PENE 25

Akapeea Au me Upokotu i te Peu Amirimiri Mero Ainga?

“E varu oku mataiti i akamata ai au i te amirimiri i toku mero ainga. Muri mai kua apii au i to te Atua manako no runga i teia. I te au taime ka tuku atu au ki te timataanga no te amirimiri mero ainga, kua taitaia tikai au. Ui au kiaku uaorai, ‘Akapeea te Atua e aroa mai ei i tetai tangata mei iaku rai?’”​—Luiz.

ME MAPU koe, ka pakari atu toou anoano no te pirianga ainga. Te ka tupu, penei ka taii koe ki te peu amirimiri mero ainga. * Penei ka karanga te manganui e kare te reira i te mea kino. “Kare e tangata e takinoia,” ka māro atu ratou. Inara, e tumu meitaki tetai kia kopae takiri koe i teia peu. Tata te apotetoro ko Paulo: “E tenana ka tamate i to kotou au melo . . . te anoano viivii ra.” (Kolosa 3:5) Te peu amirimiri i te mero ainga, kare e tamate i te anoano viivii no te ainga mari ra ka akapakari atu i te reira. Kapiti mai ki teia, akamanako ana i tei aru mai:

● Ka akatupu te amirimiri mero ainga i te tu noinoi. Ei akaraanga, iaia e amirimiri ra i tona mero ainga ka akamou ua tetai tangata ki runga i te tu navenave o tona uaorai kopapa.

● No te peu amirimiri i te mero ainga, penei ka akamanako tetai i te tane me kore vaine ei ravenga ua me kore ei apinga no te akanavenave iaia uaorai.

● Ka riro te manako noinoi tei tupu no te peu amirimiri i te mero ainga ei mea ngata no te akatupu i te pirianga ainga merengo i roto i te akaipoipo.

Eiaa e amirimiri i te mero ainga me pakari te anoano no te pirianga ainga mari ra, tauta kia akatere i toou au anoano. (1 Tesalonia 4:4, 5) Ei tauturu ia koe, te akamaroiroi ra te Pipiria kia kopae i tetai ua atu turanga tei akatupu i te anoano no te ainga. (Maseli 5:8, 9) Akapeea ra me kua tuikaa koe ki te peu amirimiri mero ainga? Penei kua tauta koe i te akamutu, kare ra e rauka. E mea māmā ua kia manako e kare koe e taui, e kare e rauka i te akono i to te Atua au turanga. Kua manako akapera tetai tamaiti ko Pedro tona ingoa. Karanga aia, “Me inga au, kua taitaia tikai au. Manako au e kare taku ara e akakoreia mai. E ngata iaku kia pure.”

Me ko tera toou manako, e akamaroiroi. Auraka e tuku i te au. E maata te au mapu​—e te aronga maata​—tei upokotu atu i te peu amirimiri mero ainga. Ka rauka katoa ia koe!

Me Tupu te Manako Akaapa

Mei tei kiteaia mai, te aronga i piritia ki roto i te peu amirimiri mero ainga, maataanga i te taime ka tataraapa ratou. “I te mea i tau to kotou aue i te Atua ra,” kare e ekoko ka riro te reira ei akamaroiroi ia koe kia akamutu i teia peu. (2 Korinetia 7:11) Inara me maata roa toou manako akaapa, ka akaparuparuia koe. Penei ka taitaia koe e ka inangaro kia tuku i te au.​—Maseli 24:10.

No reira, tauta kia akatano i toou manako. E mea viivii te amirimiri i te mero ainga. Ka akariro te reira ia koe ei “tavini no te au inangaro tika kore e te navenave e manganui ra” e ka akatupu katoa i te au tu tau kore. (Tito 3:3) Inara, kare te amirimiri mero ainga i te ara kino tikai no te ainga tau kore, mei te moeaana rai. (Iuda 7) Me kua taii koe ki te peu amirimiri mero ainga, eiaa e manako e kua rave koe i te ara kino kare e akakoreia mai. Ko te taviri koia oki kia patoi i te anoano tika kore e auraka rava e tuku i te au!

E mea māmā ua kia maromaroa me inga ake koe. Me tupu te reira, kare te aiteanga e e tangata kino koe. No reira auraka e tuku i te au. Mari ra, e akara meitaki eaa tei taki atu ki toou inga anga e oti tauta auraka kia rave akaou i te reira.

Akapou i tetai tuatau no te akamanako oonu i te tu aroa e te takinga meitaki o te Atua. Karanga te tata salamo ko Davida, koia katoa tetai tei inga no te tu paruparu e: “Mei te aroa o te metua ki tana ra au tamariki, ko to Iehova ïa aroa ki te aronga i mataku iaia ra. Kua kite oki aia i to tatou tu; te manako ra aia e, e one tatou nei.” (Salamo 103:13, 14) Ae, kua mārama a Iehova i to tatou tu apa e “kua tika [iaia] i te akakore mai i te ara.” (Salamo 86:5) Noatu ra, ka inangaro aia ia tatou kia tauta i te akameitaki atu i to tatou tu. No reira eaa te au takainga papu taau ka rave no te upokotu atu i teia peu?

Akara matatio i taau tamataoraanga. E akara ana koe i te au teata, porokaramu tivi, me kore te au Web site e akaariia ra te au tutu ainga? Kua pure te tata salamo ki te Atua: “E akaariu ke i toku mata kia kore e akara i te mea puapinga kore.”​—Salamo 119:37.

Akamanako i te au mea ke. Akakite mai tetai Kerititiano ko William: “I mua ake ka moe ei, e tatau i tetai puka Pipiria. E puapinga tikai e ko te manako openga no tera rā, e manako pae vaerua ïa.”​—Philipi 4:8.

Tuatua ki tetai tangata no runga i toou manamanata. Penei no te akama, ka ngata ia koe i te akakite i te reira ki etai ke. Inara me tuatua koe ki tetai tangata, ka tauturuia koe kia akamutu takiri i teia peu! Kite mai tetai Kerititiano ko David i te reira. Karanga aia, “Kua tuatua au ki toku papa ko maua anake ua. Kare e ngaropoina iaku tana tuatua. Ma te reo pumaana e te mata katakata, karanga aia e, ‘Ngakau parau tikai au ia koe.’ Kua kite aia e kare i te mea māmā kia tuatua kiaia no runga i teia manamanata. Kare atu e tuatua tei akamaroiroi tikai iaku kia tauta ua atu rai.

“Akaari mai toku papa i tetai au irava ei tauturu iaku kia kite e kare au i te ‘tangata kino,’ e oti akaari aia i te au irava tei akaari mai i te puapinga kia mārama i te tu kino o teia peu. Karanga aia e no tetai tuatau kia ‘vai tiamā’ au e oti ka uriuri akaou maua i te reira. Karanga aia auraka e taitaia maata me inga akaou au mari ra e tauta kia akaroa atu i te tuatau e inga akaou ei.” Eaa ta David i apii mai? Karanga aia: “Me kite tetai tangata i toou manamanata e me tauturu ia koe, ko tera te ravenga meitaki roa atu.”

[Tataanga Rikiriki i Raro]

IRAVA PUAPINGA

“E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au, ko koe e te aronga katoa e akamori i te Atu ma te ngakau mā.”​—2 Timoteo 2:22.

TAUTURU

E pure i mua ake ka pakari ei toou anoano. Pati i te Atua ko Iehova kia oronga mai i te “mana maata meitaki” ei patoi i te timataanga.​—2 Korinetia 4:7.

KUA KITE AINEI KOE . . . ?

Ka akatupu te tangata paruparu i tona anoano no te ainga. Kareka te tangata me kore te vaine akono meitaki, ka akatere iaia uaorai noatu me koia anake ua.

RAVE I TEIA!

Ka akamanako tamou au i te au mea tiamā me ․․․․․

Kare au e tuku atu ki teia timataanga, mari ra ka ․․․․․

Teia taku ka inangaro i te ui atu ki toku nga metua no runga i teia tumu manako koia oki ․․․․․

EAA TOOU MANAKO?

● Eaa i puapinga ai kia akamaara e “kua tika ia [Iehova] i te akakore mai i te ara”?​—Salamo 86:5.

● I te mea e na te Atua i anga i te anoano no te pirianga ainga e koia tei karanga kia akatere tatou ia tatou uaorai, eaa ta te Atua e papu ra ka rauka ia koe i te rave?

[Tataanga]

Te akamutu anga au i teia peu, e akava ngakau mā toku i mua ia Iehova, e kare au e akaruke i te reira no tetai ua atu apinga!’’​—Sarah

[Tutu]

Me inga koe i roto i tetai oro anga, kare te aiteanga e ka akamata akaou koe​—me inga koe no te amirimiri mero ainga kare te reira e takore i taau tere anga ki mua