KA TAUTURU ainei te pure ia tatou? Akaari mai te Pipiria e ae, kua tauturu te pure i te au tavini o te Atua. (Luka 22:40; Iakobo 5:​13) Te tika, ka tauturu tikai te pure ia tatou i te pae vaerua, te pae manako ngakau e te pae kopapa. Akapeea ra?

Penei kua orongaia te apinga aroa ki tetai tamaiti. Ka apii ainei koe iaia kia manako i te akameitaki ua? Me ka apii ainei koe iaia kia akakite i tona tu akameitaki tikai? Me akakite koe i te au mea taau e manako ra, ka papu ia koe e ka rave koe i te reira. Kua aite ainei teia me pure koe ki te Atua? Ae! Akamanako ana i teia au akaraanga.

Pure no te akameitaki anga. Me akameitaki tatou i to tatou Metua no te au apinga meitaki tei tupu kia tatou, ka akamou tatou ki runga i te au akameitakianga. Te ka tupu, ka akaari tatou i te tu mareka ua, te mataora, e te manako papu.​—Philipi 4:6.

Ei akaraanga: Kua akakite a Iesu i tona tu meitaki tikai no tei akarongo mai tona Metua e tei pau mai i tana au pure.​—Ioane 11:41.

Pure no te akakoreanga ara. Me pati tatou ki te Atua kia akakore mai i ta tatou ara, ka akaketaketaia to tatou akava ngakau, ka tataraara tatou ma te ngakau tae, e ka akamanako tatou i te tu kino ta te ara ka akatupu. Ka maru katoa te apainga teiaa no te apa.

Ei akaraanga: Kua pure a Davida ma te tataraara e te aue no te ara tana i rave.​—Salamo 51.

Pure no te aratakianga e te pakari. E pati kia Iehova kia oronga mai i tona pakari e kia arataki ia tatou kia rave i te au ikianga meitaki, te ka tauturu ia tatou kia akaari i te tu akaaka. Na te reira e akamaara i to tatou turanga e ka tauturu te reira ia tatou kia irinaki ua ki to tatou Metua i te rangi.​—Maseli 3:5, 6.

Ei akaraanga: Kua pati akaaka a Solomona no te aratakianga e te pakari kia tutara aia i runga ake i te ngati Iseraela.​—1 Ariki 3:​5-​12.

Pure no te tuatau taitaia. Me e manako ngakau taitaia tikai to tatou, e riringi i to tatou ngakau ki te Atua e nana e akapumaana mai ia tatou me irinaki ua rai tatou kiaia, eiaa ki roto ia tatou uaorai.​—Salamo 62:8.

Ei akaraanga: Kua pure te Ariki ko Asa no te tauturu kia tamaki atu i tona enemi.​—2 Paraleipomeno 14:11.

Pure no tetai ke. Ka tauturu te pure ia tatou kia kore e manako ia tatou uaorai, e ka akatupu te reira i te tu aroa e te tangi no tetai ke.

Ei akaraanga: Kua pure a Iesu no tana au pipi.​—Ioane 17:​9-​17.

Pure no te akapaapaa. Me akapaapaa tatou ia Iehova no tona tu meitaki e te au mea tana i anga, ka maata atu to tatou akaperepere e te akangateitei anga iaia. Ka tauturu teia au pure ia tatou kia akavaitata atu ki to tatou Atua e to tatou Metua.

Ei akaraanga: Kua akapaapaa ngakau tae a Davida i tona Atua no te au mea tana i anga.​—Salamo 8.

Ko tetai akaou akameitaki anga no te pure ko te “au o te Atua, ko tei maata ua atu i te kite tangata.” (Philipi 4:7) Kia rauka te ngakau maru i roto i teia ao kino, e akameitaki anga teia kare e kite putuputuia ana. Ka akatupu katoa te reira i te oraanga meitaki. (Maseli 14:30) Ka rauka ainei teia tu na roto i ta tatou tauta anga? Me kore e mea puapinga atu ainei tetai?