Patoi atu i te Nuku Vaerua Kino
Pene 12
Patoi atu i te Nuku Vaerua Kino
1. Eaa ta Iesu i rave i tona aravei poitirere anga i te au vaerua kino ra?
I MURI tika mai i tona papetito angaia, kua aere atura a Iesu Karaiti ki te metepara i Iudea i te pure e te tamanako oonu. I reira kua tauta a Satani te Tiaporo kia aati aia i te ture a te Atua. Inara, kua kopae ke atu a Iesu i te maunu a te Tiaporo e kare i mou ki roto i tana ereere. Kua aro atura a Iesu i etai atu vaerua kino i te tuatau o tana angaanga orometua i te enua nei. Inara, e putuputu aia i te akaapa e te patoi atu ia ratou.—Luka 4:1-13; 8:26-34; 9:37-43.
2. Eaa te au uianga ta tatou ka uriuri manako?
2 Ka tau te au tataanga Puka Tapu kia akairinaki ia tatou e te vaira te au nuku vaerua kino. Te tauta ra ratou kia akavare i te au tangata. Tera ra, ka rauka ia tatou i te patoi atu i teia au vaerua kino. Inara, noea mai te au vaerua kino ra? Eaa ratou ka tautaʼi kia akavare i te au tangata nei? E eaa ta ratou au ravenga e taangaanga ra kia raukaʼi ta ratou akakoro anga? Na te kitea anga te au pauanga ki teia au uianga ka tauturu ia koe kia patoi atu i taua nuku vaerua kino ra.
AU VAERUA KINO—TO RATOU AKAMATA ANGA E TE AKAKORO ANGA
3. I akapeea to Satani te Tiaporo tupu anga mai?
3 E mano tini ua atu mea ora vaerua ta te Atua ko Iehova i maani i mua ake ka angaʼi aia i te tangata. (Iobu 38:4, 7) Mei tei akatakaia maira i te Pene 6, kua akatupu tetai o teia au angera i te anoano kia akamori atu te au tangata iaia e eiaa e akamori ia Iehova. I te aruaruanga i te reira akakoro anga, kua patoi atura teia angera rave kino e kua akakino atu i Tei Anga maira, tae roa kia tuatua ki te vaine mua ra e e pikikaa te Atua. E mea tau, i reira, kua matauia teia mea ora vaerua meameaau e ko Satani (tei arai) e te Tiaporo (tei akakino ra).—Genese 3:1-5; Iobu 1:6.
4. I akapeea etai au angera i araʼi i te tuatau ia Noa ra?
4 I muri iora, kua piri atura etai atu angera kia Satani te Tiaporo. I te tuatau o te tangata tuatua tika ko Noa, kua akaruke tetai papaki o teia aronga i ta ratou angaanga i te rangi ra e kua mou i te au kopapa kiko ei akamerengo i to ratou inangaro i te pirianga ainga ma te au vaine i te enua nei. Kare e ekoko kua mana a Satani ki rungao i taua au angera ra kia rave i te reira ravenga akarongo kore. Kua taki atu te reira kia riro ratou ei metua no te anaunga e tuanga vaerua e te tuanga tangata tei tapaia ra e toa uritumu, tei riro mai ra ei aronga takinokino. I ta Iehova tuku mai anga i te Tiruvi maata ra, kua akapou atu te reira i te au tangata viivii ma teia aronga uanga tuke rai o te au angera akarongo kore ra. Kua ora atu taua aronga angera meameaau ra i te akapou anga na te akakore anga i to ratou au kopapa kiko e kua oki atu ki te ngai vaerua ra. Inara kua kotingaia teia au temoni e te Atua na te akono anga ia ratou mei tetai aronga ke ra ki roto i te poiri i te pae vaerua. (Genese 6:1-7, 17; Iuda 6) Ko Satani, koia “te demoni maata,” e tana au angera kino ra kua aere ua atu ma ta ratou meameaau. (Luka 11:15) Eaa ra ta ratou akakoro anga?
5. Eaa te akakoro anga a Satani e tana au temoni, e eaa ta ratou e taangaanga ana ei ereere i te au tangata?
5 Ko te akakoro anga kino a Satani e te au temoni ra kia akaariu ke i te au tangata kia patoi ia Iehova te Atua. No reira, kua rave teia aronga rave kino i te pikikaaanga, te tamatakuanga, e te takinga kinoanga i te au tangata i te tuatua enua katoa o te tangata nei. (Apokalupo 12:9) Te akapapu maira te au akaraanga o teia tuatau nei e ko te takinokino anga a te au temoni e kino maata atu i teianei i to mua ana. Ei ereere i te au tangata, e putuputu te au temoni i te rave i te purepure i tona au tu katoatoa. Akapeea ta te au temoni taangaanga i teia maunu, e akapeea koe me paruru ia koe uaorai?
AKAPEEA TE TAUTA ANGA A TE AU VAERUA KINO I TE TAKI KE IA KOE
6. Eaa te purepure, e eaa etai tu o te reira?
6 Eaa te purepure? E piri anga ia ma te au temoni, me kare te au vaerua kino, na te piri anga tikai me kare na roto atu i tetai taunga tangata nei. Ta te purepure e rave ra na te au temoni ko ta te maunu e rave ra na te aronga opu manu: Te akaanga maira i tana ka opu. E mei ta tetai tangata opu manu e taangaanga ra i te au maunu tuke tuke ei arataki mai i te au manu ki roto i tana ereere, pera katoa te au vaerua kino i te akamaroiroi anga i te au tu purepure ke ke kia apai mai i te au tangata ki raro ake i ta ratou akatere anga. (Akaaite ia Salamo 119:110.) Ko etai o teia au tu e tauraatua, e manamana, e kimianga akairo, te mana temoni, te makutu, te uiuianga ki te au taunga, e tei ui ki tei mate ra.
7. Akapeea te atea o te akono purepure, e eaa te reira i tupu ruperupe ei noatu i te au enua te karangaia ra e Kerititiano?
7 Te manuia ra te maunu, no te mea te akaanga ra te purepure i te au tangata takapini i te ao nei. Ko te aronga te noo ra i te au oire i te vao rakau te aere ra ki te au taunga, e ko te aronga angaanga opati i te au oire te aere ra ki te aronga akara etu. Te tupu ruperupe ra te purepure noatu i te au enua te karangaia ra e Kerititiano. Te akataka maira te kimikimianga e i te Unaite Teite anake ra, ko etai 30 makatini e tere atu i te 10,000,000 te katoatoa i te tua angaia te akakite ra i te au tu tuke tuke o te purepure. Te akapou ra to te tangata Paratiri e tere atu i te 500 mirioni tara no te au apinga purepure i te au mataiti tataki tai. Inara, e 80 patene o te aronga te aere ra ki taua au ngai akamori purepure ra i te reira enua e au Katorika papetitoia te aere katoa ra ki ta ratou Oroa. I te mea e te akono ra tetai papaki o te au orometua i te purepure, e manganui te au tangata o te akonoanga e manako ra e ko te rave anga i te reira e mea arikiia e te Atua. Inara ko te tika ainei ia?
EAA TE PUKA TAPU I AKAAPAʼI I TE RAVE ANGA PUREPURE
8. Eaa to te Tuatua Tapu manako no te purepure?
8 Me kua apiiia koe e ko etai au tu purepure e ravenga katoa no te aravei anga i te au vaerua meitaki, penei ka poitirere koe i te kite eaa ta te Puka Tapu tuatua no te purepure. Kua akamatakiteia te au tangata o Iehova: “Auraka kotou e akono i te au vaerua kino ra, e auraka e kimi i te purepure, kia viivii kotou i te reira.” (Levitiku 19:31; 20:6, 27) Te akamatakite maira te puka Puka Tapu o Apokalupo e ko te aronga rave i “te purepure” ka ope atu ki te “roto ai e te teio e ka ua ra: koia te rua o te mate [e mutu kore].” (Apokalupo 21:8; 22:15) Pouroa te au tu purepure kare te Atua ko Iehova e akatika. (Deuteronomi 18:10-12) Eaa ra i pera ei?
9. Eaa ka raukaʼi ia tatou kia akatika e ko te au tuatua mei te ao vaerua maira kare no ko mai ia Iehova ra?
9 Kua tono mai a Iehova i etai au vaerua meitaki, me kare au angera tuatua tika, kia tuatua ma etai tangata i mua ake i te oti anga te Puka Tapu. I te oti anga te reira, kua oronga maira te Tuatua a te Atua i te arataki anga te anoanoia ra e te tangata kia tavini arikiia mai e Iehova. (2 Timoteo 3:16, 17; Ebera 1:1, 2) Kare aia e tapae ke i tana Tuatua tapu na te oronga anga i te au tuatua na etai taunga rotopu e akakite. Pouroa te reira au tuatua i teia tuatau nei no ko mai i te ao vaerua ra no ko mai i te au vaerua rave kino ra. Ka rauka i te ravenga purepure i te taki atu kia tamanataia e te temoni me kare ka riro na te au vaerua kino e akatere. No reira, te akamatakite aroa maira te Atua ia tatou auraka kia o atu ki etai ua atu au ravenga purepure. (Deuteronomi 18:14; Galatia 5:19-21) Pera katoa oki, me ka rave ua atu tatou i te rave purepure i muri ake i te kiteanga i to Iehova manako no te reira, te tuku ra tatou ia tatou uaorai ki te pae i te au vaerua kino e ka riro ei au enemi no te Atua.—1 Samuela 15:23; 1 Paraleipomeno 10:13, 14; Salamo 5:4.
10. Eaa te tauraatua, e eaa ka tau ei tatou kia kopae ke i te reira?
10 Ko tetai tu rekaia o te purepure ko te tauraatua—te tamataanga kia kite i te tuatau ki mua me kare te au mea kare i kiteia ma te tauturu anga a te au vaerua. Etai au tu o te tauraatua e akara etu, akarakara poro io, te akataka anga moemoea, e akara kapu rima, e te akakiteanga i te manuia na te taangaanga i te au kati tarota. E manganui te manako ra i te tauraatua ei tamataora kino kore, inara te akaari maira te Puka Tapu e ko te aronga akakite i te manuia e te au vaerua kino e mea okotai ia. Ei akatauanga, ia Angaanga 16:16-19 te taiku maira i tetai “demoni purepure” tei akariro ra kia rauka i tetai tamaine i “te akakite i te totou anga.” Inara, kua ngaro tona kite i te totou no te tuatau ki mua i te akaatea angaia taua temoni ra. Te taka meitaki ra, ko te tauraatua e maunu ia te taangaangaia ra e te au temoni ei taki atu i te au tangata ki roto i ta ratou ereere.
11. Akapeea te au tamata anga kia tuatua ma tei mate ra te ka taki atu ei ki roto i tetai ereere?
11 Me te mamae ngakau ra koe no tetai mema akaperepere o te pamiri me kore e oa piri vaitata tei mate ra, ka ngoie ua koe i te akavareia na tetai atu maunu. Penei ka oronga atu tetai taunga purepure i tetai akakite anga taka ke kia koe me kare ka tuatua atu i te reo tei aite ra ki to te tangata kua mate ra. Kia matakite! Te tauta anga kia tuatua ma tei mate ra ka taki atu ki roto i te ereere. No teaa ra? No te mea kare tei mate e kite i te tuatua. Mei taau e maara ana, te tuatua taka meitaki maira te Tuatua a te Atua e me mate te tangata “te oki nei aia ki tona ra one; kore rava atura tana i akakoro i taua rā ra.” Ko tei mate “kare ra a te aronga i mate ra e tuatua i kitea.” (Salamo 146:4; Koheleta 9:5, 10) Ko te tika, ko te au temoni tikai teia tei kitea e te rauka ra te aru i te reo tuatua o tei mate ra e kia oronga ki tetai taunga purepure ra i tetai akakite anga no tei mate ra. (1 Samuela 28:3-19) No reira ko “tei ui ki tei mate ra” te opuia ra e te vaerua kino e te rave ra kia tarevake ki te anoano o te Atua ko Iehova.—Deuteronomi 18:11, 12; Isaia 8:19.
MEI TE AKAINANGAROANGA E TAE ATU KI TE TAKINOANGA
12, 13. Eaa te akapapu anga te vaira e te rave tamou ra te au temoni i te timata e te tamanata i te au tangata?
12 Me aru koe kia tau ki te akoanga a te Tuatua a te Atua no runga i te purepure, ka kopae ke koe i te maunu a te au temoni. (Akaaite ia Salamo 141:9, 10; Roma 12:9.) Ko te aite anga ainei o teia e ka akamutu te au vaerua kino i te tautaanga kia opu atu ia koe? Kare rava ia! I muri ake i te timataanga ia Iesu e toru taime, kua “aere ke atura [Satani], akaruke maira iaia i tetai tuatau iti.” (Luka 4:13) Mei te reira katoa, kare te au vaerua marokiakia e akainangaro anake i te au tangata mari ra ka takinokino katoa ia ratou.
13 E manako ana i ta tatou uriuri anga manako no ta Satani takinokino anga i te tavini o te Atua ko Iobu. Kua akatupu te Tiaporo kia kore atu tana manu e kia mate te maataanga o tona au tavini. E kua tamate katoa oki a Satani i ta Iobu tamariki. I muri iora, kua papa iora aia ia Iobu uaorai ma tetai maki mamae roa. Inara kua tamou a Iobu i tona tiratiratu ki te Atua e kua akameitaki maataia. (Iobu 1:7-19; 2:7, 8; 42:12) Mei reira mai, kua akariro te au temoni i etai tangata kia muteki ua me kare kia matapo e kua rave ua atu i te tamamaeanga i te au tangata. (Mataio 9:32, 33; 12:22; Mareko 5:2-5) I teia tuatau, te akaari maira te au ripoti e te tamanata ra te au temoni i etai tangata i te pae ainga e kua taki atu i etai ke kia nenevaia. Kua akakeu ratou ia etai ke atu kia ta ua e kia tamate ia ratou uaorai, koia te ara ki te Atua ra. (Deuteronomi 5:17; 1 Ioane 3:15) Tera ra, e tauatini ua atu au tangata tei mou ana ki te ereere a teia au vaerua kino kua rauka te akamatara mai ia ratou. Akapeea teia i raukaʼi ia ratou? Kua rauka ia ratou te reira na te raveanga i te au takainga puapinga.
AKAPEEA TE PATOI ANGA ATU I TE AU VAERUA KINO
14. Ei rotai ma te akatauanga o te au Kerititiano Ephesia i te anere mataiti mua ra, akapeea koe i te patoi anga atu i te au vaerua kino ra?
14 Eaa tetai mataara e raukaʼi ia koe te patoi atu i te au vaerua kino e te paruru ia koe uaorai e toou ngutuare tangata mei ta ratou au ereere ra? Te au Kerititiano i Ephesia i te anere mataiti mua ra tei rave ra i te purepure i mua ake ka riro mai ei aronga akarongo kua rave i te au takainga papu ra. Ka tatau tatou e “e manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai.” (Angaanga 19:19) Noatu rai me kare koe i rave ana i te purepure, e takore atu i tetai ua atu apinga te taangaangaia ra i te purepure me kare tei aiteite te tu. Te kapiti nei teia i te au puka, te au makatini, au vitio, au pepa akatutu, te au rekoti akatangianga imene, e te au apinga te taangaangaia ra no te au akakoro anga purepure. Kapiti katoa oki te au itoro, te au ei kura e etai atu au apinga no te paruru anga, e te au apinga tei orongaia mai e te aronga rave purepure. (Deuteronomi 7:25, 26; 1 Korinetia 10:21) Ei akatutu anga: Ko etai nga tokorua akaipoipoia i Tairani kua roa te tamanata angaia e te au temoni. E kua takore atu raua i te au apinga kapitiia ra ki te purepure. Eaa tei tupu ra? Kua ora mai raua i taua takinga kinoanga a te temoni ra e i muri iora kua tupu meitaki tikai i te pae vaerua.
15. I te patoianga i te au nuku vaerua kino ra, eaa tetai atu takainga te tau ra no te rave?
15 E raukaʼi te patoi atu i teia au vaerua kino, ko tetai atu takainga te tau ra kia rave i te akoanga a te apotetoro ko Paulo i akaue ra kia rave i te rakei vaerua katoa ta te Atua i oronga maira. (Ephesia 6:11-17) Ka tau te au Kerititiano kia akaketaketa i to ratou au paruru anga i te au vaerua kino ra. Eaa te kapitiia ra ki teia takainga? “Ei runga ravao ïa,” ta Paulo i tuatua, “e rave oki i te paruru ra i te akarongo, . . . ko te mea e mate ei te au tao ai ravarai a te vaerua kino ra.” E tika oki, ko te maroiroi atu toou akarongo, te maata atu ia toou kite i te patoi atu i te nuku vaerua kino ra.—Mataio 17:14-20.
16. Akapeea koe me akamaroiroi i toou akarongo?
16 Akapeea koe i te akamaroiroi anga i toou akarongo? Na te rave tamouanga i te apii i te Puka Tapu e te akono anga i tana akoanga i toou oraanga. Tei runga te maata anga i te maroiroi o te akarongo o tetai i te ngaueue kore tona tumuanga—koia te kite i te Atua ra. Kare ainei koe e akatika e ko te kite tika taau i rauka mai e kua tuku ki roto i to ngakau ia koe i apii ei i te Puka Tapu na te reira i patu i toou akarongo? (Roma 10:10, 17) Inara, kare e ekoko anga, ia koe ka rave ua atu i teia apiianga e ka akono ei ravenga naau kia aere ki te au uipaanga a te Au Kite o Iehova, ka tere atu te ketaketa o toou akarongo. (Roma 1:11, 12; Kolosa 2:6, 7) Ka riro te reira ei paruru maroiroi tikai i te au takinga kinoanga a te temoni.—1 Ioane 5:5.
17. Eaa etai atu au takainga penei ka tau i te patoi anga i te au nuku vaerua kikino ra?
17 Eaa etai atu takainga ka tau kia raveia e tetai tangata te patoi pakari ra i te au nuku vaerua kino? Kua anoanoia e te au Kerititiano i Ephesia te paruru anga no te mea te noo ra ratou ki tetai oire e maata te akonoanga temoni. No reira, kua tuatua atu a Paulo kia ratou: “Ma te pure tukumoe kore, i te au pure ravarai.” (Ephesia 6:18) I te mea te noo nei tatou i te ao ki i te temoni, ko te pureanga akatenga no ta te Atua paruru anga e mea tau ia i te patoianga i te au vaerua kino. (Mataio 6:13) Tetai tauturu i teia tu ko te tauturu anga i te pae vaerua e te au pure a te aronga pakari akataoongaia ra i roto i te putuputuanga Kerititiano ra.—Iakobo 5:13-15.
E TAMOU MARIE I TAAU TAMAKI ANGA I TE AU VAERUA KINO
18, 19. Eaa te ka tau kia raveia me ka akatupu taitaia akaou mai te au temoni i tetai tangata?
18 Inara, noatu i muri ake i te raveanga i teia au takainga tumuanga, kua o atu tetai papaki ki te taitaia na te au vaerua kino ra. Ei akatauanga, kua apii tetai tangata i Kote Tivua i te Puka Tapu ma te Au Kite o Iehova e kua akapou atu i tana au rei katoatoa. I muri akera, kua meitaki mai aia, kua akatapu i tona oraanga kia Iehova, e kua papetitoia. Inara okotai epetoma i muri ake i tona papetito angaia, kua akamata akaou maira te au temoni i te akatupu taitaia kiaia, e kua tuatua atu etai reo kiaia kia akaruke i tona akarongo ou i kiteia ra. Me tupu teia kia koe, ka riro ainei te aite anga e kua ngere koe i ta Iehova ra paruru anga? Kare ia e tau.
19 Noatu rai e paruru anga tu-Atua to te tangata apa kore ra koia a Iesu Karaiti, kua akarongo aia i te reo o te mea ora vaerua kino ra ko Satani te Tiaporo. Kua akaari mai a Iesu eaa te mea tau kia rave i taua tu ra. Kua tuatua atu aia ki te Tiaporo: “E aere ke atu koe e Satani.” (Mataio 4:3-10) Mei te reira katoa te tu, ka tau koe kia akakore i te akarongo atu i te au reo no te ao vaerua maira. E patoi atu i te au vaerua kino ma te kapiki anga ia Iehova no te tauturu. Ae, e pure ma te reo maata i te taikuanga i te ingoa o te Atua ra. Te tuatua ra a Maseli 18:10 e: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” Kua rave te tangata Kerititiano i Kote Tivua i teia, e kua akamutu te au vaerua kino ra i te tamanataanga iaia.—Salamo 124:8; 145:18.
20. Ei akaoti anga, eaa taau ka tau kia rave ei patoi atu i te au vaerua kino ra?
20 Kua tuku ua a Iehova i te au vaerua kino ra kia vai mai, inara te akaari ra aia i tona mana, e maata oki no tona au tangata, e te akakiteia ra tona ingoa i te enua katoa nei. (Exodo 9:16) Me ka piri vaitata koe ki te Atua, kare koe e tau kia mataku i te au vaerua kino ra. (Numero 23:21, 23; Iakobo 4:7, 8; 2 Petero 2:9) Kua kotingaia to ratou mana. Kua akautungaia ratou i te tuatau ia Noa ra, e kua uriia mai ratou ki vao i te rangi i te tuatau ou ake nei, e te tatari nei i teianei i te akavaanga openga. (Iuda 6; Apokalupo 12:9; 20:1-3, 7-10, 14) Ko te tika, te mataku nei ratou i to ratou akapou anga te aere maira. (Iakobo 2:19) No reira noatu me ka tauta te au vaerua kino i te akainangaro ia koe ma tetai tu maunu me kare ka takinga kino mai ia koe na tetai ua atu mataara, ka rauka ia koe i te patoi atu ia ratou ra. (2 Korinetia 2:11) E kopae ke atu i te au tu purepure ravarai, e akono i te akoanga no te Tuatua a te Atua, e ka kimi ei i to Iehova mareka anga. E rave i teia eiaa e taroaroa, no te mea tei runga toou oraanga i taau patoianga i te au nuku vaerua kino ra!
E TIMATA I TOOU KITE
Akapeea te au vaerua kino i te tauta anga i te ariu ke i te au tangata?
Eaa ra te Puka Tapu i akaapaʼi i te purepure?
Akapeea e raukaʼi i tetai tangata i te akaatea ke mai mei te au nuku vaerua kino ra?
Eaa i tau ei kia patoi tamou marie koe i te au vaerua kino ra?
[Au Uianga Apii]
[Tutu i te kapi 110]
Akapeea taau manako anga i te purepure i roto i tona au tu e manganui?
