Michelle: Kia orana e Sophia. Mataora au tei te kainga koe i teia rā.

Sophia: E au rai.

Michelle: Te taime openga i aravei ei taua, kua uriuri taua eaa to te Atua manako no runga i to tatou turanga taitaia. * Akakite mai koe e i manako ua ana koe i teia no tetai tuatau roa, i muri tikai i te ū anga toou mama i te motoka. Te peea ua ra toou mama?

Sophia: Ae meitaki ua aia i tetai taime, e tetai taime kare aia e meitaki ana. I teia rā, mako ua aia.

Michelle: Mataora au i te akarongo i te reira. Papu e ngata tikai te akakoromaki i teia turanga.

Sophia: Ae oki. Tetai taime e manako ana au mei teaa te roa i tona mamae ua anga.

Michelle: E mea natura kia manako akapera. Penei ka maara ia koe te taime openga i aravei ei taua, kua akaruke au i tetai uianga eaa te tumu i akatika ai te Atua i te turanga taitaia noatu tei iaia te mana i te takore i te reira.

Sophia: Ae, te maara nei au.

Michelle: Mua ake ka akara taua i te pauanga a te Pipiria. Akamanako akaou ana i ta taua i uriuri.

Sophia: OK ra.

Michelle: Mea mua, kua apii taua e kua ui rai tetai tangata akarongo i te tuatau Pipiria eaa te Atua i akatika ua ai i te kino. Noatu te reira, kare te Atua i karo ana iaia no te ui atu i tera uianga, kare katoa te Atua i karanga e ka anoanoia kia maata atu tona akarongo.

Sophia: Ae ka tai nei ka akarongo au i tena manako.

Michelle: Apii katoa taua e kare te Atua ko Iehova e mareka ana me kite aia ia tatou e mamae ra. Ei akaraanga, karanga te Pipiria e i te tupu anga te turanga taitaia ki tona iti tangata “kare aia i te enemi” koia oki, kua taitaia katoa aia. * Kare ainei e mea pumaana i te kite e te taitaia katoa ra te Atua me kite aia ia tatou e mamae ra?

Sophia: No teaa.

Michelle: E te mea openga, kua kite taua e no te mana maata o Tei Anga ia tatou, e mea papu ka rauka iaia i te takore i te turanga taitaia i tetai ua atu taime.

Sophia: Kare au e mārama i te reira. Noatu e e mana tona i te takore i te au mea kino, eaa te tumu i akatika ua ai aia i te reira?

Michelle: Ka kite taua i te pauanga ki taau uianga me akara taua i te puka mua o te Pipiria ko Genese. Kua rongo ainei koe i te tua no Adamu raua ko Eva e te ua rakau tei tureia?

Sophia: Ae, kua apii au i tera tua i te apii Sabati. Karanga te Atua e auraka e kai i to reira tumu rakau, inara kua akarongo kore raua e kua kai mei te reira.

Michelle: Ae, ko tena. Teianei, tatau taua eaa tei taki atu ki te ara a Adamu raua ko Eva. Na teia e akakite mai i te pauanga ki te uianga eaa te tumu i mamae ei tatou. Me ka tika, tatau mai koe ia Genese pene 3, i te irava 1 ki te 5?

Sophia: Te na ko ra: “E pakari maata to te ovi i to te au manu katoa o te enua, i ta te Atua ra ta Iehova i anga ra; e kua tuatua maira aia ki te vaine, Koia ïa, kua tuatua maira te Atua e, Auraka korua e kai i to te au rakau katoa o te kainga nei? E kua karanga atura te vaine ki taua ovi ra, E kai maua i to te au rakau o te kainga nei; Mari ra o to taua rakau i rotopu i te kainga nei, kua tuatua mai ïa te Atua e, Auraka korua e kai i to reira, auraka oki korua e arapaki atu, ka mate aea korua. Kua tuatua maira taua ovi ra ki te vaine, Kare rava korua e mate: Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.”

Michelle: Meitaki no taau tatau. Akamanako taua i teia irava. Mea mua, kite taua e kua tuatua tetai ovi ki te vaine ko Eva. I tetai irava ke i roto i te Pipiria, te akakite maira e ko Satani te Tiaporo tei tuatua ki te vaine na roto i te ovi. * Ui a Satani kia Eva no runga i te ture a te Atua no tetai tumu rakau. Kua kite ainei koe eaa te utunga ta te Atua i akakite kia Adamu raua ko Eva me kai raua i te reira?

Sophia: Ka mate raua.

Michelle: Ae. Aru mai, kua akakite a Satani i tetai akaapaanga kino tikai i te Atua. Akara ana i tana i tuatua: “Kare rava korua e mate.” Te kapiki ra a Satani i te Atua e pikikaa!

Sophia: Kare au i rongo ana i tera tuanga o teia tua.

Michelle: I te kapiki anga a Satani i te Atua e pikikaa, kua akatupu aia i tetai māroanga tei anoanoia te tuatau kia pau. Kite koe eaa te tumu?

Sophia: Kare au i papu.

Michelle: Penei ei akatutuanga. Karanga taua e i tetai rā kua aravei au ia koe ma te karanga e e ririnui atu au ia koe. Akapeea koe me akapapu e kua tarevake au?

Sophia: I toku manako, ka rave taua i tetai mea ei akaari koai tei ririnui atu.

Michelle: Ae. Penei ka kimi taua i tetai apinga teimaa e oti ka akara koai ka rauka i te tāki i te reira. Te tika, e mea māmā ua i te akapapu koai tei ririnui atu.

Sophia: Ae, mārama au.

Michelle: Akapeea ra me karanga au e ko au tei tiratiratu atu ia koe? E māroanga tuke rai te reira, me kare ainei?

Sophia: Ae, i toku manako.

Michelle: Te tika, kare te tu tiratiratu e aite ki te tu ririnui, te ka rauka i te akapapu vivikiia.

Sophia: Ae, ka āriki au.

Michelle: Te tika, te ravenga anake e akapapu ei taua koai tei tiratiratu atu, na te tuku anga i tetai tuatau kia aereia e kite ei koai ia taua tei akaari tikai i te tu tiratiratu.

Sophia: Ka tano rai.

Michelle: Akara akaou taua i te tua o Genese. Kua karanga ainei a Satani e ririnui atu aia i te Atua?

Sophia: Kare.

Michelle: Ka viviki ua te Atua i te akaari koai tei ririnui atu. Mari ra, kua karanga a Satani e e tiratiratu atu aia i te Atua. Mei te mea kua karanga aia kia Eva, ‘Te pikikaa ra te Atua ia koe, ko au te akakite ra i te tika.’

Sophia: E manako umere tena.

Michelle: No reira, ma tona kite pakari, kua iki te Atua e ko te ravenga meitaki roa atu no te akatikatika i teia māroanga, kia tuku i tetai tuatau kia aereia. I muri akera, ka taka meitaki ua e koai tei akakite i te tika e koai tei pikikaa.

Sophia: Kare ainei i te mate anga a Eva, kua akapapu te reira e te akakite ra te Atua i te tika?

Michelle: Ae, tika rai. Inara e maata atu te ō maira ki te taumāroanga a Satani. Akara akaou taua i te irava 5. Kite koe eaa atu ta Satani i tuatua kia Eva?

Sophia: Karanga aia e me kai te vaine i te rakau, ka puera ïa tona mata.

Michelle: Ae, e ka riro aia “mei te Atua ra te tu, i te kite i te meitaki e te kino.” No reira te karanga ra a Satani e te tāpu ra te Atua i te meitaki mei te tangata.

Sophia: Mārama au.

Michelle: Kua riro katoa teia ei māroanga puapinga.

Sophia: Mei teaa te tu?

Michelle: Mei tana i tuatua, karanga a Satani kia Eva​—pera katoa ki te katoatoa—e e meitaki atu ratou me kare te Atua e tutara ia ratou. Ta Iehova i rave, kua kite aia e ko te ravenga meitaki roa atu no te pau i teia māroanga koia oki kia tuku ia Satani ei akapapu i tana akaapaanga. No reira kua akatika te Atua ia Satani kia tutara i teianei ao no tetai tuatau. Ko tera te tumu i kite ei tatou i te au turanga taitaia takapini ia tatou—no te mea ko Satani, kare ko te Atua, te tutara o teianei ao. * Inara e nuti meitaki atu tetai.

Sophia: Eaa te reira?

Michelle: Te apii maira te Pipiria e rua tuatua mou manea no runga i te Atua. Mea mua, te vaitata ua ra a Iehova kia tatou me rokoia e te turanga taitaia. Ei akaraanga, akamanako ana i te tuatua a te Ariki ko Davida, tei tataia ia Salamo 31:7. Kua na roto a Davida i te au turanga taitaia i tona oraanga, inara akara eaa tana i tuatua i roto i tana pure ki te Atua. Me ka tika, tatau mai koe i teia irava ine?

Sophia: Te na ko ra: “Ka pereperekavana au e ka rekareka au i toou ra aroa: i akara ana oki koe i toku tumatetenga anga; kua kite mai koe i toku vaerua i te au mate noku nei.”

Michelle: No reira noatu kua tupu te au turanga taitaia kia Davida, kua akapumaanaia aia i te mārama e te kite maira a Iehova i te au manamanata tana i na roto. Mea akapumaana ainei te reira—me mārama koe e te kite maira a Iehova i te au mea katoatoa, kapiti mai to tatou mamae ngakau penei kare i kitea e tetai ke?

Sophia: Ae, e mea pumaana te reira.

Michelle: Te rua o tuatua mou manea no runga i te Atua, kare te Atua e akatika i te mamae kia tupu e tuatau ua atu. Te apii maira te Pipiria e kare e roa atu, ka akakore aia i ta Satani tutaraanga kino. E ka takore takiri aia i te au kino tei tupu, kapiti mai te au mea taau e toou mama i na roto. Penei me oki mai au a teia epetoma ki mua, ka akaari au kia koe eaa te tumu i papu ei ia taua e kare e roa atu, ka takore te Atua i te au turanga taitaia katoatoa? *

Sophia: Ae, e oki mai koe.