Kitea e Ratou Tetai Mea Meitaki Atu

AKATANGI

E MIRIONI ua atu Kerititiano tei iki kia kore e akono i te Keritimiti. Eaa to ratou manako no runga i ta ratou ikianga? Te manako ra ainei ratou e te ngere ra ratou? Eaa te manako o ta ratou tamariki? Tatau eaa ta te Au Kite o Iehova, takapini i teia ao, i tuatua no runga i te reira.

Eve

Te akamaaraanga ia Iesu Karaiti: “Mua ake ka riro mai au ei Kite no Iehova, takitai ua taime, ka aere au ki te pure. Ka aere ua au i te Keritimiti me kore te Easter. Iaku e akono ra i teia nga orote, kare rava au i akamanako ana no runga ia Iesu Karaiti. I teianei, kare au e akono i te Keritimiti inara ka aere au ki te au uipaanga Kerititiano e rua taime i te epetoma e e apii katoa ana au i ta te Pipiria e karanga ra no runga ia Iesu ki tetai ke!”—EVE, AUTIRERIA.

Reuben

Te rekareka no te oronga: “Mataora tikai au me oronga mai te tangata i tetai apinga aroa noku i te taime manako koreia. Rekareka maata au me tupu te reira! E reka katoa ana au i te maani kāti e te peni tutu no tetai ke no te mea ka akamareka te reira ia ratou, e iaku katoa.”—REUBEN, NORTHERN IRELAND.

Emily

Tauturu i te aronga tei ngere: “E reka ana matou i te tunu kai no te aronga maki. Tetai taime ka oronga matou i te tiare, tetai kēke me kore te apinga aroa ei akarekareka ia ratou. No te mea ka rauka ia matou i te atoro i teia aronga i tetai ua atu taime i te mataiti, rekareka matou.”—EMILY, AUTIRERIA.

Wendy

Te taokotai anga ki te kopu tangata: “Me taokotai matou, ka riro te reira ei atianga mataora e kare e apiapi. Pera katoa, ka kite pu ua ta maua tamariki i to ratou kopu tangata. No te mea kare matou e tiaki no tetai au rā takake kia rave i te reira, kua kite ua te kopu tangata e ka atoro matou ia ratou, kare no te mea kua māroia matou mari ra, no to matou inangaro ia ratou.”—WENDY, CAYMAN ISLANDS.

Sandra

‘Au: “I te tuatau Keritimiti, e maata te angaanga a te tangata e kare ratou e akamanako ana no runga i te ‘au. Inara kua maru toku ngakau no te mea kua apii au i ta te Pipiria e taputou maira no te tangata. Mārama au e, ka mataora te oraanga o taku tamariki a te tuatau ki mua.”—SANDRA, PANIORA.