Koai te Atua Mou?
Pene 3
Koai te Atua Mou?
1. Eaa i akatikaʼi te aronga e manganui i te au tuatua akamataanga o te Puka Tapu ra?
ME AKARA koe i te rangi i tetai po manea, kare ainei koe e umere i te kite anga i te au etu e manganui? Akapeea koe me akataka i to ratou vai mai anga? E peea katoa oki te au mea ora i runga i te enua nei—te au tiare karakara, te au manu ma ta ratou au imene marekaia, te au toora ririnui te ori aere ra i roto i te moana? Te aere ua atura te papa anga. Kare teia au mea katoatoa i tupu ua mai. No reira rai te aronga e manganui i akatikaʼi i te au tuatua akamataanga o te Puka Tapu e: “I muatangana ra, kua anga iora te Atua i te rangi e te enua”!—Genese 1:1.
2. Eaa ta te Puka Tapu tuatua no te Atua ra, e eaa ta te reira e akamaroiroi maira ia tatou kia rave?
2 E tatakakeanga maata to te au tangata no runga i te uianga no te Atua. Te manako ra tetai papaki e e mana ua te Atua kare i tetai peretana. E au mirioni ua atu te akamori ra i te ai tupuna tei mate, te irinakianga e e mamao roa te Atua no te aravei atu. Inara te akakite maira te Puka Tapu e e peretana tikai te Atua mou ra te akaari maira i te manako maanaana ia tatou tataki tai. Ko te tumu ia o te reira i akamaroiroi mai ei ia tatou: “kia kimi ratou i te [Atua],” i te nakoanga: “Kare ra aia i atea ke atu ia tatou katoa nei.”—Angaanga 17:27, akaaite ia NW.
3. Eaa ra i kore ei e rauka kia maaniia tetai tutu no te Atua?
3 Eaa te tu o te Atua me akaraia? E tokoiti ua o tona au tavini tei kite ana i te au orama o tona tu kaka. I roto i teia tu kua akatutu mai aia iaia uaorai te noo ra ki runga i tetai terono, e kaka matakuia tei totoa mei ko mai iaia ra. Inara, te aronga i kite ra i taua au orama ra kare i akataka mai i tetai mata tikai. (Daniela 7:9, 10; Apokalupo 4:2, 3) No te mea “e Vaerua te Atua”; kare ona kopapa kiko. (Ioane 4:24) Ko te tika, kare rava e rauka kia maaniia tetai tutu kopapa tikai no Tei Anga mai ia tatou, no te mea “kare ua e tangata i kite i te Atua.” (Ioane 1:18; Exodo 33:20) Inara, e maata ta te Puka Tapu e apii maira ia tatou no te Atua.
E INGOA TO TE ATUA MOU RA
4. Eaa ra etai au taoonga tau tei tuatuaia ra no te Atua i roto i te Puka Tapu?
4 I roto i te Puka Tapu, te akatakaia maira te Atua mou na te au tuatua mei te “Atua Mana katoatoa,” “Tei Teitei,” “Tei anga,” “au orometua,” “E te Atu,” e te “Ariki au mutu kore.” (Genese 17:1; Salamo 50:14; Koheleta 12:1; Isaia 30:20; Angaanga 4:24; 1 Timoteo 1:17) Na te tamanakoanga i taua au taoonga ra ka tauturu ia tatou kia tupu i te kite i te Atua ra.
5. Eaa te ingoa o te Atua, e eaa te putuputu o te mama anga mai o te reira i te au Tuatua Tapu Epera ra?
5 Inara, e ingoa takake to te Atua te mama maira e vaitata i te 7,000 taime i roto i te au Tuatua Tapu Epera anake ua—e putuputu atu i tetai ua atu o tona au taoonga ra. I etai 1,900 mataiti i topa, kua akamutu te au ngati Iuda i te taiku i te ingoa tu-Atua no te mataku kite kore ua. Kua tataia te reo Epera o te Puka Tapu ma te kore ua e au reta maro. No reira, kare rava e mataara e kite tikaiaʼi e i akapeea ta Mose, ta Davida, e etai ke atu o te au tuatau taito ra taiku anga i te au konitiniti e a (יהוה) tei akataka maira i te ingoa tu-Atua. Kua manako tetai papaki o te aronga apiiia ra e penei kua taikuia te ingoa o te Atua ko “Yahweh,” inara kare i papu ia ratou. Ko te taiku anga i te reo Kuki Airani ko “Iehova” kua taikuia e au anere ua atu mataiti, e tona aiteite i roto i te au reo e manganui e te ariki ateaia nei i teia tuatau.—Akara ia Exodo 6:3 e Isaia 26:4.
EAA KOE I TAU EI KIA TAIKU I TE INGOA O TE ATUA
6. Eaa ta Salamo 83:18 i tuatua no Iehova, e eaa i tau ei kia taiku tatou i tona ingoa?
6 Te ingoa takake o te Atua, koia a Iehova, te rave ra i te akatuke iaia mei etai atu au atua ke katoa ra. Ko te tumu ia i mama mai ei taua ingoa ra i te au taime putuputu ua i te Puka Tapu, e maata oki i tona tataanga Epera. E manganui te aronga uri reo kare e taiku i te ingoa tu-Atua, inara te tuatua taka meitaki maira a Salamo 83:18: “Ko Iehova toou ingoa, e ko koe anake Tei Teitei i te enua katoa nei.” No reira e mea tau no tatou kia taangaanga i te ingoa o te Atua me tuatua tatou nona.
7. Eaa ta te aite anga o te ingoa o Iehova e apii maira ia tatou no te Atua?
7 Kua tutuia mai te ingoa Iehova no tetai verepa Epera maira tona aiteanga “kia tupu.” No reira, te aite anga o te ingoa o te Atua “Nana e Akariro Kia Tupu.” No reira te akataka ra te Atua koia a Iehova iaia uaorai e ko Tei Akakoro Maata. Te akariro tamou ra aia i tana au akakoro anga kia tupu ei mea tika tikai. Ko te Atua mou anake te ka tika kia apai i teia ingoa, no te mea kare te au tangata e papu ana me ka puapinga ta ratou au parani. (Iakobo 4:13, 14) Ko Iehova anake ua te ka tau kia tuatua: “Koia katoa taku tuatua no roto i toku nei vaa . . . e tupu ra tei akakoroia e au ra; e manuia oki te mea i akaue atu ei au ra.”—Isaia 55:11.
8. Eaa te akakoro anga ta Iehova ra i akakite na roto mai ia Mose?
8 “Kua tautopa iora i te ingoa o Iehova,” nga pateriareka Epera tataki tai ra ko Aberahama, ko Isaaka, e Iakoba, inara kare ratou i kite i te puapinga tikai o taua ingoa tu-Atua ra. (Genese 21:33; 26:25; 32:9; Exodo 6:3) I ta Iehova akakite anga i muri akera i tana akakoro anga kia akaora i to ratou au uanga, koia to Iseraela, mei te tuikaaanga mai i Aiphiti e kia oronga atu kia ratou i “te enua e taʼe a vai ua te u e te meli ra,” penei kua akara anga rauka kore ua te reira. (Exodo 3:17) Inara, kua akaketaketa te Atua i te puapinga mutu kore o tona ingoa na te tuatua anga ki tana peroveta kia Mose: “E na ko atu koe ki te tamariki a Iseraela, Na te Atua o to kotou ai metua ra, ko Iehova, te Atua o Aberahama, te Atua o Isaaka, e te Atua o Iakoba, au i tono mai kia kotou nei: ko toku ïa ingoa e tuatau ua atu, e ko toku ïa akakite ki tera uki ki tera uki.”—Exodo 3:15.
9. Eaa to Pharao manako no Iehova?
9 Kua pati a Mose kia Pharao, koia te ariki o Aiphiti ra, kia tuku i to Iseraela kia aere e akamori ia Iehova i te metepara. Inara ko Pharao, tei manakoia ra aia uaorai ei atua e tei akamori ra i etai atu atua i Aiphiti, kua pau maira: “Koai a Iehova, ka akarongo atu ei au i tona reo, ka tuku atu ei ia Iseraela? Kare au i kite ia Iehova, kare oki au e tuku ia Iseraela.”—Exodo 5:1, 2.
10. I Aiphiti i taito ra, eaa te angaanga i raveia e Iehova ei akatupu i tana akakoro anga no to Iseraela ra?
10 Kua rave ua atu a Iehova i reira i te akatupu i tana akakoro anga, ma te raveanga kia rotai ki te aite anga o tona ingoa. Kua apai mai aia e tai ngauru mate ki runga i to Aiphiti i taito ra. Kua tamateia e te mate openga te au tama mua ravarai o to Aiphiti, kapiti katoa i te tamaiti a Pharao ngakau parau ra. Ei reira kua anoano to Aiphiti kia aere atu to Iseraela. Inara, ko tetai papaki o to Aiphiti kua mareka maata i te mana o Iehova e kua kapiti atura ki to Iseraela i te akarukeanga ia Aiphiti.—Exodo 12:35-38.
11. Eaa te temeio ta Iehova i rave i te Tai Muramura ra, e eaa te mea tei oparaia tona au enemi kia akatika mai?
11 Kua arumaki atura a Pharao marokiakia e tona vaeau, ma tona anere ua atu au kariota tamaki, kia akaoki mai i tona aronga tuikaa. I te vaitata atu anga to Aiphiti, kua vai temeio ua te Atua i te Tai Muramura kia raukai i to Iseraela i te aere atu ki tetai tua na runga i te one maro. I te tomo atu anga te aronga arumaki ra ki te taua o te tai ra, “kua kiriti atura [a Iehova] i to ratou au tipi kariota, teimaa atura kia akaoro.” Kua kapiki iora te au vaeau o Aiphiti: “Tatou e oro e akaruke i te ngati Iseraela; te akatika mai nei a Iehova ia ratou, kia pou to Aiphiti nei.” Inara kua tu reiti roa. Kua topa maira nga paruru tai maata ra, “e ngaromia iora te au kariota i raro, e te aronga akaoro oroenua, te tangata tini ravarai o Pharao ra.” (Exodo 14:22-25, 28) E kua akatupu a Iehova i tetai ingoa maata nona uaorai, e kare te reira tupu anga i akangaropoinaia e tae roa mai ki teia tuatau nei.—Iosua 2:9-11.
12, 13. (a) Eaa te aite anga o te ingoa o te Atua no tatou i teia tuatau nei? (e) Eaa te mea tau kia rapurapu te au tangata i te apii, e no teaa ra?
12 Te ingoa ta Iehova ra i akatupu nona uaorai kua riro ei aiteanga maata no tatou i teia tuatau. Kua riro tona ingoa, ko Iehova, ei akapapu anga e pouroa tana i akakoro ra ka akariro aia kia tupu. Te kapiti ra te reira i te akaotianga tana akakoro anga mua ra e kia riro to tatou enua nei ei parataito. (Genese 1:28; 2:8) I te openga ra, ka takore katoa i te Atua i te aronga katoatoa e patoi ra i tona tu ngateitei i teia tuatau nei, no te mea kua tuatua aia e: “E kite oki ratou e ko Iehova au.” (Ezekiela 38:23) E i reira ka akaoti te Atua i tana taputou kia akaoraia tana au aronga akamori ki roto i tetai ao ou o te tuatua tika.—2 Petero 3:13.
13 Pouroa te aronga katoatoa te anoano ra i te akaperepere anga a te Atua ka tau kia apii i te kapiki i tona ingoa ma te akarongo. Te taputou maira te Puka Tapu: “Ko te kapiki i te ingoa o [“Iehova,” NW] ra, e ora ïa.” (Roma 10:13) Ae, e aite anga puapinga maata to te ingoa ko Iehova ra. Te kapikianga ia Iehova ei Atua e ei Akaora noou ka taki atu ia koe ki te mataora openga kore.
AU TU O TE ATUA MOU RA
14. Eaa nga tu akatumu anga o te Atua ta te Puka Tapu e akakite maata maira?
14 Te akakite maata maira te apii anga i te akaora anga i to Iseraela mei Aiphiti mai i nga tu akatumu anga e a o te Atua ma te tau tikai. Tana au akonoanga ia Pharao kua akakite mai i tona mana matakuia. (Exodo 9:16) Te mataara tau o ta te Atua ra rave anga i taua turanga ketaketa ra kua akaari mai i tona pakari aite koreia. (Roma 11:33) Kua akakite aia i tona tuatua tau i te raveanga i te akautunga i te aronga patoi marokiakia e te aronga takinga kino i tona iti tangata. (Deuteronomi 32:4) Ko te aroa tetai tu puapinga rava atu o te Atua. Kua akaari mai a Iehova i te aroa meitaki roa na te akatupuanga i tana taputou no te au uanga o Aberahama ra. (Deuteronomi 7:8) Kua akaari katoa mai aia i te aroa i te akatikaanga i tetai papaki o to Aiphiti kia akaruke i te au atua pikikaa e kia puapinga maataia na te akatakaanga i to ratou turanga no te Atua mou anake ra.
15, 16. Na roto i teea au mataara ta te Atua ra akaari mai anga i te aroa?
15 Ia koe e tatau ra i te Puka Tapu, ka kite koe e ko te aroa te tu maata ia o te Atua, e te akakite maira aia i te reira na roto i te au tu e manganui. Ei akatauanga, no te aroa i riro ei aia ko Tei Anga mai e ko te mea mua i oronga i te rekareka o te oraanga ma te au mea ora vaerua ra. Taua au anere ua atu mirioni angera ra te aroa ra i te Atua e te akapaapaa ra iaia. (Iobu 38:4, 7; Daniela 7:10) Kua akaari katoa mai te Atua i te aroa i tona anga mai anga i te enua e te teateamamao anga i te reira no te ora anga tangata mataora.—Genese 1:1, 26-28; Salamo 115:16.
16 Te puapingaia nei tatou i te aroa o te Atua ra i te au tu e maata roa kia tuatuaia. Ko tetai apinga, kua anga aroa mai te Atua i to tatou au kopapa na tetai tu umere kia rauka ia tatou te rekareka i te oraanga. (Salamo 139:14) Te akaariia maira tona aroa i te mea e te oronga maira aia “i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.” (Angaanga 14:17) Ko te Atua oki “te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:45) Te akakeu katoa nei te aroa i Tei Anga mai ia tatou kia tauturu ia tatou kia rauka te kite i te Atua e kia tavini atu iaia ma te mataora ei aronga akamori iaia. E tika rava, “ko te Atua oki te aroa.” (1 Ioane 4:8) Inara e maata atu te vaira no tona tu.
“E ATUA TAKINGA-MEITAKI, E TE AROA UA”
17. Eaa ta tatou ka kite no to te Atua ra tu ia Exodo 34:6, 7?
17 I muri ake i te aere anga to Iseraela na roto i te Tai Muramura ra, te anoanoia ra kia meitaki atu to ratou kite i te Atua. Kua kite a Mose i te reira mea anoanoia e kua pure: “Kua kite aroaia au e koe ra, e akakite mai koe kiaku i toou aerenga, e kia kite au ia koe, kia kite aroaia au e koe ra.” (Exodo 33:13) Kua meitaki atu te kite o Mose i te Atua ra i te akarongoanga i ta te Atua uaorai akakite anga: “Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara, e te kino; e kare e tuatua ki te tangata kino e, e tangata kino kore.” (Exodo 34:6, 7) Te akatau ra te Atua i tona aroa ma te tuatua tau, kare e paruru ana i te aronga rave ara akakoroia mei te au utunga o ta ratou raveanga tarevake.
18. Akapeea to Iehova ra akapapu anga i tona tu takinga meitaki?
18 Mei ta Mose ra i kite, te akaari ra a Iehova i te takinga meitaki. Ko tetai peretana takinga meitaki te tangi ra i te aronga te mamae ra e ka tauta kia akaora ia ratou. No reira kua akaari te Atua i te aroa no te au tangata na te akapapaanga i te apinga no te akaora anga tamou mei te mamae, te maki, e te mate. (Apokalupo 21:3-5) Penei ka kite te aronga akamori i te Atua ra i te au tumatetenga no te au tu i teianei ao kino, me kare penei ka rave pakari kore ua ratou e ka rokoia e te taitaia. Inara me ka ariu akaaka ua ratou kia Iehova no te tauturu anga, ka akapumaana mai aia e ka tauturu oki ia ratou. No teaa ra? No te mea te akaari takinga-meitaki ra aia i te manako maru no te aronga akamori iaia ra.—Salamo 86:15; 1 Petero 5:6, 7.
19. Eaa i raukai ia tatou i te tuatua e e aroa ua te Atua?
19 E manganui te aronga mana taoonga te akono tau kore ra ia etai ke. Ei tuke anga, mei teaa ra to Iehova aroa ua ki tona au tavini akaaka ra! Noatu rai e koia te mana teitei rava i te ao katoa e pini ua ake, te akaari ra aia i te takinga meitaki maata na roto i tetai mataara tau ki te au tangata ravarai. (Salamo 8:3, 4; Luka 6:35) E aroa katoa to Iehova i te aronga tataki tai, i te pauanga i ta ratou patianga taka meitaki no te akaperepere. (Exodo 22:26, 27; Luka 18:13, 14) Inara, kare i te apainga na te Atua kia akaari i te akaperepere me kare te takinga meitaki ki tetai ua atu tangata. (Exodo 33:19) No reira, ka tau tatou kia akakite i te ariki anga oonu no te takinga meitaki e te aroa ua o te Atua ra.—Salamo 145:1, 8.
KARE E RIRI VAVE, KARE E AKONO I TE TU O TE TANGATA, E TUATUA TIKA
20. Eaa te akaari maira e kare a Iehova e riri vave e kare oki e akono i te tu o te tangata?
20 Kare a Iehova e riri vave. Inara, kare te aiteanga o teia e kare aia e rave i tetai apinga, no te mea kua rave aia i te reira i te akapouanga ia Pharao marokiakia ra ma tona nuku i te Tai Muramura ra. Kare katoa a Iehova e akono i te tu o te tangata. No reira, ko tona iti tangata akaperepereia, koia te ngati Iseraela, i te openga ra kua ngere i tana akaperepere anga no to ratou rave tamou i te tarevake. Te ariki ra te Atua ei aronga akamori iaia i te au tangata no te pa enua ravarai, inara ko te aronga anake ua te ka aru i tona au aerenga tuatua tika ra.—Angaanga 10:34, 35.
21. (a) Eaa ta Apokalupo 15:2-4 e apii maira ia tatou no te Atua? (e) Eaa te ka akariro kia ngoie mai no tatou i te rave i ta te Atua e karanga ra e ko te tika ia?
21 Te akakite maata maira te puka Puka Tapu o Apokalupo i te puapinga maata o te apiianga i ta te Atua ra “au ikuiku anga tika.” Te akakite maira te reira e te imene ra te au mea ora o te rangi: “E angaanga maata e te taka ke taau, [e Iehova ra], e te Atua mana katoatoa; e aerenga tika e te tuatua-mou taau, e te Ariki o te aronga tapu e! Koai oki te ka kore e mataku ia koe, [e Iehova], e te akakakā i toou ingoa? ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra [au ikuiku anga tika].” (Apokalupo 15:2-4, akaaite ia NW.) Ka akaari tatou i te mataku tau ia Iehova, me kare i te akatapu iaia, na te aruanga i tana ka tuatua e ko te tika ia. Ka riro teia kia ngoie mai na te akamaaraanga ia tatou uaorai i te pakari e te aroa o te Atua. Pouroa tana au akauenga ei meitaki anake ia no tatou.—Isaia 48:17, 18.
“KO IEHOVA TO TATOU ATUA, OKOTAI”
22. Eaa te aronga te ariki ra i te Puka Tapu i kore ei e akamori i tetai Toru Tai?
22 E manganui te au atua ta to Aiphiti i taito ra i akamori ana, inara ko Iehova “e Atua vareae oki au ko te Atua noou nei ko Iehova.” (Exodo 20:5) Kua akamaara atu a Mose i to Iseraela e “ko Iehova to tatou Atua, okotai Iehova.” (Deuteronomi 6:4) Kua taiku akaou mai a Iesu Karaiti i taua au tuatua ra. (Mareko 12:28, 29) No reira, ko te aronga te ariki ra i te Puka Tapu ei Tuatua na te Atua kare e akamori i tetai Toru Tai te kapiti ra e toru peretana me kare e toru atua i roto i te okotai. Ko te tika, te tuatua “Toru Tai” kare roa e kitea i roto i te Puka Tapu. Ko te Atua mou e Peretana okotai ia, takake mei ia Iesu Karaiti ra. (Ioane 14:28; 1 Korinetia 15:28) Kare te vaerua tapu o te Atua i tetai peretana. Ko te mana rave angaanga ia o Iehova ra, tei taangaangaia e te Mana Katoatoa ei akatupu i tona au akakoro anga.—Genese 1:2; Angaanga 2:1-4, 32, 33; 2 Petero 1:20, 21.
23. (a) Akapeea e tupu ei toou aroa no te Atua? (e) Eaa ta Iesu i tuatua no te anoanoanga i te Atua, e eaa ta tatou ka tau kia kite no runga ia Karaiti?
23 Me akamanako koe i to Iehova ra tu meitaki maata kare ainei koe e akatika e te tau ra e koia ta tatou e akamori? Ia koe e apii ra i tana Tuatua, koia te Puka Tapu ra, ka meitaki atu toou kite iaia ka kite katoa oki eaa tana e umuumu maira ia koe no toou meitaki e te mataora mutu kore. (Mataio 5:3, 6) Kapiti katoa oki, ka tupu toou aroa no te Atua. E mea tau ia, no te mea kua karanga a Iesu: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareko 12:30) E mea tika ra e, kua tu a Iesu i te reira aroa no te Atua. Inara eaa ta te Puka Tapu i akakite mai no runga ia Iesu Karaiti? Eaa tana tuanga i roto i ta Iehova akakoro anga?
E TIMATA I TOOU KITE
Eaa te ingoa o te Atua, e eaa te putuputu o te taiku anga i te reira i te au Tuatua Tapu Epera?
Eaa koe i tau ei kia taiku i te ingoa o te Atua?
Eaa te au tu o te Atua ko Iehova te akamareka maata maira ia koe?
[Au Uianga Apii]
[Tutu i te kapi 29]
Eaa te meitaki i toou kite i Tei Anga mai i te au mea ravarai?
