Taui te Pipiria i te Oraanga

Eaa tei akakeu i tetai tangata meameaau poritiki kia riro mai ei tangata akamoeau? Tatau i tona tua kia kite i te pauanga.

“Maata te au Uianga Tei Tamanata Iaku.”​—RAUDEL RODRÍGUEZ RODRÍGUEZ

MATAITI ANAU: 1959

ENUA ANAU: CUBA

ORAANGA: TANGATA MEAMEAAU PORITIKI

TOKU ORAANGA I MUA ANA: Anauia au i Havana, Cuba, i roto i tetai oire putaua e mea mātau te kite atu i te aronga e tā ra i runga i te mataara. Kia maata mai au, inangaro au i te apii i te judo e tetai atu au tipoti tā tangata.

E tamaiti kite au i te apii no reira kua akamaroiroi toku nga metua iaku kia aere ki te apii teitei. Iaku i reira, kua akamata au i te manako e ka anoanoia kia taui te akatereanga poritiki o toku enua. Kua iki au kia meameaau. Kua aere maua ko toku oa apii i te tā atu i tetai akava ma te tauta i te rave i tana pupui. Kua pakia te katu o te akava e kua kino tikai te reira. Tiria maua ko toku oa apii ki roto i te are auri no ta maua i rave e kua akautungaia kia mate na te pupui anga. E 20 ua rai oku mataiti, e ka tamateia au!

I roto i te are auri, ko au anake ua i roto i toku pia, kua teateamamao au i taku ka rave me tu ki mua i te aronga pupui. Kare au i inangaro i te akaari i toku mataku. I taua taime rai, e maata te au uianga tei tamanata iaku. Kua manako au: ‘Eaa te tumu i maata ai te tu tika kore i teianei ao? Ko teia ua ainei te oraanga?’

KUA TAUI TE PIPIRIA I TOKU ORAANGA: Muri mai kua taui ta maua utunga. Kare maua e tamateia mari ra ka noo ua ki roto i te are auri e 30 mataiti. I tera taime, kua aravei au i tetai pae o te Au Kite o Iehova tei tiria ki roto i te are auri no to ratou irinakianga. Umere au i te tu ngakau toa e te akamoeau o te Au Kite. Noatu kua tiria ratou ki roto i te are auri no tetai utunga tau kore, kare ratou i riri e kare i akamoupuku ana.

Kua apii au mei te Au Kite e e akakoroanga to te Atua no te tangata. Akaari mai ratou mei roto i te Pipiria e ka taui takiri te Atua i to tatou enua kia riro mai ei parataito e ka kore te kino e te tu tika kore. Apii mai ratou iaku e ka kī te enua i te aronga meitaki te ka ora e tuatau ua atu i roto i te au turanga apa kore.​—Salamo 37:29.

Reka au i taku e apii ra mei te Au Kite, inara e tuke takiri toku tu ki to ratou. Manako mai au e kare rava e rauka iaku i te noo takake i roto i te angaanga poritiki e kia kore e tutaki i te kino ki te kino. No reira tamanako mai au no te tatau i taku Pipiria. Te akaoti anga au i te reira, kua kite mai au e ko te Au Kite o Iehova anake te iti tangata tei aru i te au Kerititiano mua.

Mei taku apii Pipiria, kua kite mai au e ka anoanoia au kia rave i te au tauianga maata i roto i toku oraanga. Ei akaraanga, kua anoanoia au kia akamutu i te tuatua viivii no te mea kua mātau ua au i te tao. Kua anoano katoaia au kia akamutu i te kai avaava. E kua anoanoia au auraka kia piri akaou ki tetai tua i roto i te au taumāroanga poritiki. Kare i te mea māmā noku te rave i teia au tauianga. Inara ma te tauturu a Iehova, kua rauka iaku te taui.

Tetai tauianga ngata roa atu, ko te akatere i toku riri. I teianei, ka anoanoia rai au kia pure no te tu akono meitaki kia kore au e riri. Kua tauturu maata te au irava i roto i te Pipiria iaku mei ei Maseli 16:32, te na ko ra: “Te kore e rapurapu i te riri ra, e meitaki maata tona i to te aronga ririnui; e tei vi tona uaorai vaerua, i tei pou iaia te oire.”

I te mataiti 1991, kua papetitoia au ei Kite no Iehova. Kua raveia te reira i roto i tetai paero vai i ko i te are auri. I tera mai mataiti, kua tukuia tetai pae o te au mouauri kia aere, e kua tonokia matou ki Paniora no te mea e kopu tangata to matou e noo ra ki reira. Te tae anga au ki Paniora, kua akamata viviki au i te aere ki te au uipaanga a te Au Kite o Iehova. Kua āriki pumaana mai te Au Kite iaku mei te mea e kua roa au te kite anga ia ratou, e kua tauturu ratou iaku kia akamata i toku oraanga ou.

KUA PUAPINGAIA AU: E tangata mataora au i teianei e te tavini kapiti ra i te Atua ma taku vaine e ta maua tamariki tamaine. Kua rauka iaku te akameitakianga no te akapou i toku taime ei tauturu i etai ke kia apii i te Pipiria. Tetai taime, me akamaara au i toku mapuanga kua vaitata au i te tamateia, te āriki rekareka nei au i taku i rauka mai i teianei. Te ora nei au i teia rā e e manakonakoanga toku. Ka tapapa atu au i te Parataito taputouia​—te tuatau ka upokotu atu te tu tika “e e kore rava te mate.”​—Apokalupo 21:3, 4.