maira Iehova i tona ririnui na te mataara aroa, no te mea ko tona tu maata ko te aroa ia.—1 Ioane 4:16.
5. Eaa i kore ei e rave anga ngata kia kauraro i to Iehova ra mana taoonga?
5 Noatu rai e kua akamatakite a Iehova e ka akautunga aia i te aronga rave tarevake ma te kore e tataraara, kua kite a Mose i tona tu tikai “ko te Atua ïa, kia kite oki koe, ko te Atua pikikaa kore, ko tei akono tikai i te koreromotu, e te aroa, ki te aronga i inangaro iaia, e tei akono i tana au akauenga.” (Deuteronomi 7:9) E tamanako ua! Te Mana Teitei Rava o te ao katoa e pini ua ake kare e maro ia tatou kia tavini atu iaia. Mari ra, te akavaitata atura tatou kiaia no tona aroa. (Roma 2:4; 5:8) E mea mareka te kauraro anga i to Iehova ra mana, no te mea ko tana au ture te rave ra i te puapinga no tatou i te openga.—Salamo 19:7, 8.
6. I akapeea i akamataʼi te maro anga no te mana taoonga i te kainga i Edene ra, e eaa te tupu anga?
6 Kua kopae ke to tatou nga metua mua ra i to te Atua tu ngateitei. Kua anoano raua na raua uaorai e iki eaa te meitaki e te kino. (Genese 3:4-6) Ei tupu anga, kua akaateaia mai raua mei to raua kainga Parataito. Kua tuku a Iehova i muri mai na te au tangata e anga i te akapapa anga tuku mana te ka akatika ia ratou kia noo ki roto i tetai totaiete papa meitaki, noatu rai te tu apa ua. Eaa etai o teia au mana, e eaa te maata o ta te Atua ra manako anga no tatou kia kauraro atu kia ratou?
“TE ARONGA MANA TAOONGA”
7. Koai ma “te aronga mana taoonga,” e eaa te piri anga o to ratou turanga ki to te Atua ra mana taoonga?
7 Kua tata te apotetoro ko Paulo: “Kia kauraro marie te tangata katoatoa i te aronga mana taoonga ra, Kare rava oki e mana mari ra no ko mai i te Atua ra.” Koai tikai te “aronga mana taoonga”? Te akaari maira ta Paulo au tuatua i te au irava i muri iora e ko ratou te au mana kavamani tangata. (Roma 13:1-7; Tito 3:1) Kare na Iehova uaorai i akamata mai te au mana kavamani tangata, inara kua vai mai ratou na tana akatika anga. No reira kua tata a Paulo: “Te aronga mana e noo nei, kua akonoia ïa e te Atua.” Eaa ta teia i akakite mai no te aronga mana o te enua nei? E tei raro mai ia, me kare e meangiti mai, i to te Atua ra mana. (Ioane 19:10, 11) No reira, me e patoi anga tetai i rotopu i ta te tangata ture e ta te Atua ture, ka tau te au Kerititiano kia aratakiia e to ratou akava ngakau tei tereniia e te Puka Tapu ra. Ka tau e “ko te Atua ta [ratou] e akarongo e tikaʼi auraka te tangata.”—Angaanga 5:29.
8. Akapeea koe i te puapinga anga mei te aronga mana taoonga ra, e akapeea koe i te akaari anga i toou kauraro anga kia ratou ra?
8 Inara, i te maata anga o te taime te rave ra te aronga mana taoonga o te au kavamani ei ‘tavini oki aia no te Atua kia meitaki tatou.’ (Roma 13:4) Na teea au mataara? E tamanako ana i te au angaanga e manganui te raveia ra e te aronga mana taoonga, mei te rave mai i te mere, te akava e te paruru ai, te akatano i te ora anga, e te apii anga. “No reira oki kotou ka oronga atu ei i te taūnga nei,” ta Paulo ia i tata, “e tavini oki ratou no te Atua, i te rave tamou marie anga i taua mea nei.” (Roma 13:6) No runga i te au tero me kare tetai ua atu apainga i te ture, ka tau “ei akono meitaki ta [tatou].”—Ebera 13:18.
9, 10. (a) Akapeea te aronga mana taoonga ra e o atu ei ki roto i ta te Atua akanoonoo anga? (e) Eaa i tarevake ei kia patoi atu i te aronga mana taoonga ra?
9 I etai taime, te rave tarevake ra te aronga mana taoonga i to ratou mana. Ka riro ainei teia ei akakore i ta tatou apainga kia kauraro atu ia ratou? Kare rava ia. Te kite maira Iehova i te au tarevake a teia aronga mana. (Maseli 15:3) Ko tana akakoromaki anga i te tutara a te tangata nei kare mei te mea e te kamo ua ra tona mata i tana rave anga viivii; kare katoa aia e manako mai ia tatou kia pera. Ko te tika, kare e roa atu na te Atua e “akapueurikiriki e e akapou i taua au basileia katoa ra,” ka mono atu ia ratou ma te tutara a tona uaorai kavamani tuatua tika ra. (Daniela 2:44) Inara kia tupu roa te reira, te rave nei ra te aronga mana taoonga i tetai akakoro anga puapinga meitaki.
10 Kua akataka maira Paulo: “Ko tei māro atu ki te taoonga ra, kua māro aia i tei akonoia e te Atua ra.” (Roma 13:2) Ko te aronga mana taoonga ko ta te Atua ia i “akonoia” i te mea te tamou ra ratou i tetai tuanga tau, me kare te reira ka tupu te oripu ua e te orureau anga. Ko te maroanga ia ratou kare e tau i te Tuatua Tapu e e neneva ia. Ei akatutu anga: E tamanako ua e me kua vaiia koe e na te tuitui anga i tamou i te ngai vaiia ra. Noatu rai e tuanga ke te au tuitui anga ra ki te kopapa, te rave ra ratou i te akakoro anga no tetai tuatau kotingaia. Me ka viviki te takore atu penei ka riro ei kino. Mei te reira katoa oki, kare te au mana kavamani tangata i te tuanga no ta te Atua ra akakoro anga mua. Inara, kia tae roa ki te tutaraanga takiri o tona Patireia i te enua nei, te mou kapiti nei te au kavamani tangata i te totaiete, ma te raveanga i tetai angaanga te tau ra i to te Atua anoano no teia tuatau nei. Ka tau tatou kia vai ki roto i te kauraro anga i te aronga mana taoonga, koi oronga ei tatou i te ngai mua ki ta te Atua ture e te mana taoonga.
MANA TAOONGA I ROTO I TE NGUTUARE TANGATA
11. Akapeea koe me akataka i te kaveinga o te taoonga upoko ra?
11 Ko te ngutuare tangata te tuanga tumu anga o te totaiete tangata nei. I roto i reira ka kitea e te tane e te vaine te pirianga oa puapinga, e ka rauka kia paruruia te tamariki e kia tereniia no te pakari anga mai. (Maseli 5:15-21; Ephesia 6:1-4) Ka tau te reira akanoonoo anga meitaki kia akapapaia na tetai mataara te ka rauka i te au mema o te ngutuare tangata i te noo ma te au e te tu rotai. Ko ta Iehova mataara no te akatupuanga i teia na roto i te kaveinga o te upoko anga, tei akatakaia na teia au tuatua, te kiteia ra ia 1 Korinetia 11:3: “Ko te Mesia te upoko o te tangata ravarai nei, e to te vaine ra upoko, ko te tane ïa; e to te Mesia upoko, ko te Atua ïa.”
12, 13. Koai te upoko o te ngutuare tangata, e eaa ta tatou i kite mei ta Iesu mataara no te akonoanga i te taoonga upoko?
12 Ko te tane te upoko o te ngutuare tangata. Inara, e upoko tetai i runga ake iaia—ko Iesu Karaiti. Kua tata a Paulo: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia e kua oronga iaia uaorai ei oko.” (Ephesia 5:25) Te akaata maira te tane i te kauraro anga ia Karaiti me ka akono aia i tana vaine na te mataara ta Iesu i akono tamou ana i te putuputuanga. (1 Ioane 2:6) E maata te mana tei tukuia ki runga ia Iesu, inara te akono ra aia i te reira ma te tu maru maata, te aroa, e te tau katoa oki. (Mataio 20:25-28) Ei tetai tangata, kare rava a Iesu i rave tau kore ana i tona turanga mana. E “maru [aia], e ngakau akaaka” tona, e kua tapa aia i tana au pipi e “oa” nona kare i te “tavini.” “Naku e akaanga i to kotou roi” tana i taputou kia ratou, e ko tana ia i rave ra.—Mataio 11:28, 29; Ioane 15:15.
13 Te apii maira ta Iesu akaraanga i te au tane e kare te taoonga upoko Kerititiano i tetai turanga tutara takinga kino. Mari ra, ko tetai ia no te akangateitei e te aroa atinga uaorai. Ka takore takiri teia i te takinga kino i te tokorua i te pae kopapa me kare i te tuatua. (Ephesia 4:29, 31, 32; 5:28, 29; Kolosa 3:19) Me ka takinga kino tetai tangata Kerititiano i tana vaine, ka puapinga kore ua etai atu au angaanga meitaki nana ra, e ka araiia tana au pure.—1 Korinetia 13:1-3; 1 Petero 3:7.
14, 15. Akapeea te kite i te Atua i te tauturu anga i tetai vaine kia kauraro i tana tane?
14 Me aru te tane i to Karaiti akaraanga, ka ngoie atu no tana vaine kia rave i te au tuatua ia Ephesia 5:22, 23 e: “E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra, ko te tane oki te upoko o te vaine, mei te Mesia katoa ra te upoko ïa i te ekalesia.” Mei te tane te tau ra kia kauraro ia Karaiti, ka tau katoa te vaine kia kauraro i tana tane. Te akataka katoa maira te Puka Tapu e ka tau te vaine akono meitaki kia akangateiteiia e kia akapaapaaia no to ratou pakari e te tu karape i tei tau i te Atua ra.—Maseli 31:10-31.
15 E mea kotingaia to te vaine Kerititiano kauraro anga ki tana tane ra. Ko te aite anga o teia e ko te Atua kare ko te tangata te ka tau kia akarongoia me ka riro te kauraroanga i tetai tumu kia aati i te ture tu Atua ra. Noatu rai i te reira, ka tau te turanga ngaueue kore o te vaine kia akonoia ma “te ngakau maru e te muteki ua.” Ka tau kia kitea e na te kite i te Atua i akariro iaia ei vaine meitaki atu. (1 Petero 3:1-4) Ko te tika katoa oki te reira no tetai tangata Kerititiano e vaine akarongo kore ra tana. Ka tau tona aru anga i te au kaveinga Puka Tapu kia akariro iaia ei tetai tane meitaki atu.
16. Akapeea e raukaʼi i te tamariki i te aru i te akaraanga ta Iesu i akanoo i tona tuatau e mapu ra?
16 Te akapapa maira a Ephesia 6:1 i te tuanga a te tamariki, i te na ko anga: “E akarongo atu i to kotou au metua i tei tau i te Atua ra; e tuatua-tika oki te reira.” Ka aru te au tamariki Kerititiano i te akaraanga a Iesu, tei tamou marie ra i te kauraro ki tona nga metua i tona tupu ake anga. Ei tetai tamaroa akarongo ra, kua “tupu aturā Iesu i te maata anga e te pakari, e te akaperepereia mai e te Atua e te tangata katoa.”—Luka 2:51, 52.
17. Penei eaa te tupu anga ki ta ratou tamariki no te mataara akono a te au metua i te mana taoonga ra?
17 Te tu akono a te au metua i ta ratou au apainga penei ka mana ki runga i ta ratou tamariki me ka akangateitei i te mana taoonga me kare ka akameameaau i te reira. (Maseli 22:6) No reira penei ka tau te au metua kia ui kia ratou uaorai, ‘Te akono aroa ra ainei au i toku mana taoonga e me te rave kino ra ainei? Ka tuku ua ainei au?’ Te manakoia maira te metua tau i te Atua kia aroa e kia mako, inara kia ngaueue kore i te raveanga i te au kaveinga tau i te Atua. E tau tikai, ta Paulo i tata: “Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.”—Ephesia 6:4; Kolosa 3:21.
18. Akapeea te rave anga i te ako anga tau na te au metua ra?
18 Ka tau te au metua kia akara matatio i ta ratou au ravenga terenianga, kia maata oki me te anoano ra ratou e kia akarongo ta ratou tamariki e kia akarekareka ia ratou ra. (Maseli 23:24, 25) I te Puka Tapu, ko te ako e tuanga maata ia no te apii anga. (Maseli 4:1; 8:33) Te kapitiia ra ki te aroa e te maru, kare ki te riri e te takinga kino. No reira, ka anoanoia te au metua Kerititiano kia akono ma te pakari e kia tamou marie i te tu akakoromaki i te akoanga i ta ratou tamariki.—Maseli 1:7.
MANA TAOONGA I ROTO I TE PUTUPUTUANGA
19. Akapeea ta te Atua oronga anga akapapa meitaki i roto i te putuputuanga Kerititiano?
19 I te mea e Atua papa meitaki a Iehova, e mea tau e ka oronga mai aia i te arataki anga mana e te papa meitaki no tona au tangata. Kia tau ki te reira, kua akataoonga aia ia Iesu ei Upoko no te putuputuanga Kerititiano. (1 Korinetia 14:33, 40; Ephesia 1:20-23) I raro ake i ta Karaiti arataki anga akara koreia, kua akamana mai te Atua i tetai akanoonoo anga aronga pakari akataoongaia ki roto i te au putuputuanga tataki tai ei tiaki anoano ra, ma te tu puareinga, e te aroa. (1 Petero 5:2, 3) Ko te au orometua tavini ei tauturu ia ratou i te au tu tuke tuke e kia rave i te angaanga puapinga i roto i te putuputuanga.—Philipi 1:1.
20. Eaa tatou ka tau ei kia kauraro i te aronga pakari Kerititiano akataoongaia ra, e eaa teia i puapingaʼi?
20 No runga i te aronga pakari Kerititiano, kua tata a Paulo: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebera 13:17) E mea pakari ra, kua oronga atu te Atua i te apainga ki te au akaaere Kerititiano kia utuutu i te au mea anoanoia i te pae vaerua no te aronga i roto i te putuputuanga. Kare teia aronga pakari i tetai pupu orometua. E au tavini ratou e au tavini no te Atua, i te raveanga i te au mea umuumuia no to ratou au taeake akamori ra, mei ta to tatou Pu, koia Iesu Karaiti, i rave ra. (Ioane 10:14, 15) Na te kiteanga e au tangata tau i te Tuatua Tapu te manako maira ia tatou kia tere ki mua e kia tupu i te pae vaerua te akamaroiroi maira ia tatou kia taokotai atu e kia kauraro marie.—1 Korinetia 16:16.
21. Akapeea te aronga pakari akataoongaia i te kimi anga kia tauturu i te au taeake Kerititiano i te pae vaerua ra?
21 I etai tuatau, penei ka aere ke te au mamoe me kare ka riro atu ki roto i te tu kino i te au apinga takinga kino o teianei ao. I raro ake i te arataki anga a te Tiaki Maata ra, te matakite ra te aronga pakari ko ratou ra te au tiaki tauturu i te au mea anoanoia no te aronga i raro ake i ta ratou utuutu anga e te rekareka ra i te oronga atu i te tauturu kia ratou tataki tai. (1 Petero 5:4) Te aere ra ratou e atoro i te au mema o te putuputuanga e ka oronga i te au tuatua akamaroiroi. I te kiteanga e te kimi ra te Tiaporo kia akakore i te au o te au tangata o te Atua ra, ka akono te aronga pakari i te kite no runga maira i te akonoanga i etai ua atu manamanata. (Iakobo 3:17, 18) Ka rave pakari ratou kia tamou i te tau tikai e te taokotai anga i te akarongo, ko tetai apinga ia ta Iesu uaorai i pure ra.—Ioane 17:20-22; 1 Korinetia 1:10.
22. Eaa te tauturu ta te aronga pakari ka oronga i te au raveanga tarevake?
22 Ka peea me ka mamae tetai Kerititiano i etai tu kino me kare ka riro kia maromaroa no te raveanga i tetai ara? Na te apii anga pumaana no te Puka Tapu e te pure a te aronga pakari no te ngakau mai nona ra ka tauturu kia akaora iaia ki te ora meitaki i te pae vaerua. (Iakobo 5:13-15) Ko teia au tangata, tei akataoongaia e te vaerua tapu, e mana katoa to ratou i te oronga i te ako anga e te akatikatika i tetai ua atu tei aru ra i te aerenga tarevake me kare te akatupu ra i tetai tu kino i te pae vaerua i te tu tau o te putuputuanga. (Angaanga 20:28; Tito 1:9; 2:15) Kia vai tamou ei te tu ma o te putuputuanga, penei ka tau no tetai kia ripoti i te raveanga tarevake kino ra. (Levitiku 5:1) Me ka ariki tetai Kerititiano tei rave ra i te ara kino i te ako anga Tuatua Tapu e te akatikatika anga e ka akakite i te tataraara tika tikai, ka tauturuia aia. Inara, ko tei rave ua atu i te aati i te ture a te Atua ma te kore e tataraara ka akaateaia ki vao.—1 Korinetia 5:9-13.
23. Eaa ta te au akaaere Kerititiano ka oronga no te meitaki o te putuputuanga?
23 Kua totouia mai i te Puka Tapu e i raro ake ia Iesu Karaiti ei Ariki, ka akataoongaia te au tangata pakari i te pae vaerua ei oronga i te akapumaana, te paruru anga, e te akamaroiroi anga no te au tangata o te Atua. (Isaia 32:1, 2) Na ratou e rave te arataki anga ei aronga tutu evangeria, ei au tiaki, ei au orometua tei akatupu i te pae vaerua ra. (Ephesia 4:11, 12, 16) Noatu rai e ka rave te au akaaere Kerititiano i etai taime i te akatikatika, te ako, e te akamaroiroi i te au taeake, ko te raveanga i te apiianga tau a te aronga pakari tei akatumuia i te Tuatua a te Atua ra ka tauturu kia tamou i te katoatoa ki runga i te mataara ki te ora anga.—Maseli 3:11, 12; 6:23; Tito 2:1.
E ARIKI I TO IEHOVA MANAKO NO TE MANA TAOONGA
24. Eaa te maro anga te timataia ra tatou i te au ra tataki tai?
24 Kua timataia te tangata raua ko te vaine mua ra no runga i te maro anga no te kauraro anga i te mana taoonga. Kare ra i te mea poitirere, e te aro nei tatou i tetai timataanga mei te reira i te au ra tataki tai. Kua akatupu mai a Satani te Tiaporo i tetai vaerua meameaau i roto i te au tangata nei. (Ephesia 2:2) Ko te aerenga taka ke ua kua akariroia kia akara anga meitaki atu i to te kauraro anga.
25. Eaa te au puapinga o te kopae keanga i te vaerua meameaau o teianei ao e te kauraro anga i te mana taoonga ta te Atua e akono ra me kare tana e akatika ra?
25 Inara, ka tau tatou, kia kopae ke i te vaerua meameaau o teianei ao. I te raveanga i te reira, ka kite tatou e ka apai mai te kauraro anga tu Atua i te au tutaki apinganui. Ei akatauanga, ka kopae ke tatou i te au apiapi e te au pekapeka te matauia ra e te aronga te kimi ra i te au taitaia ma te aronga mana o teia akatereanga. Ka akameangiti mai tatou i te maro anga e tupu nei i roto i te au ngutuare tangata e manganui. E ka rekareka tatou i te au puapinga o te taokotai anga maanaana, e te aroa ma to tatou au taeake akarongo Kerititiano. Ko te mea maata rava oki, ka akatupu to tatou kauraro anga tu Atua ra i tetai pirianga meitaki ma Iehova, koia te Mana Teitei Rava.
E TIMATA I TOOU KITE
Akapeea ta Iehova akono i tona mana taoonga?
Koai ma “te aronga mana taoonga,” e akapeea tatou i te vai kauraro anga kia ratou ra?
Eaa te apainga ta te kaveinga no te taoonga upoko e tuku ra ki runga i te au mema tataki tai o te ngutuare tangata?
Akapeea tatou i te akaari anga i te kauraro anga i roto i te putuputuanga Kerititiano?
[Au Uianga Apii]
[Pia i te kapi 134]
KAURARO, KARE E TAMANAMANATA
Na roto i ta ratou angaanga tutu aere i te ngai tangata, kua tou atu te Au Kite o Iehova ki te Patireia o te Atua ei manakonako anga anake no te au tangata i te au tikai e te tinamou. Inara kare teia aronga akakitekite maroiroi i te Patireia o te Atua i te aronga tamanamanata i te au kavamani te noo ra ratou i raro ia ratou. Ei tuke anga, tei roto te Au Kite i te aronga maata te akangateitei ra e te akono ra i te ture o te enua. “Naringa i aite te au akonoanga katoatoa ki te au kite o Iehova,” i karangaʼi tetai opita mana taoonga i tetai enua Aperika, “kare ia i reira e aronga ta, au keia, aronga tau kore, au mou auri e te au pomu atomu. Kare te au ngutupa e rokaia i tera ra i tera ra.”
I te kiteanga i teia, kua akatika ua te aronga mana i te au enua e manganui i te angaanga tutu aereanga a te Au Kite kia raveia ma te arairai koreia. I etai atu enua, kua akakoreia te au arairai anga me kare au ture anga i te kite anga te aronga mana e ko te Au Kite o Iehova ra e mana no te meitaki. Mei ta te apotetoro ko Paulo i tata ra no te akarongoanga i te aronga mana taoonga ra: “Ka rave i te tuatua meitaki, e ka akameitakiia koe i taua taoonga na.”—Roma 13:1, 3.
