Taui te Pipiria i te Oraanga

EAA ta tetai tangata no Scotland i kite mai ei mea puapinga atu i to te angaanga pitiniti? Eaa tei tauturu i tetai tangata i Brazil kia akaruke i tona tu oraanga tau kore e kia akamutu i te kai i te apinga akakona cocaine? Akapeea i rauka ai i tetai tangata i Slovenia i te akaruke i tana peu inuinu kava? Tatau i ta ratou tua.

“Akara anga meitaki toku oraanga.”​—JOHN RICKETTS

MATAITI ANAU: 1958

ENUA ANAU: SCOTLAND

ORAANGA: TANGATA PITINITI PUAPINGA

TOKU ORAANGA I MUA ANA: Mataora toku oraanga i toku tamarikianga. E rangatira vaeau toku metua tane i roto i te nuku vaeau o Peritane, no reira e neke putuputu ana toku ngutuare. Kapiti mai ia Scotland, e noo ana rai matou i Peritane, Tiamani, Kenia, Malaysia, Ireland, e Kupero. Mei toku varu mataiti, kua tukuia au kia aere ki te apii tutakiia i Scotland. I muri mai, kua rauka mai taku pepa apii no ko mai i te Cambridge University.

Tae anga ki te 20 mataiti, kua akamata au i tetai angaanga e varu mataiti i ko i tetai ngai kō anga ‘inu no te penitini. I te akamataanga, kua rave au i teia angaanga i Marike Apatonga, e oti i Aperika e i te openga iora, i Autireria Opunga. Muri mai te neke anga au ki Autireria, kua akamata au i tetai pitiniti koʼi moni, e oti kua oko atu au i te reira pitiniti.

Te moni tei rauka mai no te reira, kua tauturu iaku kia akangaroi mei te angaanga i toku 40 mataiti. Kua taangaanga au i teia tuatau no te teretere aere. E rua taime te takapini anga au ia Autireria na runga i toku patikara matini, e kua aere au takapini i teianei ao. Akara anga meitaki toku oraanga.

KUA TAUI TE PIPIRIA I TOKU ORAANGA: Mua ake ka akangaroi mai au mei te angaanga, kua inangaro au i te kimi i tetai ravenga i te akameitaki i te Atua no toku oraanga mataora. Kua akamata au i te aere ki te Akonoanga Anglican, e akonoanga tei utuutuia mai ei au. Inara kare teia akonoanga i oronga mai ana i te apiianga no roto mai i te Pipiria. Muri mai, kua apii au i te Akonoanga Momani, kare au i reka ana no te mea kare ratou e irinaki ana ki runga i te Pipiria.

I tetai rā, kua topapa mai te Au Kite o Iehova i toku ngutupa. Kite viviki mai au e kua akatumu ratou i ta ratou apiianga katoatoa ki runga i te Pipiria. E tai a ratou irava i akaari mai kiaku, ko 1 Timoteo 2:3, 4. Karanga ra taua nga irava e to te Atua anoano, ko “te tangata katoatoa kia ora, e kia rauka te kite i te tuatua-mou.” Umere tikai au te akamārama mai anga te Au Kite e kare ko te kite ua, mari ra ko te kite mou katoa tei akatumuia ki runga i te Pipiria te mea puapinga.

Te apii anga au i te Pipiria ma te Au Kite o Iehova, kua tauturu mai iaku kia rauka taua kite mou. Ei akaraanga, kua kite mai au e kare te Atua e Iesu ei tuanga no te Toru Tai; mari ra, e nga tangata takake. (Ioane 14:28; 1 Korinetia 11:3) Mataora au i te kite anga i teia tuatua mou māmā ua. Riri katoa au e kua kaimoumou maata au i toku taime te tauta anga kia mārama i taua apiianga pikikaa!

Kare i roa ana kua akamata au i te aere ki te uipaanga a te Au Kite o Iehova. Umere tikai au i te tu oaoa e te au turanga meitaki o te katoatoa i reira​—akara anga e e iti tangata tapu ratou no te Atua. Kua akapapu mai to ratou aroa ngakau tae kiaku e kua kiteia e au te akonoanga mou tikai.​—Ioane 13:35.

KUA PUAPINGAIA AU: I muri ake te papetitoia anga au, kua aravei au i tetai vaine meitaki tikai ko Diane. Kua utuutuia mai aia ei Kite no Iehova e e maata tona au tu memeitaki taku i mareka no runga iaia. I muri mai, kua akaipoipo maua. Kua riro te pirianga oa e te turuturu anga a Diane ei akameitakianga no ko mai ia Iehova.

Inangaro maata maua ko Diane i te neke atu ki tetai ngai te anoano maataia ra te aronga tutu aere i te nuti meitaki o te Pipiria. I te mataiti 2010, kua neke atu maua ki Belize, i Marike Rotopu. I teia ngai, kua tutu aere maua ki te au tangata tei inangaro i te Atua e te inangaro maata ra i te apii i te Pipiria.

Kua akatupu tikai teia i te ‘au kiaku i te kite anga i te tuatua mou no runga i te Atua e tana Tuatua te Pipiria. Ei tavini tamou, mataora tikai au i te apii anga i te Pipiria ki te au tangata e manganui. Mataora katoa au te kite atu anga te akameitaki anga te tuatua mou o te Pipiria i te oraanga o tetai tangata​—mei tei tupu rai kiaku. I teianei, kua kite mai au i tetai mataara i te akameitaki tikai i te Atua no toku oraanga mataora.

“Takinga meitaki tikai ratou iaku.”​—MAURÍCIO ARAÚJO

MATAITI ANAU: 1967

ENUA ANAU: BRAZIL

ORAANGA: TU ORAANGA TAU KORE

TOKU ORAANGA I MUA ANA: Kua maata mai au i Avaré, e oire meangiti i São Paulo. E aronga angaanga te maataanga o te tangata e noo ana i reira.

Kua mate toku papa i mua ake ka anau mai toku mama iaku. I toku meangiti anga, me aere ana toku mama ki vao, kua aao au i tona kakau. Kua akamata au i te akavaine e kua manako mai te tangata e e tamaiti sodoma au. Muri mai, kua akamata au i te piri ainga ki te au tamaroa e te au tane.

Toku mapu anga, kua kimi putuputu au i te aronga no te pirianga ainga (te tane e te vaine) i te au ngai katoatoa​—i ko i te ngai oko kava, te ngai ura e i ko katoa i te are pure. I te tuatau tamataora anga maata, ka akamanea au iaku ei vaine e ka ura i roto i te au pupu ura no te apii. E rongonui tikai au.

Ko toku au oa, e aronga sodoma, e au vaine akaturi e te aronga kai apinga akakona. Kua akakeu tetai pae kia tamata au i te kai i te apinga akakona cocaine, e kare i roa ana, kua mātau au i te kai i te reira. I tetai taime, ka kai matou i te apinga akakona i te po katoa. E i tetai taime, ko au anake ua te ka kai i te apinga akakona i tera rā katoa. Ikoke takiri au e kua akamata te tangata i te tuatua e kua tuia au i te maki AIDS.

KUA TAUI TE PIPIRIA I TOKU ORAANGA: I taua taime ra, kua aravei au i te Au Kite o Iehova. Takinga meitaki tikai ratou iaku. Tetai irava ta ratou i tatau mai kiaku, ko Roma 10:​13, te na ko ra: “Ko te kapiki i te ingoa o te Atu ra [ko Iehova], e ora ïa.” Kua akaari mai teia au tuatua i te puapinga kia taangaanga au i te ingoa o Iehova. Maata te taime i muri ake te kai apinga akakona i te po katoa, ka eeu au i toku maramarama, ka akara ki te rangi e ka pure kia Iehova ma te roimata te pati akatenga anga kia tauturu mai aia iaku.

Kua manamanata au no runga i toku mama tei taitaia e tei mamae tikai i te akara mai iaku e takinokino ra iaku uaorai ki te apinga akakona, no reira iki au kia akamutu i te reira. Kare i roa i muri mai, kua āriki au i te patianga a te Au Kite kia apii i te Pipiria. Kua akapapu mai ratou kiaku e ka tauturu taku apii i te akamaroiroi iaku kia akamutu i te kai apinga akakona​—e kua tupu rai te reira!

Te apii anga au i te Pipiria, kite mai au e ka anoanoia au kia taui i toku tu oraanga. E ngata tikai iaku i te akaruke i taku au peu sodoma no te mea kua riro te reira ei tuanga maata i roto i toku oraanga no tetai tuatau roa. Ko tetai apinga tei tauturu iaku, ko te akaatea anga i te au akakeuanga kino mei roto i toku oraanga. Kua akaruke au i toku au oa taito e kua akamutu i te aere ki te au ngai oko kava e te ngai ura.

Noatu kare i te mea māmā i te rave i teia au tauianga, kua akapumaanaia au i te kite anga e te manako maira a Iehova iaku e te mārama ra i toku turanga ngata. (1 Ioane 3:​19, 20) I te mataiti 2002, kua akamutu takiri au i te peu sodoma e i tera mataiti, kua papetitoia au ei Kite no Iehova.

KUA PUAPINGAIA AU: Umere roa toku mama i te au tauianga taku i rave e kua akamata katoa aia i te apii i te Pipiria. Te mea tangi ra, kua tuia aia i te maki akamate kopapa. Noatu te reira, kua akatupu ua rai aia i te inangaro no Iehova e no te tuatua mou o te Pipiria.

I te varu mataiti i topa, kua rave au i te angaanga tavini tamou, te akapou maata anga i toku taime i te apii i te Pipiria ki tetai ke. Ka āriki au e i tetai taime, kua anoanoia au kia patoi pakari i te au anoano tika kore. Inara akamaroiroiia au i te kite anga e me iki au kia kore e akatupu i teia au anoano, te akamareka ra au ia Iehova.

Na te akavaitata anga kia Iehova e te akono i te tu oraanga tei akamareka iaia, kua akameitaki maata atu i toku oraanga. I teia rā, e tangata mataora au.

“Kaki ua au i te kava.”​—LUKA ŠUC

MATAITI ANAU: 1975

ENUA ANAU: SLOVENIA

ORAANGA: INU MAATA I TE KAVA

TOKU ORAANGA I MUA ANA: Anauia au i Ljubljana, te oire maata o Slovenia. Mataora toku oraanga i toku tamarikianga e tae ua atu ki toku ā mataiti. I na, kua tamate toku papa iaia uaorai. Muri ake i teia tumatetenga, kua angaanga pakari toku mami i te angai ia maua nga tamariki tamaroa, ko maua ko toku tuakana.

Tae anga toku mataiti ki te 15, kua neke au ki toku mama ruau. Mataora au i te noo i ko iaia no te mea e maata toku au oa e noo ra i te pae mai iaia. Kare katoa e maata te arairaianga mei te turanga rai i te kainga. Tae anga toku mataiti ki te 16, kua akamata au i te piri atu ki te au tangata tei aere inuinu i te openga epetoma. Kua akatupu katoa au i toku rouru kia roaroa, kua akakakau iaku ki te kakau meameaau e kua akamata i te kai avaava.

Noatu kua tamata ana au i te kai i te apinga akakona tukeke, kare ra au i akamutu ana i te inuinu no te mea e angaanga mataora tikai ïa naku. Akamata mai au i te inu karati uaina e oti, te inu anga i te moina uaina. Tukatau tikai au i te uuna i toku tu kona kava. Maataanga o te taime, ko te aunga o te kava te ka akakite mai e i inu ana au. Kare rava tetai tangata i kite e i inuinu maata ana au mei te ā ki te rima rita uaina me kore moina pia​—e kua kaʼiroia te reira ki te vodka!

Maata te au taime, naku e tauturu i toku au oa kia kore ratou e topa ki raro me akaruke i te ngai uraura i te po, noatu e maata taku kava i inu ana. Tetai rā, rongo au i tetai o toku oa te tuatua anga e kaki ua au i te kava​—e tuatua akakino i roto i te reo Slovenia no tetai tangata tei inu maata atu i to te katoatoa. Mamae tikai au te akarongo anga i taua tuatua.

Kua akamata au i te akamanako no runga i taku e rave ra i roto i toku oraanga. Tupu te manako puapinga kore kiaku. Manako mai au e kare e puapinga ana te au mea i roto i toku oraanga.

KUA TAUI TE PIPIRIA I TOKU ORAANGA: I taua taime, kua kite atu au i tetai oa apii tei taui tona tu; e tu maru tona. Inangaro au i te kite, no reira kua pati atu au iaia kia aere maua ki tetai ngai kaikai. Ia maua e pukapuka ra, kua akamārama mai aia e kua akamata aia i te apii i te Pipiria ma te Au Kite o Iehova. Akakite katoa mai aia i te au mea tana e apii ra, e au mea ou pouroa kiaku no te mea kare aku akonoanga mei toku rikiriki anga mai. Kua akamata au i te aere ki te au uipaanga a te Au Kite e kua apii i te Pipiria.

Na te apii anga i te Pipiria i mārama ai au i te au tuatua mou ririnui, tei oronga mai i te akakeuanga maata. Ei akaraanga, kua kite mai au e tei roto tatou i ta te Pipiria e karanga ra ko te “tuatau openga.” (2 Timoteo 3:​1-5) Apii katoa au e kare e roa atu, ka takore te Atua i te aronga kino mei te enua e ka oronga ki te aronga meitaki te tikaanga manea kia noo mataora e tuatau ua atu i roto i te Parataito. (Salamo 37:29) Maata tikai toku inangaro i te taui i toku oraanga kia ō atu au ki roto i teia pupu tangata meitaki.

Kua akamata au i te akakite i te tuatua mou o te Pipiria taku e apii ra ki toku au oa. Te maataanga ia ratou, kua tatiaeae mai iaku no taku i akakite atu kia ratou. Inara kua riro teia ei akameitakianga poitirere. No to ratou tu, kua tauturu iaku kia akara e kare ratou i te au oa tika tikai. Kite mai au e ko toku manamanata no te inuinu anga, no toku piri vaitata anga ki toku au oa. I te au epetoma ravarai, ka tapapa ua ratou no te openga epetoma kia aere ratou i te inuinu akaou.

Kua akaruke au i taua au oa e kua mono atu ia ratou ki te au oa meitaki, te Au Kite o Iehova. Riro ei akamaroiroi anga tikai i te piri atu kia ratou​—e au taeake teia tei inangaro i te Atua e te tauta pakari i te akono i tana au turanga. Aere ua rai, kua rauka iaku i te akaruke i taku peu inuinu maata i te kava.

KUA PUAPINGAIA AU: Akameitaki tikai au ia Iehova e kare au e anoano akaou i te kava ei tamataora iaku. Kare au i kite eaa te ka tupu mai kiaku naringa kare au i akaruke i teia au peu taito. Papu tikai iaku e e meitaki rava atu toku oraanga i teianei.

No nga mataiti e itu i teianei, tei iaku te tikaanga manea i te tavini i ko i te opati Betela o te Au Kite o Iehova i Slovenia. Te kite anga ia Iehova e te tavini anga iaia, kua oronga mai i tetai oraanga meitaki tikai kiaku.