KA AERE ainei te au pure ki te ngai okotai, ka akarongo ainei te Atua ki te au pure katoatoa? I roto i teianei ao, e mea matau teia manako. Ka āriki te manganui tei turu i te pirianga i rotopu i te au akonoanga tukeke i teia manako, e ka inangaro ratou kia taokotai te au akonoanga pouroa noatu to ratou tuke. Inara, e mea tika ainei teia irinakianga?

Te apii maira te Pipiria e e aere ke ana te pure a te manganui. I te tuatau i tataia te Pipiria, e peu matau na te tangata kia pure ki te au itoro. Inara, kua akamatakite putuputu te Atua e auraka kia pera. Ei akaraanga, te akakite ra a Salamo 115:​4-6 no runga i te au itoro: “E taringa to ratou, kare ra e akarongo.” Te taka meitaki ua ra te apiianga. Eaa koe ka pure ei ki tetai atua kare e akarongo mai kia koe?

Te akataka meitaki ra tetai tua Pipiria i teia apiianga. Kua taumāro atu te peroveta mou ko Elia ki te au peroveta a Baala e pure ratou ki to ratou atua, e oti ka pure a Elia ki tona Atua. Karanga a Elia e ka pau mai te Atua mou e kare te atua pikikaa e pau mai. Kua āriki te au peroveta a Baala i teia taumāro anga, e kua pure akatenga ratou ma te roa e ma te aue maata​—kare ra i puapingaia! Akakite mai te Pipiria: “Kare e reo, kare e tuatua mai, kare ratou e akonoia mai.” (1 Ariki 18:29) Inara eaa tei tupu i te pure anga a Elia?

Te oti anga te pure a Elia, kua pau viviki tona Atua na te tuku anga mai te aʼi mei te rangi kia akapou i te atinga ta Elia i akapapa. Eaa te tumu i pauia ai tana pure? Ka kiteaia te pauanga i roto i ta Elia pure, tei tataia ia 1 Ariki 18:36, 37. E pure poto ua te reira​—e 30 au tuatua tana i taiku i roto i te reo Epera taito. Inara, i roto i tana tuatua, e toru taime kua taiku a Elia i te ingoa o tona Atua, ko Iehova.

Te atua o te ngati Kanaana ko Baala, tona aiteanga “akaaere” me kore “pu,” e e maata te au atua Baala ke ke. Inara ko Iehova, e ingoa takake te reira e nona anake teia ingoa i te ao katoa e pini ua ake. Akakite teia Atua ki tona iti tangata: “Ko au ko Iehova; ko toku ïa ingoa; kare au e oronga i toku ra kakā no tetai ke.”​—Isaia 42:8.

Kua aere ainei te pure a Elia e te pure a te au peroveta a Baala ki te ngai okotai? Kua riro te akamorianga ia Baala ei taakaaka i te tangata ma te au peu ainga viivii e te taukore e te akaatinga tangata. I tetai tua, kua riro te akamorianga ia Iehova ei akangateitei i tona iti tangata, te ngati Iseraela na te akamatara anga ia ratou mei teia au peu viivii. No reira akamanako ana i teia: Me tata reta koe ki tetai oa taau i akangateitei, i toou manako ka tukuia taau reta ki tetai tangata e ingoa ke tona e tei patoi i te au irinakianga pouroa a toou oa? Kare!

Me pure koe kia Iehova, te pure ra koe ki Tei Anga mai, te Metua o te tangata ravarai. * “Ko koe, e Iehova, ko to matou ïa Metua,” i pure ei te peroveta ko Isaia. (Isaia 63:16) Tei taikuia i roto i teia irava, Koia ta Iesu Karaiti i tuatua i te akakite anga aia ki tana au pipi: “Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.” (Ioane 20:17) Ae, ko Iehova te Metua o Iesu. Kua pure a Iesu kiaia e kua apii katoa i tana au pipi kia pure kiaia.​—Mataio 6:9.

Akakite ainei te Pipiria kia pure tatou kia Iesu, Maria, te aronga tapu, me kore ki te au angera? Kare​—ko Iehova anake ua. Akamanako ana e rua tumu. Mea mua, e tuanga te pure no te akamorianga, e te karanga ra te Pipiria kia akamori tatou ia Iehova anake. (Exodo 20:5) Te rua, akaari mai te Pipiria e nona te taoonga “Tei akarongo i te pure.” (Salamo 65:2) Noatu e ka tuʼa a Iehova i te apainga na tetai ke, kare aia i oronga i teia apainga ki tetai ua atu. Koia te Atua tei taputou mai e ka akarongo ki ta tatou pure.

No reira me inangaro koe i te Atua kia akarongo ki taau pure, e akamaara i teia irava: “E riro oki e, ko te kapiki i te ingoa o te Atu ra, e ora ïa.” (Angaanga 2:​21) Inara, ka akarongo e ka pau ainei a Iehova i te au pure katoatoa? Me e apinga ke atu ainei tetai ka anoanoia kia akarongo mai a Iehova ki ta tatou pure?