KARE e ekokoanga kua kite koe i roto i tetai au akonoanga, kua akamou ki te ngai ka pure ratou, i roto i te au are maatamaata e te moni e pera katoa kua akanoo i te ora tikai kia rave i ta ratou pure. Kua kotinga ainei te Pipiria i te ngai e te ora kia pure tatou?

Kua akaari mai te Pipiria e e au atianga tau tetai no te pure. Ei akaraanga, i mua ake ka kaikai ei a Iesu e tana au pipi, kua akameitaki ratou i te Atua na roto i te pure. (Luka 22:17) E me akaputuputu mai tana au pipi no te akamorianga, kua pure kapipiti ratou. Mei reira mai, kua aruia rai teia tu i roto i te au sunago o te ngati Iuda e i roto i te iero i Ierusalema. Kua akakoro rai te Atua i te iero kia taangaangaia ei “are pure no te pa enua ravarai.”​—Mareko 11:17.

Me akaputuputu mai te au tavini o te Atua e me pure kapipiti ratou, e mea papu e ka akarongoia ta ratou patianga. Me e manako taokotai to ratou e kua rotai ta ratou pure ki te au kaveinga Pipiria, ka mareka tikai a Iehova. Penei ka akakeu ta ratou patianga i te Atua kia rave i tetai apinga, penei kare aia e rave. (Ebera 13:18, 19) E pure putuputu ana te Au Kite o Iehova i ko i ta ratou uipaanga. Te pati akaakaia atu nei koe kia aere mai ki te Are Uipaanga Patireia vaitata mai kia koe, kia akarongo koe ki teia au tu pure.

No reira, kare te Pipiria e kotingaia i te ngai e te ora ka pure ei te tangata. I roto i te Pipiria, e maata te au tavini o te Atua tei pure ana i te au ora e te ngai tukeke. Karanga a Iesu: “Kareka kia pure koe, e aere ki roto i toou pia, e topiri marie i te pa, ka pure ei ki toou Metua, e na to Metua, tei kite ua mai i te mea ngaro, kore ua rai aia e kitea, e o mai akakite ua i taau tutaki.”​—Mataio 6:6.

Kare ainei teia i te patianga pumaana? Ka rauka ia koe i te pure i tetai ua atu taime ki te Atu Ngateitei i te ao katoa e pini ua ake, e ko koe anake ua, e mea papu ka akarongo mai aia kia koe. No reira rai a Iesu i aere ei ki tetai ngai koia anake ua kia pure! I tetai atianga, kua pure aia i te po katoa ki te Atua i te pati no te aratakianga kia rave i tetai ikianga puapinga.​—Luka 6:​12, 13.

Akakite mai te Pipiria no runga i tetai au tane e te vaine tei pure no te tauturu kia rave i te au ikianga meitaki e kia autu atu i te au turanga ngata. I tetai taime kua pure ratou ma te reo maata e ko tetai pae, pure ngakau ua; kua pure ratou ei pupu e pera ko ratou anake ua. Ko te mea puapinga kua pure ratou. Kua pati te Atua ki tona au tavini: “Auraka e tukutuku i te pure.” (1 Tesalonia 5:​17) Ka akarongo ua rai aia ki te aronga te rave ra i tona anoano. Kare ainei teia i te patianga aroa?

I teia tuatau i roto i teia ao aroa kore, ka manako rai te maataanga me e puapinga rai te pure. Penei ka ui koe, ‘Ka tauturu rai te reira iaku?’