PENE 35

Akapeea Au me Riro ei oa no te Atua?

Te tupu anga tetai tumatetenga kia Jeremy, kua kite aia i te puapinga o te pirianga oa ki te Atua. “E 12 oku mataiti, kua akaruke toku metua tane ia matou,” i karanga ai aia. “Tetai po kua pure akatenga au i runga i toku roʼi, te pati ia Iehova kia oki mai toku metua tane.”

No tona taitaia, kua akamata a Jeremy i te tatau i te Pipiria. Te tatau anga aia ia Salamo 10:14, kua pakia tona ngakau. Karanga teia irava no runga ia Iehova: “E oro te tangata ao ra kia koe; ko koe te tauturu o te matiroeroe.” Akakite a Jeremy: “Mei te mea e te tuatua ra a Iehova kiaku e te akakite ra koia toku tauturu; koia toku Metua. Koai atu ïa metua meitaki mei iaia rai?”

ME TE na roto ra koe i tetai turanga mei to Jeremy rai e me kare, te akaari maira te Pipiria e ka inangaro a Iehova ia koe kia riro ei oa nona. Karanga te Pipiria: “E akavaitata atu ki te Atua, e nana e akavaitata mai kia kotou na.” (Iakobo 4:8) Akamanako ana i te aiteanga o teia irava: Noatu kare koe e kite mata iaia​—e kare to korua mataiti e te turanga e aiteite ana​—te pati nei te Atua ko Iehova ia koe kia riro mai ei oa nona!

Inara ka anoanoia koe kia tauta kia riro mai ei oa no te Atua. Ei akatutuanga: Me e tiare taau i tanu, kare te reira e tupu ua mai. Mari ra kia tupu ruperupe te reira, ka anoanoia kia pîpîia te reira ki te vai e kia tuku i te ngai te ka tauturu i te tiare kia tupu. Mei te reira katoa te pirianga oa ki te Atua. Akapeea koe me akatupu i teia pirianga oa?

Te Puapinga no te Apii

I roto i te pirianga oa, te ō maira te karangaranga ki tetai e tetai​—koia oki te akarongo e te tuatua. Koia katoa te pirianga oa ki te Atua. Me tatau e me apii tatou i te Pipiria, te akarongo ra tatou ki ta te Atua e tuatua maira kia tatou.​—Salamo 1:2, 3.

E tika, penei kare te apii i te mea reka naau i te rave. Ka inangaro te au mapu i te akara tivi, te vitio kangakanga, e te aru i to ratou au oa. Inara, me inangaro koe i te akatupu i te pirianga oa ki te Atua, kare te reira e tupu viviki. Ka anoanoia koe kia akarongo kiaia na te apii anga i tana Tuatua.

Inara eiaa e manamanata. Kare te apii Pipiria i te apainga teiaa. Mari ra ka mareka koe i te reira​—noatu e kare koe e reka ana i te apii. Te takainga mua, ka anoanoia koe kia akanoo i te tuatau no te apii Pipiria. “E akapapaanga taku i akanoo,” i karanga ai tetai tamaine ko Lais. “Ka tatau au e tai pene o te Pipiria me ara mai au i te popongi.” E akapapaanga ke atu to Maria, e 15 ona mataiti. “Ka tatau au i te Pipiria i te po i mua ake ka moe ei,” i karanga ai aia.

Ei akanoo i taau uaorai porokaramu apii, akara i te  pia i te kapi 292. E oti, e tata i te ora ki raro ka rave koe i te apii Pipiria mei te 30 miniti te roa.

․․․․․

Ka na mua koe i te akapapa i tetai tuatau. Inara me apii koe, penei ka kite mai koe kare i te mea māmā ua i te tatau i te Pipiria. Penei ka aite toou manako ki to Jezreel, e 11 ona mataiti, tei karanga e, “Tetai tuanga o te Pipiria e mea ngata i te mārama e kare e oraora ana.” Me manako akapera koe, auraka e tuku i te ‘au. Me rave koe i te apii Pipiria, e akamanako i te reira mei te mea e te akapou ra koe te tuatau no te akarongo ki toou oa, ko te Atua ko Iehova. Me akapera koe, ka kite mai koe e e mea oraora e te mataora te apii Pipiria!

E Puapinga te Pure

Ko te pure, e ravenga na tatou kia tuatua ki te Atua. E akamanako i te apinga aroa umere o te pure! Ka rauka ia koe i te tuatua kia Iehova i tetai ua atu taime i te po e te ao. Ka papa ua rai aia i te akarongo kia koe. Tei maata atu, ka inangaro aia i te akarongo kia koe. No reira te Pipiria i akamaroiroi ei ia koe: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.”​—Philipi 4:6.

Mei ta teia irava e taiku ra, e maata te au mea ka rauka ia koe i te tuatua kia Iehova. Penei ka kapiti mai koe i toou au manamanata e te apiapi. Pera katoa te au mea taau e mareka ra. Me akamanako koe, kare ainei ka akameitaki koe i toou au oa me rave ratou i te angaanga meitaki naau? Ka rauka katoa ia koe i te akameitaki ia Iehova, e e maata atu tana mea meitaki i rave naau i tetai ua atu oa i rave.​—Salamo 106:1.

E tata i te au mea ka inangaro koe i te akameitaki ia Iehova.

․․․․․

Penei i tetai taime, ka tupu te mataku e te manako apiapi kia koe. Karanga a Salamo 55:22: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia.”

E tata i toou au manamanata ka inangaro koe i te taiku i roto i taau pure.

․․․․․

Taau i na Roto

E tuanga ke tetai no te pirianga oa ki te Atua ka inangaro koe i te akamanako. Karanga te tata salamo ko Davida: “Ka tongi ana kia kite i te meitaki o Iehova!” (Salamo 34:8) Te tata anga a Davida ia Salamo 34, kua na roto aia i tetai turanga mataku. Te oro ra aia mei te Ariki ko Saula tei inangaro i te tamate iaia​—e turanga ngata tikai. Inara kua anoanoia aia kia kimi i te akapuanga i rotopu i tona au enemi te au Philiseti. I te akara anga e mea papu ka mate aia, inara kua ora mai a Davida no te mea kua akatuke aia ki mua ia ratou e kua akaneneva iaia uaorai.​—1 Samuela 21:10-​15.

Kare a Davida i ora mai no tona uaorai kite karape. Mari ra, kua akapaapaa aia ia Iehova. I roto i taua salamo ra, kua tata aia: “Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra.” (Salamo 34:4) No reira, mei tana i na roto, kua akamaroiroi a Davida i tetai ke “ka tongi ana kia kite i te meitaki o Iehova!” *

Ka rauka ainei ia koe i te akamanako i tetai tupuanga i roto i toou oraanga tei akapapu mai i to Iehova aroa noou? Me koia, e tata i te reira ki raro. Manako tauturu: Kare e anoanoia kia tata i tetai tupuanga oraora e te maata. E akamanako ana i te au akameitakianga rikiriki o te oraanga, penei e mea māmā ua i te akangaropoina.

․․․․․

Penei kua apii toou nga metua i te Pipiria kia koe. Me koia, e akameitakianga tera. Noatu ra, ka anoanoia koe kia akatupu i toou uaorai pirianga oa ki te Atua. Me kare koe i rave ake i te reira, e taangaanga i te au manako i roto i teia pene kia tauturu ia koe. Ka akameitaki a Iehova i taau tautaanga. Karanga te Pipiria: “E pati, e e orongaia mai ta kotou; e kimi, e kitea ïa ia kotou.”​—Mataio 7:7.

[Tataanga Rikiriki i Raro]

IRAVA PUAPINGA

“Ko tei akarongo i te tuatua a te Atua e kua akono atura, ko ratou tei meitaki roa.”​—Luka 11:28.

TAUTURU

Me tatau koe e ā kapi o te Pipiria i te au rā, ka oti ia koe i te tatau i roto i te mataiti.

KUA KITE AINEI KOE . . . ?

I te mea e te tatau ra koe i teia puka e te akarongo ra ki te au akoanga Pipiria, te akaari maira teia e te manako maira a Iehova ia koe.​—Ioane 6:​44.

RAVE I TEIA!

Kia puapingaia taku apii Pipiria, ka ․․․․․

Kia pure putuputu au, ka ․․․․․

Teia taku ka inangaro i te ui atu ki toku nga metua no runga i teia tumu manako koia oki ․․․․․

EAA TOOU MANAKO?

● Akapeea koe me akareka i taau apii Pipiria?

● Eaa a Iehova ka inangaro ei i te akarongo ki te pure a te aronga apa ua?

● Akapeea koe me akameitaki atu i taau pure?

[Tataanga]

I toku tamarikianga, kua taokioki au i te tuatua me pure. I teia taime ka pure au no runga i te au tupuanga meitaki e te kino i te au rā. I te mea kare e aiteite ana tetai rā ki tetai, kare au e taokioki ua i taku tuatua.’’​—Eve

[Pia/Tutu]

 Akara Matatio i Taau Pipiria

1. Iki i tetai tua Pipiria taau ka inangaro i te tatau. Pure no te pakari kia mārama i te reira.

2. Tatau meitaki i te tua. Tatau marie. Ia koe e tatau ra, e akamanako. Akamanako ko koe tetai i roto i te tua: Akara eaa te tupu ra, akarongo ki te reo o te aronga i roto i te tua, ongi i te au aunga tukeke, tongi i te kai, e te vai atura. Tauta kia akamanako eaa tikai te tupu ra!

3. Akamanako i taau i tatau. E ui kia koe uaorai i teia au uianga:

● Eaa a Iehova i tuku ei i teia tua i roto i tana Tuatua?

● Koai taku aronga ka inangaro i te aru, e koai te au akaraanga akamatakiteanga?

● Eaa te au apiianga taku i mou mai mei teia tua?

● Eaa ta teia e apii maira iaku no runga ia Iehova e tana au aerenga?

4. Pure kia Iehova. E akakite kiaia i taau i mou mai mei te apii Pipiria e akapeea koe me taangaanga i te reira i roto i toou oraanga. E akameitaki ua rai ia Iehova no tana apinga aroa kia koe​—tana Tuatua te Pipiria Tapu!

[Tutu]

“E lamepa taau tuatua i toku nei vaevae, e turama no toku nei arataa.”​—Salamo 119:105.

[Pia/Tutu]

Mea Puapinga na Mua

Kare oou taime no te pure? Me kore no te apii Pipiria? Maataanga te taime, tei runga i taau ka iki ei mea puapinga kia koe.

Tamata i teia: E rave i tetai pakete e e akaki i te reira ki te au toka maata. E oti akaki i te pakete ki te one​—kia kī meitaki te pakete. Kua kī te pakete i te au toka e te one.

I teianei e riringi i te toka e te one ki vao. E oti e rave i teia: Akaki i te pakete ki te one e oti e tuku i te au toka ki roto. Kua ō ainei? Kare. No te mea kua akaki koe i te pakete ki te one na mua.

Te apiianga? Karanga te Pipiria: “Kia timata oki kotou i te au mea e maata ua atu te meitaki.” (Philipi 1:​10) Me tuku koe i te au mea rikiriki mei te tamataoraanga na mua, kare oou taime no te au mea maata i roto i te oraanga​—mei te angaanga pae vaerua. Inara me aru koe i ta te Pipiria e akakite ra, ka rava toou taime no te au angaanga Patireia e te tamataoraanga. Te mea puapinga, ko taau ka tuku ki roto i te pakete na mua!

[Tutu]

Mei te tiare rai te pirianga oa ki te Atua, ka anoanoia koe kia akono kia tupu ruperupe