Pene 10

Te Tutara nei te Patireia o te Atua

1, 2. Akapeea te akapapu anga e e puapinga kore te au kavamani tangata nei?

PENEI kua tupu kia koe i te okoanga i tetai apinga, e kiteia ake e kare te reira e angaanga ana. E karanga tatou e penei kua pati atu koe i tetai tangata maani kia meitaki. Inara, i muri poto ua ake i tana “maani anga” i taua apinga ra, kua kino akaou. Mei teaa ra te reka kore i te reira!

² Mei te reira katoa oki te au kavamani tangata nei. Kua anoano tamou te au tangata i tetai kavamani te ka akapapu i te au e te mataora. Inara, te au tauta anga maroiroi kia akatikatika i te au ngai e kino ra i roto i te totaiete tangata kare i puapinga tikai. E manganui ua atu te au koreromotu au tei maaniia—e kua aatiia. Pera katoa oki, ko teea te kavamani tei rauka iaia te takore atu i te putaua, te manako kino, te rave kino, te maki mate, e te kino o te pirianga tangata? Kua topa roa te tutara a te tangata kare e rauka kia akatikatikaia. Noatu ko te ariki pakari o Iseraela ko Solomona kua ui e: “Koai oki te tangata i kite i tona uaorai arataa?”—Maseli 20:24.

3. (a) Eaa te tumu tuatua o ta Iesu tutu aereanga? (e) Akapeea etai au tangata i te akataka anga i te Patireia o te Atua?

³ Auraka e manakonako kore! Kare te kavamani ngaueue kore i te moemoea ua. Ko te tumu tuatua ia o ta Iesu ra tutu aereanga. Kua tapaia e ia ko “te basileia o te Atua,” e kua apii aia i tana au pipi kia pure no te reira. (Luka 11:2; 21:31) Inara, ko te Patireia o te Atua tetai apinga te taikuia ra i roto i te au akonoanga. Ko te tika, e au mirioni ua atu te pure putuputu ra no te reira i te au ra tataki tai ia ratou e pure ra i te Pure a  te Atu (kua karanga katoaia ko te pure e to Matou Metua me kare te pure akaraanga). Inara e tuke tuke te pauanga a te au tangata me uiia atu, “Eaa te Patireia o te Atua?” Kua karanga tetai papaki, “Tei roto ia i to ngakau.” Kua karanga etai i te reira ko te rangi. Te oronga maira te Puka Tapu i tetai pauanga taka meitaki, mei ta tatou ka kite.

E PATIREIA MA TE AKAKORO ANGA

4, 5. Eaa a Iehova i iki ei kia apai mai i tetai akakite anga ou i tona tu ngateitei, e eaa ta te reira ka akatupu mai?

⁴ Te vai tamou ua ra rai te Atua ko Iehova ei Ariki, me kare ei Tutara Ngateitei, i te ao katoa e pini ua ake. Ko te tika e nana i anga mai i te au mea ravarai te taaki ra iaia ki taua turanga teitei ra. (1 Paraleipomeno 29:11; Salamo 103:19; Angaanga 4:24) Inara te Patireia ta Iesu i tutu aere ra tei raro ake ia, me kare e tuanga rua ia, ki to te Atua ra tu ngateitei i te ao katoa e pini ua ake. E akakoro anga taka meitaki to te reira Patireia Mesia ra, inara eaa ia?

⁵ Mei tei akatakaia mai i te Pene 6, kua meameaau nga tangata tokorua mua i to te Atua mana. No te au maro anga tei akatuia mai, kua iki a Iehova kia apai mai i tetai akakite anga ou i tona tu ngateitei. Kua akakite mai te Atua i tana akakoro anga kia akatupu mai i tetai “uanga” ei akaparuparu i te Ovi, koia Satani, e kia takore atu i te au tupu anga o te ara tei akatuangaia mai ki te au tangata. Ko Iesu Karaiti te “uanga” maata, e ko “te basileia o te Atua” te rima rave, te ka autu takiri ki rungao ia Satani. Na roto i teia Patireia, ka akaoki akaou mai a Iesu Karaiti i te tutara anga ki rungao i te enua i roto i te ingoa o Iehova e ka akatika i to te Atua tu ngateitei tika tikai e tuatau ua atu.—Genese 3:15; Salamo 2:2-9.

6, 7. (a) Teiea te Patireia, koai ma te Ariki e tona aronga tutara kapiti kiaia? (e) Koai ma te au tangata i raro ake i taua Patireia ra?

⁶ Kia tau ki ta tetai uri anga i te au tuatua a Iesu ki te au Pharisea rave kino ra, kua karanga aia: “Te basileia o te Atua, tei roto ïa ia kotou nei.” (Luka 17:21) Ko te aite anga ainei o ta Iesu tuatua e tei roto te Patireia i te au ngakau rave kino o taua au tangata viivii ra? Kare. I tetai uri anga tika atu o te reo Ereni mua ana te tatau ra: “Te patireia o te Atua tei rotopu ia kotou na.” (New World Translation) Tei rotopu ia ratou, a  Iesu, na reira te taikuanga iaia uaorai ei Ariki no te tuatau ki mua. E mamao ke atu i tetai apinga i roto i te ngakau o tetai tangata, e tika tikai te Patireia o te Atua, e kavamani te angaanga ra e tutara tona e te aronga kauraro oki. E kavamani ia no te rangi, no te mea kua tapaia e ko “te patireia o te au rangi ra” e ko “te basileia o te Atua.” (Mataio 13:11, NW; Luka 8:10) I roto i te orama, kua kite te peroveta ko Daniela i tona Tutara “mei te Tamaiti a te tangata ra” tei takiia mai ki mua i te Atua Mana Katoatoa e kua orongaia maira te “mana, e te kakā, e te basileia nona, kia tavini atu te au tangata katoa, te pa enua, e te au reo, kiaia: tona mana e mana mutu kore ïa.” (Daniela 7:13, 14) Koai teia Ariki? Ae, te karanga ra te Puka Tapu ia Iesu Karaiti ko “te Tamaiti a te tangata nei.” (Mataio 12:40; Luka 17:26) Ae, kua akamana a Iehova i tana Tamaiti, ia Iesu Karaiti, ei Ariki.

⁷ Kare a Iesu e tutara koia anake ua. Kapiti atu kiaia e 144,000 tei “okoia no roto i teianei ao” kia riro ei ui ariki e te kau taunga kapitiia kiaia ra. (Apokalupo 5:9, 10; 14:1, 3; Luka 22:28-30) Ko te au tangata o raro ake i te Patireia o te Atua ra e pamiri tangata no te ao katoa nei tei kauraro ra i ta Karaiti arataki anga. (Salamo 72:7, 8) Inara, akapeea tatou e papu ei e ka akatika tikai te Patireia i te tu ngateitei o te Atua ra e ka akaoki akaou mai i te au tu parataito ki to tatou enua nei?

TE TU TIKA TIKAI O TE PATIREIA O TE ATUA

8, 9. (a) Akapeea tatou me akatutu i te tu tau kia irinakiia te au taputou o te Patireia o te Atua ra? (e) Eaa tatou ka papu ei e e tika tikai te Patireia?

⁸ E manako ua e kua pou toou kainga i te ai. I teianei kua taputou mai tetai oa e au apinga ra tana e nana e tauturu i te maani akaou i toou are e te oronga mai i te kai na toou ngutuare tangata. Me kua tuatua ua ana taua oa ra i te tika kia koe i mua ana, kare ainei koe e irinaki kiaia? Penei i to oki anga mai ki te kainga mei te angaanga i tetai ra i muri mai kua kite e kua akamata ke ana te aronga angaanga i te tama i te au teita mei te ai ra e kua apaiia mai te kai na toou ngutuare tangata. Kare e ekoko anga ka irinaki takiri koe e ma te topaanga o te tuatau, kare e akaoki akaou uaia mai te au apinga mari ra ka meitaki roa atu i to mua ana.

 ⁹ Mei te reira katoa, te oronga maira Iehova i te akapapu anga e e tika tikai te Patireia. Mei tei akaariia mai i te puka Ebera i te Puka Tapu ra, e manganui te au tu o te Ture tei akaata maira i te akanoonoo anga no te Patireia. (Ebera 10:1) Kua kitea katoaia te au akatutu anga o te Patireia o te Atua ra i te patireia o Iseraela i te enua nei. Kare te reira i te kavamani ua nei, no te mea kua noo te au tutara ki runga i “te terono o Iehova.” (1 Paraleipomeno 29:23) Pera katoa oki, kua totouia mai: “Kare te sepeta e taka ke ia Iuda, e te akava i roto i ona vaevae, e tae ua mai te Silo ra; e koia ta te pa enua e akarongo.” (Genese 49:10) * Ae, i roto i teia papa anga tupuna o te au ariki o Iuda e anauia mai ei a Iesu, koia te Ariki mutu kore o te kavamani o te Atua ra.—Luka 1:32, 33.

10. (a) I naea i akanooiaʼi te pange o te Patireia Mesia o te Atua ra? (e) Eaa te angaanga puapinga maata i te enua nei te ka raveia e teia tutara tauturu akamanakoia o Iesu?

¹⁰ Kua akanooia te pange o te Patireia Mesia o te Atua ra ma te iki anga o nga apotetoro a Iesu ra. (Ephesia 2:19, 20; Apokalupo 21:14) Ko ratou te aronga momua o te 144,000 te ka tutara katoa ei ui ariki i te rangi ma Iesu Karaiti. Ia ratou i runga i te enua nei, ka rave teia aronga manakoia kia tutara kapiti i tetai angaanga akakitekiteanga, i te raveanga kia tau ki ta Iesu akauenga: “Ka aere . . . e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti e no te Vaerua Tapu.”—Mataio 28:19.

11. Akapeea te rave anga i te angaanga tutu aereanga i te Patireia i teia tuatau nei, e eaa ta te reira e akatupu ra?

¹¹ Te akarongoia nei te akauenga kia akariro ei pipi i teianei na tetai tu aite koreia i mua ana. Te akakitekite nei te Au Kite o Iehova i te tuatua meitaki o te Patireia takapini i te ao katoa nei, kia tau ki te au tuatua totouia e Iesu ra: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Ei tuanga no te angaanga tutu aere i  te Patireia, te raveia nei tetai porokarama maata no te apiianga. Te aronga te kauraro ra i te au ture e te au kaveinga o te Patireia o te Atua te kite nei i te au e te taokotai anga kare e rauka i te au kavamani a te tangata. Pouroa teia te oronga mai nei i te akapapu anga taka meitaki e e mea tika tikai te Patireia o te Atua ra!

12. (a) Eaa ra i tau ei kia tapaia te aronga akakitekite i te Patireia ko te Au Kite o Iehova ra? (e) Eaa te tuke i te Patireia o te Atua mei te au kavamani tangata nei?

¹² Kua tuatua a Iehova ki to Iseraela e: “Ko kotou toku kite, e toku tavini i ikiia e au ra.” (Isaia 43:10-12) Ko Iesu, “te kite tuatua-mou ra,” kua akakitekite maroiroi i te tuatua meitaki  o te Patireia ra. (Apokalupo 1:5; Mataio 4:17) No reira e mea tau e kia mou te aronga akakitekite aere i te Patireia i teia tuatau nei i taua ingoa akataoongaia tu-Atua ra e te Au Kite o Iehova. Inara eaa te Au Kite ka akapou ei kia maata te taime e te maroiroi i te tuatuaanga kia etai ke atu no te Patireia o te Atua ra? Te rave nei ratou i teia no te mea ko te Patireia anake te manakonako anga no te au tangata nei. Kare ra e roa atu ka ope takiri te au kavamani a te tangata nei, mari ra kare te Patireia o te Atua e pera. Te tapa nei a Isaia 9:5, 6 i tona Tutara, koia Iesu, ko “te Ariki no te au” e kua kapiti katoa maira: “Kare e mutu te tupu anga o tona ra basileia, e tona au.” Kare te Patireia o te Atua i aite ki te au kavamani a te tangata nei—tei ko nei i teia ra kua kore apopo. E tika ta Daniela 2:44 i tuatua: “E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke. . . . E ka vai rai te reira e tuatau ua atu.”

13. (a) Eaa etai au manamanata te ka autu te Patireia o te Atua i te akatikatika anga? (e) Eaa ka papu ei ia tatou e ka akatupuia te au taputou a te Atua ra?

¹³ Koai tetai ariki tangata nei te ka rauka iaia i te akakore i te tamaki, te rave kino, te maki, te onge, e te ngere i te ngutuare? Pera katoa, koai tetai tutara i te enua nei te ka rauka iaia i te akatuakaou i te aronga tei mate ra? Ka rauka i te Patireia o te Atua e tona Ariki i te rave i teia au apinga. Kare te Patireia e riro kia puapinga kore ua, mei tetai apinga kino ua ra te anoano putuputuia ra te ripeaia. Kareka ra, ka autu te Patireia o te Atua ra, no te mea te taputou maira Iehova e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.” (Isaia 55:11) Kare e puapinga kore ta te Atua ra akakoro anga, inara aea e akamataʼi te tutara Patireia?

TUTARA PATIREIA—AEA?

14. Eaa te manako tarevake o te au pipi a Iesu no runga i te Patireia, inara eaa ta Iesu i kite no runga i tana tutara anga?

¹⁴ “E te Atu, ei teianei aina koe e akaoki mai ei i te au kia Iseraela?” Na teia uianga tei uiia ra e te au pipi a Iesu i akakite mai e kare ratou i kite ake i te akakoro anga o te Patireia  o te Atua e te tuatau i akatakaia no te akamata anga o tana tutara anga. I te akamatakiteanga ia ratou e auraka e manako ua i taua tumu ra, kua karanga atura Iesu: “Kare ïa i akonoia kia kite kotou i te taime e te tuatau, ta te Metua i vaoo iaia uaorai.” Kua kite a Iesu e ko tana tutara anga i rungao i te enua kua akatakaia no te tuatau ki mua, i muri roa mai i tona tuakaouanga e te aere anga ki te rangi. (Angaanga 1:6-11; Luka 19:11, 12, 15) Kua totou mai te au Tuatua Tapu i teia. Na ea?

15. Akapeea ta Salamo 110:1 akamarama anga i te tuatau no ta Iesu tutara anga?

¹⁵ I te taiku totou anga kia Iesu ei “Atu,” kua na ko maira te Ariki ko Davida: “Kua karanga aturā Iehova ki toku Atu, Ka noo koe ki toku rima katau nei, e kia akariroia e au to au enemi ei pange vaevae noou.” (Salamo 110:1; akaaite ia Angaanga 2:34-36.) Te akakite maira teia totou e kare ta Iesu tutara anga i akamata i muri ua ake i tona aere anga ki te rangi. Mari ra, ka tiaki aia ki te rima katau o te Atua ra. (Ebera 10:12, 13) Eaa te roa o teia tiakianga? Aea e akamataʼi tana tutara anga? Te tauturu maira te Puka Tapu ia tatou i te kimi kia kite i te au pauanga.

16. Eaa tei tupu i te 607 M.T.N., e eaa te piri anga o teia ki te Patireia o te Atua ra?

¹⁶ Ko te oire okotai anake i te enua katoa nei tei tukuia ra to Iehova ingoa ki rungao ko Ierusalema ia. (1 Ariki 11:36) Ko te oire maata katoa ia no tetai patireia i te enua nei tei marekaia e te Atua ra ei akatutu i te Patireia o te Atua i te rangi ra. No reira, e apinga puapinga maata te akapouangaia o Ierusalema ra e to Babulonia i te 607 M.T.N. Na teia tupu anga i akairo mai i te akamataanga o tetai tapu anga roa i ta te Atua ra tutara tika anga mai ki rungao i tona au tangata i te enua nei. I etai ono anere mataiti i muri iora, kua akakite mai a Iesu e te vaira taua tuatau tapu anga i te tutara ra, no te mea kua tuatua aia: “Ka takatakaiia oki Ierusalema e te au etene, e kia ope tikai to te etene tuatau.”—Luka 21:24.

17. (a) Eaa “to te etene tautau,” e eaa te roa o te tuatau no ratou? (e) I naea i akamataʼi “to te etene tuatau” e i naea i ope ei?

¹⁷ “To te etene tuatau,” ko te tuatau ia e tukuiaʼi te au kavamani o teianei ao kia tapu i te tutara anga tei marekaia ra e te  Atua. Kua akamata mai te reira tuatau mei te akapouangaia a Ierusalema i te 607 M.T.N., e kua akakite maira Daniela e ka vairai te reira no te “itu ua atu tuatau.” (Daniela 4:23-25) Eaa te roa o te reira? Te akaari maira te Puka Tapu e ko te toru e te apa “tuatau” e 1,260 au ra. (Apokalupo 12:6, 14) E taki rua i te reira tuatau, me kare e itu tuatau, ka tae ki te 2,520 au ra. Inara kare e apinga maata i tupu i te openga o taua tuatau poto ra. Na te akatakaanga e “okotai rā okotai ïa mataiti” ki ta Daniela totou e te tatauanga e 2,520 mataiti mei te 607 M.T.N. mairai, no reira, ka tae mai tatou ki te mataiti 1914 T.N.—Numero 14:34; Ezekiela 4:6.

18. Eaa ta Iesu i rave i muri poto ake i te raukaanga iaia te mana Patireia, e eaa ta teia i akatupu ki te enua nei?

¹⁸ Kua akamata ainei a Iesu i te tutara ki te rangi i te reira taime? Ka uriuriia te au tumu no te Tuatua Tapu ei akatika e kua rave aia i te reira, i te pene te ka aru mai. Inara, kare te akamataanga o ta Iesu tutara anga e akairoia na te tupu viviki anga o te au ki runga i te enua nei. Te akaari maira Apokalupo 12:7-12 e i muri poto ua ake i te raukaanga iaia te Patireia, ka uri mai a Iesu ia Satani e te au angera temoni mei te rangi maira. Ka riro teia ei mate no te enua nei, inara e mea rekarekaanga ngakau kia tatau e “e manga tuatau poto ua” to te Tiaporo e toe nei. Kare e roa atu ana, ka rauka ia tatou te rekareka kare no te tutara anga anake o te Patireia o te Atua mari ra no te mea ka apai katoa mai te reira i te au akameitakianga ki te enua nei e te au tangata akarongo ra. (Salamo 72:7, 8) Akapeea tatou i kite ei e kare e roa atu ka tupu teia?

[Tataanga Rikiriki]

E TIMATA I TOOU KITE

Eaa te Patireia o te Atua, e ka tutara mai ia meiea mai?

Koai ma te tutara ra i te Patireia, e koai ma te aronga kauraro i te reira?

Akapeea ta Iehova akapapu mai anga kia tatou e e tika tikai tona Patireia?

I naea i akamataʼi “to te etene tuatau” e i na ea i ope ei?

[Au Uianga Apii]

[Pia i te kapi 94]

ETAI TUPU ANGA PUAPINGA MAATA TE PIRI ATURA KI TE PATIREIA O TE ATUA

• Kua akakite a Iehova i tana akakoro anga kia akatupu mai i tetai “uanga” te ka akaparuparu i te mimiti o te Ovi, koia Satani te Tiaporo ra.—Genese 3:15.

• I te 1943 M.T.N., kua akakite maira Iehova e ko teia “uanga” ko tetai uanga tangata no Aberahama.—Genese 12:1-3, 7; 22:18.

• Kua akakite mai te Ture koreromotu tei orongaia ki to Iseraela i te 1513 M.T.N. i tetai “ata . . . no te au mea memeitaki a muri atu.”—Exodo 24:6-8; Ebera 10:1.

• Kua akamata te patireia o Iseraela i te enua nei i te 1117 M.T.N., e kua tamouia te reira i muri akera i te papa anga tupuna o Davida.—1 Samuela 11:15; 2 Samuela 7:8, 16.

• Kua akapouia a Ierusalema i te 607 M.T.N., e kua akamata “to te etene tuatau.”—2 Ariki 25:8-10, 25, 26; Luka 21:24.

• I te 29 T.N., kua akatainuia a Iesu ei Ariki Ikiia e kua rave aia i tana angaanga orometua i te enua nei.—Mataio 3:16, 17; 4:17; 21:9-11.

• I te 33 T.N., kua aere atu a Iesu ki te rangi, i reira kua tatari aia ki te rima katau o te Atua ra kia tae ki te akamata anga o tana tutara.—Angaanga 5:30, 31; Ebera 10:12, 13.

• Kua akateronoia a Iesu i te Patireia i te rangi i te 1914 T.N. i te openga “to te etene tuatau.”—Apokalupo 11:15.

• Kua uriia mai a Satani e tana au temoni katoa ki raro i te tuanga o te enua nei e kua akatupu kia maata te mate ki te au tangata nei.—Apokalupo 12:9-12.

• Te akaaere nei a Iesu i te tutu aereanga i te tuatua meitaki o te Patireia o te Atua ra i te ao katoa.—Mataio 24:14; 28:19, 20.