KA VAI tiratiratu ainei tetai tangata ki te Atua me timataia aia e i te akara anga kare tona akarongo e puapingaia i te pae materia? Kua uiia e kua pauia teia uianga e te tangata ko Iobu.

I te tuatau e noo ra to Iseraela i Aiphiti, te ora ra tetai tangata ko Iobu, e kopu tangata no Aberahama, i te enua tei kapikiia i teia tuatau ko Arapia. I taua taime rai, kua uipa te au angera i mua i te aroaro o te Atua e kua aere mai a Satani na rotopu ia ratou. I mua i te katoatoa i te rangi, kua akakite a Iehova i tona irinaki papu i tona tavini tiratiratu ko Iobu. Te tika, karanga a Iehova kare e tangata i te enua nei i aite mei ia Iobu rai, e tangata apa kore e te tiratiratu. Inara kua māro mai a Satani e kua tavini a Iobu i te Atua no te mea kua paruruia e kua akameitakiia aia e te Atua. Karanga a Satani e me apai ke ia te au apinga katoatoa a Iobu, ka akakino aia i te Atua.

Kua akatika te Atua ia Satani kia akangere ia Iobu i tana apinganui, tana au tamariki, e oti tona oraanga kopapa meitaki. No tona kite kore e na Satani i akatupu i teia au mea, kare a Iobu i mārama ana i te tumu i akatika ai te Atua i teia au timataanga. Noatu ra, kare a Iobu i ara ana i te Atua.

E toru au oa pikikaa tei aravei mai ia Iobu. Na roto i ta ratou au tuatua e manganui tei tataia i roto i te puka a Iobu, kua akaapa tarevake ratou ia Iobu no tana au ara uunaia e te akautunga ra te Atua iaia. Akakite katoa ratou e kare te Atua e mareka ana i tona au tavini e kare katoa ona irinaki ia ratou. Kua kopae a Iobu i to ratou manako tarevake. Ma te tu papu, akakite a Iobu e ka tamou aia i tona tu tiratiratu e mate ua atu ei.

Inara kua rave a Iobu i te tarevake na te akamanako maata roa atu i tona tu tuatua tika. I teia taime kua tuatua mai tetai mapu tane ko Eliu, tei akarongo ki te akoanga o ta ratou uriurianga manako. Kua ako a Eliu ia Iobu no tei akangaropoina e e puapinga maata atu te akatika anga i to Iehova tu ngateitei i to tetai tangata ua nei. Kua ako pakari katoa a Eliu i te au oa pikikaa o Iobu.

I reira, kua tuatua te Atua ko Iehova kia Iobu i te akatanotano i tona manako. Na te akamārama anga i te au mea umere tana i anga, kua apii a Iehova ia Iobu no runga i te tu meangiti ua o te tangata me akaaiteia ki to te Atua turanga teitei. Kua āriki akaaka a Iobu i te akoanga a te Atua. No te mea “kua ki te Atu i te aroa e te takinga-meitaki maata,” kua akaora a Iehova i to Iobu maki, kua akamaata i tana apinganui e taki rua taime te maata, e kua akameitaki iaia ma te tai ngaru tamariki. (Iakobo 5:11) Na te vai tiratiratu anga kia Iehova noatu te timataanga pakari, kua pau papu atu a Iobu i ta Satani akaapaanga e kare te tangata e vai tiratiratu ki te Atua me timataia mai aia.

​—No roto mai i te puka a Iobu.