NO RUNGA i te pure, e maata te au akonoanga tei akamou ki runga i te turanga pae kopapa, mei te pure tu ua, te tuturi me kore te noo ki raro, te aerenga tuatua e te au peu. Inara, ka tauturu te Pipiria ia tatou kia tuku i teia au mea i te pae e te akamou ki runga i te au tuanga puapinga o te uianga, “Akapeea tatou me pure?”

Akaari mai te Pipiria e kua pure te au tavini o te Atua i te au ngai e te au turanga tukeke. Kua pure ngakau ua ratou me kore kua pure maata kia tau ki te turanga. Kua pure ratou ma te akara ki te rangi me kore te tupou ki raro. Kare ratou i taangaanga ana i te au tiki, ei pūpū, me kore te au puka pure ei tauturu ia ratou, mari ra kua pure ratou ma te ngakau tae. Eaa te tumu i akarongo ei te Atua ki ta ratou pure?

Tei taikuia i te atikara i mua atu ana, kua pure anake ratou ki te Atua okotai​—ko Iehova. Teia tetai akaou tumu. Ka tatau tatou ia 1 Ioane 5:​14: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.” Ka anoanoia kia rotai ta tatou pure ki te anoano o te Atua. Eaa tona aiteanga?

Kia rotai ta tatou pure ki te anoano o te Atua, ka anoanoia tatou kia kite eaa tona anoano. No reira, ko te apii Pipiria tetai ravenga puapinga no te pure. Ko te aiteanga ainei e kare te Atua e akarongo mai kia tatou no te mea kare tatou i te aronga kimi kite no te Pipiria? Kare, mari ra ka inangaro te Atua ia tatou kia apii i tona anoano, kia mārama i te reira e kia akono i te reira. (Mataio 7:​21-​23) Ka anoanoia kia rotai ta tatou pure ki ta tatou i apii.

Me apii maata atu tatou no runga ia Iehova e tona anoano, ka akatupu tatou i te akarongo​—tetai akaou tuanga puapinga no te pure. Karanga a Iesu: “E te au mea katoa, ta kotou e pati atu i te pure, ma te akarongo, ka rauka ïa ia kotou.” (Mataio 21:22) Kare te akarongo i te irinaki ua i te au mea taau e rongo ra. Mari ra, tona aiteanga kia irinaki i tetai mea noatu kare koe e kite mata i te reira, kua akatumuia ki runga i te au akapapuanga mou tikai. (Ebera 11:1) E maata te au akaraanga i roto i te Pipiria tei akapapu mai e noatu kare tatou e kite mata ia Iehova, e tika tikai aia, e irinakiia, e ka inangaro i te pau i te pure a te aronga i akarongo iaia. Pera katoa, ka rauka ia tatou kia pati e kia akamaata mai i to tatou akarongo, e ka inangaro tikai a Iehova i te oronga mai i ta tatou e anoano ra.​—Luka 17:5; Iakobo 1:​17.

Teia akaou tetai mea ke ka anoanoia tatou kia kite akapeea me pure. Karanga a Iesu: “Kare ua e tangata e tae ki te Metua ra, mari ra ei iaku.” (Ioane 14:6) No reira ko Iesu te mataara e tae ei ta tatou pure ki te Metua ko Iehova. No reira a Iesu i akakite ei ki tana au pipi kia pure ma tona ingoa. (Ioane 14:13; 15:16) Kare te aiteanga e ka pure tatou kia Iesu. Mari ra, ka pure tatou na roto i te ingoa o Iesu, ma te akamaara e ko Iesu te tumu i tae ei ta tatou pure ki to tatou Metua tapu e te apa kore.

I tetai atianga kua ui ta Iesu au pipi kiaia: “E te Atu, e apii mai ia matou nei i te pure.” (Luka 11:1) I te akaraanga, kare ratou i ui ana i te au manako ta tatou i uriuri akenei i roto i teia atikara. Mari ra, mei te mea e te ui ra ratou, ‘Eaa ta matou ka pure?’