Pene 15

Patuanga i Tetai Ngutuare Tangata te Akangateitei ra i te Atua

1-3. Eaa i kore ei e rauka i etai papaki te akakore atu i te au manamanata te matauia ra i te akaipoipo anga e te metua anga, inara akapeea i raukaʼi te Puka Tapu i te tauturu?

ME KA parani koe kia patu i toou uaorai are. Ka oko koe i te enua. Ma te anoano maata, kua kite koe i toou are ou i roto i te mata o to manako. Inara ka peea me kare au apinga ei rave e kare e kite karape no te akatu anga? Mei teaa ra te manamanata taau au tauta anga i reira!

² E manganui te au tokorua tei akamata ra i te akaipoipo ma te tamanakoanga i tetai ngutuare tangata mataora, inara kare e apinga e kare katoa te kite karape tei anoanoia ei patu i te reira. E tuatau poto i muri mai i te ra akaipoipoanga, kua tupu mai te au manako tau kore. Te maroanga e te taumaroanga kua riro mai ei ravenga i te au ra tataki tai. Kia anau mai te tamariki, kua kite te metua tane e te metua vaine ou ra ia raua uaorai e kare i kite karape ake i te akono ei metua mei to raua kite kore i te akaipoipo anga ra.

³ Inara, e mea mataora, ka rauka i te Puka Tapu i te tauturu. Te aite ra tana au kaveinga mei te au apinga rave te ka tauturu ia koe kia patu i tetai ngutuare tangata mataora. (Maseli 24:3) E akara tatou e ka akapeea.

 TE AU APINGA NO TE PATUANGA I TETAI AKAIPOIPO ANGA MATAORA

4. Eaa ra i manakoiaʼi te au manamanata i te akaipoipo anga, e eaa te au turanga te orongaia maira i roto i te Puka Tapu?

⁴ Noatu rai akapeea te akara anga tau meitaki o nga tokorua akaipoipoia ra, te tuke ra to raua manako ngakau, te tupu anga mei te tamariki anga mai, e te tu o te ngutuare tangata. No reira, ka tau kia manakoia e ka tupu mai etai manamanata i muri ake i te akaipoipo anga. Akapeea raua i te akono anga i te reira? Ae, me patu te au kamuta i tetai are, ka akara ratou i te au parani. Ko te reira te au papa anga arataki kia aruia. Te oronga maira te Puka Tapu i ta te Atua au turanga no te patuanga i tetai ngutuare tangata mataora. E akara matatio tatou i etai tokoiti o te reira i teianei.

5. Akapeea ta te Puka Tapu akaketaketa mai i te puapinga maata o te tiratiratu i te akaipoipo anga?

⁵ Tiratiratu. Kua karanga a Iesu: “Ta te Atua i topiri ra, auraka te tangata e akataka ke atu.” * (Mataio 19:6) Kua tata te apotetoro ko Paulo: “Kia akameitakiia te akaipoipo i te tangata ravarai, e te viivii kore oki te roi: e akava oki te Atua i te akaturi e te moeana ra.” (Ebera 13:4) No reira ka tau te aronga akaipoipoia kia manako e e apainga ta ratou kia Iehova kia vai tiratiratu ki to ratou tokorua.—Genese 39:7-9.

6. Akapeea te tiratiratu i te tauturu anga kia akatinamou i te akaipoipo anga?

⁶ Te oronga ra te tiratiratu i te tu ngateitei e te tinamou ki te akaipoipo anga. Te kite ra te au tokorua tiratiratu e, noatu eaa te ka tupu, ka turu ratou tetai i tetai. (Koheleta 4:9-12) Mei teaa ra te tuke i te aronga te akaruke ra i to ratou akaipoipo anga i te akamata anga mua o te manamanata! Ko te reira aronga e viviki i te manako e ‘kua iki ratou i te peretana tarevake,’ e ‘kua topa to ratou inangaro,’ ei e tokorua ou te rapakau. Inara kare teia e oronga i tetai tuatau no taua nga tokorua ra kia tupu. Kareka ra, ko taua aronga tiratiratu kore ra penei ka apai atu i te reira au manamanata ki te au tokorua  ou. Me e kainga meitaki to tetai tangata inara kua kitea mai e te tuturu ra te tapoki are, e mea papu e ka tauta aia i te maani akaou i te reira. Kare aia e neke ua ki tetai atu are. Mei te reira katoa, te tauianga i tetai tokorua kare ia i te ravenga no te akatikatika i te au tumu te vaira i raro ake i te tu taitaia o te akaipoipo anga. Me tupu mai te au manamanata, auraka e tauta i te akaruke i te akaipoipo anga, mari ra e angaanga pakari kia akatinamou i te reira. Na te reira tu tiratiratu e akono i te reira kapiti anga ei tetai apinga tau kia paruruia, kia tamouia, e kia akaperepereia.

7. Eaa i putuputu ei te tu ngata o te komunikeiti anga no te au tangata akaipoipoia, inara akapeea te rave anga “kia akatangata ou” i te tauturu anga mai?

⁷ Komunikeiti Anga. “Kare e uruoaanga tuatua ra, kare tei akakoroia e tupu,” ta tetai materi Puka Tapu ia i tuatua. (Maseli 15:22) Inara, e rave anga ngata te komunikeitianga no etai au tokorua akaipoipoia. Eaa ra i akaperaʼi? No te mea e tuke tuke te au tu komunikeiti anga o te au tangata. Ko teia tetai tumu te putuputu ra te taki atu ki tetai marama koreanga  e te pekapeka. Penei ko te akatupu akeanga tetai tumu no teia. Ei akatauanga, penei kua tupu ake tetai papaki i roto i tetai reva taumaro ua ana te au metua. I teianei ei nga tangata kua akaipoipoia, kare ratou e kite e akapeea te tuatua maru ma te takinga meitaki e te aroa ki to ratou tokorua. Tera ra, kare to kotou ngutuare e tau kia topa ki roto i tetai tu ‘are ki i te taumaroanga.’ (Maseli 17:1) Te akaketaketa maira te Puka Tapu e “kia akatangata ou,” e kare ia e akatika i te rotoriri, e te makitakita, te taumaro, e te tuatua akakino.—Ephesia 4:22-24, 31.

8. Penei eaa te ka riro ei tauturu me ka kore koe e akatika i ta toou tokorua?

⁸ Eaa taau ka rave me tupu etai taumaroanga? Me akamata te riri i te mura mai, penei ka meitaki koe kia aru i te apii ia Maseli 17:14: “E akaruke ra i te karo ra, ka tupu aea te riri.” Ae, penei e akaruke koe i te uriuri anga manako no muri mai, kia maru mai korua ko toou tokorua. (Koheleta 3:1, 7) I tetai ua atu tu, e tauta “kia rapurapu ua . . . i te akarongo, kia tavarevare i te tuatua, kia tavarevare oki i te riri.” (Iakobo 1:19) Ka tau taau akakoro anga kia rapakau i te turanga, eiaa e kia re i te taumaroanga. (Genese 13:8, 9) E iki i te au tuatua e te tu o te tuatuaanga te ka akamaru mai ia koe e toou tokorua. (Maseli 12:8; 15:1, 4; 29:11) I runga ravao, auraka e vai ki roto i te tu riri, mari ra e kimi i te tauturu na te tuatua anga ki te Atua na roto i te pure anga kapiti ma te akaaka.—Ephesia 4:26, 27; 6:18.

9. Eaa i raukaʼi kia tuatuaia e te akamata ra te komunikeiti anga ki roto i te ngakau?

⁹ Te tuatua ra tetai materi Puka Tapu e: “Na te ngakau o te tangata pakari e akakite ki te vaa i te akono, e na te reira e akakite ki te ngutu i te kite.” (Maseli 16:23) E tika, i reira, ko te taviri ki te komunikeiti anga puapingaia tei roto ia i te ngakau, kare i roto i te vaa. Eaa toou tu akono ki toou tokorua? Te akamaroiroi maira te Puka Tapu i te au Kerititiano kia akaari i te “aroa taeake.” (1 Petero 3:8) Ka rauka ainei ia koe i te rave i teia me te tupu ra te apiapi taitaia ki toou tokorua akaipoipo? Me koia ia, ka tauturu te reira ia koe kia kite e akapeea me pau.—Isaia 50:4.

10, 11. Akapeea te tane i te akono anga i te ako ia 1 Petero 3:7?

 ¹⁰ Akangateitei e te Kauraro Anga. Kua akaueia te au tane Kerititiano kia noo ma ta ratou vaine “ma te kite, i te akangateitei anga [ia ratou] ei te āriki paruparu.” (1 Petero 3:7) Te akangateiteianga i te vaine a tetai te kapiti ra i te kiteanga i tona puapinga. Ko te tane tei noo ra ma tana vaine “ma te kite” ka manako teitei no tona au manako ngakau, au ririnui, te kite, e te tapunui. Ka inangaro katoa aia i te apii e eaa to Iehova ra manako e te anoano ra kia akonoia e ratou.

¹¹ I roto i toou are ra, e manako ua tatou e e ariki meitaki roa taau i reira e paruparu ra. Kare ainei koe e akono i te reira ma te matakite tikai? Ae, kua taiku a Petero i te tuatua “āriki paruparu” na taua tu rai, e ka tau teia kia akakeu i te tane Kerititiano kia akakite i te manako maru no tana vaine akaperepere.

12. Akapeea te vaine i te akaari anga e te kauraro oonu ra aia i tana tane?

¹² Inara eaa te apii anga ta te Puka Tapu e oronga ra ki te vaine? Kua tata a Paulo: “E te vaine oki i kauraro aia i tana tane.” (Ephesia 5:33) Mei te vaine e anoano ra kia kite aia e te akangateiteiia ra e te akaperepereia ra aia e tona tokorua, ka tau katoa oki te tane kia kite e te kauraro ra tana vaine iaia. Ko te vaine kauraro ra kare e akakitekite manako kore ua i te au tarevake o tana tane, me e Kerititiano aia e me kare ra. Kare aia e akakore i te tu tapunui o tana tane na te akaapaanga e te avirianga iaia i te ngai muna me kare te ngai tangata.—1 Timoteo 3:11; 5:13.

13. Akapeea te akakite anga i te au manako na roto i te tu ponuiaau?

¹³ Kare te aite anga o teia e kare e tika kia akakite te vaine i tona au manako. Me e apinga tetai te akapekapeka ra iaia, ka tau aia kia tuatua i te reira ma te tu kauraro. (Genese 21:9-12) Te orongaanga i tetai manako ki tana tane penei ka tau ki te peianga i tetai poro kiaia. Ka rauka iaia i te pei marie atu kia rauka iaia i te opu mai i te reira, me kare ka rauka katoa oki iaia i te pei viviki atu ma te ririnui e ka kino mai tana tane. Mei teaa te meitaki atu kia kopae ke raua rai nga tokorua kia kore e pei i te au akaapa anga, mari ra, kia tuatua ma te tu takinga  meitaki e te maru!—Mataio 7:12; Kolosa 4:6; 1 Petero 3:3, 4.

14. Eaa taau ka tau kia rave me e meangiti ua te akaari anga a toou tokorua i te manako akono i te au kaveinga Puka Tapu i roto i te akaipoipo anga?

¹⁴ Mei ta tatou i kite ana, ka rauka i te au kaveinga Puka Tapu i te tauturu ia koe kia patu i te akaipoipo anga mataora. Inara ka peea me ka akaari toou tokorua i te manako meangiti ua i ta te Puka Tapu tuatua ra? E maata te ka oti kia raveia me ka akono koe i te kite i te Atua i roto i taau tuanga. Kua tata a Petero: “Ko kotou oki, e te vaine tini e, e kauraro marie i ta kotou au tane ra; kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua; I te akara anga mai ratou i to kotou aerenga viivii kore i kapiti katoaia i te mataku.” (1 Petero 3:1, 2) Inara, ka tau katoa te reira ki tetai tane kare ra tana vaine e irinaki ana i te Puka Tapu. Noatu rai eaa ta toou tokorua ka iki kia rave, e tuku na te au kaveinga Puka Tapu e akariro ia koe ei tokorua meitaki. Ka rauka katoa i te kite i te Atua i te akariro ia koe ei metua meitaki atu.

AKONOANGA TAMARIKI KIA TAU KI TE KITE I TE ATUA

15. Akapeea te tuku anga mai i te au ravenga tarevake no te akono anga metua i etai taime, inara penei ka akapeea te taui anga i te reira tu ravenga?

¹⁵ Ko te rauka ua anga tetai keke me kare tetai amara kare te reira e akariro i tetai ei kamuta karape. Mei te reira katoa oki, te anau anga tamariki ua kare e akariro i tetai ei metua karape. Ma te kiteanga me kare kite koreanga, e putuputu te au metua i te akatupu ake i ta ratou tamariki na te mataara i akatupuia mai ei ratou uaorai. Na reira, te au ravenga tarevake i te akonoanga tamariki i etai taime te tukuia maira mei tetai uki ki tetai atu uki. Kua tuatua mai tetai materi Epera taito ra: “Kua kai te au metua i te vine kava, e kua mania te nio o te tamariki.” Inara, te akaari maira te au Tuatua Tapu e kare tetai tangata e anoanoia kia aru i te aerenga tei akanooia mai e tona nga metua. Ka rauka iaia i te iki i tetai atu arataa ke, tetai tei mana ra ta Iehova au ture ki rungao.—Ezekiela 18:2, 14, 17.

16. Eaa ra i puapinga maataʼi kia akono i toou ngutuare tangata, e eaa te kapitiia ra ki te reira?

 ¹⁶ Te manakonako maira Iehova i te au metua Kerititiano kia akono i te arataki anga tika e te utuutu i ta ratou tamariki. Kua tata a Paulo e: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timoteo 5:8) Mei teaa ra te au tuatua ririnui! Te akaotianga i taau tuanga ei oronga, tei kapiti ra i te utuutuanga i taau tamariki i te pae kopapa, e te pae vaerua, e te anoanoia no te manako ngakau, e tika ia e te apainga oki na te tangata tu Atua ra. Te oronga maira te Puka Tapu i te au kaveinga te ka tauturu i te au metua kia patu i te takapini anga mataora no ta ratou tamariki. E akamanako ana i etai o te reira.

17. Eaa te anoanoia ra me kia mou taau tamariki i te ture a te Atua ki roto i to ratou ngakau?

¹⁷ E akanoo i tetai akaraanga meitaki. Tei akaueia ki te au metua Iseraela: “E ka apii tamou tikai koe i [te au tuatua a te Atua] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” E apii te au metua i te au turanga a te Atua ki ta ratou tamariki. Inara ko teia akamaroiroi anga kua akamataia mai na te tuatua anga: “E teianei au tuatua taku e akaue atu kia koe i teianei rā, ei roto i toou ngakau e vai ei.” (Deuteronomi 6:6, 7) Ae, kare e rauka i te au metua te oronga i te apinga kare ra a ratou. Ka tau te au ture a te Atua kia taraiia ki roto i to kotou uaorai ngakau me te anoano ra kotou kia tataia ki runga i te au ngakau o ta kotou tamariki.—Maseli 20:7; akaaite ia Luka 6:40.

18. I te akakiteanga aroa, akapeea ta Iehova ra akanoo anga i tetai akatauanga meitaki rava no te au metua?

¹⁸ E oronga i te akapapu anga i toou aroa. I to Iesu ra papetito anga, kua akakite a Iehova: “Ko taku tamaiti akaperepere koe; kua mareka rava au ia koe.” (Luka 3:22) No reira kua akatika a Iehova e ko tana Tamaiti ia, kua tuatua akakite ua i te mareka anga iaia e te orongaanga akapapu anga i Tona aroa. Kua tuatua atu a Iesu i muri akera ki tona Metua: “Kua akaperepere mai ana oki koe iaku ou teianei ao i angaiaʼi.” (Ioane 17:24) Ei au metua tu Atua, i reira, e oronga ki taau tamariki i  te akakiteanga tuatua e te au apinga kopapa i toou aroa no ratou—e kia putuputu te rave i teia. Kia maara tamou e “te aroa, e tamaata ïa i te meitaki.”—1 Korinetia 8:1.

19, 20. Eaa te o atura ki te ako anga tika i te tamariki, e akapeea te au metua ka puapingaiaʼi mei to Iehova ra akatauanga?

¹⁹ Ako. Te akaketaketa maira te Puka Tapu i te puapinga maata o te ako aroa. (Maseli 1:8) Te au metua te kore ra e rave i ta ratou apainga i te arataki i ta ratou tamariki i teianei ra e mea papu ka aro atu i te au tupu anga ati ngakau apopo. Inara, te akamatakite katoaia ra te au metua kia kore e aere mamao atu ki tetai pae roa. “E te au metua ra,” ta Paulo i tata, “auraka e akariri atu i ta kotou tamariki, ko te taitaia aea ratou.” (Kolosa 3:21) Ka tau te au metua kia kore e maata rava te akatikatikaanga i ta ratou tamariki me kare raurauanga i to ratou tarevake e te avirianga i ta ratou au tauta anga.

²⁰ Kua akanoo mai te Atua ko Iehova, koia to tatou Metua i te rangi ra, i te akatauanga no te orongaanga i te ako. Kare tana akatikatika anga e maata rava. “E ako ra au ia koe ma te tuatua-tau,” ta te Atua i tuatua ki tona au tangata ra. (Ieremia 46:28) Ka tau te au metua kia aru ia Iehova i teia tu. Te ako te tere atura i to te au kotinga tau me kare te maata atura i to te akakoro anga tei manakoia no te akatikatikaanga e te apiianga e tika rai e mea akariri ia.

21. Akapeea e raukaʼi i te au metua i te akataka me te meitaki ra ta ratou ako anga?

²¹ Akapeea te au metua e kite ei me te puapinga ra ta ratou ako anga? Penei ka tau ratou kia ui kia ratou uaorai, ‘Eaa tei akatupuia e taku ako anga?’ Ka tau ia kia apii. Ka tau taau tamaiti kia kite eaa te ako anga i raveiaʼi. Ka tau katoa te au metua kia akamanako i te tupu anga i muri akera i ta ratou akatikatika anga. E tika, e vaitata te au tamariki ravarai ka taitaia i te akamata anga te ako anga. (Ebera 12:11) Inara kare e tau te ako kia akariro i tetai tamaiti kia mataku me kare kia manako e kua akarukeia aia me kare kia manako aia e e tamaiti kino tikai aia. I mua ake i te akatikatikaanga i tona au tangata, kua na ko maira Iehova: “Auraka koe e mataku, . . . ei vaitata katoa au ia koe.” (Ieremia 46:28) Ae, ka tau te akatikatika anga kia raveia na roto i tetai mataara e ka kite taau tamaiti e e vaitata katoa ua koe kiaia, ei metua turu aroa ua.

 KIMIANGA “ARATAKI ANGA KARAPE”

22, 23. Akapeea e raukaʼi ia koe te arataki anga te anoanoia ra kia patu i tetai ngutuare tangata mataora?

²² Ka tika ra tatou kia akameitaki e kua orongaia mai e Iehova te au apinga ta tatou e anoano ra ei patu i tetai ngutuare tangata mataora. Inara kare te raukaanga anake te au apinga ra. Ka tau tatou kia akamatau i te taangaanga tika ia ratou. Ei akatauanga, penei ka akatupu tetai kamuta i etai ravenga tau kore i tana akono anga i tana au apinga angaanga ra. Penei ka rave aia i etai ei rave anga tarevake takiri. I raro ake i te reira au turanga, ka akariro tana au ravenga kia akatupu mai i tetai apinga tau kore. Mei te reira katoa oki, penei te kite nei koe i etai au ravenga kare e meitaki te pipini maira ki roto i toou ngutuare tangata ra. Penei ko etai e maroiroi te tomo anga oonu e e ngata kia tauiia. Inara, e aru i te apii o te Puka Tapu: “Ka akarongo te tangata pakari e ka maata atu tana apii anga, e ko te tangata kite ra koia te ka kimi i te arataki anga karape.”—Maseli 1:5, NW.

²³ Ka rauka ia koe te arataki anga karape na te rave tamouanga i te kimi anga i te kite i te Atua. Kia matakite i te au kaveinga Puka Tapu te piri atura ki te oraanga ngutuare tangata, e ka rave ei i te au akatikatika anga i te ngai te anoanoia ra. E akara i te au Kerititiano pakari tei akanoo maira i tetai akaraanga meitaki ei au tokorua akaipoipo e ei au metua. E tuatua atu kia ratou. I runga ravao, e tuku atu i toou au manako taitaia kia Iehova na roto i te pure. (Salamo 55:22; Philipi 4:6, 7) Ka rauka iaia i te tauturu ia koe kia rekareka i tetai oraanga ngutuare tangata rekareka te ka akangateitei iaia ra.

[Tataanga Rikiriki]

E TIMATA I TOOU KITE

Akapeea te tiratiratu, te komunikeiti anga,te akangateitei anga, e te kauraro anga i te tauturu anga i te akaipoipo anga kia mataora?

Na teea au mataara te au metua i te akapapu anga ki ta ratou tamariki i to ratou aroa?

Eaa te au tumu te o atura ki te ako anga tika?

[Au Uianga Apii]

 [Tutu i te kapi katoa i te kapi 147]